| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
5. பட²மமெத்தாஸுத்தங்
5. Paṭhamamettāsuttaṃ
125. ‘‘சத்தாரோமே, பி⁴க்க²வே, புக்³க³லா ஸந்தோ ஸங்விஜ்ஜமானா லோகஸ்மிங். கதமே சத்தாரோ? இத⁴, பி⁴க்க²வே, ஏகச்சோ புக்³க³லோ மெத்தாஸஹக³தேன சேதஸா ஏகங் தி³ஸங் ப²ரித்வா விஹரதி, ததா² து³தியங் ததா² ததியங் ததா² சதுத்த²ங். இதி உத்³த⁴மதோ⁴ திரியங் ஸப்³ப³தி⁴ ஸப்³ப³த்ததாய ஸப்³பா³வந்தங் லோகங் மெத்தாஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாபஜ்ஜேன ப²ரித்வா விஹரதி. ஸோ தத³ஸ்ஸாதே³தி, தங் நிகாமேதி, தேன ச வித்திங் ஆபஜ்ஜதி. தத்த² டி²தோ தத³தி⁴முத்தோ தப்³ப³ஹுலவிஹாரீ அபரிஹீனோ காலங் குருமானோ ப்³ரஹ்மகாயிகானங் தே³வானங் ஸஹப்³யதங் உபபஜ்ஜதி. ப்³ரஹ்மகாயிகானங், பி⁴க்க²வே, தே³வானங் கப்போ ஆயுப்பமாணங். தத்த² புது²ஜ்ஜனோ யாவதாயுகங் ட²த்வா யாவதகங் தேஸங் தே³வானங் ஆயுப்பமாணங் தங் ஸப்³ப³ங் கே²பெத்வா நிரயம்பி க³ச்ச²தி திரச்சா²னயோனிம்பி க³ச்ச²தி பெத்திவிஸயம்பி க³ச்ச²தி. ப⁴க³வதோ பன ஸாவகோ தத்த² யாவதாயுகங் ட²த்வா யாவதகங் தேஸங் தே³வானங் ஆயுப்பமாணங் தங் ஸப்³ப³ங் கே²பெத்வா தஸ்மிங்யேவ ப⁴வே பரினிப்³பா³யதி. அயங் கோ² , பி⁴க்க²வே, விஸேஸோ அயங் அதி⁴ப்பயாஸோ இத³ங் நானாகரணங் ஸுதவதோ அரியஸாவகஸ்ஸ அஸ்ஸுதவதா புது²ஜ்ஜனேன, யதி³த³ங் க³தியா உபபத்தியா ஸதி.
125. ‘‘Cattārome, bhikkhave, puggalā santo saṃvijjamānā lokasmiṃ. Katame cattāro? Idha, bhikkhave, ekacco puggalo mettāsahagatena cetasā ekaṃ disaṃ pharitvā viharati, tathā dutiyaṃ tathā tatiyaṃ tathā catutthaṃ. Iti uddhamadho tiriyaṃ sabbadhi sabbattatāya sabbāvantaṃ lokaṃ mettāsahagatena cetasā vipulena mahaggatena appamāṇena averena abyāpajjena pharitvā viharati. So tadassādeti, taṃ nikāmeti, tena ca vittiṃ āpajjati. Tattha ṭhito tadadhimutto tabbahulavihārī aparihīno kālaṃ kurumāno brahmakāyikānaṃ devānaṃ sahabyataṃ upapajjati. Brahmakāyikānaṃ, bhikkhave, devānaṃ kappo āyuppamāṇaṃ. Tattha puthujjano yāvatāyukaṃ ṭhatvā yāvatakaṃ tesaṃ devānaṃ āyuppamāṇaṃ taṃ sabbaṃ khepetvā nirayampi gacchati tiracchānayonimpi gacchati pettivisayampi gacchati. Bhagavato pana sāvako tattha yāvatāyukaṃ ṭhatvā yāvatakaṃ tesaṃ devānaṃ āyuppamāṇaṃ taṃ sabbaṃ khepetvā tasmiṃyeva bhave parinibbāyati. Ayaṃ kho , bhikkhave, viseso ayaṃ adhippayāso idaṃ nānākaraṇaṃ sutavato ariyasāvakassa assutavatā puthujjanena, yadidaṃ gatiyā upapattiyā sati.
‘‘புன சபரங், பி⁴க்க²வே, இதே⁴கச்சோ புக்³க³லோ கருணாஸஹக³தேன சேதஸா…பே॰… முதி³தாஸஹக³தேன சேதஸா…பே॰… உபெக்கா²ஸஹக³தேன சேதஸா ஏகங் தி³ஸங் ப²ரித்வா விஹரதி, ததா² து³தியங் ததா² ததியங் ததா² சதுத்த²ங். இதி உத்³த⁴மதோ⁴ திரியங் ஸப்³ப³தி⁴ ஸப்³ப³த்ததாய ஸப்³பா³வந்தங் லோகங் உபெக்கா²ஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாபஜ்ஜேன ப²ரித்வா விஹரதி. ஸோ தத³ஸ்ஸாதே³தி, தங் நிகாமேதி, தேன ச வித்திங் ஆபஜ்ஜதி. தத்த² டி²தோ தத³தி⁴முத்தோ தப்³ப³ஹுலவிஹாரீ அபரிஹீனோ காலங் குருமானோ ஆப⁴ஸ்ஸரானங் 1 தே³வானங் ஸஹப்³யதங் உபபஜ்ஜதி. ஆப⁴ஸ்ஸரானங், பி⁴க்க²வே, தே³வானங் த்³வே கப்பா ஆயுப்பமாணங்…பே॰… ஸுப⁴கிண்ஹானங் 2 தே³வானங் ஸஹப்³யதங் உபபஜ்ஜதி. ஸுப⁴கிண்ஹானங், பி⁴க்க²வே, தே³வானங் சத்தாரோ கப்பா ஆயுப்பமாணங்…பே॰… வேஹப்ப²லானங் தே³வானங் ஸஹப்³யதங் உபபஜ்ஜதி. வேஹப்ப²லானங், பி⁴க்க²வே, தே³வானங் பஞ்ச கப்பஸதானி ஆயுப்பமாணங். தத்த² புது²ஜ்ஜனோ யாவதாயுகங் ட²த்வா யாவதகங் தேஸங் தே³வானங் ஆயுப்பமாணங் தங் ஸப்³ப³ங் கே²பெத்வா நிரயம்பி க³ச்ச²தி திரச்சா²னயோனிம்பி க³ச்ச²தி பெத்திவிஸயம்பி க³ச்ச²தி. ப⁴க³வதோ பன ஸாவகோ தத்த² யாவதாயுகங் ட²த்வா யாவதகங் தேஸங் தே³வானங் ஆயுப்பமாணங் தங் ஸப்³ப³ங் கே²பெத்வா தஸ்மிங்யேவ ப⁴வே பரினிப்³பா³யதி. அயங் கோ², பி⁴க்க²வே, விஸேஸோ அயங் அதி⁴ப்பயாஸோ இத³ங் நானாகரணங் ஸுதவதோ அரியஸாவகஸ்ஸ அஸ்ஸுதவதா புது²ஜ்ஜனேன, யதி³த³ங் க³தியா உபபத்தியா ஸதி. இமே கோ², பி⁴க்க²வே, சத்தாரோ புக்³க³லா ஸந்தோ ஸங்விஜ்ஜமானா லோகஸ்மி’’ந்தி. பஞ்சமங்.
‘‘Puna caparaṃ, bhikkhave, idhekacco puggalo karuṇāsahagatena cetasā…pe… muditāsahagatena cetasā…pe… upekkhāsahagatena cetasā ekaṃ disaṃ pharitvā viharati, tathā dutiyaṃ tathā tatiyaṃ tathā catutthaṃ. Iti uddhamadho tiriyaṃ sabbadhi sabbattatāya sabbāvantaṃ lokaṃ upekkhāsahagatena cetasā vipulena mahaggatena appamāṇena averena abyāpajjena pharitvā viharati. So tadassādeti, taṃ nikāmeti, tena ca vittiṃ āpajjati. Tattha ṭhito tadadhimutto tabbahulavihārī aparihīno kālaṃ kurumāno ābhassarānaṃ 3 devānaṃ sahabyataṃ upapajjati. Ābhassarānaṃ, bhikkhave, devānaṃ dve kappā āyuppamāṇaṃ…pe… subhakiṇhānaṃ 4 devānaṃ sahabyataṃ upapajjati. Subhakiṇhānaṃ, bhikkhave, devānaṃ cattāro kappā āyuppamāṇaṃ…pe… vehapphalānaṃ devānaṃ sahabyataṃ upapajjati. Vehapphalānaṃ, bhikkhave, devānaṃ pañca kappasatāni āyuppamāṇaṃ. Tattha puthujjano yāvatāyukaṃ ṭhatvā yāvatakaṃ tesaṃ devānaṃ āyuppamāṇaṃ taṃ sabbaṃ khepetvā nirayampi gacchati tiracchānayonimpi gacchati pettivisayampi gacchati. Bhagavato pana sāvako tattha yāvatāyukaṃ ṭhatvā yāvatakaṃ tesaṃ devānaṃ āyuppamāṇaṃ taṃ sabbaṃ khepetvā tasmiṃyeva bhave parinibbāyati. Ayaṃ kho, bhikkhave, viseso ayaṃ adhippayāso idaṃ nānākaraṇaṃ sutavato ariyasāvakassa assutavatā puthujjanena, yadidaṃ gatiyā upapattiyā sati. Ime kho, bhikkhave, cattāro puggalā santo saṃvijjamānā lokasmi’’nti. Pañcamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 5-6. மெத்தாஸுத்தத்³வயவண்ணனா • 5-6. Mettāsuttadvayavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 4-6. து³தியனானாகரணஸுத்தாதி³வண்ணனா • 4-6. Dutiyanānākaraṇasuttādivaṇṇanā
