| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
9. பட²மராக³ஸுத்தவண்ணனா
9. Paṭhamarāgasuttavaṇṇanā
68. நவமே யஸ்ஸ கஸ்ஸசீதி அனியமிதவசனங், தஸ்மா யஸ்ஸ கஸ்ஸசி புக்³க³லஸ்ஸ க³ஹட்ட²ஸ்ஸ வா பப்³ப³ஜிதஸ்ஸ வா. ராகோ³ அப்பஹீனோதி ரஞ்ஜனட்டே²ன ராகோ³ ஸமுச்சே²த³வஸேன ந பஹீனோ, மக்³கே³ன அனுப்பத்தித⁴ம்மதங் ந ஆபாதி³தோ. தோ³ஸமோஹேஸுபி ஏஸேவ நயோ. தத்த² அபாயக³மனீயா ராக³தோ³ஸமோஹா பட²மமக்³கே³ன, ஓளாரிகா காமராக³தோ³ஸா து³தியமக்³கே³ன, தேயேவ அனவஸேஸா ததியமக்³கே³ன, ப⁴வராகோ³ அவஸிட்ட²மோஹோ ச சதுத்த²மக்³கே³ன பஹீயந்தி. ஏவமேதேஸு பஹீயந்தேஸு ததே³கட்ட²தோ ஸப்³பே³பி கிலேஸா பஹீயந்தேவ. ஏவமேதே ராகா³த³யோ யஸ்ஸ கஸ்ஸசி பி⁴க்கு²ஸ்ஸ வா பி⁴க்கு²னியா வா உபாஸகஸ்ஸ வா உபாஸிகாய வா மக்³கே³ன அப்பஹீனா. ப³த்³தோ⁴ மாரஸ்ஸாதி கிலேஸமாரேன ப³த்³தோ⁴தி வுச்சதி. யத³க்³கே³ன ச கிலேஸமாரேன ப³த்³தோ⁴, தத³க்³கே³ன அபி⁴ஸங்கா²ரமாராதீ³ஹிபி ப³த்³தோ⁴யேவ ஹோதி. படிமுக்கஸ்ஸ மாரபாஸோதி படிமுக்கோ அஸ்ஸ அனேன அப்பஹீனகிலேஸேன புக்³க³லேன தாயேவ அப்பஹீனகிலேஸதாய மாரபாஸஸங்கா²தோ கிலேஸோ அத்தனோ சித்தஸந்தானே படிமுக்கோ பவேஸிதோ, தேன ஸயங் ப³ந்தா⁴பிதோதி அத்தோ². அத² வா படிமுக்கோ அஸ்ஸ ப⁴வெய்ய மாரபாஸோ. ஸுக்கபக்கே² ஓமுக்கஸ்ஸாதி அவமுக்கோ மோசிதோ அபனீதோ அஸ்ஸ. ஸேஸங் வுத்தவிபரியாயேன வேதி³தப்³ப³ங்.
68. Navame yassa kassacīti aniyamitavacanaṃ, tasmā yassa kassaci puggalassa gahaṭṭhassa vā pabbajitassa vā. Rāgo appahīnoti rañjanaṭṭhena rāgo samucchedavasena na pahīno, maggena anuppattidhammataṃ na āpādito. Dosamohesupi eseva nayo. Tattha apāyagamanīyā rāgadosamohā paṭhamamaggena, oḷārikā kāmarāgadosā dutiyamaggena, teyeva anavasesā tatiyamaggena, bhavarāgo avasiṭṭhamoho ca catutthamaggena pahīyanti. Evametesu pahīyantesu tadekaṭṭhato sabbepi kilesā pahīyanteva. Evamete rāgādayo yassa kassaci bhikkhussa vā bhikkhuniyā vā upāsakassa vā upāsikāya vā maggena appahīnā. Baddho mārassāti kilesamārena baddhoti vuccati. Yadaggena ca kilesamārena baddho, tadaggena abhisaṅkhāramārādīhipi baddhoyeva hoti. Paṭimukkassa mārapāsoti paṭimukko assa anena appahīnakilesena puggalena tāyeva appahīnakilesatāya mārapāsasaṅkhāto kileso attano cittasantāne paṭimukko pavesito, tena sayaṃ bandhāpitoti attho. Atha vā paṭimukko assa bhaveyya mārapāso. Sukkapakkhe omukkassāti avamukko mocito apanīto assa. Sesaṃ vuttavipariyāyena veditabbaṃ.
இத⁴ கா³தா² ஸுக்கபக்க²வஸேனேவ ஆக³தா. தத்ராயங் ஸங்கே²பத்தோ² – யஸ்ஸ அரியபுக்³க³லஸ்ஸ ராக³தோ³ஸாவிஜ்ஜா விராஜிதா அக்³க³மக்³கே³ன நிரோதி⁴தா, தங் பா⁴விதகாயஸீலசித்தபஞ்ஞதாய பா⁴விதத்தேஸு அரஹந்தேஸு அஞ்ஞதரங் அப்³ப⁴ந்தரங் ஏகங் ப்³ரஹ்மபூ⁴தங் ப்³ரஹ்மங் வா ஸெட்ட²ங் அரஹத்தப²லங் பத்தங். யதா² அஞ்ஞே கீ²ணாஸவா புப்³பூ³பனிஸ்ஸயஸம்பத்திஸமன்னாக³தா ஹுத்வா ஆக³தா, யதா² ச தே அந்தத்³வயரஹிதாய ஸீலஸமாதி⁴பஞ்ஞாக்க²ந்த⁴ஸஹக³தாய மஜ்ஜி²மாய படிபதா³ய நிப்³பா³னங் க³தா அதி⁴க³தா. யதா² வா தே க²ந்தா⁴தீ³னங் தத²லக்க²ணங் யாதா²வதோ படிவிஜ்ஜி²ங்ஸு, யதா² ச தே தத²த⁴ம்மே து³க்கா²த³யோ அவிபரீததோ அப்³ப⁴ஞ்ஞிங்ஸு, ரூபாதி³கே ச விஸயே யதா² தே தி³ட்ட²மத்தாதி³வஸேனேவ பஸ்ஸிங்ஸு, யதா² வா பன தே அட்ட² அனரியவோஹாரே வஜ்ஜெத்வா அரியவோஹாரவஸேனேவ பவத்தவாசா, வாசானுரூபஞ்ச பவத்தகாயா, காயானுரூபஞ்ச பவத்தவாசா, ததா² அயம்பி அரியபுக்³க³லோதி ததா²க³தங், சதுஸச்சபு³த்³த⁴தாய பு³த்³த⁴ங், புக்³க³லவேரங் கிலேஸவேரங் அத்தானுவாதா³தி³ப⁴யஞ்ச அதிக்கந்தந்தி வேரப⁴யாதீதங். ஸப்³பே³ஸங் கிலேஸாபி⁴ஸங்கா²ராதீ³னங் பஹீனத்தா ஸப்³ப³ப்பஹாயினங் பு³த்³தா⁴த³யோ அரியா ஆஹு கதெ²ந்தி கித்தெந்தீதி.
Idha gāthā sukkapakkhavaseneva āgatā. Tatrāyaṃ saṅkhepattho – yassa ariyapuggalassa rāgadosāvijjā virājitā aggamaggena nirodhitā, taṃ bhāvitakāyasīlacittapaññatāya bhāvitattesu arahantesu aññataraṃ abbhantaraṃ ekaṃ brahmabhūtaṃ brahmaṃ vā seṭṭhaṃ arahattaphalaṃ pattaṃ. Yathā aññe khīṇāsavā pubbūpanissayasampattisamannāgatā hutvā āgatā, yathā ca te antadvayarahitāya sīlasamādhipaññākkhandhasahagatāya majjhimāya paṭipadāya nibbānaṃ gatā adhigatā. Yathā vā te khandhādīnaṃ tathalakkhaṇaṃ yāthāvato paṭivijjhiṃsu, yathā ca te tathadhamme dukkhādayo aviparītato abbhaññiṃsu, rūpādike ca visaye yathā te diṭṭhamattādivaseneva passiṃsu, yathā vā pana te aṭṭha anariyavohāre vajjetvā ariyavohāravaseneva pavattavācā, vācānurūpañca pavattakāyā, kāyānurūpañca pavattavācā, tathā ayampi ariyapuggaloti tathāgataṃ, catusaccabuddhatāya buddhaṃ, puggalaveraṃ kilesaveraṃ attānuvādādibhayañca atikkantanti verabhayātītaṃ. Sabbesaṃ kilesābhisaṅkhārādīnaṃ pahīnattā sabbappahāyinaṃ buddhādayo ariyā āhu kathenti kittentīti.
நவமஸுத்தவண்ணனா நிட்டி²தா.
Navamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 9. பட²மராக³ஸுத்தங் • 9. Paṭhamarāgasuttaṃ
