| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
5. பட²மஸந்தி³ட்டி²கஸுத்தங்
5. Paṭhamasandiṭṭhikasuttaṃ
47. அத² கோ² மோளியஸீவகோ 1 பரிப்³பா³ஜகோ யேன ப⁴க³வா தேனுபஸங்கமி; உபஸங்கமித்வா ப⁴க³வதா ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³. ஏகமந்தங் நிஸின்னோ கோ² மோளியஸீவகோ பரிப்³பா³ஜகோ ப⁴க³வந்தங் ஏதத³வோச – ‘‘‘ஸந்தி³ட்டி²கோ த⁴ம்மோ, ஸந்தி³ட்டி²கோ த⁴ம்மோ’தி, ப⁴ந்தே, வுச்சதி. கித்தாவதா நு கோ², ப⁴ந்தே, ஸந்தி³ட்டி²கோ த⁴ம்மோ ஹோதி அகாலிகோ ஏஹிபஸ்ஸிகோ ஓபனெய்யிகோ பச்சத்தங் வேதி³தப்³போ³ விஞ்ஞூஹீ’’தி?
47. Atha kho moḷiyasīvako 2 paribbājako yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho moḷiyasīvako paribbājako bhagavantaṃ etadavoca – ‘‘‘sandiṭṭhiko dhammo, sandiṭṭhiko dhammo’ti, bhante, vuccati. Kittāvatā nu kho, bhante, sandiṭṭhiko dhammo hoti akāliko ehipassiko opaneyyiko paccattaṃ veditabbo viññūhī’’ti?
‘‘தேன ஹி, ஸீவக, தஞ்ஞேவெத்த² படிபுச்சா²மி. யதா² தே க²மெய்ய ததா² நங் ப்³யாகரெய்யாஸி. தங் கிங் மஞ்ஞஸி, ஸீவக, ஸந்தங் வா அஜ்ஜ²த்தங் லோப⁴ங் ‘அத்தி² மே அஜ்ஜ²த்தங் லோபோ⁴’தி பஜானாஸி, அஸந்தங் வா அஜ்ஜ²த்தங் லோப⁴ங் ‘நத்தி² மே அஜ்ஜ²த்தங் லோபோ⁴’தி பஜானாஸீ’’தி? ‘‘ஏவங், ப⁴ந்தே’’. ‘‘யங் கோ² த்வங், ஸீவக, ஸந்தங் வா அஜ்ஜ²த்தங் லோப⁴ங் ‘அத்தி² மே அஜ்ஜ²த்தங் லோபோ⁴’தி பஜானாஸி, அஸந்தங் வா அஜ்ஜ²த்தங் லோப⁴ங் ‘நத்தி² மே அஜ்ஜ²த்தங் லோபோ⁴’தி பஜானாஸி – ஏவம்பி கோ², ஸீவக, ஸந்தி³ட்டி²கோ த⁴ம்மோ ஹோதி…பே॰….
‘‘Tena hi, sīvaka, taññevettha paṭipucchāmi. Yathā te khameyya tathā naṃ byākareyyāsi. Taṃ kiṃ maññasi, sīvaka, santaṃ vā ajjhattaṃ lobhaṃ ‘atthi me ajjhattaṃ lobho’ti pajānāsi, asantaṃ vā ajjhattaṃ lobhaṃ ‘natthi me ajjhattaṃ lobho’ti pajānāsī’’ti? ‘‘Evaṃ, bhante’’. ‘‘Yaṃ kho tvaṃ, sīvaka, santaṃ vā ajjhattaṃ lobhaṃ ‘atthi me ajjhattaṃ lobho’ti pajānāsi, asantaṃ vā ajjhattaṃ lobhaṃ ‘natthi me ajjhattaṃ lobho’ti pajānāsi – evampi kho, sīvaka, sandiṭṭhiko dhammo hoti…pe….
‘‘தங் கிங் மஞ்ஞஸி, ஸீவக, ஸந்தங் வா அஜ்ஜ²த்தங் தோ³ஸங்…பே॰… ஸந்தங் வா அஜ்ஜ²த்தங் மோஹங்…பே॰… ஸந்தங் வா அஜ்ஜ²த்தங் லோப⁴த⁴ம்மங்…பே॰… ஸந்தங் வா அஜ்ஜ²த்தங் தோ³ஸத⁴ம்மங்…பே॰… ஸந்தங் வா அஜ்ஜ²த்தங் மோஹத⁴ம்மங் ‘அத்தி² மே அஜ்ஜ²த்தங் மோஹத⁴ம்மோ’தி பஜானாஸி, அஸந்தங் வா அஜ்ஜ²த்தங் மோஹத⁴ம்மங் ‘நத்தி² மே அஜ்ஜ²த்தங் மோஹத⁴ம்மோ’தி பஜானாஸீ’’தி? ‘‘ஏவங், ப⁴ந்தே’’. ‘‘யங் கோ² த்வங், ஸீவக, ஸந்தங் வா அஜ்ஜ²த்தங் மோஹத⁴ம்மங் ‘அத்தி² மே அஜ்ஜ²த்தங் மோஹத⁴ம்மோ’தி பஜானாஸி, அஸந்தங் வா அஜ்ஜ²த்தங் மோஹத⁴ம்மங் ‘நத்தி² மே அஜ்ஜ²த்தங் மோஹத⁴ம்மோ’தி பஜானாஸி – ஏவங் கோ², ஸீவக, ஸந்தி³ட்டி²கோ த⁴ம்மோ ஹோதி அகாலிகோ ஏஹிபஸ்ஸிகோ ஓபனெய்யிகோ பச்சத்தங் வேதி³தப்³போ³ விஞ்ஞூஹீ’’தி.
‘‘Taṃ kiṃ maññasi, sīvaka, santaṃ vā ajjhattaṃ dosaṃ…pe… santaṃ vā ajjhattaṃ mohaṃ…pe… santaṃ vā ajjhattaṃ lobhadhammaṃ…pe… santaṃ vā ajjhattaṃ dosadhammaṃ…pe… santaṃ vā ajjhattaṃ mohadhammaṃ ‘atthi me ajjhattaṃ mohadhammo’ti pajānāsi, asantaṃ vā ajjhattaṃ mohadhammaṃ ‘natthi me ajjhattaṃ mohadhammo’ti pajānāsī’’ti? ‘‘Evaṃ, bhante’’. ‘‘Yaṃ kho tvaṃ, sīvaka, santaṃ vā ajjhattaṃ mohadhammaṃ ‘atthi me ajjhattaṃ mohadhammo’ti pajānāsi, asantaṃ vā ajjhattaṃ mohadhammaṃ ‘natthi me ajjhattaṃ mohadhammo’ti pajānāsi – evaṃ kho, sīvaka, sandiṭṭhiko dhammo hoti akāliko ehipassiko opaneyyiko paccattaṃ veditabbo viññūhī’’ti.
‘‘அபி⁴க்கந்தங், ப⁴ந்தே, அபி⁴க்கந்தங், ப⁴ந்தே…பே॰… உபாஸகங் மங், ப⁴ந்தே, ப⁴க³வா தா⁴ரேது அஜ்ஜதக்³கே³ பாணுபேதங் ஸரணங் க³த’’ந்தி. பஞ்சமங்.
‘‘Abhikkantaṃ, bhante, abhikkantaṃ, bhante…pe… upāsakaṃ maṃ, bhante, bhagavā dhāretu ajjatagge pāṇupetaṃ saraṇaṃ gata’’nti. Pañcamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 5-6. ஸந்தி³ட்டி²கஸுத்தத்³வயவண்ணனா • 5-6. Sandiṭṭhikasuttadvayavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 3-6. இணஸுத்தாதி³வண்ணனா • 3-6. Iṇasuttādivaṇṇanā
