| Library / Tipiṭaka / તિપિટક • Tipiṭaka / સંયુત્તનિકાય (ટીકા) • Saṃyuttanikāya (ṭīkā) |
૩. પઠમરૂપારામસુત્તવણ્ણના
3. Paṭhamarūpārāmasuttavaṇṇanā
૧૩૬. સમ્મુદિતા સમ્મોદપ્પત્તા, પમોદિતા સઞ્જાતપમોદા. દુક્ખાતિ દુક્ખવન્તો સઞ્જાતદુક્ખા. તેનાહ ‘‘દુક્ખિતા’’તિ. સુખં એતસ્સ અત્થીતિ સુખો, સુખી. તેનાહ ‘‘સુખિતો’’તિ. યત્તકા રૂપાદયો ધમ્મા લોકે અત્થીતિ વુચ્ચતિ. પસ્સન્તાનન્તિ સચ્ચપટિવેધેન સમ્મદેવ પસ્સન્તાનં. ‘‘પચ્ચનીકં હોતી’’તિ વત્વા તં પચ્ચનીકભાવં દસ્સેતું ‘‘લોકો હી’’તિઆદિ વુત્તં. અસુભાતિ ‘‘આહૂ’’તિપદં આનેત્વા સમ્બન્ધો. સબ્બમેતન્તિ ‘‘સુખં દિટ્ઠમરિયેભિ…પે॰… તદરિયા સુખતો વિદૂ’’તિ ચ વુત્તં. સબ્બમેતં નિબ્બાનમેવ સન્ધાય વુત્તં. નિબ્બાનમેવ હિ એકન્તતો સુખં નામ.
136.Sammuditā sammodappattā, pamoditā sañjātapamodā. Dukkhāti dukkhavanto sañjātadukkhā. Tenāha ‘‘dukkhitā’’ti. Sukhaṃ etassa atthīti sukho, sukhī. Tenāha ‘‘sukhito’’ti. Yattakā rūpādayo dhammā loke atthīti vuccati. Passantānanti saccapaṭivedhena sammadeva passantānaṃ. ‘‘Paccanīkaṃ hotī’’ti vatvā taṃ paccanīkabhāvaṃ dassetuṃ ‘‘loko hī’’tiādi vuttaṃ. Asubhāti ‘‘āhū’’tipadaṃ ānetvā sambandho. Sabbametanti ‘‘sukhaṃ diṭṭhamariyebhi…pe… tadariyā sukhato vidū’’ti ca vuttaṃ. Sabbametaṃ nibbānameva sandhāya vuttaṃ. Nibbānameva hi ekantato sukhaṃ nāma.
પઞ્ચનવુતિપાસણ્ડિનો તેસઞ્ચ પાસણ્ડિભાવો પપઞ્ચસૂદનિટ્ઠકથાયં પકાસિતો એવ. કિલેસનીવરણેન નિવુતાનન્તિ કિલેસખન્ધા કિલેસનીવરણં, તેન નિવારિતાનં. નિબ્બાનદસ્સનં નામ અરિયમગ્ગો, તેન તસ્સ પટિવિજ્ઝનઞ્ચ કાળમેઘઅવચ્છાદિતં વિય ચન્દમણ્ડલં.
Pañcanavutipāsaṇḍino tesañca pāsaṇḍibhāvo papañcasūdaniṭṭhakathāyaṃ pakāsito eva. Kilesanīvaraṇena nivutānanti kilesakhandhā kilesanīvaraṇaṃ, tena nivāritānaṃ. Nibbānadassanaṃ nāma ariyamaggo, tena tassa paṭivijjhanañca kāḷameghaavacchāditaṃ viya candamaṇḍalaṃ.
પરિચ્છિન્દિત્વાતિ અસુભભાવપરિચ્છિન્દનેન સમ્માવિઞ્ઞાણદસ્સનેન ચ પરિચ્છિન્દિત્વા. મગ્ગધમ્મસ્સાતિ અરિયમગ્ગધમ્મસ્સ.
Paricchinditvāti asubhabhāvaparicchindanena sammāviññāṇadassanena ca paricchinditvā. Maggadhammassāti ariyamaggadhammassa.
અનુપન્નેહીતિ અનુ અનુ અવિહાય પટિપન્નેહિ. કો નુ અઞ્ઞો જાનિતું અરહતિ, અઞ્ઞો ન જાનાતીતિ દસ્સેતિ.
Anupannehīti anu anu avihāya paṭipannehi. Ko nu añño jānituṃ arahati, añño na jānātīti dasseti.
પઠમરૂપારામસુત્તવણ્ણના નિટ્ઠિતા.
Paṭhamarūpārāmasuttavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૩. પઠમરૂપારામસુત્તં • 3. Paṭhamarūpārāmasuttaṃ
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૩. પઠમરૂપારામસુત્તવણ્ણના • 3. Paṭhamarūpārāmasuttavaṇṇanā
