| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
2. பட²மஸங்கி²த்தஸுத்தவண்ணனா
2. Paṭhamasaṃkhittasuttavaṇṇanā
482. இந்த்³ரியானங் திக்கா²தி³பா⁴வோ விபஸ்ஸனாவஸேன வா மக்³க³வஸேன வா ப²லவஸேன வா க³ஹேதப்³போ³தி வுத்தங் ‘‘ததோதி…பே॰… வேதி³தப்³ப³’’ந்தி. நனு செத்த² முது³பா⁴வோ ஏவ பாளியங் க³ஹிதோதி? ஸச்சமேதங், தங் பன திக்க²பா⁴வே அஸதி ந ஹோதி திக்கா²தி³பா⁴வோதி வுத்தங். யதோ ஹி அயங் முது³, இதோ தங் திக்க²ந்தி வத்தப்³ப³தங் லப⁴தி அபெக்கா²ஸித்³த⁴த்தா திக்க²முது³பா⁴வானங் பாராபாரங் விய. இதா³னி ‘‘ததோ’’திஆதி³னா ஸங்கே²பதோ வுத்தமத்த²ங் வித்தா²ரதோ த³ஸ்ஸேதுங் ‘‘ஸமத்தானீ’’திஆதி³ வுத்தங். தத்த² ஸமத்தானீதி ஸம்பன்னானி. இதரங் தஸ்ஸேவ வேவசனங். ஸமத்தானீதி வா பரியத்தானி, ஸமத்தானீதி அத்தோ². ‘‘ததோ முது³தரானி த⁴ம்மானுஸாரீமக்³க³ஸ்ஸா’’தி கஸ்மா வுத்தங்? ததோதி ஹி ஸோதாபத்திமக்³க³விபஸ்ஸனிந்த்³ரியானி அதி⁴ப்பேதானியேவ, ‘‘ததோ முது³தரானீ’’தி வுத்தபட²மமக்³கோ³ த⁴ம்மானுஸாரீ வா ஸியா ஸத்³தா⁴னுஸாரீ வாதி ப்³யபி⁴சரதி? நாயங் தோ³ஸோ, ஸோதாபத்திமக்³கே³கதே³ஸவஸேனேவ லத்³த⁴ப்³ப³பட²மமக்³கா³பெக்கா²ய விபஸ்ஸனாய விபா⁴க³ஸ்ஸ அதி⁴ப்பேதத்தா. யோ ஹி ஸோதாபன்னோ ஹுத்வா இரியாபத²ங் அகோபெத்வா யதா²னிஸின்னோவ ஸகதா³கா³மிமக்³க³ங் பாபுணாதி, தஸ்ஸ விபஸ்ஸனிந்த்³ரியானி ஸந்தா⁴ய அவிபா⁴கே³ன வுத்தங் – ‘‘ததோ முது³தரானி ஸோதாபத்திமக்³க³ஸ்ஸ விபஸ்ஸனிந்த்³ரியானி நாமா’’தி. யோ பன ஸோதாபன்னோ ஹுத்வா காலந்தரேன ஸகதா³கா³மீ ஹோதி, தஸ்ஸ ஸோதாபத்திமக்³க³த்தா²ய பவத்தானி விபஸ்ஸனிந்த்³ரியானி நாம ஹொந்தி. ஸோ சே த⁴ம்மானுஸாரீகொ³த்தோ, தஸ்ஸ யதா²வுத்தவிபஸ்ஸனிந்த்³ரியதோ முது³தரானீதி ‘‘ததோ முது³தரானி த⁴ம்மானுஸாரீமக்³க³ஸ்ஸா’’தி வுத்தங். விபஸ்ஸனிந்த்³ரியானி நாமாதி ஆனெத்வா ஸம்ப³ந்தோ⁴. த⁴ம்மானுஸாரீவிபஸ்ஸனிந்த்³ரியதோ ஸத்³தா⁴னுஸாரீவிபஸ்ஸனிந்த்³ரியானங் முது³பா⁴வஸ்ஸ காரணங் ஸயமேவ வக்க²தி. த⁴ம்மேன பஞ்ஞாய மக்³க³ஸோதங் அனுஸ்ஸரதீதி த⁴ம்மானுஸாரீ, பஞ்ஞுத்தரோ அரியோ. ஸத்³தா⁴ய மக்³க³ஸோதங் அனுஸ்ஸரதீதி ஸத்³தா⁴னுஸாரீ, ஸத்³து⁴த்தரோ அரியோ.
482. Indriyānaṃ tikkhādibhāvo vipassanāvasena vā maggavasena vā phalavasena vā gahetabboti vuttaṃ ‘‘tatoti…pe… veditabba’’nti. Nanu cettha mudubhāvo eva pāḷiyaṃ gahitoti? Saccametaṃ, taṃ pana tikkhabhāve asati na hoti tikkhādibhāvoti vuttaṃ. Yato hi ayaṃ mudu, ito taṃ tikkhanti vattabbataṃ labhati apekkhāsiddhattā tikkhamudubhāvānaṃ pārāpāraṃ viya. Idāni ‘‘tato’’tiādinā saṅkhepato vuttamatthaṃ vitthārato dassetuṃ ‘‘samattānī’’tiādi vuttaṃ. Tattha samattānīti sampannāni. Itaraṃ tasseva vevacanaṃ. Samattānīti vā pariyattāni, samattānīti attho. ‘‘Tato mudutarāni dhammānusārīmaggassā’’ti kasmā vuttaṃ? Tatoti hi sotāpattimaggavipassanindriyāni adhippetāniyeva, ‘‘tato mudutarānī’’ti vuttapaṭhamamaggo dhammānusārī vā siyā saddhānusārī vāti byabhicarati? Nāyaṃ doso, sotāpattimaggekadesavaseneva laddhabbapaṭhamamaggāpekkhāya vipassanāya vibhāgassa adhippetattā. Yo hi sotāpanno hutvā iriyāpathaṃ akopetvā yathānisinnova sakadāgāmimaggaṃ pāpuṇāti, tassa vipassanindriyāni sandhāya avibhāgena vuttaṃ – ‘‘tato mudutarāni sotāpattimaggassa vipassanindriyāni nāmā’’ti. Yo pana sotāpanno hutvā kālantarena sakadāgāmī hoti, tassa sotāpattimaggatthāya pavattāni vipassanindriyāni nāma honti. So ce dhammānusārīgotto, tassa yathāvuttavipassanindriyato mudutarānīti ‘‘tato mudutarāni dhammānusārīmaggassā’’ti vuttaṃ. Vipassanindriyāni nāmāti ānetvā sambandho. Dhammānusārīvipassanindriyato saddhānusārīvipassanindriyānaṃ mudubhāvassa kāraṇaṃ sayameva vakkhati. Dhammena paññāya maggasotaṃ anussaratīti dhammānusārī, paññuttaro ariyo. Saddhāya maggasotaṃ anussaratīti saddhānusārī, saddhuttaro ariyo.
ஏவங் விபஸ்ஸனாவஸேன த³ஸ்ஸெத்வா மக்³க³வஸேன த³ஸ்ஸேதுங் ‘‘ததா²’’திஆதி³ ஆரத்³த⁴ங். ஸம்பயோக³தோ ஸபா⁴வதோ ச அரஹத்தமக்³க³பரியாபன்னானி அரஹத்தமக்³கி³ந்த்³ரியானி. அரஹத்தப²லிந்த்³ரியானீதி எத்தா²பி ஏஸேவ நயோ.
Evaṃ vipassanāvasena dassetvā maggavasena dassetuṃ ‘‘tathā’’tiādi āraddhaṃ. Sampayogato sabhāvato ca arahattamaggapariyāpannāni arahattamaggindriyāni. Arahattaphalindriyānīti etthāpi eseva nayo.
இதா³னி ப²லவஸேன த³ஸ்ஸேதுங் ‘‘ஸமத்தானி பரிபுண்ணானீ’’திஆதி³ வுத்தங். ஸோதாபத்திமக்³க³ட்ட²புக்³க³லவஸேன நானத்தங் ஜாதங், தஸ்மா தே த்³வேபி இத⁴ ததியவாரே ந லப்³ப⁴ந்தீதி அதி⁴ப்பாயோ. த⁴ம்மானுஸாரீஸத்³தா⁴னுஸாரீனங் நானத்தங் கத²ங் ஜாதந்தி ஆஹ ‘‘ஆக³மனேனபி மக்³கே³னபீ’’தி. தது³ப⁴யங் த³ஸ்ஸெந்தோ ‘‘ஸத்³தா⁴னுஸாரீபுக்³க³லோ’’திஆதி³மாஹ. உத்³தி³ஸாபெந்தோதி உத்³தே³ஸங் க³ண்ஹந்தோ.
Idāni phalavasena dassetuṃ ‘‘samattāni paripuṇṇānī’’tiādi vuttaṃ. Sotāpattimaggaṭṭhapuggalavasena nānattaṃ jātaṃ, tasmā te dvepi idha tatiyavāre na labbhantīti adhippāyo. Dhammānusārīsaddhānusārīnaṃ nānattaṃ kathaṃ jātanti āha ‘‘āgamanenapi maggenapī’’ti. Tadubhayaṃ dassento ‘‘saddhānusārīpuggalo’’tiādimāha. Uddisāpentoti uddesaṃ gaṇhanto.
மக்³கோ³ திக்கோ² ஹோதி உபனிஸ்ஸயிந்த்³ரியானங் திக்க²விஸத³பா⁴வதோ. தேனாஹ ‘‘ஸூரங் ஞாணங் வஹதீ’’தி. அஸங்கா²ரேனாதி ஸரஸேனேவ. அப்பயோகே³னாதி தஸ்ஸேவ வேவசனங். த⁴ம்மானுஸாரீபுக்³க³லோ ஹி ஆக³மனம்ஹி கிலேஸே விக்க²ம்பெ⁴ந்தோ அப்பது³க்கே²ன அப்பகஸிரேன அகிலமந்தோவ விக்க²ம்பே⁴துங் ஸக்கோதி. ஸத்³தா⁴னுஸாரீபுக்³க³லோ பன து³க்கே²ன கஸிரேன கிலமந்தோ ஹுத்வா விக்க²ம்பே⁴துங் ஸக்கோதி, தஸ்மா த⁴ம்மானுஸாரிஸ்ஸ புப்³ப³பா⁴க³மக்³க³க்க²ணே கிலேஸச்சே²த³கஞாணங் அத³ந்த⁴ங் திகி²ணங் ஹுத்வா வஹதி, யதா² நாம திகி²ணேன அஸினா கத³லிங் சி²ந்த³ந்தஸ்ஸ சி²ன்னட்டா²னங் மட்ட²ங் ஹோதி, அஸி கி²ப்பங் வஹதி, ஸத்³தோ³ ந ஸுய்யதி, ப³லவவாயாமகிச்சங் ந ஹோதி, ஏவரூபா த⁴ம்மானுஸாரினோ புப்³ப³பா⁴க³பா⁴வனா ஹோதி, ஸத்³தா⁴னுஸாரினோ பன புப்³ப³பா⁴க³க்க²ணே கிலேஸச்சே²த³கஞாணங் த³ந்த⁴ங் ந திகி²ணங் அஸூரங் ஹுத்வா வஹதி, யதா² நாம நாதிதிகி²ணேன அஸினா கத³லிங் சி²ந்த³ந்தஸ்ஸ சி²ன்னட்டா²னங் ந மட்ட²ங் ஹோதி, அஸி ஸீக⁴ங் ந வஹதி, ஸத்³தோ³ ஸுய்யதி, ப³லவவாயாமகிச்சங் இச்சி²தப்³ப³ங் ஹோதி, ஏவரூபா ஸத்³தா⁴னுஸாரினோ புப்³ப³பா⁴க³பா⁴வனா ஹோதி. ஏவங் ஸந்தேபி கிலேஸக்க²யே நானத்தங் நத்தி². தேனாஹ ‘‘கிலேஸக்க²யே பனா’’திஆதி³. அவஸேஸா ச கிலேஸா கீ²யந்தி ஸங்யோஜனக்க²யாய யோக³த்தா.
Maggo tikkho hoti upanissayindriyānaṃ tikkhavisadabhāvato. Tenāha ‘‘sūraṃ ñāṇaṃ vahatī’’ti. Asaṅkhārenāti saraseneva. Appayogenāti tasseva vevacanaṃ. Dhammānusārīpuggalo hi āgamanamhi kilese vikkhambhento appadukkhena appakasirena akilamantova vikkhambhetuṃ sakkoti. Saddhānusārīpuggalo pana dukkhena kasirena kilamanto hutvā vikkhambhetuṃ sakkoti, tasmā dhammānusārissa pubbabhāgamaggakkhaṇe kilesacchedakañāṇaṃ adandhaṃ tikhiṇaṃ hutvā vahati, yathā nāma tikhiṇena asinā kadaliṃ chindantassa chinnaṭṭhānaṃ maṭṭhaṃ hoti, asi khippaṃ vahati, saddo na suyyati, balavavāyāmakiccaṃ na hoti, evarūpā dhammānusārino pubbabhāgabhāvanā hoti, saddhānusārino pana pubbabhāgakkhaṇe kilesacchedakañāṇaṃ dandhaṃ na tikhiṇaṃ asūraṃ hutvā vahati, yathā nāma nātitikhiṇena asinā kadaliṃ chindantassa chinnaṭṭhānaṃ na maṭṭhaṃ hoti, asi sīghaṃ na vahati, saddo suyyati, balavavāyāmakiccaṃ icchitabbaṃ hoti, evarūpā saddhānusārino pubbabhāgabhāvanā hoti. Evaṃ santepi kilesakkhaye nānattaṃ natthi. Tenāha ‘‘kilesakkhaye panā’’tiādi. Avasesā ca kilesā khīyanti saṃyojanakkhayāya yogattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. பட²மஸங்கி²த்தஸுத்தங் • 2. Paṭhamasaṃkhittasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2. பட²மஸங்கி²த்தஸுத்தவண்ணனா • 2. Paṭhamasaṃkhittasuttavaṇṇanā
