| Library / Tipiṭaka / તિપિટક • Tipiṭaka / સંયુત્તનિકાય (ટીકા) • Saṃyuttanikāya (ṭīkā) |
૯. પઠમસમુગ્ઘાતસપ્પાયસુત્તવણ્ણના
9. Paṭhamasamugghātasappāyasuttavaṇṇanā
૩૧. ઉપકારભૂતા તદાવહત્તા. તતોતિ મઞ્ઞિતાકારતો. તન્તિ મઞ્ઞનાવત્થું. અઞ્ઞેનાકારેનાતિ યથા મઞ્ઞતિ અનિચ્ચાદિઆકારતો, અઞ્ઞેન અનિચ્ચાદિના આકારેન હોતિ. અઞ્ઞથાભાવં વિપરિણામન્તિ ઉપ્પાદવયતાય અઞ્ઞથાભાવં જરાય મરણેન ચ દ્વેધા વિપરિણામેતબ્બં. તં ઉપગમનેન અઞ્ઞથાભાવી, એવંભૂતો હુત્વાપિ જીરણભિજ્જનસભાવેસુ. ભવેસુ સત્તો લોકો ઉપરિપિ ભવંયેવ અભિનન્દતિ. હેટ્ઠા ગહિતમેવ સઙ્કડ્ઢિત્વાતિ ‘‘ચક્ખું ન મઞ્ઞતી’’તિઆદિના હેટ્ઠા ગહિતમેવ ખન્ધધાતુઆયતનાતિ ખન્ધાદિપરિયાયેન એકતો ગહેત્વા પુનપિ મઞ્ઞનાવત્થું દસ્સેતિ. અવસાને ‘‘તતો તં હોતી’’તિ વુત્તપદેન સદ્ધિં સબ્બવારેસુ અટ્ઠ અટ્ઠ હોન્તીતિ ‘‘અટ્ઠચત્તાલીસાય ઠાનેસૂ’’તિ વુત્તં.
31.Upakārabhūtā tadāvahattā. Tatoti maññitākārato. Tanti maññanāvatthuṃ. Aññenākārenāti yathā maññati aniccādiākārato, aññena aniccādinā ākārena hoti. Aññathābhāvaṃ vipariṇāmanti uppādavayatāya aññathābhāvaṃ jarāya maraṇena ca dvedhā vipariṇāmetabbaṃ. Taṃ upagamanena aññathābhāvī, evaṃbhūto hutvāpi jīraṇabhijjanasabhāvesu. Bhavesu satto loko uparipi bhavaṃyeva abhinandati. Heṭṭhā gahitameva saṅkaḍḍhitvāti ‘‘cakkhuṃ na maññatī’’tiādinā heṭṭhā gahitameva khandhadhātuāyatanāti khandhādipariyāyena ekato gahetvā punapi maññanāvatthuṃ dasseti. Avasāne ‘‘tato taṃ hotī’’ti vuttapadena saddhiṃ sabbavāresu aṭṭha aṭṭha hontīti ‘‘aṭṭhacattālīsāya ṭhānesū’’ti vuttaṃ.
પઠમસમુગ્ઘાતસપ્પાયસુત્તવણ્ણના નિટ્ઠિતા.
Paṭhamasamugghātasappāyasuttavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૯. પઠમસમુગ્ઘાતસપ્પાયસુત્તં • 9. Paṭhamasamugghātasappāyasuttaṃ
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૯. પઠમસમુગ્ઘાતસપ્પાયસુત્તવણ્ણના • 9. Paṭhamasamugghātasappāyasuttavaṇṇanā
