| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
3. பட²மத⁴ம்மவிஹாரீஸுத்தங்
3. Paṭhamadhammavihārīsuttaṃ
73. அத² கோ² அஞ்ஞதரோ பி⁴க்கு² யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஸோ பி⁴க்கு² ப⁴க³வந்தங் ஏதத³வோச – ‘‘‘த⁴ம்மவிஹாரீ, த⁴ம்மவிஹாரீ’தி, ப⁴ந்தே, வுச்சதி. கித்தாவதா நு கோ², ப⁴ந்தே, பி⁴க்கு² த⁴ம்மவிஹாரீ ஹோதீ’’தி?
73. Atha kho aññataro bhikkhu yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho so bhikkhu bhagavantaṃ etadavoca – ‘‘‘dhammavihārī, dhammavihārī’ti, bhante, vuccati. Kittāvatā nu kho, bhante, bhikkhu dhammavihārī hotī’’ti?
‘‘இத⁴, பி⁴க்கு², பி⁴க்கு² த⁴ம்மங் பரியாபுணாதி – ஸுத்தங், கெ³ய்யங், வெய்யாகரணங், கா³த²ங், உதா³னங், இதிவுத்தகங், ஜாதகங், அப்³பு⁴தத⁴ம்மங், வேத³ல்லங். ஸோ தாய த⁴ம்மபரியத்தியா தி³வஸங் அதினாமேதி, ரிஞ்சதி படிஸல்லானங், நானுயுஞ்ஜதி அஜ்ஜ²த்தங் சேதோஸமத²ங். அயங் வுச்சதி, பி⁴க்கு² – ‘பி⁴க்கு² பரியத்திப³ஹுலோ, நோ த⁴ம்மவிஹாரீ’’’.
‘‘Idha, bhikkhu, bhikkhu dhammaṃ pariyāpuṇāti – suttaṃ, geyyaṃ, veyyākaraṇaṃ, gāthaṃ, udānaṃ, itivuttakaṃ, jātakaṃ, abbhutadhammaṃ, vedallaṃ. So tāya dhammapariyattiyā divasaṃ atināmeti, riñcati paṭisallānaṃ, nānuyuñjati ajjhattaṃ cetosamathaṃ. Ayaṃ vuccati, bhikkhu – ‘bhikkhu pariyattibahulo, no dhammavihārī’’’.
‘‘புன சபரங், பி⁴க்கு², பி⁴க்கு² யதா²ஸுதங் யதா²பரியத்தங் த⁴ம்மங் வித்தா²ரேன பரேஸங் தே³ஸேதி. ஸோ தாய த⁴ம்மபஞ்ஞத்தியா தி³வஸங் அதினாமேதி, ரிஞ்சதி படிஸல்லானங், நானுயுஞ்ஜதி அஜ்ஜ²த்தங் சேதோஸமத²ங். அயங் வுச்சதி, பி⁴க்கு² – ‘பி⁴க்கு² பஞ்ஞத்திப³ஹுலோ, நோ த⁴ம்மவிஹாரீ’’’.
‘‘Puna caparaṃ, bhikkhu, bhikkhu yathāsutaṃ yathāpariyattaṃ dhammaṃ vitthārena paresaṃ deseti. So tāya dhammapaññattiyā divasaṃ atināmeti, riñcati paṭisallānaṃ, nānuyuñjati ajjhattaṃ cetosamathaṃ. Ayaṃ vuccati, bhikkhu – ‘bhikkhu paññattibahulo, no dhammavihārī’’’.
‘‘புன சபரங், பி⁴க்கு², பி⁴க்கு² யதா²ஸுதங் யதா²பரியத்தங் த⁴ம்மங் வித்தா²ரேன ஸஜ்ஜா²யங் கரோதி. ஸோ தேன ஸஜ்ஜா²யேன தி³வஸங் அதினாமேதி, ரிஞ்சதி படிஸல்லானங், நானுயுஞ்ஜதி அஜ்ஜ²த்தங் சேதோஸமத²ங். அயங் வுச்சதி, பி⁴க்கு² – ‘பி⁴க்கு² ஸஜ்ஜா²யப³ஹுலோ, நோ த⁴ம்மவிஹாரீ’’’.
‘‘Puna caparaṃ, bhikkhu, bhikkhu yathāsutaṃ yathāpariyattaṃ dhammaṃ vitthārena sajjhāyaṃ karoti. So tena sajjhāyena divasaṃ atināmeti, riñcati paṭisallānaṃ, nānuyuñjati ajjhattaṃ cetosamathaṃ. Ayaṃ vuccati, bhikkhu – ‘bhikkhu sajjhāyabahulo, no dhammavihārī’’’.
‘‘புன சபரங், பி⁴க்கு², பி⁴க்கு² யதா²ஸுதங் யதா²பரியத்தங் த⁴ம்மங் சேதஸா அனுவிதக்கேதி அனுவிசாரேதி மனஸானுபெக்க²தி. ஸோ தேஹி த⁴ம்மவிதக்கேஹி தி³வஸங் அதினாமேதி, ரிஞ்சதி படிஸல்லானங், நானுயுஞ்ஜதி அஜ்ஜ²த்தங் சேதோஸமத²ங். அயங் வுச்சதி, பி⁴க்கு² – ‘பி⁴க்கு² விதக்கப³ஹுலோ, நோ த⁴ம்மவிஹாரீ’’’.
‘‘Puna caparaṃ, bhikkhu, bhikkhu yathāsutaṃ yathāpariyattaṃ dhammaṃ cetasā anuvitakketi anuvicāreti manasānupekkhati. So tehi dhammavitakkehi divasaṃ atināmeti, riñcati paṭisallānaṃ, nānuyuñjati ajjhattaṃ cetosamathaṃ. Ayaṃ vuccati, bhikkhu – ‘bhikkhu vitakkabahulo, no dhammavihārī’’’.
‘‘இத⁴, பி⁴க்கு², பி⁴க்கு² த⁴ம்மங் பரியாபுணாதி – ஸுத்தங், கெ³ய்யங், வெய்யாகரணங், கா³த²ங், உதா³னங், இதிவுத்தகங், ஜாதகங், அப்³பு⁴தத⁴ம்மங், வேத³ல்லங். ஸோ தாய த⁴ம்மபரியத்தியா ந தி³வஸங் அதினாமேதி, நாபி ரிஞ்சதி படிஸல்லானங், அனுயுஞ்ஜதி அஜ்ஜ²த்தங் சேதோஸமத²ங். ஏவங் கோ², பி⁴க்கு², பி⁴க்கு² த⁴ம்மவிஹாரீ ஹோதி.
‘‘Idha, bhikkhu, bhikkhu dhammaṃ pariyāpuṇāti – suttaṃ, geyyaṃ, veyyākaraṇaṃ, gāthaṃ, udānaṃ, itivuttakaṃ, jātakaṃ, abbhutadhammaṃ, vedallaṃ. So tāya dhammapariyattiyā na divasaṃ atināmeti, nāpi riñcati paṭisallānaṃ, anuyuñjati ajjhattaṃ cetosamathaṃ. Evaṃ kho, bhikkhu, bhikkhu dhammavihārī hoti.
‘‘இதி கோ², பி⁴க்கு², தே³ஸிதோ மயா பரியத்திப³ஹுலோ, தே³ஸிதோ பஞ்ஞத்திப³ஹுலோ, தே³ஸிதோ ஸஜ்ஜா²யப³ஹுலோ, தே³ஸிதோ விதக்கப³ஹுலோ, தே³ஸிதோ த⁴ம்மவிஹாரீ. யங் கோ², பி⁴க்கு² 1, ஸத்தா²ரா கரணீயங் ஸாவகானங் ஹிதேஸினா அனுகம்பகேன அனுகம்பங் உபாதா³ய, கதங் வோ தங் மயா. ஏதானி, பி⁴க்கு², ருக்க²மூலானி, ஏதானி ஸுஞ்ஞாகா³ரானி. ஜா²யத², பி⁴க்கு², மா பமாத³த்த² , மா பச்சா² விப்படிஸாரினோ அஹுவத்த². அயங் வோ அம்ஹாகங் அனுஸாஸனீ’’தி. ததியங்.
‘‘Iti kho, bhikkhu, desito mayā pariyattibahulo, desito paññattibahulo, desito sajjhāyabahulo, desito vitakkabahulo, desito dhammavihārī. Yaṃ kho, bhikkhu 2, satthārā karaṇīyaṃ sāvakānaṃ hitesinā anukampakena anukampaṃ upādāya, kataṃ vo taṃ mayā. Etāni, bhikkhu, rukkhamūlāni, etāni suññāgārāni. Jhāyatha, bhikkhu, mā pamādattha , mā pacchā vippaṭisārino ahuvattha. Ayaṃ vo amhākaṃ anusāsanī’’ti. Tatiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 3. பட²மத⁴ம்மவிஹாரீஸுத்தவண்ணனா • 3. Paṭhamadhammavihārīsuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 3-4. பட²மத⁴ம்மவிஹாரீஸுத்தாதி³வண்ணனா • 3-4. Paṭhamadhammavihārīsuttādivaṇṇanā
