| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
3. பட²மஹத்த²கஸுத்தங்
3. Paṭhamahatthakasuttaṃ
23. ஏகங் ஸமயங் ப⁴க³வா ஆளவியங் விஹரதி அக்³கா³ளவே சேதியே. தத்ர கோ² ப⁴க³வா பி⁴க்கூ² ஆமந்தேஸி – ‘‘ஸத்தஹி , பி⁴க்க²வே, அச்ச²ரியேஹி அப்³பு⁴தேஹி த⁴ம்மேஹி ஸமன்னாக³தங் ஹத்த²கங் ஆளவகங் தா⁴ரேத². கதமேஹி ஸத்தஹி? ஸத்³தோ⁴ ஹி, பி⁴க்க²வே, ஹத்த²கோ ஆளவகோ; ஸீலவா, பி⁴க்க²வே, ஹத்த²கோ ஆளவகோ; ஹிரீமா, பி⁴க்க²வே, ஹத்த²கோ ஆளவகோ; ஒத்தப்பீ, பி⁴க்க²வே, ஹத்த²கோ ஆளவகோ; ப³ஹுஸ்ஸுதோ, பி⁴க்க²வே, ஹத்த²கோ ஆளவகோ; சாக³வா, பி⁴க்க²வே, ஹத்த²கோ ஆளவகோ; பஞ்ஞவா, பி⁴க்க²வே, ஹத்த²கோ ஆளவகோ – இமேஹி கோ², பி⁴க்க²வே, ஸத்தஹி அச்ச²ரியேஹி அப்³பு⁴தேஹி த⁴ம்மேஹி ஸமன்னாக³தங் ஹத்த²கங் ஆளவகங் தா⁴ரேதா²’’தி. இத³மவோச ப⁴க³வா. இத³ங் வத்வான ஸுக³தோ உட்டா²யாஸனா விஹாரங் பாவிஸி.
23. Ekaṃ samayaṃ bhagavā āḷaviyaṃ viharati aggāḷave cetiye. Tatra kho bhagavā bhikkhū āmantesi – ‘‘sattahi , bhikkhave, acchariyehi abbhutehi dhammehi samannāgataṃ hatthakaṃ āḷavakaṃ dhāretha. Katamehi sattahi? Saddho hi, bhikkhave, hatthako āḷavako; sīlavā, bhikkhave, hatthako āḷavako; hirīmā, bhikkhave, hatthako āḷavako; ottappī, bhikkhave, hatthako āḷavako; bahussuto, bhikkhave, hatthako āḷavako; cāgavā, bhikkhave, hatthako āḷavako; paññavā, bhikkhave, hatthako āḷavako – imehi kho, bhikkhave, sattahi acchariyehi abbhutehi dhammehi samannāgataṃ hatthakaṃ āḷavakaṃ dhārethā’’ti. Idamavoca bhagavā. Idaṃ vatvāna sugato uṭṭhāyāsanā vihāraṃ pāvisi.
அத² கோ² அஞ்ஞதரோ பி⁴க்கு² புப்³ப³ண்ஹஸமயங் நிவாஸெத்வா பத்தசீவரமாதா³ய யேன ஹத்த²கஸ்ஸ ஆளவகஸ்ஸ நிவேஸனங் தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³. அத² கோ² ஹத்த²கோ ஆளவகோ யேன ஸோ பி⁴க்கு² தேனுபஸங்கமி; உபஸங்கமித்வா தங் பி⁴க்கு²ங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னங் கோ² ஹத்த²கங் ஆளவகங் ஸோ பி⁴க்கு² ஏதத³வோச –
Atha kho aññataro bhikkhu pubbaṇhasamayaṃ nivāsetvā pattacīvaramādāya yena hatthakassa āḷavakassa nivesanaṃ tenupasaṅkami; upasaṅkamitvā paññatte āsane nisīdi. Atha kho hatthako āḷavako yena so bhikkhu tenupasaṅkami; upasaṅkamitvā taṃ bhikkhuṃ abhivādetvā ekamantaṃ nisīdi. Ekamantaṃ nisinnaṃ kho hatthakaṃ āḷavakaṃ so bhikkhu etadavoca –
‘‘ஸத்தஹி கோ² த்வங், ஆவுஸோ, அச்ச²ரியேஹி அப்³பு⁴தேஹி த⁴ம்மேஹி ஸமன்னாக³தோ ப⁴க³வதா ப்³யாகதோ. கதமேஹி ஸத்தஹி? ‘ஸத்³தோ⁴, பி⁴க்க²வே, ஹத்த²கோ ஆளவகோ; ஸீலவா…பே॰… ஹிரிமா… ஒத்தப்பீ… ப³ஹுஸ்ஸுதோ… சாக³வா… பஞ்ஞவா, பி⁴க்க²வே, ஹத்த²கோ ஆளவகோ’தி. இமேஹி கோ² த்வங், ஆவுஸோ, ஸத்தஹி அச்ச²ரியேஹி அப்³பு⁴தேஹி த⁴ம்மேஹி ஸமன்னாக³தோ ப⁴க³வதா ப்³யாகதோ’’தி. ‘‘கச்சித்த², ப⁴ந்தே, ந கோசி கி³ஹீ அஹோஸி ஓதா³தவஸனோ’’தி? ‘‘ந ஹெத்த², ஆவுஸோ , கோசி கி³ஹீ அஹோஸி ஓதா³தவஸனோ’’தி. ‘‘ஸாது⁴, ப⁴ந்தே, யதெ³த்த² ந கோசி கி³ஹீ அஹோஸி ஓதா³தவஸனோ’’தி.
‘‘Sattahi kho tvaṃ, āvuso, acchariyehi abbhutehi dhammehi samannāgato bhagavatā byākato. Katamehi sattahi? ‘Saddho, bhikkhave, hatthako āḷavako; sīlavā…pe… hirimā… ottappī… bahussuto… cāgavā… paññavā, bhikkhave, hatthako āḷavako’ti. Imehi kho tvaṃ, āvuso, sattahi acchariyehi abbhutehi dhammehi samannāgato bhagavatā byākato’’ti. ‘‘Kaccittha, bhante, na koci gihī ahosi odātavasano’’ti? ‘‘Na hettha, āvuso , koci gihī ahosi odātavasano’’ti. ‘‘Sādhu, bhante, yadettha na koci gihī ahosi odātavasano’’ti.
அத² கோ² ஸோ பி⁴க்கு² ஹத்த²கஸ்ஸ ஆளவகஸ்ஸ நிவேஸனே பிண்ட³பாதங் க³ஹெத்வா உட்டா²யாஸனா பக்காமி . அத² கோ² ஸோ பி⁴க்கு² பச்சா²ப⁴த்தங் பிண்ட³பாதபடிக்கந்தோ யேன ப⁴க³வா தேனுபஸங்கமி ; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஸோ பி⁴க்கு² ப⁴க³வந்தங் ஏதத³வோச –
Atha kho so bhikkhu hatthakassa āḷavakassa nivesane piṇḍapātaṃ gahetvā uṭṭhāyāsanā pakkāmi . Atha kho so bhikkhu pacchābhattaṃ piṇḍapātapaṭikkanto yena bhagavā tenupasaṅkami ; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho so bhikkhu bhagavantaṃ etadavoca –
‘‘இதா⁴ஹங், ப⁴ந்தே, புப்³ப³ண்ஹஸமயங் நிவாஸெத்வா பத்தசீவரமாதா³ய யேன ஹத்த²கஸ்ஸ ஆளவகஸ்ஸ நிவேஸனங் தேனுபஸங்கமிங்; உபஸங்கமித்வா பஞ்ஞத்தே ஆஸனே நிஸீதி³ங். அத² கோ², ப⁴ந்தே, ஹத்த²கோ ஆளவகோ யேனாஹங் தேனுபஸங்கமி; உபஸங்கமித்வா மங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னங் கோ² அஹங், ப⁴ந்தே, ஹத்த²கங் ஆளவகங் ஏதத³வசங் – ‘ஸத்தஹி கோ² த்வங், ஆவுஸோ, அச்ச²ரியேஹி அப்³பு⁴தேஹி த⁴ம்மேஹி ஸமன்னாக³தோ ப⁴க³வதா ப்³யாகதோ. கதமேஹி ஸத்தஹி? ஸத்³தோ⁴, பி⁴க்க²வே, ஹத்த²கோ ஆளவகோ; ஸீலவா…பே॰… ஹிரிமா… ஒத்தப்பீ… ப³ஹுஸ்ஸுதோ… சாக³வா… பஞ்ஞவா, பி⁴க்க²வே, ஹத்த²கோ ஆளவகோதி. இமேஹி கோ² த்வங், ஆவுஸோ, ஸத்தஹி அச்ச²ரியேஹி அப்³பு⁴தேஹி த⁴ம்மேஹி ஸமன்னாக³தோ ப⁴க³வதா ப்³யாகதோ’தி.
‘‘Idhāhaṃ, bhante, pubbaṇhasamayaṃ nivāsetvā pattacīvaramādāya yena hatthakassa āḷavakassa nivesanaṃ tenupasaṅkamiṃ; upasaṅkamitvā paññatte āsane nisīdiṃ. Atha kho, bhante, hatthako āḷavako yenāhaṃ tenupasaṅkami; upasaṅkamitvā maṃ abhivādetvā ekamantaṃ nisīdi. Ekamantaṃ nisinnaṃ kho ahaṃ, bhante, hatthakaṃ āḷavakaṃ etadavacaṃ – ‘sattahi kho tvaṃ, āvuso, acchariyehi abbhutehi dhammehi samannāgato bhagavatā byākato. Katamehi sattahi? Saddho, bhikkhave, hatthako āḷavako; sīlavā…pe… hirimā… ottappī… bahussuto… cāgavā… paññavā, bhikkhave, hatthako āḷavakoti. Imehi kho tvaṃ, āvuso, sattahi acchariyehi abbhutehi dhammehi samannāgato bhagavatā byākato’ti.
‘‘ஏவங் வுத்தே, ப⁴ந்தே, ஹத்த²கோ மங் ஏதத³வோச – ‘கச்சித்த², ப⁴ந்தே, ந கோசி கி³ஹீ அஹோஸி ஓதா³தவஸனோ’தி? ‘ந ஹெத்த², ஆவுஸோ, கோசி கி³ஹீ அஹோஸி ஓதா³தவஸனோ’தி. ‘ஸாது⁴, ப⁴ந்தே, யதெ³த்த² ந கோசி கி³ஹீ அஹோஸி ஓதா³தவஸனோ’’’தி.
‘‘Evaṃ vutte, bhante, hatthako maṃ etadavoca – ‘kaccittha, bhante, na koci gihī ahosi odātavasano’ti? ‘Na hettha, āvuso, koci gihī ahosi odātavasano’ti. ‘Sādhu, bhante, yadettha na koci gihī ahosi odātavasano’’’ti.
‘‘ஸாது⁴ ஸாது⁴, பி⁴க்கு²! அப்பிச்சோ² ஸோ, பி⁴க்கு², குலபுத்தோ . ஸந்தேயேவ அத்தனி குஸலத⁴ம்மே ந இச்ச²தி பரேஹி ஞாயமானே 1. தேன ஹி த்வங், பி⁴க்கு², இமினாபி அட்ட²மேன அச்ச²ரியேன அப்³பு⁴தேன த⁴ம்மேன ஸமன்னாக³தங் ஹத்த²கங் ஆளவகங் தா⁴ரேஹி, யதி³த³ங் அப்பிச்ச²தாயா’’தி. ததியங்.
‘‘Sādhu sādhu, bhikkhu! Appiccho so, bhikkhu, kulaputto . Santeyeva attani kusaladhamme na icchati parehi ñāyamāne 2. Tena hi tvaṃ, bhikkhu, imināpi aṭṭhamena acchariyena abbhutena dhammena samannāgataṃ hatthakaṃ āḷavakaṃ dhārehi, yadidaṃ appicchatāyā’’ti. Tatiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 3. பட²மஹத்த²கஸுத்தவண்ணனா • 3. Paṭhamahatthakasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-7. பட²மஉக்³க³ஸுத்தாதி³வண்ணனா • 1-7. Paṭhamauggasuttādivaṇṇanā
