| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
9-10. பட²மத்³வயஸுத்தாதி³வண்ணனா
9-10. Paṭhamadvayasuttādivaṇṇanā
92-93. த்³வயந்தி து³கங். பாளியங் ஆமேடி³தலோபேன நித்³தே³ஸோதி ஆஹ ‘‘த்³வே த்³வே கொட்டா²ஸே’’தி. ஏவமேதந்தி ஏவங் அனிச்சாதி³பா⁴வேன ஏதங் சக்கு²ரூபஞ்சாதி த்³வயங். சலதீதி அனவட்டா²னேன பசலதி. ப்³யத²தீதி ஜராய மரணேன ச பவேத⁴தி. ஹேது சேவ உப்பத்தினிமித்தத்தா. ஸஹக³தீதி ஸஹப்பவத்தி, தாய க³ஹேதப்³ப³த்தா ‘‘ஸங்க³தீ’’தி ப²ஸ்ஸோ வுத்தோ. ஏஸ நயோ ஸேஸபத³த்³வயேபி. யஸ்மா ச ஸங்க³ச்ச²மானத⁴ம்மவிமுத்தா ஸங்க³தி நாம நத்தி², ததா² ஸன்னிபாதஸமவாயா, தேஸங் வஸேன நிப்³ப³த்தோ ப²ஸ்ஸோ ததா² வுச்சதீதி. தேனாஹ ‘‘இமினா’’திஆதி³.
92-93.Dvayanti dukaṃ. Pāḷiyaṃ āmeḍitalopena niddesoti āha ‘‘dve dve koṭṭhāse’’ti. Evametanti evaṃ aniccādibhāvena etaṃ cakkhurūpañcāti dvayaṃ. Calatīti anavaṭṭhānena pacalati. Byathatīti jarāya maraṇena ca pavedhati. Hetu ceva uppattinimittattā. Sahagatīti sahappavatti, tāya gahetabbattā ‘‘saṅgatī’’ti phasso vutto. Esa nayo sesapadadvayepi. Yasmā ca saṃgacchamānadhammavimuttā saṅgati nāma natthi, tathā sannipātasamavāyā, tesaṃ vasena nibbatto phasso tathā vuccatīti. Tenāha ‘‘iminā’’tiādi.
வத்தூ²தி சக்கு² நிஸ்ஸயபச்சயாதி³பா⁴வேன. ஆரம்மணந்தி ரூபங் ஆரம்மணபச்சயாதி³பா⁴வேன. ஸஹஜாதா தயோ க²ந்தா⁴ வேத³னாத³யோ, தே ஸஹஜாதாதி³பச்சயபா⁴வேன. அயங் ஹேதூதி அயங் திவிதோ⁴ ஹேதூ. ப²ஸ்ஸேனாதிஆதீ³ஸு அயங் ஸங்கே²பத்தோ² – யஸ்மா ரூபாரம்மணே ப²ஸ்ஸே அத்தனோ பு²ஸனகிச்சங் கரொந்தே ஏவங் வேத³னா அனுப⁴வனகிச்சங், ஸஞ்ஞா ஸஞ்ஜானநகிச்சங் கரோதி, தஸ்மா ‘‘ப²ஸ்ஸேன பு²ட்ட²மேவா’’திஆதி³வுத்தமேவ அத்த²ங் இதா³னி புக்³க³லாதி⁴ட்டா²னேன த³ஸ்ஸேதுங் ‘‘பு²ட்டோ²’’திஆதி³ வுத்தங். பஞ்சேவ க²ந்தா⁴ ப⁴க³வதா ஸமதிங்ஸாய ஆகாரேஹி வுத்தா. கஸ்மாதி ஆஹ ‘‘கத²’’ந்திஆதி³. ருக்க²ஸாகா²ஸு ருக்க²வோஹாரோ விய ஏகேகத⁴ம்மேபி க²ந்த⁴வோஹாரோ ஹோதியேவ. தேனாஹ ப⁴க³வா – ‘‘விஞ்ஞாணங் விஞ்ஞாணக்க²ந்தோ⁴’’தி (யம॰ க²ந்த⁴யமக 2).
Vatthūti cakkhu nissayapaccayādibhāvena. Ārammaṇanti rūpaṃ ārammaṇapaccayādibhāvena. Sahajātā tayo khandhā vedanādayo, te sahajātādipaccayabhāvena. Ayaṃ hetūti ayaṃ tividho hetū. Phassenātiādīsu ayaṃ saṅkhepattho – yasmā rūpārammaṇe phasse attano phusanakiccaṃ karonte evaṃ vedanā anubhavanakiccaṃ, saññā sañjānanakiccaṃ karoti, tasmā ‘‘phassena phuṭṭhamevā’’tiādivuttameva atthaṃ idāni puggalādhiṭṭhānena dassetuṃ ‘‘phuṭṭho’’tiādi vuttaṃ. Pañceva khandhā bhagavatā samatiṃsāya ākārehi vuttā. Kasmāti āha ‘‘katha’’ntiādi. Rukkhasākhāsu rukkhavohāro viya ekekadhammepi khandhavohāro hotiyeva. Tenāha bhagavā – ‘‘viññāṇaṃ viññāṇakkhandho’’ti (yama. khandhayamaka 2).
பட²மத்³வயஸுத்தாதி³வண்ணனா நிட்டி²தா.
Paṭhamadvayasuttādivaṇṇanā niṭṭhitā.
ச²ன்னவக்³க³வண்ணனா நிட்டி²தா.
Channavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya
9. பட²மத்³வயஸுத்தங் • 9. Paṭhamadvayasuttaṃ
10. து³தியத்³வயஸுத்தங் • 10. Dutiyadvayasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 9-10. பட²மத்³வயஸுத்தாதி³வண்ணனா • 9-10. Paṭhamadvayasuttādivaṇṇanā
