| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
(8) 3. யோதா⁴ஜீவவக்³கோ³
(8) 3. Yodhājīvavaggo
1. பட²மசேதோவிமுத்திப²லஸுத்தங்
1. Paṭhamacetovimuttiphalasuttaṃ
71. ‘‘பஞ்சிமே , பி⁴க்க²வே, த⁴ம்மா பா⁴விதா ப³ஹுலீகதா சேதோவிமுத்திப²லா ச ஹொந்தி சேதோவிமுத்திப²லானிஸங்ஸா ச, பஞ்ஞாவிமுத்திப²லா ச ஹொந்தி பஞ்ஞாவிமுத்திப²லானிஸங்ஸா ச.
71. ‘‘Pañcime , bhikkhave, dhammā bhāvitā bahulīkatā cetovimuttiphalā ca honti cetovimuttiphalānisaṃsā ca, paññāvimuttiphalā ca honti paññāvimuttiphalānisaṃsā ca.
‘‘கதமே பஞ்ச? இத⁴, பி⁴க்க²வே, பி⁴க்கு² அஸுபா⁴னுபஸ்ஸீ காயே விஹரதி, ஆஹாரே படிகூலஸஞ்ஞீ 1, ஸப்³ப³லோகே அனபி⁴ரதஸஞ்ஞீ, ஸப்³ப³ஸங்கா²ரேஸு அனிச்சானுபஸ்ஸீ, மரணஸஞ்ஞா கோ² பனஸ்ஸ அஜ்ஜ²த்தங் ஸூபட்டி²தா ஹோதி. இமே கோ², பி⁴க்க²வே, பஞ்ச த⁴ம்மா பா⁴விதா ப³ஹுலீகதா சேதோவிமுத்திப²லா ச ஹொந்தி சேதோவிமுத்திப²லானிஸங்ஸா ச, பஞ்ஞாவிமுத்திப²லா ச ஹொந்தி பஞ்ஞாவிமுத்திப²லானிஸங்ஸா ச. யதோ கோ², பி⁴க்க²வே, பி⁴க்கு² சேதோவிமுத்தோ ச ஹோதி பஞ்ஞாவிமுத்தோ ச ஹோதி – அயங் வுச்சதி, பி⁴க்க²வே, ‘பி⁴க்கு² உக்கி²த்தபலிகோ⁴ இதிபி, ஸங்கிண்ணபரிகோ² 2 இதிபி, அப்³பூ³ள்ஹேஸிகோ இதிபி, நிரக்³க³ளோ இதிபி, அரியோ பன்னத்³த⁴ஜோ பன்னபா⁴ரோ விஸங்யுத்தோ இதிபி’’’.
‘‘Katame pañca? Idha, bhikkhave, bhikkhu asubhānupassī kāye viharati, āhāre paṭikūlasaññī 3, sabbaloke anabhiratasaññī, sabbasaṅkhāresu aniccānupassī, maraṇasaññā kho panassa ajjhattaṃ sūpaṭṭhitā hoti. Ime kho, bhikkhave, pañca dhammā bhāvitā bahulīkatā cetovimuttiphalā ca honti cetovimuttiphalānisaṃsā ca, paññāvimuttiphalā ca honti paññāvimuttiphalānisaṃsā ca. Yato kho, bhikkhave, bhikkhu cetovimutto ca hoti paññāvimutto ca hoti – ayaṃ vuccati, bhikkhave, ‘bhikkhu ukkhittapaligho itipi, saṃkiṇṇaparikho 4 itipi, abbūḷhesiko itipi, niraggaḷo itipi, ariyo pannaddhajo pannabhāro visaṃyutto itipi’’’.
‘‘கத²ஞ்ச, பி⁴க்க²வே, பி⁴க்கு² உக்கி²த்தபலிகோ⁴ ஹோதி? இத⁴, பி⁴க்க²வே, பி⁴க்கு²னோ அவிஜ்ஜா பஹீனா ஹோதி உச்சி²ன்னமூலா தாலாவத்து²கதா அனபா⁴வங்கதா ஆயதிங் அனுப்பாத³த⁴ம்மா. ஏவங் கோ², பி⁴க்க²வே, பி⁴க்கு² உக்கி²த்தபலிகோ⁴ ஹோதி.
‘‘Kathañca, bhikkhave, bhikkhu ukkhittapaligho hoti? Idha, bhikkhave, bhikkhuno avijjā pahīnā hoti ucchinnamūlā tālāvatthukatā anabhāvaṃkatā āyatiṃ anuppādadhammā. Evaṃ kho, bhikkhave, bhikkhu ukkhittapaligho hoti.
‘‘கத²ஞ்ச, பி⁴க்க²வே, பி⁴க்கு² ஸங்கிண்ணபரிகோ² ஹோதி? இத⁴, பி⁴க்க²வே, பி⁴க்கு²னோ போனோப⁴விகோ 5 ஜாதிஸங்ஸாரோ பஹீனோ ஹோதி உச்சி²ன்னமூலோ தாலாவத்து²கதோ அனபா⁴வங்கதோ ஆயதிங் அனுப்பாத³த⁴ம்மோ. ஏவங் கோ², பி⁴க்க²வே, பி⁴க்கு² ஸங்கிண்ணபரிகோ² ஹோதி.
‘‘Kathañca, bhikkhave, bhikkhu saṃkiṇṇaparikho hoti? Idha, bhikkhave, bhikkhuno ponobhaviko 6 jātisaṃsāro pahīno hoti ucchinnamūlo tālāvatthukato anabhāvaṃkato āyatiṃ anuppādadhammo. Evaṃ kho, bhikkhave, bhikkhu saṃkiṇṇaparikho hoti.
‘‘கத²ஞ்ச, பி⁴க்க²வே, பி⁴க்கு² அப்³பூ³ள்ஹேஸிகோ ஹோதி? இத⁴ , பி⁴க்க²வே, பி⁴க்கு²னோ தண்ஹா பஹீனா ஹோதி உச்சி²ன்னமூலா தாலாவத்து²கதா அனபா⁴வங்கதா ஆயதிங் அனுப்பாத³த⁴ம்மா. ஏவங் கோ², பி⁴க்க²வே, பி⁴க்கு² அப்³பூ³ள்ஹேஸிகோ ஹோதி.
‘‘Kathañca, bhikkhave, bhikkhu abbūḷhesiko hoti? Idha , bhikkhave, bhikkhuno taṇhā pahīnā hoti ucchinnamūlā tālāvatthukatā anabhāvaṃkatā āyatiṃ anuppādadhammā. Evaṃ kho, bhikkhave, bhikkhu abbūḷhesiko hoti.
‘‘கத²ஞ்ச , பி⁴க்க²வே, பி⁴க்கு² நிரக்³க³ளோ ஹோதி? இத⁴, பி⁴க்க²வே, பி⁴க்கு²னோ பஞ்சோரம்பா⁴கி³யானி ஸங்யோஜனானி பஹீனானி ஹொந்தி உச்சி²ன்னமூலானி தாலாவத்து²கதானி அனபா⁴வங்கதானி ஆயதிங் அனுப்பாத³த⁴ம்மானி. ஏவங் கோ², பி⁴க்க²வே, பி⁴க்கு² நிரக்³க³ளோ ஹோதி.
‘‘Kathañca , bhikkhave, bhikkhu niraggaḷo hoti? Idha, bhikkhave, bhikkhuno pañcorambhāgiyāni saṃyojanāni pahīnāni honti ucchinnamūlāni tālāvatthukatāni anabhāvaṃkatāni āyatiṃ anuppādadhammāni. Evaṃ kho, bhikkhave, bhikkhu niraggaḷo hoti.
‘‘கத²ஞ்ச, பி⁴க்க²வே, பி⁴க்கு² அரியோ பன்னத்³த⁴ஜோ பன்னபா⁴ரோ விஸங்யுத்தோ ஹோதி? இத⁴, பி⁴க்க²வே, பி⁴க்கு²னோ அஸ்மிமானோ பஹீனோ ஹோதி உச்சி²ன்னமூலோ தாலாவத்து²கதோ அனபா⁴வங்கதோ ஆயதிங் அனுப்பாத³த⁴ம்மோ. ஏவங் கோ², பி⁴க்க²வே, பி⁴க்கு² அரியோ பன்னத்³த⁴ஜோ பன்னபா⁴ரோ விஸங்யுத்தோ ஹோதீ’’தி. பட²மங்.
‘‘Kathañca, bhikkhave, bhikkhu ariyo pannaddhajo pannabhāro visaṃyutto hoti? Idha, bhikkhave, bhikkhuno asmimāno pahīno hoti ucchinnamūlo tālāvatthukato anabhāvaṃkato āyatiṃ anuppādadhammo. Evaṃ kho, bhikkhave, bhikkhu ariyo pannaddhajo pannabhāro visaṃyutto hotī’’ti. Paṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 1. பட²மசேதோவிமுத்திப²லஸுத்தவண்ணனா • 1. Paṭhamacetovimuttiphalasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-2. பட²மசேதோவிமுத்திப²லஸுத்தாதி³வண்ணனா • 1-2. Paṭhamacetovimuttiphalasuttādivaṇṇanā
