| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
3. பட²மரூபாராமஸுத்தவண்ணனா
3. Paṭhamarūpārāmasuttavaṇṇanā
136. ஸம்முதி³தா ஸம்மோத³ப்பத்தா, பமோதி³தா ஸஞ்ஜாதபமோதா³. து³க்கா²தி து³க்க²வந்தோ ஸஞ்ஜாதது³க்கா². தேனாஹ ‘‘து³க்கி²தா’’தி. ஸுக²ங் ஏதஸ்ஸ அத்தீ²தி ஸுகோ², ஸுகீ². தேனாஹ ‘‘ஸுகி²தோ’’தி. யத்தகா ரூபாத³யோ த⁴ம்மா லோகே அத்தீ²தி வுச்சதி. பஸ்ஸந்தானந்தி ஸச்சபடிவேதே⁴ன ஸம்மதே³வ பஸ்ஸந்தானங். ‘‘பச்சனீகங் ஹோதீ’’தி வத்வா தங் பச்சனீகபா⁴வங் த³ஸ்ஸேதுங் ‘‘லோகோ ஹீ’’திஆதி³ வுத்தங். அஸுபா⁴தி ‘‘ஆஹூ’’திபத³ங் ஆனெத்வா ஸம்ப³ந்தோ⁴. ஸப்³ப³மேதந்தி ‘‘ஸுக²ங் தி³ட்ட²மரியேபி⁴…பே॰… தத³ரியா ஸுக²தோ விதூ³’’தி ச வுத்தங். ஸப்³ப³மேதங் நிப்³பா³னமேவ ஸந்தா⁴ய வுத்தங். நிப்³பா³னமேவ ஹி ஏகந்ததோ ஸுக²ங் நாம.
136.Sammuditā sammodappattā, pamoditā sañjātapamodā. Dukkhāti dukkhavanto sañjātadukkhā. Tenāha ‘‘dukkhitā’’ti. Sukhaṃ etassa atthīti sukho, sukhī. Tenāha ‘‘sukhito’’ti. Yattakā rūpādayo dhammā loke atthīti vuccati. Passantānanti saccapaṭivedhena sammadeva passantānaṃ. ‘‘Paccanīkaṃ hotī’’ti vatvā taṃ paccanīkabhāvaṃ dassetuṃ ‘‘loko hī’’tiādi vuttaṃ. Asubhāti ‘‘āhū’’tipadaṃ ānetvā sambandho. Sabbametanti ‘‘sukhaṃ diṭṭhamariyebhi…pe… tadariyā sukhato vidū’’ti ca vuttaṃ. Sabbametaṃ nibbānameva sandhāya vuttaṃ. Nibbānameva hi ekantato sukhaṃ nāma.
பஞ்சனவுதிபாஸண்டி³னோ தேஸஞ்ச பாஸண்டி³பா⁴வோ பபஞ்சஸூத³னிட்ட²கதா²யங் பகாஸிதோ ஏவ. கிலேஸனீவரணேன நிவுதானந்தி கிலேஸக²ந்தா⁴ கிலேஸனீவரணங், தேன நிவாரிதானங். நிப்³பா³னத³ஸ்ஸனங் நாம அரியமக்³கோ³, தேன தஸ்ஸ படிவிஜ்ஜ²னஞ்ச காளமேக⁴அவச்சா²தி³தங் விய சந்த³மண்ட³லங்.
Pañcanavutipāsaṇḍino tesañca pāsaṇḍibhāvo papañcasūdaniṭṭhakathāyaṃ pakāsito eva. Kilesanīvaraṇena nivutānanti kilesakhandhā kilesanīvaraṇaṃ, tena nivāritānaṃ. Nibbānadassanaṃ nāma ariyamaggo, tena tassa paṭivijjhanañca kāḷameghaavacchāditaṃ viya candamaṇḍalaṃ.
பரிச்சி²ந்தி³த்வாதி அஸுப⁴பா⁴வபரிச்சி²ந்த³னேன ஸம்மாவிஞ்ஞாணத³ஸ்ஸனேன ச பரிச்சி²ந்தி³த்வா. மக்³க³த⁴ம்மஸ்ஸாதி அரியமக்³க³த⁴ம்மஸ்ஸ.
Paricchinditvāti asubhabhāvaparicchindanena sammāviññāṇadassanena ca paricchinditvā. Maggadhammassāti ariyamaggadhammassa.
அனுபன்னேஹீதி அனு அனு அவிஹாய படிபன்னேஹி. கோ நு அஞ்ஞோ ஜானிதுங் அரஹதி, அஞ்ஞோ ந ஜானாதீதி த³ஸ்ஸேதி.
Anupannehīti anu anu avihāya paṭipannehi. Ko nu añño jānituṃ arahati, añño na jānātīti dasseti.
பட²மரூபாராமஸுத்தவண்ணனா நிட்டி²தா.
Paṭhamarūpārāmasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. பட²மரூபாராமஸுத்தங் • 3. Paṭhamarūpārāmasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3. பட²மரூபாராமஸுத்தவண்ணனா • 3. Paṭhamarūpārāmasuttavaṇṇanā
