| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
5. பட²மஏஸனாஸுத்தவண்ணனா
5. Paṭhamaesanāsuttavaṇṇanā
54. பஞ்சமே ஏஸனாதி க³வேஸனா பரியேஸனா மக்³க³னா. தா விபா⁴க³தோ த³ஸ்ஸேதுங் ‘‘காமேஸனா’’திஆதி³ வுத்தங். தத்த² காமேஸனாதி காமானங் ஏஸனா, காமஸங்கா²தா வா ஏஸனா காமேஸனா. வுத்தஞ்ஹேதங் –
54. Pañcame esanāti gavesanā pariyesanā magganā. Tā vibhāgato dassetuṃ ‘‘kāmesanā’’tiādi vuttaṃ. Tattha kāmesanāti kāmānaṃ esanā, kāmasaṅkhātā vā esanā kāmesanā. Vuttañhetaṃ –
‘‘தத்த² கதமா காமேஸனா? யோ காமேஸு காமச்ச²ந்தோ³, காமராகோ³, காமனந்தீ³, காமஸ்னேஹோ , காமபிபாஸா, காமமுச்சா², காமஜ்ஜோ²ஸானங், அயங் வுச்சதி காமேஸனா’’தி (விப⁴॰ 919).
‘‘Tattha katamā kāmesanā? Yo kāmesu kāmacchando, kāmarāgo, kāmanandī, kāmasneho , kāmapipāsā, kāmamucchā, kāmajjhosānaṃ, ayaṃ vuccati kāmesanā’’ti (vibha. 919).
தஸ்மா காமராகோ³ காமேஸனாதி வேதி³தப்³போ³. ப⁴வேஸனாயபி ஏஸேவ நயோ. வுத்தம்பி சேதங் –
Tasmā kāmarāgo kāmesanāti veditabbo. Bhavesanāyapi eseva nayo. Vuttampi cetaṃ –
‘‘தத்த² கதமா ப⁴வேஸனா? யோ ப⁴வேஸு ப⁴வச்ச²ந்தோ³…பே॰… ப⁴வஜ்ஜோ²ஸானங், அயங் வுச்சதி ப⁴வேஸனா’’தி (விப⁴॰ 919).
‘‘Tattha katamā bhavesanā? Yo bhavesu bhavacchando…pe… bhavajjhosānaṃ, ayaṃ vuccati bhavesanā’’ti (vibha. 919).
தஸ்மா ப⁴வேஸனராகோ³ ரூபாரூபப⁴வபத்த²னா ப⁴வேஸனாதி வேதி³தப்³பா³. ப்³ரஹ்மசரியஸ்ஸ ஏஸனா ப்³ரஹ்மசரியேஸனா. யதா²ஹ –
Tasmā bhavesanarāgo rūpārūpabhavapatthanā bhavesanāti veditabbā. Brahmacariyassa esanā brahmacariyesanā. Yathāha –
‘‘தத்த² கதமா ப்³ரஹ்மசரியேஸனா? ஸஸ்ஸதோ லோகோதி வா, அஸஸ்ஸதோ லோகோதி வா, அந்தவா லோகோதி வா, அனந்தவா லோகோதி வா, தங் ஜீவங் தங் ஸரீரந்தி வா, அஞ்ஞங் ஜீவங் அஞ்ஞங் ஸரீரந்தி வா, ஹோதி ததா²க³தோ பரங் மரணாதி வா, ந ஹோதி ததா²க³தோ பரங் மரணாதி வா, ஹோதி ச ந ச ஹோதி ததா²க³தோ பரங் மரணாதி வா, நேவ ஹோதி ந ந ஹோதி ததா²க³தோ பரங் மரணாதி வா, யா ஏவரூபா தி³ட்டி² தி³ட்டி²க³தங் தி³ட்டி²க³ஹனங் தி³ட்டி²கந்தாரோ தி³ட்டி²விஸூகாயிகங் தி³ட்டி²விப்ப²ந்தி³தங் தி³ட்டி²ஸஞ்ஞோஜனங் கா³ஹோ பதிட்டா²ஹோ அபி⁴னிவேஸோ பராமாஸோ கும்மக்³கோ³ மிச்சா²பதோ² மிச்ச²த்தங் தித்தா²யதனங் விபரியேஸக்³கா³ஹோ, அயங் வுச்சதி ப்³ரஹ்மசரியேஸனா’’தி (விப⁴॰ 919).
‘‘Tattha katamā brahmacariyesanā? Sassato lokoti vā, asassato lokoti vā, antavā lokoti vā, anantavā lokoti vā, taṃ jīvaṃ taṃ sarīranti vā, aññaṃ jīvaṃ aññaṃ sarīranti vā, hoti tathāgato paraṃ maraṇāti vā, na hoti tathāgato paraṃ maraṇāti vā, hoti ca na ca hoti tathāgato paraṃ maraṇāti vā, neva hoti na na hoti tathāgato paraṃ maraṇāti vā, yā evarūpā diṭṭhi diṭṭhigataṃ diṭṭhigahanaṃ diṭṭhikantāro diṭṭhivisūkāyikaṃ diṭṭhivipphanditaṃ diṭṭhisaññojanaṃ gāho patiṭṭhāho abhiniveso parāmāso kummaggo micchāpatho micchattaṃ titthāyatanaṃ vipariyesaggāho, ayaṃ vuccati brahmacariyesanā’’ti (vibha. 919).
தஸ்மா தி³ட்டி²க³தஸம்மதஸ்ஸ ப்³ரஹ்மசரியஸ்ஸ ஏஸனா தி³ட்டி²ப்³ரஹ்மசரியேஸனாதி வேதி³தப்³பா³தி. எத்தாவதா ராக³தி³ட்டி²யோ ஏஸனாதி த³ஸ்ஸிதா ஹொந்தி. ந கேவலஞ்ச ராக³தி³ட்டி²யோவ ஏஸனா, ததே³கட்ட²ங் கம்மம்பி. வுத்தம்பி சேதங் –
Tasmā diṭṭhigatasammatassa brahmacariyassa esanā diṭṭhibrahmacariyesanāti veditabbāti. Ettāvatā rāgadiṭṭhiyo esanāti dassitā honti. Na kevalañca rāgadiṭṭhiyova esanā, tadekaṭṭhaṃ kammampi. Vuttampi cetaṃ –
‘‘தத்த² கதமா காமேஸனா? காமராகோ³ ததே³கட்ட²ங் அகுஸலங் காயகம்மங் வசீகம்மங் மனோகம்மங், அயங் வுச்சதி காமேஸனா. தத்த² கதமா ப⁴வேஸனா? ப⁴வராகோ³ ததே³கட்ட²ங் அகுஸலங் காயகம்மங் வசீகம்மங் மனோகம்மங், அயங் வுச்சதி ப⁴வேஸனா. தத்த² கதமா ப்³ரஹ்மசரியேஸனா? அந்தக்³கா³ஹிகா தி³ட்டி² ததே³கட்ட²ங் அகுஸலங் காயகம்மங், வசீகம்மங், மனோகம்மங், அயங் வுச்சதி ப்³ரஹ்மசரியேஸனா’’தி (விப⁴॰ 919) –
‘‘Tattha katamā kāmesanā? Kāmarāgo tadekaṭṭhaṃ akusalaṃ kāyakammaṃ vacīkammaṃ manokammaṃ, ayaṃ vuccati kāmesanā. Tattha katamā bhavesanā? Bhavarāgo tadekaṭṭhaṃ akusalaṃ kāyakammaṃ vacīkammaṃ manokammaṃ, ayaṃ vuccati bhavesanā. Tattha katamā brahmacariyesanā? Antaggāhikā diṭṭhi tadekaṭṭhaṃ akusalaṃ kāyakammaṃ, vacīkammaṃ, manokammaṃ, ayaṃ vuccati brahmacariyesanā’’ti (vibha. 919) –
ஏவமேதா திஸ்ஸோ ஏஸனா வேதி³தப்³பா³.
Evametā tisso esanā veditabbā.
கா³தா²ஸு ஸம்ப⁴வந்தி எத்த² ஏஸனானங் உப்பத்திஹேதுபூ⁴தா அவிஜ்ஜாத³யோ தண்ஹா சாதி ஸம்ப⁴வோ, ஸமுத³யோதி அத்தோ². யத்த² சேதா நிருஜ்ஜ²ந்தீதி ப்³ரஹ்மசரியேஸனா பட²மமக்³கே³ன நிருஜ்ஜ²தி, காமேஸனா அனாகா³மிமக்³கே³ன, ப⁴வேஸனா அரஹத்தமக்³கே³ன நிருஜ்ஜ²தீதி வேதி³தப்³ப³ங். ஸேஸங் வுத்தனயமேவ.
Gāthāsu sambhavanti ettha esanānaṃ uppattihetubhūtā avijjādayo taṇhā cāti sambhavo, samudayoti attho. Yatthacetā nirujjhantīti brahmacariyesanā paṭhamamaggena nirujjhati, kāmesanā anāgāmimaggena, bhavesanā arahattamaggena nirujjhatīti veditabbaṃ. Sesaṃ vuttanayameva.
பஞ்சமஸுத்தவண்ணனா நிட்டி²தா.
Pañcamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 5. பட²மஏஸனாஸுத்தங் • 5. Paṭhamaesanāsuttaṃ
