| Library / Tipiṭaka / திபிடக • Tipiṭaka / உதா³னபாளி • Udānapāḷi |
8. பாடலிகா³மியவக்³கோ³
8. Pāṭaligāmiyavaggo
1. பட²மனிப்³பா³னபடிஸங்யுத்தஸுத்தங்
1. Paṭhamanibbānapaṭisaṃyuttasuttaṃ
71. ஏவங் மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ப⁴க³வா பி⁴க்கூ² நிப்³பா³னபடிஸங்யுத்தாய த⁴ம்மியா கதா²ய ஸந்த³ஸ்ஸேதி ஸமாத³பேதி ஸமுத்தேஜேதி ஸம்பஹங்ஸேதி. தேத⁴ பி⁴க்கூ² 1 அட்டி²ங் கத்வா 2 மனஸி கத்வா ஸப்³ப³ங் சேதஸோ 3 ஸமன்னாஹரித்வா ஓஹிதஸோதா த⁴ம்மங் ஸுணந்தி.
71. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena bhagavā bhikkhū nibbānapaṭisaṃyuttāya dhammiyā kathāya sandasseti samādapeti samuttejeti sampahaṃseti. Tedha bhikkhū 4 aṭṭhiṃ katvā 5 manasi katvā sabbaṃ cetaso 6 samannāharitvā ohitasotā dhammaṃ suṇanti.
அத² கோ² ப⁴க³வா ஏதமத்த²ங் விதி³த்வா தாயங் வேலாயங் இமங் உதா³னங் உதா³னேஸி –
Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –
‘‘அத்தி², பி⁴க்க²வே, ததா³யதனங், யத்த² நேவ பத²வீ, ந ஆபோ, ந தேஜோ, ந வாயோ, ந ஆகாஸானஞ்சாயதனங், ந விஞ்ஞாணஞ்சாயதனங், ந ஆகிஞ்சஞ்ஞாயதனங், ந நேவஸஞ்ஞானாஸஞ்ஞாயதனங், நாயங் லோகோ, ந பரலோகோ, ந உபோ⁴ சந்தி³மஸூரியா. தத்ராபாஹங், பி⁴க்க²வே, நேவ ஆக³திங் வதா³மி , ந க³திங், ந டி²திங், ந சுதிங், ந உபபத்திங்; அப்பதிட்ட²ங், அப்பவத்தங், அனாரம்மணமேவேதங். ஏஸேவந்தோ து³க்க²ஸ்ஸா’’தி. பட²மங்.
‘‘Atthi, bhikkhave, tadāyatanaṃ, yattha neva pathavī, na āpo, na tejo, na vāyo, na ākāsānañcāyatanaṃ, na viññāṇañcāyatanaṃ, na ākiñcaññāyatanaṃ, na nevasaññānāsaññāyatanaṃ, nāyaṃ loko, na paraloko, na ubho candimasūriyā. Tatrāpāhaṃ, bhikkhave, neva āgatiṃ vadāmi , na gatiṃ, na ṭhitiṃ, na cutiṃ, na upapattiṃ; appatiṭṭhaṃ, appavattaṃ, anārammaṇamevetaṃ. Esevanto dukkhassā’’ti. Paṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / உதா³ன-அட்ட²கதா² • Udāna-aṭṭhakathā / 1. பட²மனிப்³பா³னபடிஸங்யுத்தஸுத்தவண்ணனா • 1. Paṭhamanibbānapaṭisaṃyuttasuttavaṇṇanā
