| Library / Tipiṭaka / તિપિટક • Tipiṭaka / સંયુત્તનિકાય • Saṃyuttanikāya |
૯. પઠમપજ્જુન્નધીતુસુત્તં
9. Paṭhamapajjunnadhītusuttaṃ
૩૯. એવં મે સુતં – એકં સમયં ભગવા વેસાલિયં વિહરતિ મહાવને કૂટાગારસાલાયં. અથ ખો કોકનદા પજ્જુન્નસ્સ ધીતા અભિક્કન્તાય રત્તિયા અભિક્કન્તવણ્ણા કેવલકપ્પં મહાવનં ઓભાસેત્વા યેન ભગવા તેનુપસઙ્કમિ; ઉપસઙ્કમિત્વા ભગવન્તં અભિવાદેત્વા એકમન્તં અટ્ઠાસિ. એકમન્તં ઠિતા ખો સા દેવતા કોકનદા પજ્જુન્નસ્સ ધીતા ભગવતો સન્તિકે ઇમા ગાથાયો અભાસિ –
39. Evaṃ me sutaṃ – ekaṃ samayaṃ bhagavā vesāliyaṃ viharati mahāvane kūṭāgārasālāyaṃ. Atha kho kokanadā pajjunnassa dhītā abhikkantāya rattiyā abhikkantavaṇṇā kevalakappaṃ mahāvanaṃ obhāsetvā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhitā kho sā devatā kokanadā pajjunnassa dhītā bhagavato santike imā gāthāyo abhāsi –
‘‘વેસાલિયં વને વિહરન્તં, અગ્ગં સત્તસ્સ સમ્બુદ્ધં;
‘‘Vesāliyaṃ vane viharantaṃ, aggaṃ sattassa sambuddhaṃ;
કોકનદાહમસ્મિ અભિવન્દે, કોકનદા પજ્જુન્નસ્સ ધીતા.
Kokanadāhamasmi abhivande, kokanadā pajjunnassa dhītā.
‘‘સુતમેવ પુરે આસિ, ધમ્મો ચક્ખુમતાનુબુદ્ધો;
‘‘Sutameva pure āsi, dhammo cakkhumatānubuddho;
સાહં દાનિ સક્ખિ જાનામિ, મુનિનો દેસયતો સુગતસ્સ.
Sāhaṃ dāni sakkhi jānāmi, munino desayato sugatassa.
‘‘યે કેચિ અરિયં ધમ્મં, વિગરહન્તા ચરન્તિ દુમ્મેધા;
‘‘Ye keci ariyaṃ dhammaṃ, vigarahantā caranti dummedhā;
ઉપેન્તિ રોરુવં ઘોરં, ચિરરત્તં દુક્ખં અનુભવન્તિ.
Upenti roruvaṃ ghoraṃ, cirarattaṃ dukkhaṃ anubhavanti.
‘‘યે ચ ખો અરિયે ધમ્મે, ખન્તિયા ઉપસમેન ઉપેતા;
‘‘Ye ca kho ariye dhamme, khantiyā upasamena upetā;
પહાય માનુસં દેહં, દેવકાય પરિપૂરેસ્સન્તી’’તિ.
Pahāya mānusaṃ dehaṃ, devakāya paripūressantī’’ti.
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૯. પઠમપજ્જુન્નધીતુસુત્તવણ્ણના • 9. Paṭhamapajjunnadhītusuttavaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૯. પઠમપજ્જુન્નધીતુસુત્તવણ્ણના • 9. Paṭhamapajjunnadhītusuttavaṇṇanā
