| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
9. பட²மஅபுத்தகஸுத்தவண்ணனா
9. Paṭhamaaputtakasuttavaṇṇanā
130. தி³வ-ஸத்³தோ³ தி³வா-ஸத்³தோ³ விய தி³வஸபரியாயோ, தஸ்மா விஸேஸனபா⁴வேன வுச்சமானோ தி³வஸத்³தோ³ அத்த²விஸேஸங் தீ³பேதீதி ஆஹ ‘‘தி³வஸஸ்ஸ தி³வா’’திஆதி³. ஸங் வுச்சதி த⁴னங், தஸ்ஸ பதீதி ஸம்பதி, த⁴னஸாமிகோ, தஸ்ஸ ஹிதாவஹத்தா ஸாபதெய்யந்தி ஆஹ ‘‘ஸாபதெய்யந்தி த⁴ன’’ந்தி. தஸ்ஸ கே³ஹே கதாகதப⁴ண்ட³ஸ்ஸ அதிப³ஹுபா⁴வதோ விம்ஹயப்பத்தோ ராஜா ‘‘கோ பன வாதோ³’’தி ஆஹ. காளலோஹங் நாம அயோப²லங். கச்ச²பாதி³ரூபேஹிபி ஸோவண்ணாதீ³னி ட²பெந்தி. ஸகுண்ட³கப⁴த்தந்தி ஸகுண்டே³ஹி வா ஸது²ஸேஹி வா பக்கப⁴த்தங். பி³லங்க³ங் வுச்சதி த⁴ஞ்ஞபி³லங்க³ங், ஆரனாலந்திபி வுச்சதி, தங் து³தியங் அஸ்ஸாதி பி³லங்க³து³தியங். தஞ்ஹி கஞ்ஜிதோ நிப்³ப³த்தத்தா கஞ்ஜிகங் நாம. தீஹி பக்கே²ஹி வத்த²க²ண்டே³ஹி கதனிவாஸனங் திபக்க²வஸனங். தேனாஹ ‘‘தீணி…பே॰… நிவாஸன’’ந்தி.
130. Diva-saddo divā-saddo viya divasapariyāyo, tasmā visesanabhāvena vuccamāno divasaddo atthavisesaṃ dīpetīti āha ‘‘divasassa divā’’tiādi. Saṃ vuccati dhanaṃ, tassa patīti sampati, dhanasāmiko, tassa hitāvahattā sāpateyyanti āha ‘‘sāpateyyanti dhana’’nti. Tassa gehe katākatabhaṇḍassa atibahubhāvato vimhayappatto rājā ‘‘ko pana vādo’’ti āha. Kāḷalohaṃ nāma ayophalaṃ. Kacchapādirūpehipi sovaṇṇādīni ṭhapenti. Sakuṇḍakabhattanti sakuṇḍehi vā sathusehi vā pakkabhattaṃ. Bilaṅgaṃ vuccati dhaññabilaṅgaṃ, āranālantipi vuccati, taṃ dutiyaṃ assāti bilaṅgadutiyaṃ. Tañhi kañjito nibbattattā kañjikaṃ nāma. Tīhi pakkhehi vatthakhaṇḍehi katanivāsanaṃ tipakkhavasanaṃ. Tenāha ‘‘tīṇi…pe… nivāsana’’nti.
அஸந்தோ நீசோ புரிஸோதி அஸப்புரிஸோதி ஆஹ ‘‘லாமகபுரிஸோ’’தி. கம்மஸ்ஸ நிப்³ப³த்தபா⁴வேன ஓதரணதாய ப²லங் அக்³க³ங் நாம, உபரிபூ⁴மிக³தத்தா உத்³த⁴ங் அக்³க³ங் அஸ்ஸாதி உத்³த⁴க்³கி³கங். த³க்கி²ணந்தி தா³னமாஹ. ஸக்³கோ³ நாம காமப⁴வூபபத்திப⁴வோ, தஸ்ஸ நிப்³ப³த்தனதோ ‘‘ஸக்³க³ஸ்ஸ ஹிதா’’தி வுத்தங். தத்ருபபத்திஜனநதோதி தத்ர உபபத்தியா ஜனநதோ, உப்பாத³னதோதி அத்தோ².
Asanto nīco purisoti asappurisoti āha ‘‘lāmakapuriso’’ti. Kammassa nibbattabhāvena otaraṇatāya phalaṃ aggaṃ nāma, uparibhūmigatattā uddhaṃ aggaṃ assāti uddhaggikaṃ. Dakkhiṇanti dānamāha. Saggo nāma kāmabhavūpapattibhavo, tassa nibbattanato ‘‘saggassa hitā’’ti vuttaṃ. Tatrupapattijananatoti tatra upapattiyā jananato, uppādanatoti attho.
ஸேதங் உத³கங் ஏதிஸ்ஸாதி ஸேதோத³கா. ஸோ யேன பா⁴வேன யத்த² பாகடதரோ ஹுத்வா தி³ஸ்ஸதி, தங் த³ஸ்ஸேதுங் ‘‘வீசீனங் பி⁴ன்னட்டா²னே’’தி ஆஹ. ஸுகோ²தரணட்டா²னதாய கத்³த³மாதி³தோ³ஸவிரஹதோ ச ஸுந்த³ரதித்தா². தங் அபெய்யமானந்தி தங் உத³கங் கேனசி அபரிபு⁴ஞ்ஜியமானங். அத்தனா கத்தப்³ப³கிச்சகரோதி அத்தனா காதப்³ப³கம்மஸங்கா²தகிச்சகரோ, பரிபோ⁴க³வஸேன சேவ ஸங்க³ஹேதப்³ப³ஸங்க³ண்ஹனவஸேன ச நியோஜகோதி அத்தோ². குஸலகிச்சகரோதி அத்தனா காதப்³ப³புஞ்ஞகரோ.
Setaṃ udakaṃ etissāti setodakā. So yena bhāvena yattha pākaṭataro hutvā dissati, taṃ dassetuṃ ‘‘vīcīnaṃ bhinnaṭṭhāne’’ti āha. Sukhotaraṇaṭṭhānatāya kaddamādidosavirahato ca sundaratitthā. Taṃ apeyyamānanti taṃ udakaṃ kenaci aparibhuñjiyamānaṃ. Attanā kattabbakiccakaroti attanā kātabbakammasaṅkhātakiccakaro, paribhogavasena ceva saṅgahetabbasaṅgaṇhanavasena ca niyojakoti attho. Kusalakiccakaroti attanā kātabbapuññakaro.
பட²மஅபுத்தகஸுத்தவண்ணனா நிட்டி²தா.
Paṭhamaaputtakasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 9. பட²மஅபுத்தகஸுத்தங் • 9. Paṭhamaaputtakasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 9. பட²மஅபுத்தகஸுத்தவண்ணனா • 9. Paṭhamaaputtakasuttavaṇṇanā
