| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
7. பட²மபடிஸம்பி⁴தா³ஸுத்தங்
7. Paṭhamapaṭisambhidāsuttaṃ
38. ‘‘ஸத்தஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² நசிரஸ்ஸேவ சதஸ்ஸோ படிஸம்பி⁴தா³ ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரெய்ய. கதமேஹி ஸத்தஹி? இத⁴, பி⁴க்க²வே, பி⁴க்கு² ‘இத³ங் மே சேதஸோ லீனத்த’ந்தி யதா²பூ⁴தங் பஜானாதி; அஜ்ஜ²த்தங் ஸங்கி²த்தங் வா சித்தங் ‘அஜ்ஜ²த்தங் மே ஸங்கி²த்தங் சித்த’ந்தி யதா²பூ⁴தங் பஜானாதி; ப³ஹித்³தா⁴ விக்கி²த்தங் வா சித்தங் ‘ப³ஹித்³தா⁴ மே விக்கி²த்தங் சித்த’ந்தி யதா²பூ⁴தங் பஜானாதி; தஸ்ஸ விதி³தா வேத³னா உப்பஜ்ஜந்தி, விதி³தா உபட்ட²ஹந்தி, விதி³தா அப்³ப⁴த்த²ங் க³ச்ச²ந்தி; விதி³தா ஸஞ்ஞா உப்பஜ்ஜந்தி, விதி³தா உபட்ட²ஹந்தி, விதி³தா அப்³ப⁴த்த²ங் க³ச்ச²ந்தி; விதி³தா விதக்கா உப்பஜ்ஜந்தி, விதி³தா உபட்ட²ஹந்தி, விதி³தா அப்³ப⁴த்த²ங் க³ச்ச²ந்தி; ஸப்பாயாஸப்பாயேஸு கோ² பனஸ்ஸ த⁴ம்மேஸு ஹீனப்பணீதேஸு கண்ஹஸுக்கஸப்பதிபா⁴கே³ஸு நிமித்தங் ஸுக்³க³ஹிதங் ஹோதி ஸுமனஸிகதங் ஸூபதா⁴ரிதங் ஸுப்படிவித்³த⁴ங் பஞ்ஞாய. இமேஹி கோ², பி⁴க்க²வே, ஸத்தஹி த⁴ம்மேஹி ஸமன்னாக³தோ பி⁴க்கு² நசிரஸ்ஸேவ சதஸ்ஸோ படிஸம்பி⁴தா³ ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரெய்யா’’தி. ஸத்தமங்.
38. ‘‘Sattahi, bhikkhave, dhammehi samannāgato bhikkhu nacirasseva catasso paṭisambhidā sayaṃ abhiññā sacchikatvā upasampajja vihareyya. Katamehi sattahi? Idha, bhikkhave, bhikkhu ‘idaṃ me cetaso līnatta’nti yathābhūtaṃ pajānāti; ajjhattaṃ saṃkhittaṃ vā cittaṃ ‘ajjhattaṃ me saṃkhittaṃ citta’nti yathābhūtaṃ pajānāti; bahiddhā vikkhittaṃ vā cittaṃ ‘bahiddhā me vikkhittaṃ citta’nti yathābhūtaṃ pajānāti; tassa viditā vedanā uppajjanti, viditā upaṭṭhahanti, viditā abbhatthaṃ gacchanti; viditā saññā uppajjanti, viditā upaṭṭhahanti, viditā abbhatthaṃ gacchanti; viditā vitakkā uppajjanti, viditā upaṭṭhahanti, viditā abbhatthaṃ gacchanti; sappāyāsappāyesu kho panassa dhammesu hīnappaṇītesu kaṇhasukkasappatibhāgesu nimittaṃ suggahitaṃ hoti sumanasikataṃ sūpadhāritaṃ suppaṭividdhaṃ paññāya. Imehi kho, bhikkhave, sattahi dhammehi samannāgato bhikkhu nacirasseva catasso paṭisambhidā sayaṃ abhiññā sacchikatvā upasampajja vihareyyā’’ti. Sattamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 7. பட²மபடிஸம்பி⁴தா³ஸுத்தவண்ணனா • 7. Paṭhamapaṭisambhidāsuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 6-11. து³தியமித்தஸுத்தாதி³வண்ணனா • 6-11. Dutiyamittasuttādivaṇṇanā
