| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
8-9. பட²மகி³ஞ்ஜகாவஸத²ஸுத்தாதி³வண்ணனா
8-9. Paṭhamagiñjakāvasathasuttādivaṇṇanā
1004-5. த்³வே கா³மா த்³வின்னங் ஞாதீனங் கா³மாதி கத்வா. ஞாதிகேதி ஏவங்லத்³த⁴னாமே ஏகஸ்மிங் கா³மகே. கி³ஞ்ஜகாவஸதே²தி கி³ஞ்ஜகா வுச்சந்தி இட்ட²கா, கி³ஞ்ஜகாஹி ஏவ கதோ ஆவஸதோ², தஸ்மிங். ஸோ கிர ஆவாஸோ யதா² ஸுதா⁴ஹி பரிகம்மேன பயோஜனங் நத்தி², ஏவங் இட்ட²காஹி ஏவ சினித்வா கதோ. தேன வுத்தங் ‘‘இட்ட²காமயே ஆவஸதே²’’தி. துலாத²ம்ப⁴த்³வாரப³ந்த⁴கவாடப²லகானி பன தா³ருமயா ஏவ. ஓரங் வுச்சதி காமதா⁴து, பச்சயபா⁴வேன தங் ஓரங் ப⁴ஜந்தீதி ஓரம்பா⁴கி³யானி, ஓரம்பா⁴க³ஸ்ஸ வா ஹிதானி ஓரம்பா⁴கி³யானி. தேனாஹ ‘‘ஹெட்டா²பா⁴கி³யான’’ந்திஆதி³. தீஹி மக்³கே³ஹீதி ஹெட்டி²மேஹி தீஹி மக்³கே³ஹி. தேஹி பஹாதப்³ப³தாய ஹி தேஸங் ஸஞ்ஞோஜனானங் ஓரம்பா⁴கி³யதா, ஓரங் ப⁴ஞ்ஜியானி வா ஓரம்பா⁴கி³யானி வுத்தானி நிருத்தினயேன. இதா³னி ப்³யதிரேகமுகே²ன நேஸங் ஓரம்பா⁴கி³யபா⁴வங் விபா⁴வேதுங் ‘‘தத்தா²’’திஆதி³ வுத்தங். விக்க²ம்பி⁴தானி ஸமத்த²தாவிகா⁴தேன புது²ஜ்ஜனானங், ஸமுச்சி²ன்னானி ஸப்³ப³ஸோ அபா⁴வேன அரியானங் ரூபாரூபப⁴வூபபத்தியா விப³ந்த⁴னாய ந ஹொந்தீதி வுத்தங் ‘‘அவிக்க²ம்பி⁴தானி மக்³கே³ன வா அஸமுச்சி²ன்னானீ’’தி. நிப்³ப³த்திவஸேனாதி படிஸந்தி⁴க்³க³ஹணவஸேன க³ந்துங் ந தெ³ந்தி. மஹக்³க³தப⁴வகா³மிகம்மாயூஹனஸ்ஸ விப³ந்த⁴னதோ ஸக்காயதி³ட்டி²ஆதீ³னி தீணி ஸஞ்ஞோஜனானி காமச்ச²ந்த³ப்³யாபாதா³ விய மஹக்³க³தப⁴வூபபத்தியா விஸேஸபச்சயத்தா தத்த² மஹக்³க³தப⁴வே நிப்³ப³த்தம்பி தன்னிப்³ப³த்திஹேதுகம்மபரிக்க²யே காமப⁴வூபபத்திபச்சயதாய மஹக்³க³தப⁴வதோ ஆனெத்வா இதே⁴வ காமப⁴வே ஏவ நிப்³ப³த்தாபெந்தி. தஸ்மா ஸப்³பா³னிபி பஞ்சபி ஸங்யோஜனானி ஓரம்பா⁴கி³யானேவ. படிஸந்தி⁴வஸேன அனாக³மனஸபா⁴வோதி படிஸந்தி⁴க்³க³ஹணவஸேன தஸ்மா லோகா இத⁴ ந ஆக³மனஸபா⁴வோ. பு³த்³த⁴த³ஸ்ஸன-தே²ரத³ஸ்ஸன-த⁴ம்மஸ்ஸவனானங் பன அத்தா²ய அஸ்ஸ ஆக³மனங் அனிவாரிதங்.
1004-5.Dve gāmā dvinnaṃ ñātīnaṃ gāmāti katvā. Ñātiketi evaṃladdhanāme ekasmiṃ gāmake. Giñjakāvasatheti giñjakā vuccanti iṭṭhakā, giñjakāhi eva kato āvasatho, tasmiṃ. So kira āvāso yathā sudhāhi parikammena payojanaṃ natthi, evaṃ iṭṭhakāhi eva cinitvā kato. Tena vuttaṃ ‘‘iṭṭhakāmaye āvasathe’’ti. Tulāthambhadvārabandhakavāṭaphalakāni pana dārumayā eva. Oraṃ vuccati kāmadhātu, paccayabhāvena taṃ oraṃ bhajantīti orambhāgiyāni, orambhāgassa vā hitāni orambhāgiyāni. Tenāha ‘‘heṭṭhābhāgiyāna’’ntiādi. Tīhi maggehīti heṭṭhimehi tīhi maggehi. Tehi pahātabbatāya hi tesaṃ saññojanānaṃ orambhāgiyatā, oraṃ bhañjiyāni vā orambhāgiyāni vuttāni niruttinayena. Idāni byatirekamukhena nesaṃ orambhāgiyabhāvaṃ vibhāvetuṃ ‘‘tatthā’’tiādi vuttaṃ. Vikkhambhitāni samatthatāvighātena puthujjanānaṃ, samucchinnāni sabbaso abhāvena ariyānaṃ rūpārūpabhavūpapattiyā vibandhanāya na hontīti vuttaṃ ‘‘avikkhambhitāni maggena vā asamucchinnānī’’ti. Nibbattivasenāti paṭisandhiggahaṇavasena gantuṃ na denti. Mahaggatabhavagāmikammāyūhanassa vibandhanato sakkāyadiṭṭhiādīni tīṇi saññojanāni kāmacchandabyāpādā viya mahaggatabhavūpapattiyā visesapaccayattā tattha mahaggatabhave nibbattampi tannibbattihetukammaparikkhaye kāmabhavūpapattipaccayatāya mahaggatabhavato ānetvā idheva kāmabhave eva nibbattāpenti. Tasmā sabbānipi pañcapi saṃyojanāni orambhāgiyāneva. Paṭisandhivasena anāgamanasabhāvoti paṭisandhiggahaṇavasena tasmā lokā idha na āgamanasabhāvo. Buddhadassana-theradassana-dhammassavanānaṃ pana atthāya assa āgamanaṃ anivāritaṃ.
கதா³சி உப்பத்தியா விரளாகாரதா, பரியுட்டா²னமந்த³தாய அப³ஹலதாதி த்³வேதா⁴பி தனுபா⁴வோ. அபி⁴ண்ஹந்தி ப³ஹுஸோ. ப³ஹலப³ஹலாதி திப்³ப³திப்³பா³. யத்த² உப்பஜ்ஜந்தி, தங் ஸந்தானங் மத்³த³ந்தா ப²ரந்தா ஸாதெ⁴ந்தா அந்த⁴காரங் கரொந்தா உப்பஜ்ஜந்தி, த்³வீஹி பன மக்³கே³ஹி பஹீனத்தா தனுகதனுகா மந்த³மந்தா³ உப்பஜ்ஜந்தி. புத்ததீ⁴தரோ ஹொந்தீதி இத³ங் அகாரணங். ததா² ஹி அங்க³பச்சங்க³பராமஸனமத்தேனபி தே ஹொந்தி. இத³ந்தி ‘‘ராக³தோ³ஸமோஹானங் தனுத்தா’’தி இத³ங் வசனங். ப⁴வதனுகவஸேனாதி அப்பகப⁴வவஸேன. தந்தி மஹாஸீவத்தே²ரஸ்ஸ வசனங் படிக்கி²த்தந்தி ஸம்ப³ந்தோ⁴. யே ப⁴வா அரியானங் லப்³ப⁴ந்தி, தே பரிபுண்ணலக்க²ணப⁴வா ஏவ. யே ந லப்³ப⁴ந்தி, தத்த² கீதி³ஸங் தங் ப⁴வதனுகங். தஸ்மா உப⁴யதா²பி ப⁴வதனுகஸ்ஸ அஸம்ப⁴வோ ஏவாதி த³ஸ்ஸேதுங் ‘‘ஸோதாபன்னஸ்ஸா’’திஆதி³ வுத்தங். அட்ட²மே ப⁴வே ப⁴வதனுகங் நத்தி² அட்ட²மஸ்ஸேவ ப⁴வஸ்ஸ ஸப்³ப³ஸ்ஸேவ அபா⁴வதோ. ஸேஸேஸுபி ஏஸேவ நயோ.
Kadāci uppattiyā viraḷākāratā, pariyuṭṭhānamandatāya abahalatāti dvedhāpi tanubhāvo. Abhiṇhanti bahuso. Bahalabahalāti tibbatibbā. Yattha uppajjanti, taṃ santānaṃ maddantā pharantā sādhentā andhakāraṃ karontā uppajjanti, dvīhi pana maggehi pahīnattā tanukatanukā mandamandā uppajjanti. Puttadhītaro hontīti idaṃ akāraṇaṃ. Tathā hi aṅgapaccaṅgaparāmasanamattenapi te honti. Idanti ‘‘rāgadosamohānaṃ tanuttā’’ti idaṃ vacanaṃ. Bhavatanukavasenāti appakabhavavasena. Tanti mahāsīvattherassa vacanaṃ paṭikkhittanti sambandho. Ye bhavā ariyānaṃ labbhanti, te paripuṇṇalakkhaṇabhavā eva. Ye na labbhanti, tattha kīdisaṃ taṃ bhavatanukaṃ. Tasmā ubhayathāpi bhavatanukassa asambhavo evāti dassetuṃ ‘‘sotāpannassā’’tiādi vuttaṃ. Aṭṭhame bhave bhavatanukaṃ natthi aṭṭhamasseva bhavassa sabbasseva abhāvato. Sesesupi eseva nayo.
காமாவசரலோகங் ஸந்தா⁴ய வுத்தங் இதரஸ்ஸ லோகஸ்ஸ வஸேன ததா² வத்துங் அஸக்குணெய்யத்தா. யோ ஹி ஸகதா³கா³மீ தே³வமனுஸ்ஸலோகேஸு வோமிஸ்ஸகவஸேன நிப்³ப³த்ததி, ஸோபி காமப⁴வவஸேனேவ பரிச்சி²ந்தி³தப்³போ³. ப⁴க³வதா ச காமலோகே ட²த்வா – ‘‘ஸகிதே³வ இமங் லோகங் ஆக³ந்த்வா’’தி வுத்தங். இமங் லோகங் ஆக³ந்த்வாதி ச இமினா பஞ்சஸு ஸகதா³கா³மீஸு சத்தாரோ வஜ்ஜெத்வா ஏகோவ க³ஹிதோ. ஏகச்சோ ஹி இத⁴ ஸகதா³கா³மிப²லங் பத்வா இதே⁴வ பரினிப்³பா³யதி, ஏகச்சோ இத⁴ பத்வா தே³வலோகே பரினிப்³பா³யதி, ஏகச்சோ தே³வலோகே பத்வா தத்தே²வ பரினிப்³பா³யதி, ஏகச்சோ தே³வலோகே பத்வா இதூ⁴பபஜ்ஜித்வா பரினிப்³பா³யதி, இமே சத்தாரோ இத⁴ ந லப்³ப⁴ந்தி. யோ பன இத⁴ பத்வா தே³வலோகே யாவதாயுகங் வஸித்வா புன இதூ⁴பபஜ்ஜித்வா பரினிப்³பா³யதி, அயமித⁴ அதி⁴ப்பேதோ. அட்ட²கதா²யங் பன ‘‘இமங் லோகந்தி காமப⁴வோ அதி⁴ப்பேதோ’’தி இமமத்த²ங் விபா⁴வேதுங் ‘‘ஸசே ஹீ’’திஆதி³னா அஞ்ஞங்யேவ சதுக்கங் த³ஸ்ஸிதங்.
Kāmāvacaralokaṃsandhāya vuttaṃ itarassa lokassa vasena tathā vattuṃ asakkuṇeyyattā. Yo hi sakadāgāmī devamanussalokesu vomissakavasena nibbattati, sopi kāmabhavavaseneva paricchinditabbo. Bhagavatā ca kāmaloke ṭhatvā – ‘‘sakideva imaṃ lokaṃ āgantvā’’ti vuttaṃ. Imaṃ lokaṃ āgantvāti ca iminā pañcasu sakadāgāmīsu cattāro vajjetvā ekova gahito. Ekacco hi idha sakadāgāmiphalaṃ patvā idheva parinibbāyati, ekacco idha patvā devaloke parinibbāyati, ekacco devaloke patvā tattheva parinibbāyati, ekacco devaloke patvā idhūpapajjitvā parinibbāyati, ime cattāro idha na labbhanti. Yo pana idha patvā devaloke yāvatāyukaṃ vasitvā puna idhūpapajjitvā parinibbāyati, ayamidha adhippeto. Aṭṭhakathāyaṃ pana ‘‘imaṃ lokanti kāmabhavo adhippeto’’ti imamatthaṃ vibhāvetuṃ ‘‘sace hī’’tiādinā aññaṃyeva catukkaṃ dassitaṃ.
சதூஸு…பே॰… ஸபா⁴வோதி அத்தோ² அபாயக³மனீயானங் பாபத⁴ம்மானங் ஸப்³ப³ஸோ பஹீனத்தா. த⁴ம்மனியாமேனாதி மக்³க³த⁴ம்மனியாமேன நியதோ உபரிமக்³கா³தி⁴க³மஸ்ஸ அவஸ்ஸங்பா⁴விபா⁴வதோ. தேனாஹ ‘‘ஸம்போ³தி⁴பராயணோ’’தி. தேஸங் தேஸங் ஞாணக³திந்தி தேஸங் தேஸங் ஸத்தானங் ‘‘அஸுகோ ஸோதாபன்னோ, அஸுகோ ஸகதா³கா³மீ’’திஆதி³னா தங்தங்ஞாணாதி⁴க³மனங் ஞாணூபபத்திங். ஞாணாபி⁴ஸம்பராயந்தி ததோ பரம்பி – ‘‘நியதோ ஸம்போ³தி⁴பராயணோ ஸகிதே³வ இமங் லோகங் ஆக³ந்த்வா து³க்க²ஸ்ஸந்தங் கரிஸ்ஸதீ’’திஆதி³னா ஞாணஸஹிதங் உபபத்திபச்சயப⁴வங். ஓலோகெந்தஸ்ஸ ஞாணசக்கு²னா அபெக்க²ந்தஸ்ஸ. கேவலங் காயகிலமதோ²வ, ந தேன காசி பரேஸங் அத்த²ஸித்³தீ⁴தி அதி⁴ப்பாயோ. சித்தவிஹேஸா சித்தகே²தோ³, ஸா கிலேஸூபஸங்ஹிதத்தா பு³த்³தா⁴னங் நத்தி².
Catūsu…pe… sabhāvoti attho apāyagamanīyānaṃ pāpadhammānaṃ sabbaso pahīnattā. Dhammaniyāmenāti maggadhammaniyāmena niyato uparimaggādhigamassa avassaṃbhāvibhāvato. Tenāha ‘‘sambodhiparāyaṇo’’ti. Tesaṃ tesaṃ ñāṇagatinti tesaṃ tesaṃ sattānaṃ ‘‘asuko sotāpanno, asuko sakadāgāmī’’tiādinā taṃtaṃñāṇādhigamanaṃ ñāṇūpapattiṃ. Ñāṇābhisamparāyanti tato parampi – ‘‘niyato sambodhiparāyaṇo sakideva imaṃ lokaṃ āgantvā dukkhassantaṃ karissatī’’tiādinā ñāṇasahitaṃ upapattipaccayabhavaṃ. Olokentassa ñāṇacakkhunā apekkhantassa. Kevalaṃ kāyakilamathova, na tena kāci paresaṃ atthasiddhīti adhippāyo. Cittavihesā cittakhedo, sā kilesūpasaṃhitattā buddhānaṃ natthi.
ஆதி³ஸ்ஸதி ஆலோகீயதி அத்தா ஏதேனாதி ஆதா³ஸங், த⁴ம்மபூ⁴தங் ஆதா³ஸங் த⁴ம்மாதா³ஸங், அரியமக்³க³ஞாணஸ்ஸேதங் அதி⁴வசனங். தேன ஹி அரியஸாவகோ சதூஸு அரியஸச்சேஸு வித்³த⁴ஸ்தஸம்மோஹத்தா அத்தானங் யாதா²வதோ ஞத்வா யாதா²வதோ ப்³யாகரெய்ய, தப்பகாஸனதோ பன த⁴ம்மபரியாயஸ்ஸ ஸுத்தஸ்ஸ த⁴ம்மாதா³ஸதா வேதி³தப்³பா³தி. யேன த⁴ம்மாதா³ஸேனாதி இத⁴ பன மக்³க³த⁴ம்மமேவ வத³தி. ஸேஸங் உத்தானத்த²த்தா ஸுவிஞ்ஞெய்யமேவாதி.
Ādissati ālokīyati attā etenāti ādāsaṃ, dhammabhūtaṃ ādāsaṃ dhammādāsaṃ, ariyamaggañāṇassetaṃ adhivacanaṃ. Tena hi ariyasāvako catūsu ariyasaccesu viddhastasammohattā attānaṃ yāthāvato ñatvā yāthāvato byākareyya, tappakāsanato pana dhammapariyāyassa suttassa dhammādāsatā veditabbāti. Yena dhammādāsenāti idha pana maggadhammameva vadati. Sesaṃ uttānatthattā suviññeyyamevāti.
வேளுத்³வாரவக்³க³வண்ணனா நிட்டி²தா.
Veḷudvāravaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya
8. பட²மகி³ஞ்ஜகாவஸத²ஸுத்தங் • 8. Paṭhamagiñjakāvasathasuttaṃ
9. து³தியகி³ஞ்ஜகாவஸத²ஸுத்தங் • 9. Dutiyagiñjakāvasathasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 8-9. பட²மகி³ஞ்ஜகாவஸத²ஸுத்தாதி³வண்ணனா • 8-9. Paṭhamagiñjakāvasathasuttādivaṇṇanā
