| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
2. தே³வபுத்தஸங்யுத்தங்
2. Devaputtasaṃyuttaṃ
1. பட²மவக்³கோ³
1. Paṭhamavaggo
1. பட²மகஸ்ஸபஸுத்தவண்ணனா
1. Paṭhamakassapasuttavaṇṇanā
82. தே³வஸ்ஸ புத்தோ தே³வபுத்தோ. தே³வானங் ஜனகஜனேதப்³ப³ஸம்ப³ந்தா⁴பா⁴வதோ கத²மயங் தே³வபுத்தோதி வுச்சதீதி ஆஹ ‘‘தே³வானங் ஹீ’’திஆதி³. ‘‘அபாகடோ அஞ்ஞதரோதி வுச்சதீ’’தி இத³ங் யேபு⁴ய்யவஸேன வுத்தங். பாகடோபி ஹி கத்த²சி ‘‘அஞ்ஞதரோ’’தி வுச்சதி. ஹெட்டா² தே³வதாஸங்யுத்தே ‘‘அபாகடா அஞ்ஞதரா தே³வதா’’தி வத்வா இத⁴ ‘‘பாகடோ தே³வபுத்தோ’’தி வுத்தங். ததா² ஹிஸ்ஸ கஸ்ஸபோதி கொ³த்தனாமங் க³ஹிதங், தஞ்ச கோ² புரிமஜாதிஸித்³த⁴ஸமஞ்ஞாவஸேன. அனுஸாஸனங் அனுஸாஸோ, தங் அனுஸாஸங். பி⁴க்கு²னித்³தே³ஸந்தி பி⁴க்கு²ஸத்³த³ஸ்ஸ நித்³தே³ஸங். பி⁴க்கு²ஓவாத³ந்தி பி⁴க்கு²பா⁴வாவஹங் ஓவாத³ங். யதி³ பன ந அஸ்ஸோஸி, கத²மயங் பஞ்ஹங் கதே²ஸீதி? அஞ்ஞதோ ஸுதங் நிஸ்ஸாய பஞ்ஹங் கதே²ஸி, ந பன ப⁴க³வதோ ஸம்முகா² ஸுதபா⁴வேன.
82. Devassa putto devaputto. Devānaṃ janakajanetabbasambandhābhāvato kathamayaṃ devaputtoti vuccatīti āha ‘‘devānaṃ hī’’tiādi. ‘‘Apākaṭo aññataroti vuccatī’’ti idaṃ yebhuyyavasena vuttaṃ. Pākaṭopi hi katthaci ‘‘aññataro’’ti vuccati. Heṭṭhā devatāsaṃyutte ‘‘apākaṭā aññatarā devatā’’ti vatvā idha ‘‘pākaṭo devaputto’’ti vuttaṃ. Tathā hissa kassapoti gottanāmaṃ gahitaṃ, tañca kho purimajātisiddhasamaññāvasena. Anusāsanaṃ anusāso, taṃ anusāsaṃ. Bhikkhuniddesanti bhikkhusaddassa niddesaṃ. Bhikkhuovādanti bhikkhubhāvāvahaṃ ovādaṃ. Yadi pana na assosi, kathamayaṃ pañhaṃ kathesīti? Aññato sutaṃ nissāya pañhaṃ kathesi, na pana bhagavato sammukhā sutabhāvena.
தேஸந்தி யதா²வுத்தானங் திண்ணங் புக்³க³லானங். ‘‘கதே²துகாமோ சேவா’’திஆதி³னா ஹி சதுத்த²ங் இத⁴ உத்³த⁴டங். தத்த² ஆதி³தோ திண்ணங் ப⁴க³வா பஞ்ஹங் பா⁴ரங் ந கரோதி ஏகேகங்க³வேகல்லதோ சேவ அங்க³த்³வயவேகல்லதோ ச, சதுத்த²ஸ்ஸ பன உப⁴யங்க³பாரிபூரத்தா பா⁴ரங் கரோதீதி ஆஹ ‘‘அயங் பனா’’திஆதி³.
Tesanti yathāvuttānaṃ tiṇṇaṃ puggalānaṃ. ‘‘Kathetukāmo cevā’’tiādinā hi catutthaṃ idha uddhaṭaṃ. Tattha ādito tiṇṇaṃ bhagavā pañhaṃ bhāraṃ na karoti ekekaṅgavekallato ceva aṅgadvayavekallato ca, catutthassa pana ubhayaṅgapāripūrattā bhāraṃ karotīti āha ‘‘ayaṃ panā’’tiādi.
கா³தா²யங் ‘‘ஸுபா⁴ஸிதஸ்ஸா’’தி உபயோக³த்தே² ஸாமிவசனந்தி ஆஹ ‘‘ஸுபா⁴ஸிதங் ஸிக்கெ²ய்யா’’தி. சதுஸச்சாதி³னிஸ்ஸிதங் பு³த்³த⁴வசனங் ஸிக்க²ந்தோ சதுப்³பி³த⁴ங் வசீஸுசரிதங் ஸிக்க²தி நாமாதி ஆஹ ‘‘சதுஸச்சனிஸ்ஸிதங்…பே॰… ஸிக்கெ²ய்யா’’தி. அவதா⁴ரணேன தப்படிபக்க²ங் படினிவத்தேதி. உபாஸிதப்³ப³ந்தி ஆஸேவிதப்³ப³ங் பா⁴வேதப்³ப³ங் ப³ஹுலீகாதப்³ப³ங். அட்ட²திங்ஸபே⁴த³ங் கம்மட்டா²னந்தி இத³ங் தஸ்ஸ விபஸ்ஸனாபத³ட்டா²னதங் ஹத³யே ட²பெத்வா வுத்தங். ததா² ஹி வுத்தங் ‘‘து³தியபதே³ன அதி⁴பஞ்ஞாஸிக்கா² கதி²தா’’தி. யே பன ‘‘து³தியபதே³ன அதி⁴சித்தஸிக்கா² சித்தவூபஸமேன அதி⁴பஞ்ஞாஸிக்கா²’’தி பட²ந்தி, தேஸங் பதே³ன அட்ட²திங்ஸப்பபே⁴த³கம்மட்டா²னங் ஸுத்³த⁴ஸமத²கம்மட்டா²னஸ்ஸேவ க³ஹணங் த³ட்ட²ப்³ப³ங். யதி³ ஏவங் ‘‘அட்ட²ஸமாபத்திவஸேனா’’தி இத³ங் கத²ந்தி? ‘‘தங் விபஸ்ஸனாதி⁴ட்டா²னானங் ஸமாபத்தீனங் வஸேன கதி²த’’ந்தி வத³ந்தி. ஏவஞ்ச கத்வா ‘‘து³தியபதே³ன அதி⁴பஞ்ஞாஸிக்கா²’’தி இத³ங் வசனங் ஸமத்தி²தங் ஹோதி. ஸிக்க²னங் நாம ஆஸேவனந்தி ஆஹ ‘‘பா⁴வெய்யாதி அத்தோ²’’தி. உபாஸனந்தி பயிருபாஸனங். தஞ்ச கோ² அஸ்ஸுதபரியாபுணனகம்மட்டா²னுக்³க³ஹாதி³வஸேன த³ஸ்ஸெந்தோ ‘‘தம்பீ’’திஆதி³மாஹ. அதி⁴ஸீலஸிக்கா² கதி²தா லக்க²ணஹாரனயேன. வசீஸுசரிதஸ்ஸ ஹி ஸீலஸபா⁴வத்தா தக்³க³ஹணேனேவ ததே³கலக்க²ணங் காயஸுசரிதம்பி இதரம்பி க³ஹிதமேவாதி. எத்த² ச அதி⁴ஸீலஸிக்கா²ய சித்தவிவேகோ, அதி⁴பஞ்ஞாஸிக்கா²ய உபதி⁴விவேகோ, அதி⁴சித்தஸிக்கா²ய காயவிவேகோ கதி²தோ, காயவிவேகோ பன ஸரூபேனேவ பாளியங் க³ஹிதோதி திவித⁴ஸ்ஸபி விவேகஸ்ஸ பகாஸிதத்தங் த³ட்ட²ப்³ப³ங். ஸேஸங் ஸுவிஞ்ஞெய்யமேவ.
Gāthāyaṃ ‘‘subhāsitassā’’ti upayogatthe sāmivacananti āha ‘‘subhāsitaṃ sikkheyyā’’ti. Catusaccādinissitaṃ buddhavacanaṃ sikkhanto catubbidhaṃ vacīsucaritaṃ sikkhati nāmāti āha ‘‘catusaccanissitaṃ…pe… sikkheyyā’’ti. Avadhāraṇena tappaṭipakkhaṃ paṭinivatteti. Upāsitabbanti āsevitabbaṃ bhāvetabbaṃ bahulīkātabbaṃ. Aṭṭhatiṃsabhedaṃ kammaṭṭhānanti idaṃ tassa vipassanāpadaṭṭhānataṃ hadaye ṭhapetvā vuttaṃ. Tathā hi vuttaṃ ‘‘dutiyapadena adhipaññāsikkhā kathitā’’ti. Ye pana ‘‘dutiyapadena adhicittasikkhā cittavūpasamena adhipaññāsikkhā’’ti paṭhanti, tesaṃ padena aṭṭhatiṃsappabhedakammaṭṭhānaṃ suddhasamathakammaṭṭhānasseva gahaṇaṃ daṭṭhabbaṃ. Yadi evaṃ ‘‘aṭṭhasamāpattivasenā’’ti idaṃ kathanti? ‘‘Taṃ vipassanādhiṭṭhānānaṃ samāpattīnaṃ vasena kathita’’nti vadanti. Evañca katvā ‘‘dutiyapadena adhipaññāsikkhā’’ti idaṃ vacanaṃ samatthitaṃ hoti. Sikkhanaṃ nāma āsevananti āha ‘‘bhāveyyāti attho’’ti. Upāsananti payirupāsanaṃ. Tañca kho assutapariyāpuṇanakammaṭṭhānuggahādivasena dassento ‘‘tampī’’tiādimāha. Adhisīlasikkhā kathitā lakkhaṇahāranayena. Vacīsucaritassa hi sīlasabhāvattā taggahaṇeneva tadekalakkhaṇaṃ kāyasucaritampi itarampi gahitamevāti. Ettha ca adhisīlasikkhāya cittaviveko, adhipaññāsikkhāya upadhiviveko, adhicittasikkhāya kāyaviveko kathito, kāyaviveko pana sarūpeneva pāḷiyaṃ gahitoti tividhassapi vivekassa pakāsitattaṃ daṭṭhabbaṃ. Sesaṃ suviññeyyameva.
பட²மகஸ்ஸபஸுத்தவண்ணனா நிட்டி²தா.
Paṭhamakassapasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. பட²மகஸ்ஸபஸுத்தங் • 1. Paṭhamakassapasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. பட²மகஸ்ஸபஸுத்தவண்ணனா • 1. Paṭhamakassapasuttavaṇṇanā
