| Library / Tipiṭaka / திபிடக • Tipiṭaka / உதா³ன-அட்ட²கதா² • Udāna-aṭṭhakathā |
7. சூளவக்³கோ³
7. Cūḷavaggo
1. பட²மலகுண்ட³கப⁴த்³தி³யஸுத்தவண்ணனா
1. Paṭhamalakuṇḍakabhaddiyasuttavaṇṇanā
61. சூளவக்³க³ஸ்ஸ பட²மே லகுண்ட³கப⁴த்³தி³யந்தி எத்த² ப⁴த்³தி³யோதி தஸ்ஸ ஆயஸ்மதோ நாமங், காயஸ்ஸ பன ரஸ்ஸத்தா ‘‘லகுண்ட³கப⁴த்³தி³யோ’’தி நங் ஸஞ்ஜானந்தி. ஸோ கிர ஸாவத்தி²வாஸீ குலபுத்தோ மஹத்³த⁴னோ மஹாபோ⁴கோ³ ரூபேன அபாஸாதி³கோ து³ப்³ப³ண்ணோ து³த்³த³ஸிகோ ஓகோடிமகோ. ஸோ ஏகதி³வஸங் ஸத்த²ரி ஜேதவனே விஹரந்தே உபாஸகேஹி ஸத்³தி⁴ங் விஹாரங் க³ந்த்வா த⁴ம்மதே³ஸனங் ஸுத்வா படிலத்³த⁴ஸத்³தோ⁴ பப்³ப³ஜித்வா லத்³தூ⁴பஸம்பதோ³ ஸத்து² ஸந்திகே கம்மட்டா²னங் க³ஹெத்வா விபஸ்ஸனாய கம்மங் கரொந்தோ ஸோதாபத்திப²லங் பாபுணி. ததா³ ஸெக்கா² பி⁴க்கூ² யேபு⁴ய்யேன ஆயஸ்மந்தங் ஸாரிபுத்தங் உபஸங்கமித்வா உபரிமக்³க³த்தா²ய கம்மட்டா²னங் யாசந்தி, த⁴ம்மதே³ஸனங் யாசந்தி, பஞ்ஹங் புச்ச²ந்தி. ஸோ தேஸங் அதி⁴ப்பாயங் பூரெந்தோ கம்மட்டா²னங் ஆசிக்க²தி, த⁴ம்மங் தே³ஸேதி, பஞ்ஹங் விஸ்ஸஜ்ஜேதி. தே க⁴டெந்தா வாயமந்தா அப்பேகச்சே ஸகதா³கா³மிப²லங், அப்பேகச்சே அனாகா³மிப²லங், அப்பேகச்சே அரஹத்தங், அப்பேகச்சே திஸ்ஸோ விஜ்ஜா, அப்பேகச்சே ச²ளபி⁴ஞ்ஞா, அப்பேகச்சே சதஸ்ஸோ படிஸம்பி⁴தா³ அதி⁴க³ச்ச²ந்தி. தே தி³ஸ்வா லகுண்ட³கப⁴த்³தி³யோபி ஸேகோ² ஸமானோ காலங் ஞத்வா அத்தனோ சித்தகல்லதஞ்ச ஸல்லேக²ஞ்ச பச்சவெக்கி²த்வா த⁴ம்மஸேனாபதிங் உபஸங்கமித்வா கதபடிஸந்தா²ரோ ஸம்மோத³மானோ த⁴ம்மதே³ஸனங் யாசி. ஸோபிஸ்ஸ அஜ்ஜா²ஸயஸ்ஸ அனுரூபங் கத²ங் கதே²ஸி. தேன வுத்தங் – ‘‘தேன கோ² பன ஸமயேன ஆயஸ்மா ஸாரிபுத்தோ ஆயஸ்மந்தங் லகுண்ட³கப⁴த்³தி³யங் அனேகபரியாயேன த⁴ம்மியா கதா²ய ஸந்த³ஸ்ஸேதீ’’திஆதி³.
61. Cūḷavaggassa paṭhame lakuṇḍakabhaddiyanti ettha bhaddiyoti tassa āyasmato nāmaṃ, kāyassa pana rassattā ‘‘lakuṇḍakabhaddiyo’’ti naṃ sañjānanti. So kira sāvatthivāsī kulaputto mahaddhano mahābhogo rūpena apāsādiko dubbaṇṇo duddasiko okoṭimako. So ekadivasaṃ satthari jetavane viharante upāsakehi saddhiṃ vihāraṃ gantvā dhammadesanaṃ sutvā paṭiladdhasaddho pabbajitvā laddhūpasampado satthu santike kammaṭṭhānaṃ gahetvā vipassanāya kammaṃ karonto sotāpattiphalaṃ pāpuṇi. Tadā sekkhā bhikkhū yebhuyyena āyasmantaṃ sāriputtaṃ upasaṅkamitvā uparimaggatthāya kammaṭṭhānaṃ yācanti, dhammadesanaṃ yācanti, pañhaṃ pucchanti. So tesaṃ adhippāyaṃ pūrento kammaṭṭhānaṃ ācikkhati, dhammaṃ deseti, pañhaṃ vissajjeti. Te ghaṭentā vāyamantā appekacce sakadāgāmiphalaṃ, appekacce anāgāmiphalaṃ, appekacce arahattaṃ, appekacce tisso vijjā, appekacce chaḷabhiññā, appekacce catasso paṭisambhidā adhigacchanti. Te disvā lakuṇḍakabhaddiyopi sekho samāno kālaṃ ñatvā attano cittakallatañca sallekhañca paccavekkhitvā dhammasenāpatiṃ upasaṅkamitvā katapaṭisanthāro sammodamāno dhammadesanaṃ yāci. Sopissa ajjhāsayassa anurūpaṃ kathaṃ kathesi. Tena vuttaṃ – ‘‘tena kho pana samayena āyasmā sāriputto āyasmantaṃ lakuṇḍakabhaddiyaṃ anekapariyāyena dhammiyā kathāya sandassetī’’tiādi.
தத்த² அனேகபரியாயேனாதி ‘‘இதிபி பஞ்சக்க²ந்தா⁴ அனிச்சா, இதிபி து³க்கா², இதிபி அனத்தா’’தி ஏவங் அனேகேஹி காரணேஹி. த⁴ம்மியா கதா²யாதி பஞ்சன்னங் உபாதா³னக்க²ந்தா⁴னங் உத³யப்³ப³யாதி³பகாஸனியா த⁴ம்மியா கதா²ய. ஸந்த³ஸ்ஸேதீதி தானியேவ அனிச்சாதி³லக்க²ணானி உத³யப்³ப³யாதி³கே ச ஸம்மா த³ஸ்ஸேதி, ஹத்தே²ன க³ஹெத்வா விய பச்சக்க²தோ த³ஸ்ஸேதி. ஸமாத³பேதீதி தத்த² லக்க²ணாரம்மணிகங் விபஸ்ஸனங் ஸம்மா ஆத³பேதி, யதா² வீதி²படிபன்னா ஹுத்வா பவத்ததி, ஏவங் க³ண்ஹாபேதி. ஸமுத்தேஜேதீதி விபஸ்ஸனாய ஆரத்³தா⁴ய ஸங்கா²ரானங் உத³யப்³ப³யாதீ³ஸு உபட்ட²ஹந்தேஸு யதா²காலங் பக்³க³ஹனிக்³க³ஹஸமுபெக்க²ணேஹி பொ³ஜ்ஜ²ங்கா³னங் அனுபவத்தனேன பா⁴வனங் மஜ்ஜி²மங் வீதி²ங் ஓதாரெத்வா யதா² விபஸ்ஸனாஞாணங் ஸூரங் பஸன்னங் ஹுத்வா வஹதி, ஏவங் இந்த்³ரியானங் விஸத³பா⁴வகரணேன விபஸ்ஸனாசித்தங் ஸம்மா உத்தேஜேதி, விஸதா³பனவஸேன வோத³பேதி. ஸம்பஹங்ஸேதீதி ததா² பவத்தியமானாய விபஸ்ஸனாய ஸமப்பவத்தபா⁴வனாவஸேன சேவ உபரிலத்³த⁴ப்³ப³பா⁴வனாப³லேன ச சித்தங் ஸம்மா பஹங்ஸேதி, லத்³த⁴ஸ்ஸாத³வஸேன வா ஸுட்டு² தோஸேதி. அனுபாதா³ய ஆஸவேஹி சித்தங் விமுச்சீதி யதா² யதா² த⁴ம்மஸேனாபதி த⁴ம்மங் தே³ஸேதி, ததா² ததா² தத²லக்க²ணங் விபஸ்ஸந்தஸ்ஸ தே²ரஸ்ஸ ச தே³ஸனானுபா⁴வேன, அத்தனோ ச உபனிஸ்ஸயஸம்பத்தியா ஞாணஸ்ஸ பரிபாகங் க³தத்தா தே³ஸனானுஸாரேன ஞாணே அனுபவத்தந்தே காமாஸவாதீ³ஸு கஞ்சி ஆஸவங் அக்³க³ஹெத்வா மக்³க³படிபாடியாவ அனவஸேஸதோ சித்தங் விமுச்சி, அரஹத்தப²லங் ஸச்சா²காஸீதி அத்தோ².
Tattha anekapariyāyenāti ‘‘itipi pañcakkhandhā aniccā, itipi dukkhā, itipi anattā’’ti evaṃ anekehi kāraṇehi. Dhammiyā kathāyāti pañcannaṃ upādānakkhandhānaṃ udayabbayādipakāsaniyā dhammiyā kathāya. Sandassetīti tāniyeva aniccādilakkhaṇāni udayabbayādike ca sammā dasseti, hatthena gahetvā viya paccakkhato dasseti. Samādapetīti tattha lakkhaṇārammaṇikaṃ vipassanaṃ sammā ādapeti, yathā vīthipaṭipannā hutvā pavattati, evaṃ gaṇhāpeti. Samuttejetīti vipassanāya āraddhāya saṅkhārānaṃ udayabbayādīsu upaṭṭhahantesu yathākālaṃ paggahaniggahasamupekkhaṇehi bojjhaṅgānaṃ anupavattanena bhāvanaṃ majjhimaṃ vīthiṃ otāretvā yathā vipassanāñāṇaṃ sūraṃ pasannaṃ hutvā vahati, evaṃ indriyānaṃ visadabhāvakaraṇena vipassanācittaṃ sammā uttejeti, visadāpanavasena vodapeti. Sampahaṃsetīti tathā pavattiyamānāya vipassanāya samappavattabhāvanāvasena ceva upariladdhabbabhāvanābalena ca cittaṃ sammā pahaṃseti, laddhassādavasena vā suṭṭhu toseti. Anupādāya āsavehi cittaṃ vimuccīti yathā yathā dhammasenāpati dhammaṃ deseti, tathā tathā tathalakkhaṇaṃ vipassantassa therassa ca desanānubhāvena, attano ca upanissayasampattiyā ñāṇassa paripākaṃ gatattā desanānusārena ñāṇe anupavattante kāmāsavādīsu kañci āsavaṃ aggahetvā maggapaṭipāṭiyāva anavasesato cittaṃ vimucci, arahattaphalaṃ sacchākāsīti attho.
ஏதமத்த²ங் விதி³த்வாதி ஏதங் ஆயஸ்மதோ லகுண்ட³கப⁴த்³தி³யஸ்ஸ அஞ்ஞாராத⁴னஸங்கா²தங் அத்த²ங் ஸப்³பா³காரதோ விதி³த்வா தத³த்த²தீ³பனங் இமங் உதா³னங் உதா³னேஸி.
Etamatthaṃ viditvāti etaṃ āyasmato lakuṇḍakabhaddiyassa aññārādhanasaṅkhātaṃ atthaṃ sabbākārato viditvā tadatthadīpanaṃ imaṃ udānaṃ udānesi.
தத்த² உத்³த⁴ந்தி ரூபதா⁴துயா அரூபதா⁴துயா ச. அதோ⁴தி காமதா⁴துயா. ஸப்³ப³தீ⁴தி ஸப்³ப³ஸ்மிம்பி ஸங்கா²ரக³தே. விப்பமுத்தோதி புப்³ப³பா⁴கே³ விக்க²ம்ப⁴னவிமுத்தியா அபரபா⁴கே³ ஸமுச்சே²த³படிபஸ்ஸத்³தி⁴விமுத்தீஹி ஸப்³ப³ப்பகாரேன விமுத்தோ. எத்த² ச உத்³த⁴ங் விப்பமுத்தோதி ஏதேன பஞ்சுத்³த⁴ம்பா⁴கி³யஸங்யோஜனபஹானங் த³ஸ்ஸேதி. அதோ⁴ விப்பமுத்தோதி ஏதேன பஞ்சோரம்பா⁴கி³யஸங்யோஜனபஹானங். ஸப்³ப³தி⁴ விப்பமுத்தோதி ஏதேன அவஸிட்ட²ஸப்³பா³குஸலபஹானங் த³ஸ்ஸேதி. அத² வா உத்³த⁴ந்தி அனாக³தகாலக்³க³ஹணங். அதோ⁴தி அதீதகாலக்³க³ஹணங். உப⁴யக்³க³ஹணேனேவ தது³ப⁴யபடிஸங்யுத்தத்தா பச்சுப்பன்னோ அத்³தா⁴ க³ஹிதோ ஹோதி, தத்த² அனாக³தகாலக்³க³ஹணேன அனாக³தக்க²ந்தா⁴யதனதா⁴துயோ க³ஹிதா. ஸேஸபதே³ஸுபி ஏஸேவ நயோ. ஸப்³ப³தீ⁴தி காமபே⁴தா³தி³கே ஸப்³ப³ஸ்மிங் ப⁴வே. இத³ங் வுத்தங் ஹோதி – அனாக³தோ அதீதோ பச்சுப்பன்னோதி ஏவங் தியத்³த⁴ஸங்க³ஹிதே ஸப்³ப³ஸ்மிங் ப⁴வே விப்பமுத்தோதி.
Tattha uddhanti rūpadhātuyā arūpadhātuyā ca. Adhoti kāmadhātuyā. Sabbadhīti sabbasmimpi saṅkhāragate. Vippamuttoti pubbabhāge vikkhambhanavimuttiyā aparabhāge samucchedapaṭipassaddhivimuttīhi sabbappakārena vimutto. Ettha ca uddhaṃ vippamuttoti etena pañcuddhambhāgiyasaṃyojanapahānaṃ dasseti. Adho vippamuttoti etena pañcorambhāgiyasaṃyojanapahānaṃ. Sabbadhivippamuttoti etena avasiṭṭhasabbākusalapahānaṃ dasseti. Atha vā uddhanti anāgatakālaggahaṇaṃ. Adhoti atītakālaggahaṇaṃ. Ubhayaggahaṇeneva tadubhayapaṭisaṃyuttattā paccuppanno addhā gahito hoti, tattha anāgatakālaggahaṇena anāgatakkhandhāyatanadhātuyo gahitā. Sesapadesupi eseva nayo. Sabbadhīti kāmabhedādike sabbasmiṃ bhave. Idaṃ vuttaṃ hoti – anāgato atīto paccuppannoti evaṃ tiyaddhasaṅgahite sabbasmiṃ bhave vippamuttoti.
அயங்ஹமஸ்மீதி அனானுபஸ்ஸீதி யோ ஏவங் விப்பமுத்தோ, ஸோ ரூபவேத³னாதீ³ஸு ‘‘அயங் நாம த⁴ம்மோ அஹமஸ்மீ’’தி தி³ட்டி²மானமஞ்ஞனாவஸேன ஏவங் நானுபஸ்ஸதி. தஸ்ஸ ததா² த³ஸ்ஸனே காரணங் நத்தீ²தி அதி⁴ப்பாயோ. அத² வா அயங்ஹமஸ்மீதி அனானுபஸ்ஸீதி இத³ங் யதா²வுத்தாய விமுத்தியா அதி⁴க³முபாயதீ³பனங். தியத்³த⁴ஸங்க³ஹிதே தேபூ⁴மகே ஸங்கா²ரே ‘‘ஏதங் மம, ஏஸோஹமஸ்மி, ஏஸோ மே அத்தா’’தி பவத்தனஸபா⁴வாய மஞ்ஞனாய அனதி⁴ட்டா²னங் கத்வா ‘‘நேதங் மம, நேஸோஹமஸ்மி, ந மே ஸோ அத்தா’’தி ஏவங் உப்பஜ்ஜமானா யா புப்³ப³பா⁴க³வுட்டா²னகா³மினீ விபஸ்ஸனா, ஸா விமுத்தியா பத³ட்டா²னங். ஏவங் விமுத்தோ உத³தாரி ஓக⁴ங், அதிண்ணபுப்³ப³ங் அபுனப்³ப⁴வாயாதி ஏவங் த³ஸஹி ஸங்யோஜனேஹி ஸப்³பா³குஸலேஹி ச ஸப்³ப³தா² விமுத்தோ அரஹா அரியமக்³கா³தி⁴க³மனதோ புப்³பே³ ஸுபினந்தேபி அதிண்ணபுப்³ப³ங் காமோகோ⁴ ப⁴வோகோ⁴ தி³ட்டோ²கோ⁴ அவிஜ்ஜோகோ⁴தி இமங் சதுப்³பி³த⁴ங் ஓக⁴ங், ஸங்ஸாரமஹோக⁴மேவ வா அபுனப்³ப⁴வாய அனுபாதி³ஸேஸாய நிப்³பா³னாய உத³தாரி உத்திண்ணோ, உத்தரித்வா பாரே டி²தோதி அத்தோ².
Ayaṃhamasmītianānupassīti yo evaṃ vippamutto, so rūpavedanādīsu ‘‘ayaṃ nāma dhammo ahamasmī’’ti diṭṭhimānamaññanāvasena evaṃ nānupassati. Tassa tathā dassane kāraṇaṃ natthīti adhippāyo. Atha vā ayaṃhamasmīti anānupassīti idaṃ yathāvuttāya vimuttiyā adhigamupāyadīpanaṃ. Tiyaddhasaṅgahite tebhūmake saṅkhāre ‘‘etaṃ mama, esohamasmi, eso me attā’’ti pavattanasabhāvāya maññanāya anadhiṭṭhānaṃ katvā ‘‘netaṃ mama, nesohamasmi, na me so attā’’ti evaṃ uppajjamānā yā pubbabhāgavuṭṭhānagāminī vipassanā, sā vimuttiyā padaṭṭhānaṃ. Evaṃ vimutto udatāri oghaṃ, atiṇṇapubbaṃ apunabbhavāyāti evaṃ dasahi saṃyojanehi sabbākusalehi ca sabbathā vimutto arahā ariyamaggādhigamanato pubbe supinantepi atiṇṇapubbaṃ kāmogho bhavogho diṭṭhogho avijjoghoti imaṃ catubbidhaṃ oghaṃ, saṃsāramahoghameva vā apunabbhavāya anupādisesāya nibbānāya udatāri uttiṇṇo, uttaritvā pāre ṭhitoti attho.
பட²மஸுத்தவண்ணனா நிட்டி²தா.
Paṭhamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / உதா³னபாளி • Udānapāḷi / 1. பட²மலகுண்ட³கப⁴த்³தி³யஸுத்தங் • 1. Paṭhamalakuṇḍakabhaddiyasuttaṃ
