| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
8. பட²மபரிஹானிஸுத்தங்
8. Paṭhamaparihānisuttaṃ
28. ஏவங் மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘ஸத்திமே, பி⁴க்க²வே, த⁴ம்மா ஸேக²ஸ்ஸ பி⁴க்கு²னோ பரிஹானாய ஸங்வத்தந்தி. கதமே ஸத்த? கம்மாராமதா, ப⁴ஸ்ஸாராமதா, நித்³தா³ராமதா, ஸங்க³ணிகாராமதா, இந்த்³ரியேஸு அகு³த்தத்³வாரதா, போ⁴ஜனே அமத்தஞ்ஞுதா, ஸந்தி கோ² பன ஸங்கே⁴ ஸங்க⁴கரணீயானி; தத்ர ஸேகோ² பி⁴க்கு² 1 இதி படிஸஞ்சிக்க²தி – ‘ஸந்தி கோ² பன ஸங்கே⁴ தே²ரா 2 ரத்தஞ்ஞூ சிரபப்³ப³ஜிதா பா⁴ரவாஹினோ, தே 3 தேன பஞ்ஞாயிஸ்ஸந்தீ’தி அத்தனா தேஸு யோக³ங் 4 ஆபஜ்ஜதி. இமே கோ², பி⁴க்க²வே, ஸத்த த⁴ம்மா ஸேக²ஸ்ஸ பி⁴க்கு²னோ பரிஹானாய ஸங்வத்தந்தி.
28. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi – ‘‘sattime, bhikkhave, dhammā sekhassa bhikkhuno parihānāya saṃvattanti. Katame satta? Kammārāmatā, bhassārāmatā, niddārāmatā, saṅgaṇikārāmatā, indriyesu aguttadvāratā, bhojane amattaññutā, santi kho pana saṅghe saṅghakaraṇīyāni; tatra sekho bhikkhu 5 iti paṭisañcikkhati – ‘santi kho pana saṅghe therā 6 rattaññū cirapabbajitā bhāravāhino, te 7 tena paññāyissantī’ti attanā tesu yogaṃ 8 āpajjati. Ime kho, bhikkhave, satta dhammā sekhassa bhikkhuno parihānāya saṃvattanti.
‘‘ஸத்திமே, பி⁴க்க²வே, த⁴ம்மா ஸேக²ஸ்ஸ பி⁴க்கு²னோ அபரிஹானாய ஸங்வத்தந்தி. கதமே ஸத்த? ந கம்மாராமதா, ந ப⁴ஸ்ஸாராமதா, ந நித்³தா³ராமதா, ந ஸங்க³ணிகாராமதா, இந்த்³ரியேஸு கு³த்தத்³வாரதா, போ⁴ஜனே மத்தஞ்ஞுதா, ஸந்தி கோ² பன ஸங்கே⁴ ஸங்க⁴கரணீயானி; தத்ர ஸேகோ² பி⁴க்கு² இதி படிஸஞ்சிக்க²தி – ‘ஸந்தி கோ² பன ஸங்கே⁴ தே²ரா ரத்தஞ்ஞூ சிரபப்³ப³ஜிதா பா⁴ரவாஹினோ, தே தேன பஞ்ஞாயிஸ்ஸந்தீ’தி அத்தனா ந தேஸு யோக³ங் ஆபஜ்ஜதி. இமே கோ², பி⁴க்க²வே, ஸத்த த⁴ம்மா ஸேக²ஸ்ஸ பி⁴க்கு²னோ அபரிஹானாய ஸங்வத்தந்தீ’’தி. அட்ட²மங்.
‘‘Sattime, bhikkhave, dhammā sekhassa bhikkhuno aparihānāya saṃvattanti. Katame satta? Na kammārāmatā, na bhassārāmatā, na niddārāmatā, na saṅgaṇikārāmatā, indriyesu guttadvāratā, bhojane mattaññutā, santi kho pana saṅghe saṅghakaraṇīyāni; tatra sekho bhikkhu iti paṭisañcikkhati – ‘santi kho pana saṅghe therā rattaññū cirapabbajitā bhāravāhino, te tena paññāyissantī’ti attanā na tesu yogaṃ āpajjati. Ime kho, bhikkhave, satta dhammā sekhassa bhikkhuno aparihānāya saṃvattantī’’ti. Aṭṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 8. பட²மபரிஹானிஸுத்தவண்ணனா • 8. Paṭhamaparihānisuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 7-11. ஸஞ்ஞாஸுத்தாதி³வண்ணனா • 7-11. Saññāsuttādivaṇṇanā
