| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
18. ஸமுத்³த³வக்³கோ³
18. Samuddavaggo
1. பட²மஸமுத்³த³ஸுத்தவண்ணனா
1. Paṭhamasamuddasuttavaṇṇanā
228. யதி³ ‘‘து³ப்பூரணட்டே²ன ஸமுத்³த³னட்டே²னா’’தி இமினா அத்த²த்³வயேன ஸாக³ரோ ‘‘ஸமுத்³தோ³’’தி வுச்சதி, சக்கு²ஸ்ஸேவேதங் நிப்பரியாயதோ யுஜ்ஜதீதி த³ஸ்ஸேதுங் ‘‘யதீ³’’திஆதி³ வுத்தங். தத்த² து³ப்பூரணட்டே²னாதி பூரேதுங் அஸக்குணெய்யபா⁴வேன. ஸமுத்³த³னட்டே²னாதி ஸப்³ப³ஸோ உபரூபரிபக்கி²த்தக³மனேன. மஹாக³ங்கா³தி³மஹானதீ³னங் மஹதா உத³கோகே⁴ன அனுஸங்வச்ச²ரங் அனுபக்க²ந்த³மானோபி ஹி ஸமுத்³தோ³ பாரிபூரிங் ந க³ச்ச²தி, யஞ்ச பூ⁴மிபதே³ஸங் ஒத்த²ரதி, தங் ஸமுத்³த³பா⁴வங் நேதி, அபா⁴வங் வா பாபுணாதி அபயாதே ஸமுத்³தோ³த³கே, தங் வா அனுத³கபா⁴வபத்தியா அதத²மேவ ஹோதி. காமஞ்சேஸ து³ப்பூரணட்டோ² ஸமுத்³த³னட்டோ² ஸாக³ரே லப்³ப⁴தி, ததா²பி தங் த்³வயங் சக்கு²ஸ்மிங்யேவ விஸேஸதோ லப்³ப⁴தீதி த³ஸ்ஸெந்தோ ‘‘தஸ்ஸ ஹீ’’திஆதி³மாஹ. ஸமோஸரந்தந்தி ஸப்³ப³ஸோ நீலாதி³பா⁴கே³ஹி ஓஸரந்தங், ஆபாத²ங் ஆக³ச்ச²ந்தந்தி அத்தோ². காதுங் ந ஸக்கோதி து³ப்பூரணீயத்தா. ஸதோ³ஸக³மனேன க³ச்ச²தி ஸத்தஸந்தானஸ்ஸ து³ஸ்ஸனதோ. து³ஸ்ஸனட்ட²தா சஸ்ஸ சக்கு²த்³வாரிகதண்ஹாவஸேன வேதி³தப்³பா³. யதா² ஸமுத்³தே³ அபராபரங் பரிவத்தமானோ ஊமியா வேகோ³ ஸமுத்³த³ஸ்ஸாதி வுச்சதி, ஏவங் சக்கு²ஸமுத்³த³ஸ்ஸ புரதோ அபராபரங் பரிவத்தமானங் நீலாதி³பே⁴த³ங் ரூபாரம்மணங் சக்கு²ஸ்ஸாதி வத்தப்³ப³தங் அரஹதி அனஞ்ஞஸாதா⁴ரணத்தாதி வுத்தங் ‘‘ரூபமயோ வேகோ³’’தி. அஸமபெக்கி²தேதி ஸம்மாத³ஸ்ஸனே ரூபே மனாபபா⁴வங் அமனாபபா⁴வஞ்ச க³ஹெத்வா, ‘‘இத³ங் நாம மயா தி³ட்ட²’’ந்தி அனுபதா⁴ரெந்தஸ்ஸ கேவலங் ஸமூஹக⁴னவஸேன க³ண்ஹந்தஸ்ஸ க³ஹணங் அஸமபெக்க²னங். ஸஹதீதி அதி⁴ப⁴வதி, தங்னிமித்தங் கஞ்சி விகாரங் நாபஜ்ஜதி.
228. Yadi ‘‘duppūraṇaṭṭhena samuddanaṭṭhenā’’ti iminā atthadvayena sāgaro ‘‘samuddo’’ti vuccati, cakkhussevetaṃ nippariyāyato yujjatīti dassetuṃ ‘‘yadī’’tiādi vuttaṃ. Tattha duppūraṇaṭṭhenāti pūretuṃ asakkuṇeyyabhāvena. Samuddanaṭṭhenāti sabbaso uparūparipakkhittagamanena. Mahāgaṅgādimahānadīnaṃ mahatā udakoghena anusaṃvaccharaṃ anupakkhandamānopi hi samuddo pāripūriṃ na gacchati, yañca bhūmipadesaṃ ottharati, taṃ samuddabhāvaṃ neti, abhāvaṃ vā pāpuṇāti apayāte samuddodake, taṃ vā anudakabhāvapattiyā atathameva hoti. Kāmañcesa duppūraṇaṭṭho samuddanaṭṭho sāgare labbhati, tathāpi taṃ dvayaṃ cakkhusmiṃyeva visesato labbhatīti dassento ‘‘tassa hī’’tiādimāha. Samosarantanti sabbaso nīlādibhāgehi osarantaṃ, āpāthaṃ āgacchantanti attho. Kātuṃ na sakkoti duppūraṇīyattā. Sadosagamanena gacchati sattasantānassa dussanato. Dussanaṭṭhatā cassa cakkhudvārikataṇhāvasena veditabbā. Yathā samudde aparāparaṃ parivattamāno ūmiyā vego samuddassāti vuccati, evaṃ cakkhusamuddassa purato aparāparaṃ parivattamānaṃ nīlādibhedaṃ rūpārammaṇaṃ cakkhussāti vattabbataṃ arahati anaññasādhāraṇattāti vuttaṃ ‘‘rūpamayo vego’’ti. Asamapekkhiteti sammādassane rūpe manāpabhāvaṃ amanāpabhāvañca gahetvā, ‘‘idaṃ nāma mayā diṭṭha’’nti anupadhārentassa kevalaṃ samūhaghanavasena gaṇhantassa gahaṇaṃ asamapekkhanaṃ. Sahatīti adhibhavati, taṃnimittaṃ kañci vikāraṃ nāpajjati.
ஊமீதி வீசியோ. ஆவட்டோ ஆவட்டனவஸேன பவத்தங் உத³கங். கா³ஹரக்க²ஸமகராத³யோ கா³ஹரக்க²ஸோ. யதா² ஸமுத்³தே³ ஊமியோ உபரூபரி வத்தமானா அத்தனி பதிதபுக்³க³லங் அஜ்ஜொ²த்த²ரித்வா அனயப்³யஸனங் ஆபாதெ³ந்தி, ததா² ஆவட்டகா³ஹரக்க²ஸா. ஏவமேதே ராகா³த³யோ கிலேஸா ஸயங் உப்பன்னகஸத்தே அஜ்ஜொ²த்த²ரித்வா அனயப்³யஸனங் ஆபாதெ³ந்தி, கிலேஸுப்பத்தினிமித்ததாய ஸத்தானங் அனயப்³யஸனாபத்திஹேதுபூ⁴தஸ்ஸ ஊமிப⁴யஸ்ஸ ஆரம்மணவஸேன சக்கு²ஸமுத்³தோ³ ‘‘ஸஊமிஸாவட்டோ ஸகா³ஹோ ஸரக்க²ஸோ’’தி வுத்தோ.
Ūmīti vīciyo. Āvaṭṭo āvaṭṭanavasena pavattaṃ udakaṃ. Gāharakkhasamakarādayo gāharakkhaso. Yathā samudde ūmiyo uparūpari vattamānā attani patitapuggalaṃ ajjhottharitvā anayabyasanaṃ āpādenti, tathā āvaṭṭagāharakkhasā. Evamete rāgādayo kilesā sayaṃ uppannakasatte ajjhottharitvā anayabyasanaṃ āpādenti, kilesuppattinimittatāya sattānaṃ anayabyasanāpattihetubhūtassa ūmibhayassa ārammaṇavasena cakkhusamuddo ‘‘saūmisāvaṭṭo sagāho sarakkhaso’’ti vutto.
ஊமிப⁴யந்தி எத்த² பா⁴யதி ஏதஸ்மாதி ப⁴யங், ஊமீவ ப⁴யங் ஊமிப⁴யங். குஜ்ஜ²னட்டே²ன கோதோ⁴. ஸ்வேவ சித்தஸ்ஸ ச அபி⁴மத்³த³னவஸேனுப்பாத³னத்தே²ன த³ள்ஹங் ஆயாஸனட்டே²ன உபாயாஸோ. எத்த² ச அனேகவாரங் பவத்தித்வா ஸத்தே அஜ்ஜொ²த்த²ரித்வா ஸீஸங் உக்கி²பிதுங் அத³த்வா அனயப்³யஸனநிப்பா²த³னேன கோதூ⁴பாயாஸஸ்ஸ ஊமிஸதி³ஸதா த³ட்ட²ப்³பா³. ததா² காமகு³ணா கிலேஸாபி⁴பூ⁴தே ஸத்தே மானே விய ரூபாதி³விஸயஸங்கா²தே அத்தனி ஸங்ஸாரெத்வா யதா² ததோ ப³ஹிபூ⁴தே நெக்க²ம்மே சித்தம்பி ந உப்பஜ்ஜதி, ஏவங் ஆவட்டெத்வா ப்³யஸனாபாத³னேன ஆவட்டஸதி³ஸதா த³ட்ட²ப்³பா³. யதா³ பன கா³ஹரக்க²ஸோ ஆரக்க²ரஹிதங் அத்தனோ கோ³சரபூ⁴மிக³தங் புரிஸங் அபி⁴பு⁴ய்ய க³ஹெத்வா அகோ³சரே டி²தம்பி கோ³சரங் நெத்வா பே⁴ரவரூபத³ஸ்ஸனாதி³னா அத்தனோ உபக்கமங் காதுங் அஸமத்த²ங் கத்வா அன்வாவிஸித்வா வண்ணப³லபோ⁴க³ஆயுஸுகே²ஹி வியோஜெத்வா மஹந்தங் அனயப்³யஸனங் ஆபாதே³தி, ஏவங் மாதுகா³மோபி யோனிஸோமனஸிகாரரஹிதங் அவீரபுரிஸங் அத்தனோ ரூபாதீ³ஹி பலோப⁴னவஸேன அபி⁴பு⁴ய்ய க³ஹெத்வா வா வீரஜாதியம்பி இத்தி²குத்தபூ⁴தேஹி அத்தனோ ஹாவபா⁴வவிலாஸேஹி இத்தி²மாயாய அன்வாவிஸித்வா வா அவஸங் அத்தனோ உபகாரத⁴ம்மே ஸீலாத³யோ ஸம்பாதே³துங் அஸமத்த²ங் கரொந்தோ கு³ணவண்ணாதீ³ஹி வியோஜெத்வா மஹந்தங் அனயப்³யஸனங் ஆபாதே³தி, ஏவங் மாதுகா³மஸ்ஸ கா³ஹரக்க²ஸஸதி³ஸதா த³ட்ட²ப்³பா³. ஊமிப⁴யந்தி லக்க²ணவசனங் . யதா² ஹி ஊமி பா⁴யிதப்³ப³ட்டே²ன ப⁴யங், ஏவங் ஆவட்டகா³ஹரக்க²ஸாபீதி ஊமிஆதி³ப⁴யேன ஸப⁴யந்தி அத்தோ² வேதி³தப்³போ³. அந்தங் அவஸானங் க³தோ, ஏவங் பாரங் நிப்³பா³னங் க³தோதி வுச்சதி.
Ūmibhayanti ettha bhāyati etasmāti bhayaṃ, ūmīva bhayaṃ ūmibhayaṃ. Kujjhanaṭṭhena kodho. Sveva cittassa ca abhimaddanavasenuppādanatthena daḷhaṃ āyāsanaṭṭhena upāyāso. Ettha ca anekavāraṃ pavattitvā satte ajjhottharitvā sīsaṃ ukkhipituṃ adatvā anayabyasananipphādanena kodhūpāyāsassa ūmisadisatā daṭṭhabbā. Tathā kāmaguṇā kilesābhibhūte satte māne viya rūpādivisayasaṅkhāte attani saṃsāretvā yathā tato bahibhūte nekkhamme cittampi na uppajjati, evaṃ āvaṭṭetvā byasanāpādanena āvaṭṭasadisatā daṭṭhabbā. Yadā pana gāharakkhaso ārakkharahitaṃ attano gocarabhūmigataṃ purisaṃ abhibhuyya gahetvā agocare ṭhitampi gocaraṃ netvā bheravarūpadassanādinā attano upakkamaṃ kātuṃ asamatthaṃ katvā anvāvisitvā vaṇṇabalabhogaāyusukhehi viyojetvā mahantaṃ anayabyasanaṃ āpādeti, evaṃ mātugāmopi yonisomanasikārarahitaṃ avīrapurisaṃ attano rūpādīhi palobhanavasena abhibhuyya gahetvā vā vīrajātiyampi itthikuttabhūtehi attano hāvabhāvavilāsehi itthimāyāya anvāvisitvā vā avasaṃ attano upakāradhamme sīlādayo sampādetuṃ asamatthaṃ karonto guṇavaṇṇādīhi viyojetvā mahantaṃ anayabyasanaṃ āpādeti, evaṃ mātugāmassa gāharakkhasasadisatā daṭṭhabbā. Ūmibhayanti lakkhaṇavacanaṃ . Yathā hi ūmi bhāyitabbaṭṭhena bhayaṃ, evaṃ āvaṭṭagāharakkhasāpīti ūmiādibhayena sabhayanti attho veditabbo. Antaṃ avasānaṃ gato, evaṃ pāraṃ nibbānaṃ gatoti vuccati.
பட²மஸமுத்³த³ஸுத்தவண்ணனா நிட்டி²தா.
Paṭhamasamuddasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. பட²மஸமுத்³த³ஸுத்தங் • 1. Paṭhamasamuddasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. பட²மஸமுத்³த³ஸுத்தவண்ணனா • 1. Paṭhamasamuddasuttavaṇṇanā
