| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
7. பட²மனளகபானஸுத்தங்
7. Paṭhamanaḷakapānasuttaṃ
67. ஏகங் ஸமயங் ப⁴க³வா கோஸலேஸு சாரிகங் சரமானோ மஹதா பி⁴க்கு²ஸங்கே⁴ன ஸத்³தி⁴ங் யேன நளகபானங் நாம கோஸலானங் நிக³மோ தத³வஸரி. தத்ர ஸுத³ங் ப⁴க³வா நளகபானே விஹரதி பலாஸவனே. தேன கோ² பன ஸமயேன ப⁴க³வா தத³ஹுபோஸதே² பி⁴க்கு²ஸங்க⁴பரிவுதோ நிஸின்னோ ஹோதி. அத² கோ² ப⁴க³வா ப³ஹுதே³வ ரத்திங் பி⁴க்கூ²னங் த⁴ம்மியா கதா²ய ஸந்த³ஸ்ஸெத்வா ஸமாத³பெத்வா ஸமுத்தேஜெத்வா ஸம்பஹங்ஸெத்வா துண்ஹீபூ⁴தங் துண்ஹீபூ⁴தங் பி⁴க்கு²ஸங்க⁴ங் அனுவிலோகெத்வா ஆயஸ்மந்தங் ஸாரிபுத்தங் ஆமந்தேஸி –
67. Ekaṃ samayaṃ bhagavā kosalesu cārikaṃ caramāno mahatā bhikkhusaṅghena saddhiṃ yena naḷakapānaṃ nāma kosalānaṃ nigamo tadavasari. Tatra sudaṃ bhagavā naḷakapāne viharati palāsavane. Tena kho pana samayena bhagavā tadahuposathe bhikkhusaṅghaparivuto nisinno hoti. Atha kho bhagavā bahudeva rattiṃ bhikkhūnaṃ dhammiyā kathāya sandassetvā samādapetvā samuttejetvā sampahaṃsetvā tuṇhībhūtaṃ tuṇhībhūtaṃ bhikkhusaṅghaṃ anuviloketvā āyasmantaṃ sāriputtaṃ āmantesi –
‘‘விக³ததி²னமித்³தோ⁴ 1 கோ², ஸாரிபுத்த, பி⁴க்கு²ஸங்கோ⁴. படிபா⁴து தங், ஸாரிபுத்த , பி⁴க்கூ²னங் த⁴ம்மீ கதா². பிட்டி² மே ஆகி³லாயதி; தமஹங் ஆயமிஸ்ஸாமீ’’தி. ‘‘ஏவங், ப⁴ந்தே’’தி கோ² ஆயஸ்மா ஸாரிபுத்தோ ப⁴க³வதோ பச்சஸ்ஸோஸி.
‘‘Vigatathinamiddho 2 kho, sāriputta, bhikkhusaṅgho. Paṭibhātu taṃ, sāriputta , bhikkhūnaṃ dhammī kathā. Piṭṭhi me āgilāyati; tamahaṃ āyamissāmī’’ti. ‘‘Evaṃ, bhante’’ti kho āyasmā sāriputto bhagavato paccassosi.
அத² கோ² ப⁴க³வா சதுக்³கு³ணங் ஸங்கா⁴டிங் பஞ்ஞாபெத்வா த³க்கி²ணேன பஸ்ஸேன ஸீஹஸெய்யங் கப்பேஸி பாதே³ பாத³ங் அச்சாதா⁴ய ஸதோ ஸம்பஜானோ உட்டா²னஸஞ்ஞங் மனஸி கரித்வா. தத்ர கோ² ஆயஸ்மா ஸாரிபுத்தோ பி⁴க்கூ² ஆமந்தேஸி – ‘‘ஆவுஸோ பி⁴க்க²வே’’தி. ‘‘ஆவுஸோ’’தி கோ² தே பி⁴க்கூ² ஆயஸ்மதோ ஸாரிபுத்தஸ்ஸ பச்சஸ்ஸோஸுங். ஆயஸ்மா ஸாரிபுத்தோ ஏதத³வோச –
Atha kho bhagavā catugguṇaṃ saṅghāṭiṃ paññāpetvā dakkhiṇena passena sīhaseyyaṃ kappesi pāde pādaṃ accādhāya sato sampajāno uṭṭhānasaññaṃ manasi karitvā. Tatra kho āyasmā sāriputto bhikkhū āmantesi – ‘‘āvuso bhikkhave’’ti. ‘‘Āvuso’’ti kho te bhikkhū āyasmato sāriputtassa paccassosuṃ. Āyasmā sāriputto etadavoca –
‘‘யஸ்ஸ கஸ்ஸசி, ஆவுஸோ, ஸத்³தா⁴ நத்தி² குஸலேஸு த⁴ம்மேஸு, ஹிரீ 3 நத்தி²… ஒத்தப்பங் நத்தி² … வீரியங் 4 நத்தி²… பஞ்ஞா நத்தி² குஸலேஸு த⁴ம்மேஸு, தஸ்ஸ யா ரத்தி வா தி³வஸோ வா ஆக³ச்ச²தி, ஹானியேவ பாடிகங்கா² குஸலேஸு த⁴ம்மேஸு நோ வுத்³தி⁴. ஸெய்யதா²பி, ஆவுஸோ, காளபக்கே² சந்த³ஸ்ஸ யா ரத்தி வா தி³வஸோ வா ஆக³ச்ச²தி, ஹாயதேவ வண்ணேன ஹாயதி மண்ட³லேன ஹாயதி ஆபா⁴ய ஹாயதி ஆரோஹபரிணாஹேன; ஏவமேவங் கோ², ஆவுஸோ, யஸ்ஸ கஸ்ஸசி ஸத்³தா⁴ நத்தி² குஸலேஸு த⁴ம்மேஸு, ஹிரீ நத்தி²… ஒத்தப்பங் நத்தி²… வீரியங் நத்தி²… பஞ்ஞா நத்தி² குஸலேஸு த⁴ம்மேஸு, தஸ்ஸ யா ரத்தி வா தி³வஸோ வா ஆக³ச்ச²தி, ஹானியேவ பாடிகங்கா² குஸலேஸு த⁴ம்மேஸு நோ வுத்³தி⁴.
‘‘Yassa kassaci, āvuso, saddhā natthi kusalesu dhammesu, hirī 5 natthi… ottappaṃ natthi … vīriyaṃ 6 natthi… paññā natthi kusalesu dhammesu, tassa yā ratti vā divaso vā āgacchati, hāniyeva pāṭikaṅkhā kusalesu dhammesu no vuddhi. Seyyathāpi, āvuso, kāḷapakkhe candassa yā ratti vā divaso vā āgacchati, hāyateva vaṇṇena hāyati maṇḍalena hāyati ābhāya hāyati ārohapariṇāhena; evamevaṃ kho, āvuso, yassa kassaci saddhā natthi kusalesu dhammesu, hirī natthi… ottappaṃ natthi… vīriyaṃ natthi… paññā natthi kusalesu dhammesu, tassa yā ratti vā divaso vā āgacchati, hāniyeva pāṭikaṅkhā kusalesu dhammesu no vuddhi.
‘‘அஸ்ஸத்³தோ⁴ புரிஸபுக்³க³லோ’தி, ஆவுஸோ, பரிஹானமேதங்; ‘அஹிரிகோ புரிஸபுக்³க³லோ’தி, ஆவுஸோ, பரிஹானமேதங்; ‘அனொத்தப்பீ புரிஸபுக்³க³லோ’தி, ஆவுஸோ, பரிஹானமேதங்; ‘குஸீதோ புரிஸபுக்³க³லோ’தி, ஆவுஸோ, பரிஹானமேதங்; ‘து³ப்பஞ்ஞோ புரிஸபுக்³க³லோ’தி, ஆவுஸோ, பரிஹானமேதங்; ‘கோத⁴னோ புரிஸபுக்³க³லோ’தி, ஆவுஸோ, பரிஹானமேதங்; ‘உபனாஹீ புரிஸபுக்³க³லோ’தி, ஆவுஸோ, பரிஹானமேதங்; ‘பாபிச்சோ² புரிஸபுக்³க³லோ’தி, ஆவுஸோ, பரிஹானமேதங்; ‘பாபமித்தோ புரிஸபுக்³க³லோ’தி, ஆவுஸோ, பரிஹானமேதங்; ‘மிச்சா²தி³ட்டி²கோ புரிஸபுக்³க³லோ’தி, ஆவுஸோ, பரிஹானமேதங்.
‘‘Assaddho purisapuggalo’ti, āvuso, parihānametaṃ; ‘ahiriko purisapuggalo’ti, āvuso, parihānametaṃ; ‘anottappī purisapuggalo’ti, āvuso, parihānametaṃ; ‘kusīto purisapuggalo’ti, āvuso, parihānametaṃ; ‘duppañño purisapuggalo’ti, āvuso, parihānametaṃ; ‘kodhano purisapuggalo’ti, āvuso, parihānametaṃ; ‘upanāhī purisapuggalo’ti, āvuso, parihānametaṃ; ‘pāpiccho purisapuggalo’ti, āvuso, parihānametaṃ; ‘pāpamitto purisapuggalo’ti, āvuso, parihānametaṃ; ‘micchādiṭṭhiko purisapuggalo’ti, āvuso, parihānametaṃ.
‘‘யஸ்ஸ கஸ்ஸசி, ஆவுஸோ, ஸத்³தா⁴ அத்தி² குஸலேஸு த⁴ம்மேஸு, ஹிரீ அத்தி²… ஒத்தப்பங் அத்தி²… பஞ்ஞா அத்தி² குஸலேஸு த⁴ம்மேஸு, தஸ்ஸ யா ரத்தி வா தி³வஸோ வா ஆக³ச்ச²தி, வுத்³தி⁴யேவ பாடிகங்கா² குஸலேஸு த⁴ம்மேஸு நோ பரிஹானி. ஸெய்யதா²பி, ஆவுஸோ, ஜுண்ஹபக்கே² சந்த³ஸ்ஸ யா ரத்தி வா தி³வஸோ வா ஆக³ச்ச²தி, வட்³ட⁴தேவ வண்ணேன வட்³ட⁴தி மண்ட³லேன வட்³ட⁴தி ஆபா⁴ய வட்³ட⁴தி ஆரோஹபரிணாஹேன; ஏவமேவங் கோ², ஆவுஸோ, யஸ்ஸ கஸ்ஸசி ஸத்³தா⁴ அத்தி² குஸலேஸு த⁴ம்மேஸு, ஹிரீ அத்தி²… ஒத்தப்பங் அத்தி²… வீரியங் அத்தி²… பஞ்ஞா அத்தி² குஸலேஸு த⁴ம்மேஸு, தஸ்ஸ யா ரத்தி வா தி³வஸோ வா ஆக³ச்ச²தி, வுத்³தி⁴யேவ பாடிகங்கா² குஸலேஸு த⁴ம்மேஸு நோ பரிஹானி.
‘‘Yassa kassaci, āvuso, saddhā atthi kusalesu dhammesu, hirī atthi… ottappaṃ atthi… paññā atthi kusalesu dhammesu, tassa yā ratti vā divaso vā āgacchati, vuddhiyeva pāṭikaṅkhā kusalesu dhammesu no parihāni. Seyyathāpi, āvuso, juṇhapakkhe candassa yā ratti vā divaso vā āgacchati, vaḍḍhateva vaṇṇena vaḍḍhati maṇḍalena vaḍḍhati ābhāya vaḍḍhati ārohapariṇāhena; evamevaṃ kho, āvuso, yassa kassaci saddhā atthi kusalesu dhammesu, hirī atthi… ottappaṃ atthi… vīriyaṃ atthi… paññā atthi kusalesu dhammesu, tassa yā ratti vā divaso vā āgacchati, vuddhiyeva pāṭikaṅkhā kusalesu dhammesu no parihāni.
‘‘‘ஸத்³தோ⁴ புரிஸபுக்³க³லோ’தி, ஆவுஸோ, அபரிஹானமேதங்; ‘ஹிரீமா புரிஸபுக்³க³லோ’தி, ஆவுஸோ, அபரிஹானமேதங்; ‘ஒத்தப்பீ புரிஸபுக்³க³லோ’தி, ஆவுஸோ, அபரிஹானமேதங்; ‘ஆரத்³த⁴வீரியோ புரிஸபுக்³க³லோ’தி, ஆவுஸோ, அபரிஹானமேதங்; ‘பஞ்ஞவா புரிஸபுக்³க³லோ’தி, ஆவுஸோ, அபரிஹானமேதங்; ‘அக்கோத⁴னோ புரிஸபுக்³க³லோ’தி, ஆவுஸோ, அபரிஹானமேதங்; ‘அனுபனாஹீ புரிஸபுக்³க³லோ’தி, ஆவுஸோ, அபரிஹானமேதங்; ‘அப்பிச்சோ² புரிஸபுக்³க³லோ’தி, ஆவுஸோ, அபரிஹானமேதங்; ‘கல்யாணமித்தோ புரிஸபுக்³க³லோ’தி, ஆவுஸோ, அபரிஹானமேதங்; ‘ஸம்மாதி³ட்டி²கோ புரிஸபுக்³க³லோ’தி, ஆவுஸோ, அபரிஹானமேத’’ந்தி.
‘‘‘Saddho purisapuggalo’ti, āvuso, aparihānametaṃ; ‘hirīmā purisapuggalo’ti, āvuso, aparihānametaṃ; ‘ottappī purisapuggalo’ti, āvuso, aparihānametaṃ; ‘āraddhavīriyo purisapuggalo’ti, āvuso, aparihānametaṃ; ‘paññavā purisapuggalo’ti, āvuso, aparihānametaṃ; ‘akkodhano purisapuggalo’ti, āvuso, aparihānametaṃ; ‘anupanāhī purisapuggalo’ti, āvuso, aparihānametaṃ; ‘appiccho purisapuggalo’ti, āvuso, aparihānametaṃ; ‘kalyāṇamitto purisapuggalo’ti, āvuso, aparihānametaṃ; ‘sammādiṭṭhiko purisapuggalo’ti, āvuso, aparihānameta’’nti.
அத² கோ² ப⁴க³வா பச்சுட்டா²ய ஆயஸ்மந்தங் ஸாரிபுத்தங் ஆமந்தேஸி – ‘‘ஸாது⁴ ஸாது⁴, ஸாரிபுத்த! யஸ்ஸ கஸ்ஸசி, ஸாரிபுத்த, ஸத்³தா⁴ நத்தி² குஸலேஸு த⁴ம்மேஸு, ஹிரீ நத்தி²… ஒத்தப்பங் நத்தி²… வீரியங் நத்தி²… பஞ்ஞா நத்தி² குஸலேஸு த⁴ம்மேஸு, தஸ்ஸ யா ரத்தி வா தி³வஸோ வா ஆக³ச்ச²தி, ஹானியேவ பாடிகங்கா² குஸலேஸு த⁴ம்மேஸு நோ வுத்³தி⁴. ஸெய்யதா²பி, ஸாரிபுத்த, காளபக்கே² சந்த³ஸ்ஸ யா ரத்தி வா தி³வஸோ வா ஆக³ச்ச²தி, ஹாயதேவ வண்ணேன ஹாயதி மண்ட³லேன ஹாயதி ஆபா⁴ய ஹாயதி ஆரோஹபரிணாஹேன; ஏவமேவங் கோ², ஸாரிபுத்த, யஸ்ஸ கஸ்ஸசி ஸத்³தா⁴ நத்தி² குஸலேஸு த⁴ம்மேஸு…பே॰… பஞ்ஞா நத்தி² குஸலேஸு த⁴ம்மேஸு, தஸ்ஸ யா ரத்தி வா தி³வஸோ வா …பே॰… நோ வுத்³தி⁴.
Atha kho bhagavā paccuṭṭhāya āyasmantaṃ sāriputtaṃ āmantesi – ‘‘sādhu sādhu, sāriputta! Yassa kassaci, sāriputta, saddhā natthi kusalesu dhammesu, hirī natthi… ottappaṃ natthi… vīriyaṃ natthi… paññā natthi kusalesu dhammesu, tassa yā ratti vā divaso vā āgacchati, hāniyeva pāṭikaṅkhā kusalesu dhammesu no vuddhi. Seyyathāpi, sāriputta, kāḷapakkhe candassa yā ratti vā divaso vā āgacchati, hāyateva vaṇṇena hāyati maṇḍalena hāyati ābhāya hāyati ārohapariṇāhena; evamevaṃ kho, sāriputta, yassa kassaci saddhā natthi kusalesu dhammesu…pe… paññā natthi kusalesu dhammesu, tassa yā ratti vā divaso vā …pe… no vuddhi.
‘‘‘அஸ்ஸத்³தோ⁴ புரிஸபுக்³க³லோ’தி, ஸாரிபுத்த, பரிஹானமேதங்; அஹிரிகோ… அனொத்தப்பீ… குஸீதோ… து³ப்பஞ்ஞோ… கோத⁴னோ… உபனாஹீ… பாபிச்சோ²… பாபமித்தோ… ‘மிச்சா²தி³ட்டி²கோ புரிஸபுக்³க³லோ’தி, ஸாரிபுத்த, பரிஹானமேதங்.
‘‘‘Assaddho purisapuggalo’ti, sāriputta, parihānametaṃ; ahiriko… anottappī… kusīto… duppañño… kodhano… upanāhī… pāpiccho… pāpamitto… ‘micchādiṭṭhiko purisapuggalo’ti, sāriputta, parihānametaṃ.
‘‘யஸ்ஸ கஸ்ஸசி, ஸாரிபுத்த, ஸத்³தா⁴ அத்தி² குஸலேஸு த⁴ம்மேஸு, ஹிரீ அத்தி²… ஒத்தப்பங் அத்தி²… வீரியங் அத்தி²… பஞ்ஞா அத்தி² குஸலேஸு த⁴ம்மேஸு, தஸ்ஸ யா ரத்தி வா தி³வஸோ வா ஆக³ச்ச²தி, வுத்³தி⁴யேவ பாடிகங்கா² குஸலேஸு த⁴ம்மேஸு நோ பரிஹானி. ஸெய்யதா²பி, ஸாரிபுத்த, ஜுண்ஹபக்கே² சந்த³ஸ்ஸ யா ரத்தி வா தி³வஸோ வா ஆக³ச்ச²தி, வட்³ட⁴தேவ வண்ணேன வட்³ட⁴தி மண்ட³லேன வட்³ட⁴தி ஆபா⁴ய வட்³ட⁴தி ஆரோஹபரிணாஹேன; ஏவமேவங் கோ², ஸாரிபுத்த, யஸ்ஸ கஸ்ஸசி ஸத்³தா⁴ அத்தி² குஸலேஸு த⁴ம்மேஸு, ஹிரீ அத்தி²… ஒத்தப்பங் அத்தி²… வீரியங் அத்தி²… பஞ்ஞா அத்தி² குஸலேஸு த⁴ம்மேஸு, தஸ்ஸ யா ரத்தி வா தி³வஸோ வா ஆக³ச்ச²தி, வுத்³தி⁴யேவ பாடிகங்கா² குஸலேஸு த⁴ம்மேஸு நோ பரிஹானி.
‘‘Yassa kassaci, sāriputta, saddhā atthi kusalesu dhammesu, hirī atthi… ottappaṃ atthi… vīriyaṃ atthi… paññā atthi kusalesu dhammesu, tassa yā ratti vā divaso vā āgacchati, vuddhiyeva pāṭikaṅkhā kusalesu dhammesu no parihāni. Seyyathāpi, sāriputta, juṇhapakkhe candassa yā ratti vā divaso vā āgacchati, vaḍḍhateva vaṇṇena vaḍḍhati maṇḍalena vaḍḍhati ābhāya vaḍḍhati ārohapariṇāhena; evamevaṃ kho, sāriputta, yassa kassaci saddhā atthi kusalesu dhammesu, hirī atthi… ottappaṃ atthi… vīriyaṃ atthi… paññā atthi kusalesu dhammesu, tassa yā ratti vā divaso vā āgacchati, vuddhiyeva pāṭikaṅkhā kusalesu dhammesu no parihāni.
‘‘‘ஸத்³தோ⁴ புரிஸபுக்³க³லோ’தி, ஸாரிபுத்த, அபரிஹானமேதங்; ஹிரீமா… ஒத்தப்பீ… ஆரத்³த⁴வீரியோ… பஞ்ஞவா… அக்கோத⁴னோ… அனுபனாஹீ… அப்பிச்சோ²… கல்யாணமித்தோ… ‘ஸம்மாதி³ட்டி²கோ புரிஸபுக்³க³லோ’தி, ஸாரிபுத்த, அபரிஹானமேத’’ந்தி. ஸத்தமங்.
‘‘‘Saddho purisapuggalo’ti, sāriputta, aparihānametaṃ; hirīmā… ottappī… āraddhavīriyo… paññavā… akkodhano… anupanāhī… appiccho… kalyāṇamitto… ‘sammādiṭṭhiko purisapuggalo’ti, sāriputta, aparihānameta’’nti. Sattamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 5-7. பட²மஸுக²ஸுத்தாதி³வண்ணனா • 5-7. Paṭhamasukhasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-7. அவிஜ்ஜாஸுத்தாதி³வண்ணனா • 1-7. Avijjāsuttādivaṇṇanā
