| Library / Tipiṭaka / તિપિટક • Tipiṭaka / સંયુત્તનિકાય • Saṃyuttanikāya |
૭. પઠમછિગ્ગળયુગસુત્તં
7. Paṭhamachiggaḷayugasuttaṃ
૧૧૧૭. ‘‘સેય્યથાપિ, ભિક્ખવે, પુરિસો મહાસમુદ્દે એકચ્છિગ્ગળં યુગં પક્ખિપેય્ય. તત્રાપિસ્સ કાણો કચ્છપો. સો વસ્સસતસ્સ વસ્સસતસ્સ અચ્ચયેન સકિં સકિં ઉમ્મુજ્જેય્ય. તં કિં મઞ્ઞથ, ભિક્ખવે, અપિ નુ ખો કાણો કચ્છપો વસ્સસતસ્સ વસ્સસતસ્સ અચ્ચયેન સકિં સકિં ઉમ્મુજ્જન્તો અમુસ્મિં એકચ્છિગ્ગળે યુગે ગીવં પવેસેય્યા’’તિ? ‘‘યદિ નૂન, ભન્તે, કદાચિ કરહચિ દીઘસ્સ અદ્ધુનો અચ્ચયેના’’તિ.
1117. ‘‘Seyyathāpi, bhikkhave, puriso mahāsamudde ekacchiggaḷaṃ yugaṃ pakkhipeyya. Tatrāpissa kāṇo kacchapo. So vassasatassa vassasatassa accayena sakiṃ sakiṃ ummujjeyya. Taṃ kiṃ maññatha, bhikkhave, api nu kho kāṇo kacchapo vassasatassa vassasatassa accayena sakiṃ sakiṃ ummujjanto amusmiṃ ekacchiggaḷe yuge gīvaṃ paveseyyā’’ti? ‘‘Yadi nūna, bhante, kadāci karahaci dīghassa addhuno accayenā’’ti.
‘‘ખિપ્પતરં ખો સો, ભિક્ખવે, કાણો કચ્છપો વસ્સસતસ્સ વસ્સસતસ્સ અચ્ચયેન સકિં સકિં ઉમ્મુજ્જન્તો અમુસ્મિં એકચ્છિગ્ગળે યુગે ગીવં પવેસેય્ય, ન ત્વેવાહં, ભિક્ખવે, સકિં વિનિપાતગતેન બાલેન 1 મનુસ્સત્તં વદામિ’’.
‘‘Khippataraṃ kho so, bhikkhave, kāṇo kacchapo vassasatassa vassasatassa accayena sakiṃ sakiṃ ummujjanto amusmiṃ ekacchiggaḷe yuge gīvaṃ paveseyya, na tvevāhaṃ, bhikkhave, sakiṃ vinipātagatena bālena 2 manussattaṃ vadāmi’’.
તં કિસ્સ હેતુ? ન હેત્થ, ભિક્ખવે, અત્થિ ધમ્મચરિયા, સમચરિયા, કુસલકિરિયા, પુઞ્ઞકિરિયા. અઞ્ઞમઞ્ઞખાદિકા એત્થ, ભિક્ખવે, વત્તતિ દુબ્બલખાદિકા. તં કિસ્સ હેતુ? અદિટ્ઠત્તા, ભિક્ખવે, ચતુન્નં અરિયસચ્ચાનં. કતમેસં ચતુન્નં? દુક્ખસ્સ અરિયસચ્ચસ્સ…પે॰… દુક્ખનિરોધગામિનિયા પટિપદાય અરિયસચ્ચસ્સ.
Taṃ kissa hetu? Na hettha, bhikkhave, atthi dhammacariyā, samacariyā, kusalakiriyā, puññakiriyā. Aññamaññakhādikā ettha, bhikkhave, vattati dubbalakhādikā. Taṃ kissa hetu? Adiṭṭhattā, bhikkhave, catunnaṃ ariyasaccānaṃ. Katamesaṃ catunnaṃ? Dukkhassa ariyasaccassa…pe… dukkhanirodhagāminiyā paṭipadāya ariyasaccassa.
‘‘તસ્માતિહ, ભિક્ખવે, ‘ઇદં દુક્ખ’ન્તિ યોગો કરણીયો…પે॰… ‘અયં દુક્ખનિરોધગામિની પટિપદા’તિ યોગો કરણીયો’’તિ. સત્તમં.
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Sattamaṃ.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૭. પઠમછિગ્ગળયુગસુત્તવણ્ણના • 7. Paṭhamachiggaḷayugasuttavaṇṇanā
