| Library / Tipiṭaka / திபிடக • Tipiṭaka / உதா³ன-அட்ட²கதா² • Udāna-aṭṭhakathā |
8. பாடலிகா³மியவக்³கோ³
8. Pāṭaligāmiyavaggo
1. பட²மனிப்³பா³னபடிஸங்யுத்தஸுத்தவண்ணனா
1. Paṭhamanibbānapaṭisaṃyuttasuttavaṇṇanā
71. பாடலிகா³மியவக்³க³ஸ்ஸ பட²மே நிப்³பா³னபடிஸங்யுத்தாயாதி அமததா⁴துஸன்னிஸ்ஸிதாய அஸங்க²ததா⁴துயா பவேத³னவஸேன பவத்தாய. த⁴ம்மியா கதா²யாதி த⁴ம்மதே³ஸனாய. ஸந்த³ஸ்ஸேதீதி ஸபா⁴வஸரஸலக்க²ணதோ நிப்³பா³னங் த³ஸ்ஸேதி. ஸமாத³பேதீதி தமேவ அத்த²ங் தே பி⁴க்கூ² க³ண்ஹாபேதி. ஸமுத்தேஜேதீதி தத³த்த²க³ஹணே உஸ்ஸாஹங் ஜனெந்தோ தேஜேதி ஜோதேதி. ஸம்பஹங்ஸேதீதி நிப்³பா³னகு³ணேஹி ஸம்மதே³வ ஸப்³ப³ப்பகாரேஹி தோஸேதி.
71. Pāṭaligāmiyavaggassa paṭhame nibbānapaṭisaṃyuttāyāti amatadhātusannissitāya asaṅkhatadhātuyā pavedanavasena pavattāya. Dhammiyā kathāyāti dhammadesanāya. Sandassetīti sabhāvasarasalakkhaṇato nibbānaṃ dasseti. Samādapetīti tameva atthaṃ te bhikkhū gaṇhāpeti. Samuttejetīti tadatthagahaṇe ussāhaṃ janento tejeti joteti. Sampahaṃsetīti nibbānaguṇehi sammadeva sabbappakārehi toseti.
அத² வா ஸந்த³ஸ்ஸேதீதி ‘‘ஸோ ஸப்³ப³ஸங்கா²ரஸமதோ² ஸப்³பூ³பதி⁴படினிஸ்ஸக்³கா³ தண்ஹக்க²யோ விராகோ³ நிரோதோ⁴’’திஆதி³னா (ம॰ நி॰ 1.281; 2.337; மஹாவ॰ 8) நயேனேவ ஸப்³ப³தா² தேன தேன பரியாயேன தேஸங் தேஸங் அஜ்ஜா²ஸயானுரூபங் ஸம்மா த³ஸ்ஸேதி. ஸமாத³பேதீதி ‘‘இமினா அரியமக்³கே³ன தங் அதி⁴க³ந்தப்³ப³’’ந்தி அதி⁴க³மபடிபதா³ய ஸத்³தி⁴ங் தத்த² பி⁴க்கூ² நின்னபோணபப்³பா⁴ரே கரொந்தோ ஸம்மா ஆத³பேதி க³ண்ஹாபேதி. ஸமுத்தேஜேதீதி ஏதங் து³க்கரங் து³ரபி⁴ஸம்ப⁴வந்தி ‘‘மா ஸம்மாபடிபத்தியங் பமாத³ங் அந்தராவோஸானங் ஆபஜ்ஜத², உபனிஸ்ஸயஸம்பன்னஸ்ஸ வீரியவதோ நயித³ங் து³க்கரங், தஸ்மா ஸீலவிஸுத்³தி⁴ஆதி³விஸுத்³தி⁴படிபதா³ய உட்ட²ஹத² க⁴டயத² வாயமெய்யாதா²’’தி நிப்³பா³னாதி⁴க³மாய உஸ்ஸாஹேதி, தத்த² வா சித்தங் வோத³பேதி. ஸம்பஹங்ஸேதீதி ‘‘மத³னிம்மத³னோ பிபாஸவினயோ ஆலயஸமுக்³கா⁴தோ’’தி (அ॰ நி॰ 4.34; இதிவு॰ 90), ராக³க்க²யோ தோ³ஸக்க²யோ மோஹக்க²யோதி (ஸங்॰ நி॰ 4.367; இதிவு॰ 44), அஸங்க²தந்தி (ஸங்॰ நி॰ 4.367), அமதஞ்ச ஸந்தந்திஆதி³னா ச அனேகபரியாயேன (ஸங்॰ நி॰ 4.409) நிப்³பா³னானிஸங்ஸப்பகாஸனேன தேஸங் பி⁴க்கூ²னங் சித்தங் தோஸெந்தோ ஹாஸெந்தோ ஸம்பஹங்ஸேதி ஸமஸ்ஸாஸேதி.
Atha vā sandassetīti ‘‘so sabbasaṅkhārasamatho sabbūpadhipaṭinissaggā taṇhakkhayo virāgo nirodho’’tiādinā (ma. ni. 1.281; 2.337; mahāva. 8) nayeneva sabbathā tena tena pariyāyena tesaṃ tesaṃ ajjhāsayānurūpaṃ sammā dasseti. Samādapetīti ‘‘iminā ariyamaggena taṃ adhigantabba’’nti adhigamapaṭipadāya saddhiṃ tattha bhikkhū ninnapoṇapabbhāre karonto sammā ādapeti gaṇhāpeti. Samuttejetīti etaṃ dukkaraṃ durabhisambhavanti ‘‘mā sammāpaṭipattiyaṃ pamādaṃ antarāvosānaṃ āpajjatha, upanissayasampannassa vīriyavato nayidaṃ dukkaraṃ, tasmā sīlavisuddhiādivisuddhipaṭipadāya uṭṭhahatha ghaṭayatha vāyameyyāthā’’ti nibbānādhigamāya ussāheti, tattha vā cittaṃ vodapeti. Sampahaṃsetīti ‘‘madanimmadano pipāsavinayo ālayasamugghāto’’ti (a. ni. 4.34; itivu. 90), rāgakkhayo dosakkhayo mohakkhayoti (saṃ. ni. 4.367; itivu. 44), asaṅkhatanti (saṃ. ni. 4.367), amatañca santantiādinā ca anekapariyāyena (saṃ. ni. 4.409) nibbānānisaṃsappakāsanena tesaṃ bhikkhūnaṃ cittaṃ tosento hāsento sampahaṃseti samassāseti.
தேதா⁴தி தே இத⁴. அட்டி²ங் கத்வாதி ‘‘அத்தி² கிஞ்சி அயங் நோ அத்தோ² அதி⁴க³ந்தப்³போ³’’தி ஏவங் ஸல்லக்கெ²த்வா தாய தே³ஸனாய அத்தி²கா ஹுத்வா. மனஸி கத்வாதி சித்தே ட²பெத்வா அனஞ்ஞவிஹிதா தங் தே³ஸனங் அத்தனோ சித்தக³தமேவ கத்வா. ஸப்³ப³ங் சேதஸோ ஸமன்னாஹரித்வாதி ஸப்³பே³ன காரகசித்தேன ஆதி³தோ பட்டா²ய யாவ பரியோஸானா தே³ஸனங் ஆவஜ்ஜெத்வா, தக்³க³தமேவ ஆபோ⁴க³ங் கத்வாதி அத்தோ². அத² வா ஸப்³ப³ங் சேதஸோ ஸமன்னாஹரித்வாதி ஸப்³ப³ஸ்மா சித்ததோ தே³ஸனங் ஸம்மா அனு அனு ஆஹரித்வா. இத³ங் வுத்தங் ஹோதி – தே³ஸெந்தஸ்ஸ யேஹி சித்தேஹி தே³ஸனா கதா, ஸப்³ப³ஸ்மா சித்ததோ பவத்தங் தே³ஸனங் ப³ஹி க³ந்துங் அதெ³ந்தோ ஸம்மா அவிபரீதங் அனு அனு ஆஹரித்வா அத்தனோ சித்தஸந்தானங் ஆஹரித்வா யதா²தே³ஸிததே³ஸிதங் தே³ஸனங் ஸுட்டு² உபதா⁴ரெத்வா. ஓஹிதஸோதாதி அவஹிதஸோதா, ஸுட்டு² உபிதஸோதா. ஓஹிதஸோதாதி வா அவிக்கி²த்தஸோதா. தமேவ உபலப்³ப⁴மானோபி ஹி ஸவனே அவிக்கே²போ ஸதிஸங்வரோ விய சக்கு²ந்த்³ரியாதீ³ஸு ஸோதிந்த்³ரியேபி வத்துமரஹதீதி. எத்த² ச ‘‘அட்டி²ங் கத்வா’’திஆதீ³ஹி சதூஹிபி பதே³ஹி தேஸங் பி⁴க்கூ²னங் தப்பரபா⁴வதோ ஸவனே ஆத³ரதீ³பனேன ஸக்கச்சஸவனங் த³ஸ்ஸேதி.
Tedhāti te idha. Aṭṭhiṃ katvāti ‘‘atthi kiñci ayaṃ no attho adhigantabbo’’ti evaṃ sallakkhetvā tāya desanāya atthikā hutvā. Manasi katvāti citte ṭhapetvā anaññavihitā taṃ desanaṃ attano cittagatameva katvā. Sabbaṃ cetaso samannāharitvāti sabbena kārakacittena ādito paṭṭhāya yāva pariyosānā desanaṃ āvajjetvā, taggatameva ābhogaṃ katvāti attho. Atha vā sabbaṃ cetaso samannāharitvāti sabbasmā cittato desanaṃ sammā anu anu āharitvā. Idaṃ vuttaṃ hoti – desentassa yehi cittehi desanā katā, sabbasmā cittato pavattaṃ desanaṃ bahi gantuṃ adento sammā aviparītaṃ anu anu āharitvā attano cittasantānaṃ āharitvā yathādesitadesitaṃ desanaṃ suṭṭhu upadhāretvā. Ohitasotāti avahitasotā, suṭṭhu upitasotā. Ohitasotāti vā avikkhittasotā. Tameva upalabbhamānopi hi savane avikkhepo satisaṃvaro viya cakkhundriyādīsu sotindriyepi vattumarahatīti. Ettha ca ‘‘aṭṭhiṃ katvā’’tiādīhi catūhipi padehi tesaṃ bhikkhūnaṃ tapparabhāvato savane ādaradīpanena sakkaccasavanaṃ dasseti.
ஏதமத்த²ங் விதி³த்வாதி ஏதங் தேஸங் பி⁴க்கூ²னங் தஸ்ஸா நிப்³பா³னபடிஸங்யுத்தாய த⁴ம்மகதா²ய ஸவனே ஆத³ரகாரிதங் ஸப்³பா³காரதோ விதி³த்வா. இமங் உதா³னந்தி இமங் நிப்³பா³னஸ்ஸ தப்³பி³து⁴ரத⁴ம்மதே³ஸனாமுகே²ன பரமத்த²தோ விஜ்ஜமானபா⁴வவிபா⁴வனங் உதா³னங் உதா³னேஸி.
Etamatthaṃ viditvāti etaṃ tesaṃ bhikkhūnaṃ tassā nibbānapaṭisaṃyuttāya dhammakathāya savane ādarakāritaṃ sabbākārato viditvā. Imaṃ udānanti imaṃ nibbānassa tabbidhuradhammadesanāmukhena paramatthato vijjamānabhāvavibhāvanaṃ udānaṃ udānesi.
தத்த² அத்தீ²தி விஜ்ஜதி, பரமத்த²தோ உபலப்³ப⁴தீதி அத்தோ². பி⁴க்க²வேதி தேஸங் பி⁴க்கூ²னங் ஆலபனங். நனு ச உதா³னங் நாம பீதிஸோமனஸ்ஸஸமுட்டா²பிதோ வா த⁴ம்மஸங்வேக³ஸமுட்டா²பிதோ வா த⁴ம்மபடிக்³கா³ஹகனிரபெக்கோ² உதா³ஹாரோ, ததா² சேவ எத்தகேஸு ஸுத்தேஸு ஆக³தங், இத⁴ கஸ்மா ப⁴க³வா உதா³னெந்தோ தே பி⁴க்கூ² ஆமந்தேஸீதி? தேஸங் பி⁴க்கூ²னங் ஸஞ்ஞாபனத்த²ங். நிப்³பா³னபடிஸங்யுத்தஞ்ஹி ப⁴க³வா தேஸங் பி⁴க்கூ²னங் த⁴ம்மங் தே³ஸெத்வா நிப்³பா³னகு³ணானுஸ்ஸரணேன உப்பன்னபீதிஸோமனஸ்ஸா உதா³னங் உதா³னேஸி. இத⁴ நிப்³பா³னவஜ்ஜோ ஸப்³போ³ ஸபா⁴வத⁴ம்மோ பச்சயாயத்தவுத்திகோவ உபலப்³ப⁴தி, ந பச்சயனிரபெக்கோ². அயங் பன நிப்³பா³னத⁴ம்மோ கதமபச்சயே உபலப்³ப⁴தீதி தேஸங் பி⁴க்கூ²னங் சேதோபரிவிதக்கமஞ்ஞாய தே ச ஸஞ்ஞாபேதுகாமோ ‘‘அத்தி², பி⁴க்க²வே, ததா³யதன’’ந்திஆதி³மாஹ, ந ஏகந்ததோவ தே படிக்³கா³ஹகே கத்வாதி வேதி³தப்³ப³ங். ததா³யதனந்தி தங் காரணங். த³காரோ பத³ஸந்தி⁴கரோ. நிப்³பா³னஞ்ஹி மக்³க³ப²லஞாணாதீ³னங் ஆரம்மணபச்சயபா⁴வதோ ரூபாதீ³னி விய சக்கு²விஞ்ஞாணாதீ³னங் ஆரம்மணபச்சயபூ⁴தானீதி காரணட்டே²ன ‘‘ஆயதன’’ந்தி வுச்சதி. எத்தாவதா ச ப⁴க³வா தேஸங் பி⁴க்கூ²னங் அஸங்க²தாய தா⁴துயா பரமத்த²தோ அத்தி²பா⁴வங் பவேதே³ஸி.
Tattha atthīti vijjati, paramatthato upalabbhatīti attho. Bhikkhaveti tesaṃ bhikkhūnaṃ ālapanaṃ. Nanu ca udānaṃ nāma pītisomanassasamuṭṭhāpito vā dhammasaṃvegasamuṭṭhāpito vā dhammapaṭiggāhakanirapekkho udāhāro, tathā ceva ettakesu suttesu āgataṃ, idha kasmā bhagavā udānento te bhikkhū āmantesīti? Tesaṃ bhikkhūnaṃ saññāpanatthaṃ. Nibbānapaṭisaṃyuttañhi bhagavā tesaṃ bhikkhūnaṃ dhammaṃ desetvā nibbānaguṇānussaraṇena uppannapītisomanassā udānaṃ udānesi. Idha nibbānavajjo sabbo sabhāvadhammo paccayāyattavuttikova upalabbhati, na paccayanirapekkho. Ayaṃ pana nibbānadhammo katamapaccaye upalabbhatīti tesaṃ bhikkhūnaṃ cetoparivitakkamaññāya te ca saññāpetukāmo ‘‘atthi, bhikkhave, tadāyatana’’ntiādimāha, na ekantatova te paṭiggāhake katvāti veditabbaṃ. Tadāyatananti taṃ kāraṇaṃ. Dakāro padasandhikaro. Nibbānañhi maggaphalañāṇādīnaṃ ārammaṇapaccayabhāvato rūpādīni viya cakkhuviññāṇādīnaṃ ārammaṇapaccayabhūtānīti kāraṇaṭṭhena ‘‘āyatana’’nti vuccati. Ettāvatā ca bhagavā tesaṃ bhikkhūnaṃ asaṅkhatāya dhātuyā paramatthato atthibhāvaṃ pavedesi.
தத்ராயங் த⁴ம்மன்வயோ – இத⁴ ஸங்க²தத⁴ம்மானங் விஜ்ஜமானத்தா அஸங்க²தாயபி தா⁴துயா ப⁴விதப்³ப³ங் தப்படிபக்க²த்தா ஸபா⁴வத⁴ம்மானங். யதா² ஹி து³க்கே² விஜ்ஜமானே தப்படிபக்க²பூ⁴தங் ஸுக²ம்பி விஜ்ஜதியேவ , ததா² உண்ஹே விஜ்ஜமானே ஸீதம்பி விஜ்ஜதி, பாபத⁴ம்மேஸு விஜ்ஜமானேஸு கல்யாணத⁴ம்மாபி விஜ்ஜந்தி ஏவ. வுத்தஞ்சேதங் –
Tatrāyaṃ dhammanvayo – idha saṅkhatadhammānaṃ vijjamānattā asaṅkhatāyapi dhātuyā bhavitabbaṃ tappaṭipakkhattā sabhāvadhammānaṃ. Yathā hi dukkhe vijjamāne tappaṭipakkhabhūtaṃ sukhampi vijjatiyeva , tathā uṇhe vijjamāne sītampi vijjati, pāpadhammesu vijjamānesu kalyāṇadhammāpi vijjanti eva. Vuttañcetaṃ –
‘‘யதா²பி து³க்கே² விஜ்ஜந்தே, ஸுக²ங் நாமபி விஜ்ஜதி;
‘‘Yathāpi dukkhe vijjante, sukhaṃ nāmapi vijjati;
ஏவங் ப⁴வே விஜ்ஜமானே, விப⁴வோபி இச்சி²தப்³ப³கோ.
Evaṃ bhave vijjamāne, vibhavopi icchitabbako.
‘‘யதா²பி உண்ஹே விஜ்ஜந்தே, அபரங் விஜ்ஜதி ஸீதலங்;
‘‘Yathāpi uṇhe vijjante, aparaṃ vijjati sītalaṃ;
ஏவங் திவித⁴க்³கி³ விஜ்ஜந்தே, நிப்³பா³னங் இச்சி²தப்³ப³கங்.
Evaṃ tividhaggi vijjante, nibbānaṃ icchitabbakaṃ.
‘‘யதா²பி பாபே விஜ்ஜந்தே, கல்யாணமபி விஜ்ஜதி;
‘‘Yathāpi pāpe vijjante, kalyāṇamapi vijjati;
ஏவமேவ ஜாதி விஜ்ஜந்தே, அஜாதிமபி இச்சி²தப்³ப³க’’ந்திஆதி³. (பு³॰ வங்॰ 2.10-12) –
Evameva jāti vijjante, ajātimapi icchitabbaka’’ntiādi. (bu. vaṃ. 2.10-12) –
அபிச நிப்³பா³னஸ்ஸ பரமத்த²தோ அத்தி²பா⁴வவிசாரணங் பரதோ ஆவிப⁴விஸ்ஸதி.
Apica nibbānassa paramatthato atthibhāvavicāraṇaṃ parato āvibhavissati.
ஏவங் ப⁴க³வா அஸங்க²தாய தா⁴துயா பரமத்த²தோ அத்தி²பா⁴வங் ஸம்முகே²ன த³ஸ்ஸெத்வா இதா³னி தப்³பி³து⁴ரத⁴ம்மாபோஹனமுகே²னஸ்ஸ ஸபா⁴வங் த³ஸ்ஸேதுங், ‘‘யத்த² நேவ பத²வீ ந ஆபோ’’திஆதி³மாஹ. தத்த² யஸ்மா நிப்³பா³னங் ஸப்³ப³ஸங்கா²ரவிது⁴ரஸபா⁴வங் யதா² ஸங்க²தத⁴ம்மேஸு கத்த²சி நத்தி², ததா² தத்த²பி ஸப்³பே³ ஸங்க²தத⁴ம்மா. ந ஹி ஸங்க²தாஸங்க²தத⁴ம்மானங் ஸமோதா⁴னங் ஸம்ப⁴வதி. தத்ராயங் அத்த²விபா⁴வனா – யத்த² யஸ்மிங் நிப்³பா³னே யஸ்ஸங் அஸங்க²ததா⁴துயங் நேவ கக்க²ளலக்க²ணா பத²வீதா⁴து அத்தி², ந பக்³க⁴ரணலக்க²ணா ஆபோதா⁴து, ந உண்ஹலக்க²ணா தேஜோதா⁴து, ந வித்த²ம்ப⁴னலக்க²ணா வாயோதா⁴து அத்தி². இதி சதுமஹாபூ⁴தாபா⁴வவசனேன யதா² ஸப்³ப³ஸ்ஸபி உபாதா³ரூபஸ்ஸ அபா⁴வோ வுத்தோ ஹோதி தன்னிஸ்ஸிதத்தா. ஏவங் அனவஸேஸதோ காமரூபப⁴வஸ்ஸ தத்த² அபா⁴வோ வுத்தோ ஹோதி ததா³யத்தவுத்திபா⁴வதோ. ந ஹி மஹாபூ⁴தனிஸ்ஸயேன வினா பஞ்சவோகாரப⁴வோ ஏகவோகாரப⁴வோ வா ஸம்ப⁴வதீதி.
Evaṃ bhagavā asaṅkhatāya dhātuyā paramatthato atthibhāvaṃ sammukhena dassetvā idāni tabbidhuradhammāpohanamukhenassa sabhāvaṃ dassetuṃ, ‘‘yattha neva pathavī na āpo’’tiādimāha. Tattha yasmā nibbānaṃ sabbasaṅkhāravidhurasabhāvaṃ yathā saṅkhatadhammesu katthaci natthi, tathā tatthapi sabbe saṅkhatadhammā. Na hi saṅkhatāsaṅkhatadhammānaṃ samodhānaṃ sambhavati. Tatrāyaṃ atthavibhāvanā – yattha yasmiṃ nibbāne yassaṃ asaṅkhatadhātuyaṃ neva kakkhaḷalakkhaṇā pathavīdhātu atthi, na paggharaṇalakkhaṇā āpodhātu, na uṇhalakkhaṇā tejodhātu, na vitthambhanalakkhaṇā vāyodhātu atthi. Iti catumahābhūtābhāvavacanena yathā sabbassapi upādārūpassa abhāvo vutto hoti tannissitattā. Evaṃ anavasesato kāmarūpabhavassa tattha abhāvo vutto hoti tadāyattavuttibhāvato. Na hi mahābhūtanissayena vinā pañcavokārabhavo ekavokārabhavo vā sambhavatīti.
இதா³னி அரூபஸபா⁴வத்தேபி நிப்³பா³னஸ்ஸ அரூபப⁴வபரியாபன்னானங் த⁴ம்மானங் தத்த² அபா⁴வங் த³ஸ்ஸேதுங், ‘‘ந ஆகாஸானஞ்சாயதனங்…பே॰… ந நேவஸஞ்ஞானாஸஞ்ஞாயதன’’ந்தி வுத்தங். தத்த² ந ஆகாஸானஞ்சாயதனந்தி ஸத்³தி⁴ங் ஆரம்மணேன குஸலவிபாககிரியபே⁴தோ³ திவிதோ⁴பி ஆகாஸானஞ்சாயதனசித்துப்பாதோ³ நத்தீ²தி அத்தோ². ஸேஸேஸுபி ஏஸேவ நயோ. யத³க்³கே³ன ச நிப்³பா³னே காமலோகாதீ³னங் அபா⁴வோ ஹோதி, தத³க்³கே³ன தத்த² இத⁴லோகபரலோகானம்பி அபா⁴வோதி ஆஹ – ‘‘நாயங் லோகோ ந பரலோகோ’’தி. தஸ்ஸத்தோ² – ய்வாயங் ‘‘இத்த²த்தங் தி³ட்ட²த⁴ம்மோ இத⁴லோகோ’’தி ச லத்³த⁴வோஹாரோ க²ந்தா⁴தி³லோகோ, யோ ச ‘‘ததோ அஞ்ஞதா² பரோ அபி⁴ஸம்பராயோ’’தி ச லத்³த⁴வோஹாரோ க²ந்தா⁴தி³லோகோ, தது³ப⁴யம்பி தத்த² நத்தீ²தி. ந உபோ⁴ சந்தி³மஸூரியாதி யஸ்மா ரூபக³தே ஸதி தமோ நாம ஸியா, தமஸ்ஸ ச வித⁴மனத்த²ங் சந்தி³மஸூரியேஹி வத்திதப்³ப³ங். ஸப்³பே³ன ஸப்³ப³ங் பன யத்த² ரூபக³தமேவ நத்தி², குதோ தத்த² தமோ. தமஸ்ஸ வா வித⁴மனா சந்தி³மஸூரியா, தஸ்மா சந்தி³மா ஸூரியோ சாதி உபோ⁴பி தத்த² நிப்³பா³னே நத்தீ²தி அத்தோ². இமினா ஆலோகஸபா⁴வதங்யேவ நிப்³பா³னஸ்ஸ த³ஸ்ஸேதி.
Idāni arūpasabhāvattepi nibbānassa arūpabhavapariyāpannānaṃ dhammānaṃ tattha abhāvaṃ dassetuṃ, ‘‘na ākāsānañcāyatanaṃ…pe… na nevasaññānāsaññāyatana’’nti vuttaṃ. Tattha na ākāsānañcāyatananti saddhiṃ ārammaṇena kusalavipākakiriyabhedo tividhopi ākāsānañcāyatanacittuppādo natthīti attho. Sesesupi eseva nayo. Yadaggena ca nibbāne kāmalokādīnaṃ abhāvo hoti, tadaggena tattha idhalokaparalokānampi abhāvoti āha – ‘‘nāyaṃ loko na paraloko’’ti. Tassattho – yvāyaṃ ‘‘itthattaṃ diṭṭhadhammo idhaloko’’ti ca laddhavohāro khandhādiloko, yo ca ‘‘tato aññathā paro abhisamparāyo’’ti ca laddhavohāro khandhādiloko, tadubhayampi tattha natthīti. Na ubho candimasūriyāti yasmā rūpagate sati tamo nāma siyā, tamassa ca vidhamanatthaṃ candimasūriyehi vattitabbaṃ. Sabbena sabbaṃ pana yattha rūpagatameva natthi, kuto tattha tamo. Tamassa vā vidhamanā candimasūriyā, tasmā candimā sūriyo cāti ubhopi tattha nibbāne natthīti attho. Iminā ālokasabhāvataṃyeva nibbānassa dasseti.
எத்தாவதா ச அனபி⁴ஸமேதாவீனங் பி⁴க்கூ²னங் அனாதி³மதிஸங்ஸாரே ஸுபினந்தேபி அனநுபூ⁴தபுப்³ப³ங் பரமக³ம்பீ⁴ரங் அதிது³த்³த³ஸங் ஸண்ஹஸுகு²மங் அதக்காவசரங் அச்சந்தஸந்தங் பண்டி³தவேத³னீயங் அதிபணீதங் அமதங் நிப்³பா³னங் விபா⁴வெந்தோ பட²மங் தாவ ‘‘அத்தி², பி⁴க்க²வே, ததா³யதன’’ந்தி தஸ்ஸ அத்தி²பா⁴வா தேஸங் அஞ்ஞாணாதீ³னி அபனெத்வா ‘‘யத்த² நேவ பத²வீ …பே॰… ந உபோ⁴ சந்தி³மஸூரியா’’தி தத³ஞ்ஞத⁴ம்மாபோஹனமுகே²ன தங் விபா⁴வேதி த⁴ம்மராஜா. தேன பத²வீஆதி³ஸப்³ப³ஸங்க²தத⁴ம்மவிது⁴ரஸபா⁴வா யா அஸங்க²தா தா⁴து, தங் நிப்³பா³னந்தி தீ³பிதங் ஹோதி. தேனேவாஹ, ‘‘தத்ராபாஹங், பி⁴க்க²வே, நேவ ஆக³திங் வதா³மீ’’தி.
Ettāvatā ca anabhisametāvīnaṃ bhikkhūnaṃ anādimatisaṃsāre supinantepi ananubhūtapubbaṃ paramagambhīraṃ atiduddasaṃ saṇhasukhumaṃ atakkāvacaraṃ accantasantaṃ paṇḍitavedanīyaṃ atipaṇītaṃ amataṃ nibbānaṃ vibhāvento paṭhamaṃ tāva ‘‘atthi, bhikkhave, tadāyatana’’nti tassa atthibhāvā tesaṃ aññāṇādīni apanetvā ‘‘yattha neva pathavī …pe… na ubho candimasūriyā’’ti tadaññadhammāpohanamukhena taṃ vibhāveti dhammarājā. Tena pathavīādisabbasaṅkhatadhammavidhurasabhāvā yā asaṅkhatā dhātu, taṃ nibbānanti dīpitaṃ hoti. Tenevāha, ‘‘tatrāpāhaṃ, bhikkhave, neva āgatiṃ vadāmī’’ti.
தத்த² தத்ராதி தஸ்மிங். அபிஸத்³தோ³ ஸமுச்சயே. அஹங், பி⁴க்க²வே, யத்த² ஸங்கா²ரபவத்தே குதோசி கஸ்ஸசி ஆக³திங் ந வதா³மி யதா²பச்சயங் தத்த² த⁴ம்மமத்தஸ்ஸ உப்பஜ்ஜனதோ. ஏவங் தஸ்மிம்பி ஆயதனே நிப்³பா³னே குதோசி ஆக³திங் ஆக³மனங் நேவ வதா³மி ஆக³ந்தப்³ப³ட்டா²னதாய அபா⁴வதோ. ந க³திந்தி கத்த²சி க³மனங் ந வதா³மி க³ந்தப்³ப³ட்டா²னதாய அபா⁴வதோ. ந ஹி தத்த² ஸத்தானங் ட²பெத்வா ஞாணேன ஆரம்மணகரணங் ஆக³திக³தியோ ஸம்ப⁴வந்தி, நாபி டி²திசுதூபபத்தியோ வதா³மி. ‘‘ததா³பஹ’’ந்திபி பாளி. தஸ்ஸத்தோ² – தம்பி ஆயதனங் கா³மந்தரதோ கா³மந்தரங் விய ந ஆக³ந்தப்³ப³தாய ந ஆக³தி, ந க³ந்தப்³ப³தாய ந க³தி, பத²வீபப்³ப³தாதி³ விய அபதிட்டா²னதாய ந டி²தி, அபச்சயத்தா வா உப்பாதா³பா⁴வோ, ததோ அமதஸபா⁴வத்தா சவனாபா⁴வோ, உப்பாத³னிரோதா⁴பா⁴வதோ சேவ தது³ப⁴யபரிச்சி²ன்னாய டி²தியா ச அபா⁴வதோ ந டி²திங் ந சுதிங் ந உபபத்திங் வதா³மி. கேவலங் பன தங் அரூபஸபா⁴வத்தா அபச்சயத்தா ச ந கத்த²சி பதிட்டி²தந்தி அப்பதிட்ட²ங். தத்த² பவத்தாபா⁴வதோ பவத்தப்படிபக்க²தோ ச அப்பவத்தங். அரூபஸபா⁴வத்தேபி வேத³னாத³யோ விய கஸ்ஸசிபி ஆரம்மணஸ்ஸ அனாலம்ப³னதோ உபத்த²ம்ப⁴னிரபெக்க²தோ ச அனாரம்மணமேவ தங் ‘‘ஆயதன’’ந்தி வுத்தங் நிப்³பா³னங். அயஞ்ச ஏவஸத்³தோ³ அப்பதிட்ட²மேவ அப்பவத்தமேவாதி பத³த்³வயேனபி யோஜேதப்³போ³ . ஏஸேவந்தோ து³க்க²ஸ்ஸாதி யதி³த³ங் ‘‘அப்பதிட்ட²’’ந்திஆதீ³ஹி வசனேஹி வண்ணிதங் தோ²மிதங் யதா²வுத்தலக்க²ணங் நிப்³பா³னங், ஏஸோ ஏவ ஸகலஸ்ஸ வட்டது³க்க²ஸ்ஸ அந்தோ பரியோஸானங் தத³தி⁴க³மே ஸதி ஸப்³ப³து³க்கா²பா⁴வதோ. தஸ்மா ‘‘து³க்க²ஸ்ஸ அந்தோ’’தி அயமேவ தஸ்ஸ ஸபா⁴வோதி த³ஸ்ஸேதி.
Tattha tatrāti tasmiṃ. Apisaddo samuccaye. Ahaṃ, bhikkhave, yattha saṅkhārapavatte kutoci kassaci āgatiṃ na vadāmi yathāpaccayaṃ tattha dhammamattassa uppajjanato. Evaṃ tasmimpi āyatane nibbāne kutoci āgatiṃ āgamanaṃ neva vadāmi āgantabbaṭṭhānatāya abhāvato. Na gatinti katthaci gamanaṃ na vadāmi gantabbaṭṭhānatāya abhāvato. Na hi tattha sattānaṃ ṭhapetvā ñāṇena ārammaṇakaraṇaṃ āgatigatiyo sambhavanti, nāpi ṭhiticutūpapattiyo vadāmi. ‘‘Tadāpaha’’ntipi pāḷi. Tassattho – tampi āyatanaṃ gāmantarato gāmantaraṃ viya na āgantabbatāya na āgati, na gantabbatāya na gati, pathavīpabbatādi viya apatiṭṭhānatāya na ṭhiti, apaccayattā vā uppādābhāvo, tato amatasabhāvattā cavanābhāvo, uppādanirodhābhāvato ceva tadubhayaparicchinnāya ṭhitiyā ca abhāvato na ṭhitiṃ na cutiṃ na upapattiṃ vadāmi. Kevalaṃ pana taṃ arūpasabhāvattā apaccayattā ca na katthaci patiṭṭhitanti appatiṭṭhaṃ. Tattha pavattābhāvato pavattappaṭipakkhato ca appavattaṃ. Arūpasabhāvattepi vedanādayo viya kassacipi ārammaṇassa anālambanato upatthambhanirapekkhato ca anārammaṇameva taṃ ‘‘āyatana’’nti vuttaṃ nibbānaṃ. Ayañca evasaddo appatiṭṭhameva appavattamevāti padadvayenapi yojetabbo . Esevanto dukkhassāti yadidaṃ ‘‘appatiṭṭha’’ntiādīhi vacanehi vaṇṇitaṃ thomitaṃ yathāvuttalakkhaṇaṃ nibbānaṃ, eso eva sakalassa vaṭṭadukkhassa anto pariyosānaṃ tadadhigame sati sabbadukkhābhāvato. Tasmā ‘‘dukkhassa anto’’ti ayameva tassa sabhāvoti dasseti.
பட²மஸுத்தவண்ணனா நிட்டி²தா.
Paṭhamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / உதா³னபாளி • Udānapāḷi / 1. பட²மனிப்³பா³னபடிஸங்யுத்தஸுத்தங் • 1. Paṭhamanibbānapaṭisaṃyuttasuttaṃ
