| Library / Tipiṭaka / તિપિટક • Tipiṭaka / સંયુત્તનિકાય (અટ્ઠકથા) • Saṃyuttanikāya (aṭṭhakathā) |
૯. પઠમપજ્જુન્નધીતુસુત્તવણ્ણના
9. Paṭhamapajjunnadhītusuttavaṇṇanā
૩૯. નવમે પજ્જુન્નસ્સ ધીતાતિ પજ્જુન્નસ્સ નામ વસ્સવલાહકદેવરઞ્ઞો ચાતુમહારાજિકસ્સ ધીતા. અભિવન્દેતિ ભગવા તુમ્હાકં પાદે વન્દામિ. ચક્ખુમતાતિ પઞ્ચહિ ચક્ખૂહિ ચક્ખુમન્તેન તથાગતેન. ધમ્મો અનુબુદ્ધોતિ, ‘‘ઇદં મયા પુબ્બે પરેસં સન્તિકે કેવલં સુતંયેવ આસી’’તિ વદતિ. સાહં દાનીતિ, સા અહં ઇદાનિ. સક્ખિ જાનામીતિ, પટિવેધવસેન પચ્ચક્ખમેવ જાનામિ. વિગરહન્તાતિ, ‘‘હીનક્ખરપદબ્યઞ્જનો’’તિ વા ‘‘અનિય્યાનિકો’’તિ વા એવં ગરહન્તા. રોરુવન્તિ, દ્વે રોરુવા – ધૂમરોરુવો ચ જાલરોરુવો ચ. તત્થ ધૂમરોરુવો વિસું હોતિ, જાલરોરુવોતિ પન અવીચિમહાનિરયસ્સેવેતં નામં. તત્થ હિ સત્તા અગ્ગિમ્હિ જલન્તે જલન્તે પુનપ્પુનં રવં રવન્તિ, તસ્મા સો ‘‘રોરુવો’’તિ વુચ્ચતિ. ઘોરન્તિ દારુણં. ખન્તિયા ઉપસમેન ઉપેતાતિ રુચ્ચિત્વા ખમાપેત્વા ગહણખન્તિયા ચ રાગાદિઉપસમેન ચ ઉપેતાતિ. નવમં.
39. Navame pajjunnassa dhītāti pajjunnassa nāma vassavalāhakadevarañño cātumahārājikassa dhītā. Abhivandeti bhagavā tumhākaṃ pāde vandāmi. Cakkhumatāti pañcahi cakkhūhi cakkhumantena tathāgatena. Dhammo anubuddhoti, ‘‘idaṃ mayā pubbe paresaṃ santike kevalaṃ sutaṃyeva āsī’’ti vadati. Sāhaṃ dānīti, sā ahaṃ idāni. Sakkhi jānāmīti, paṭivedhavasena paccakkhameva jānāmi. Vigarahantāti, ‘‘hīnakkharapadabyañjano’’ti vā ‘‘aniyyāniko’’ti vā evaṃ garahantā. Roruvanti, dve roruvā – dhūmaroruvo ca jālaroruvo ca. Tattha dhūmaroruvo visuṃ hoti, jālaroruvoti pana avīcimahānirayassevetaṃ nāmaṃ. Tattha hi sattā aggimhi jalante jalante punappunaṃ ravaṃ ravanti, tasmā so ‘‘roruvo’’ti vuccati. Ghoranti dāruṇaṃ. Khantiyā upasamena upetāti ruccitvā khamāpetvā gahaṇakhantiyā ca rāgādiupasamena ca upetāti. Navamaṃ.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૯. પઠમપજ્જુન્નધીતુસુત્તં • 9. Paṭhamapajjunnadhītusuttaṃ
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૯. પઠમપજ્જુન્નધીતુસુત્તવણ્ણના • 9. Paṭhamapajjunnadhītusuttavaṇṇanā
