| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
6. பட²மஸேக²ஸுத்தவண்ணனா
6. Paṭhamasekhasuttavaṇṇanā
16. ச²ட்டே² ஸேக²ஸ்ஸாதி எத்த² கேனட்டே²ன ஸேகோ²? ஸெக்க²த⁴ம்மபடிலாப⁴தோ ஸேகோ². வுத்தஞ்ஹேதங் –
16. Chaṭṭhe sekhassāti ettha kenaṭṭhena sekho? Sekkhadhammapaṭilābhato sekho. Vuttañhetaṃ –
‘‘கித்தாவதா நு கோ², ப⁴ந்தே, ஸேகோ² ஹோதீதி? இத⁴, பி⁴க்கு², ஸேகா²ய ஸம்மாதி³ட்டி²யா ஸமன்னாக³தோ ஹோதி…பே॰… ஸேகே²ன ஸம்மாஸமாதி⁴னா ஸமன்னாக³தோ ஹோதி. எத்தாவதா கோ², பி⁴க்கு², ஸேகோ² ஹோதீ’’தி (ஸங்॰ நி॰ 5.13).
‘‘Kittāvatā nu kho, bhante, sekho hotīti? Idha, bhikkhu, sekhāya sammādiṭṭhiyā samannāgato hoti…pe… sekhena sammāsamādhinā samannāgato hoti. Ettāvatā kho, bhikkhu, sekho hotī’’ti (saṃ. ni. 5.13).
அபிச ஸிக்க²தீதி ஸேகோ². வுத்தம்பி சேதங் –
Apica sikkhatīti sekho. Vuttampi cetaṃ –
‘‘ஸிக்க²தீதி கோ², பி⁴க்கு², தஸ்மா ஸேகோ²தி வுச்சதி. கிஞ்ச ஸிக்க²தி? அதி⁴ஸீலம்பி ஸிக்க²தி, அதி⁴சித்தம்பி ஸிக்க²தி, அதி⁴பஞ்ஞம்பி ஸிக்க²தி. ஸிக்க²தீதி கோ², பி⁴க்கு², தஸ்மா ஸேகோ²தி வுச்சதீ’’தி (அ॰ நி॰ 3.86).
‘‘Sikkhatīti kho, bhikkhu, tasmā sekhoti vuccati. Kiñca sikkhati? Adhisīlampi sikkhati, adhicittampi sikkhati, adhipaññampi sikkhati. Sikkhatīti kho, bhikkhu, tasmā sekhoti vuccatī’’ti (a. ni. 3.86).
யோபி கல்யாணபுது²ஜ்ஜனோ அனுலோமப்படிபதா³ய பரிபூரகாரீ ஸீலஸம்பன்னோ இந்த்³ரியேஸு கு³த்தத்³வாரோ போ⁴ஜனே மத்தஞ்ஞூ ஜாக³ரியானுயோக³மனுயுத்தோ புப்³ப³ரத்தாபரரத்தங் போ³தி⁴பக்கி²யானங் த⁴ம்மானங் பா⁴வனானுயோக³மனுயுத்தோ விஹரதி – ‘‘அஜ்ஜ வா ஸ்வே வா அஞ்ஞதரங் ஸாமஞ்ஞப²லங் அதி⁴க³மிஸ்ஸாமீ’’தி, ஸோபி வுச்சதி ஸிக்க²தீதி ஸேகோ²தி. இமஸ்மிங் அத்தே² ந படிவிஜ்ஜ²ந்தோவ ஸேகோ² அதி⁴ப்பேதோ, அத² கோ² கல்யாணபுது²ஜ்ஜனோபி. அப்பத்தங் மானஸங் ஏதேனாதி அப்பத்தமானஸோ. மானஸந்தி ‘‘அந்தலிக்க²சரோ பாஸோ, ய்வாயங் சரதி மானஸோ’’தி (ஸங்॰ நி॰ 1.151; மஹாவ॰ 33) எத்த² ராகோ³ மானஸந்தி வுத்தோ. ‘‘சித்தங் மனோ மானஸ’’ந்தி (த⁴॰ ஸ॰ 63, 65) எத்த² சித்தங். ‘‘அப்பத்தமானஸோ ஸேகோ², காலங் கயிரா ஜனே ஸுதா’’தி (ஸங்॰ நி॰ 1.159) எத்த² அரஹத்தங். இதா⁴பி அரஹத்தமேவ அதி⁴ப்பேதங். தேன அப்பத்தஅரஹத்தஸ்ஸாதி வுத்தங் ஹோதி.
Yopi kalyāṇaputhujjano anulomappaṭipadāya paripūrakārī sīlasampanno indriyesu guttadvāro bhojane mattaññū jāgariyānuyogamanuyutto pubbarattāpararattaṃ bodhipakkhiyānaṃ dhammānaṃ bhāvanānuyogamanuyutto viharati – ‘‘ajja vā sve vā aññataraṃ sāmaññaphalaṃ adhigamissāmī’’ti, sopi vuccati sikkhatīti sekhoti. Imasmiṃ atthe na paṭivijjhantova sekho adhippeto, atha kho kalyāṇaputhujjanopi. Appattaṃ mānasaṃ etenāti appattamānaso. Mānasanti ‘‘antalikkhacaro pāso, yvāyaṃ carati mānaso’’ti (saṃ. ni. 1.151; mahāva. 33) ettha rāgo mānasanti vutto. ‘‘Cittaṃ mano mānasa’’nti (dha. sa. 63, 65) ettha cittaṃ. ‘‘Appattamānaso sekho, kālaṃ kayirā jane sutā’’ti (saṃ. ni. 1.159) ettha arahattaṃ. Idhāpi arahattameva adhippetaṃ. Tena appattaarahattassāti vuttaṃ hoti.
அனுத்தரந்தி ஸெட்ட²ங், அஸதி³ஸந்தி அத்தோ². சதூஹி யோகே³ஹி கே²மங் அனுபத்³து³தந்தி யோக³க்கே²மங், அரஹத்தமேவ அதி⁴ப்பேதங். பத்த²யமானஸ்ஸாதி த்³வே பத்த²னா தண்ஹாபத்த²னா, குஸலச்ச²ந்த³பத்த²னா ச. ‘‘பத்த²யமானஸ்ஸ ஹி ஜப்பிதானி, பவேதி⁴தங் வாபி பகப்பிதேஸூ’’தி (ஸு॰ நி॰ 908; மஹானி॰ 137) எத்த² தண்ஹாபத்த²னா.
Anuttaranti seṭṭhaṃ, asadisanti attho. Catūhi yogehi khemaṃ anupaddutanti yogakkhemaṃ, arahattameva adhippetaṃ. Patthayamānassāti dve patthanā taṇhāpatthanā, kusalacchandapatthanā ca. ‘‘Patthayamānassa hi jappitāni, pavedhitaṃ vāpi pakappitesū’’ti (su. ni. 908; mahāni. 137) ettha taṇhāpatthanā.
‘‘சி²ன்னங் பாபிமதோ ஸோதங், வித்³த⁴ஸ்தங் வினளீகதங்;
‘‘Chinnaṃ pāpimato sotaṃ, viddhastaṃ vinaḷīkataṃ;
பாமோஜ்ஜப³ஹுலா ஹோத², கே²மங் பத்தே²த² பி⁴க்க²வோ’’தி. (ம॰ நி॰ 1.352);
Pāmojjabahulā hotha, khemaṃ patthetha bhikkhavo’’ti. (ma. ni. 1.352);
எத்த² கத்துகம்யதாகுஸலச்ச²ந்த³பத்த²னா, அயமேவ இதா⁴தி⁴ப்பேதா. தேன பத்த²யமானஸ்ஸாதி தங் யோக³க்கே²மங் க³ந்துகாமஸ்ஸ தன்னின்னஸ்ஸ தப்போணஸ்ஸ தப்பப்³பா⁴ரஸ்ஸாதி அத்தோ². விஹரதோதி ஏகங் இரியாபத²து³க்க²ங் அஞ்ஞேன இரியாபதே²ன விச்சி²ந்தி³த்வா அபரிபதந்தங் அத்தபா⁴வங் ஹரதோ. அத² வா ‘‘ஸப்³பே³ ஸங்கா²ரா அனிச்சாதி அதி⁴முச்சந்தோ ஸத்³தா⁴ய விஹரதீ’’திஆதி³னா நித்³தே³ஸனயேன செத்த² அத்தோ² த³ட்ட²ப்³போ³. அஜ்ஜ²த்திகந்தி நியகஜ்ஜ²த்தஸங்கா²தே அஜ்ஜ²த்தே ப⁴வங் அஜ்ஜ²த்திகங். அங்க³ந்தி காரணங். இதி கரித்வாதி ஏவங் கத்வா. ந அஞ்ஞங் ஏகங்க³ம்பி ஸமனுபஸ்ஸாமீதி எத்த² அயங் ஸங்கே²பத்தோ² – பி⁴க்க²வே, அஜ்ஜ²த்தங் அத்தனோ ஸந்தானே ஸமுட்டி²தங் காரணந்தி கத்வா அஞ்ஞங் ஏககாரணம்பி ந ஸமனுபஸ்ஸாமி யங் ஏவங் ப³ஹூபகாரங், யத²யித³ங் யோனிஸோ மனஸிகாரோதி உபாயமனஸிகாரோ, பத²மனஸிகாரோ, அனிச்சாதீ³ஸு அனிச்சாதி³னயேனேவ மனஸிகாரோ, அனிச்சானுலோமிகேன வா சித்தஸ்ஸ ஆவட்டனா அன்வாவட்டனா ஆபோ⁴கோ³ ஸமன்னாஹாரோ மனஸிகாரோ. அயங் யோனிஸோ மனஸிகாரோ.
Ettha kattukamyatākusalacchandapatthanā, ayameva idhādhippetā. Tena patthayamānassāti taṃ yogakkhemaṃ gantukāmassa tanninnassa tappoṇassa tappabbhārassāti attho. Viharatoti ekaṃ iriyāpathadukkhaṃ aññena iriyāpathena vicchinditvā aparipatantaṃ attabhāvaṃ harato. Atha vā ‘‘sabbe saṅkhārā aniccāti adhimuccanto saddhāya viharatī’’tiādinā niddesanayena cettha attho daṭṭhabbo. Ajjhattikanti niyakajjhattasaṅkhāte ajjhatte bhavaṃ ajjhattikaṃ. Aṅganti kāraṇaṃ. Iti karitvāti evaṃ katvā. Na aññaṃ ekaṅgampi samanupassāmīti ettha ayaṃ saṅkhepattho – bhikkhave, ajjhattaṃ attano santāne samuṭṭhitaṃ kāraṇanti katvā aññaṃ ekakāraṇampi na samanupassāmi yaṃ evaṃ bahūpakāraṃ, yathayidaṃ yoniso manasikāroti upāyamanasikāro, pathamanasikāro, aniccādīsu aniccādinayeneva manasikāro, aniccānulomikena vā cittassa āvaṭṭanā anvāvaṭṭanā ābhogo samannāhāro manasikāro. Ayaṃ yoniso manasikāro.
இதா³னி யோனிஸோ மனஸிகாரஸ்ஸ ஆனுபா⁴வங் த³ஸ்ஸேதுங் ‘‘யோனிஸோ, பி⁴க்க²வே, பி⁴க்கு² மனஸி கரொந்தோ அகுஸலங் பஜஹதி, குஸலங் பா⁴வேதீ’’தி வுத்தங். தத்த² யோனிஸோ மனஸி கரொந்தோதி ‘‘இத³ங் து³க்க²ங் அரியஸச்சங், அயங் து³க்க²ஸமுத³யோ அரியஸச்சங், அயங் து³க்க²னிரோதோ⁴ அரியஸச்சங், அயங் து³க்க²னிரோத⁴கா³மினீ படிபதா³ அரியஸச்ச’’ந்தி சதூஸு அரியஸச்சேஸு யோனிஸோ மனஸிகாரங் பவத்தெந்தோ.
Idāni yoniso manasikārassa ānubhāvaṃ dassetuṃ ‘‘yoniso, bhikkhave, bhikkhu manasi karonto akusalaṃ pajahati, kusalaṃ bhāvetī’’ti vuttaṃ. Tattha yoniso manasi karontoti ‘‘idaṃ dukkhaṃ ariyasaccaṃ, ayaṃ dukkhasamudayo ariyasaccaṃ, ayaṃ dukkhanirodho ariyasaccaṃ, ayaṃ dukkhanirodhagāminī paṭipadā ariyasacca’’nti catūsu ariyasaccesu yoniso manasikāraṃ pavattento.
தத்ராயங் அத்த²விபா⁴வனா – யதி³பி இத³ங் ஸுத்தங் அவிஸேஸேன ஸெக்க²புக்³க³லவஸேன ஆக³தங், சதுமக்³க³ஸாதா⁴ரணவஸேன பன ஸங்கே²பேனேவ கம்மட்டா²னங் கத²யிஸ்ஸாம. யோ சதுஸச்சகம்மட்டா²னிகோ யோகா³வசரோ ‘‘தண்ஹாவஜ்ஜா தேபூ⁴மகா க²ந்தா⁴ து³க்க²ங், தண்ஹா ஸமுத³யோ, உபி⁴ன்னங் அப்பவத்தி நிரோதோ⁴, நிரோத⁴ஸம்பாபகோ மக்³கோ³’’தி ஏவங் புப்³பே³ ஏவ ஆசரியஸந்திகே உக்³க³ஹிதசதுஸச்சகம்மட்டா²னோ. ஸோ அபரேன ஸமயேன விபஸ்ஸனாமக்³க³ங் ஸமாருள்ஹோ ஸமானோ தேபூ⁴மகே க²ந்தே⁴ ‘‘இத³ங் து³க்க²’’ந்தி யோனிஸோ மனஸி கரோதி, உபாயேன பதே²ன ஸமன்னாஹரதி சேவ விபஸ்ஸதி ச. விபஸ்ஸனா ஹி இத⁴ மனஸிகாரஸீஸேன வுத்தா. யா பனாயங் தஸ்ஸ து³க்க²ஸ்ஸ ஸமுட்டா²பிகா புரிமப⁴விகா தண்ஹா, அயங் து³க்க²ஸமுத³யோதி யோனிஸோ மனஸி கரோதி. யஸ்மா பன இத³ங் து³க்க²ங், அயஞ்ச ஸமுத³யோ இத³ங் டா²னங் பத்வா நிருஜ்ஜ²ந்தி ந பவத்தந்தி, தஸ்மா யதி³த³ங் நிப்³பா³னங் நாம , அயங் து³க்க²னிரோதோ⁴தி யோனிஸோ மனஸி கரோதி. நிரோத⁴ஸம்பாபகங் அட்ட²ங்கி³கங் மக்³க³ங், ‘‘அயங் து³க்க²னிரோத⁴கா³மினீ படிபதா³’’தி யோனிஸோ மனஸி கரோதி, உபாயேன பதே²ன ஸமன்னாஹரதி சேவ விபஸ்ஸதி ச.
Tatrāyaṃ atthavibhāvanā – yadipi idaṃ suttaṃ avisesena sekkhapuggalavasena āgataṃ, catumaggasādhāraṇavasena pana saṅkhepeneva kammaṭṭhānaṃ kathayissāma. Yo catusaccakammaṭṭhāniko yogāvacaro ‘‘taṇhāvajjā tebhūmakā khandhā dukkhaṃ, taṇhā samudayo, ubhinnaṃ appavatti nirodho, nirodhasampāpako maggo’’ti evaṃ pubbe eva ācariyasantike uggahitacatusaccakammaṭṭhāno. So aparena samayena vipassanāmaggaṃ samāruḷho samāno tebhūmake khandhe ‘‘idaṃ dukkha’’nti yoniso manasi karoti, upāyena pathena samannāharati ceva vipassati ca. Vipassanā hi idha manasikārasīsena vuttā. Yā panāyaṃ tassa dukkhassa samuṭṭhāpikā purimabhavikā taṇhā, ayaṃ dukkhasamudayoti yoniso manasi karoti. Yasmā pana idaṃ dukkhaṃ, ayañca samudayo idaṃ ṭhānaṃ patvā nirujjhanti na pavattanti, tasmā yadidaṃ nibbānaṃ nāma , ayaṃ dukkhanirodhoti yoniso manasi karoti. Nirodhasampāpakaṃ aṭṭhaṅgikaṃ maggaṃ, ‘‘ayaṃ dukkhanirodhagāminī paṭipadā’’ti yoniso manasi karoti, upāyena pathena samannāharati ceva vipassati ca.
தத்ராயங் உபாயோ – அபி⁴னிவேஸோ நாம க²ந்தே⁴ ஹோதி, ந விவட்டே, தஸ்மா அயமத்தோ² – ‘‘இமஸ்மிங் காயே பத²வீதா⁴து, ஆபோதா⁴தூ’’திஆதி³னா (தீ³॰ நி॰ 2.378) நயேன சத்தாரி மஹாபூ⁴தானி தத³னுஸாரேன உபாதா³ரூபானி ச பரிக்³க³ஹெத்வா ‘‘அயங் ரூபக்க²ந்தோ⁴’’தி வவத்த²பேதி. தங் வவத்தா²பயதோ உப்பன்னே ததா³ரம்மணே சித்தசேதஸிகத⁴ம்மே ‘‘இமே சத்தாரோ அரூபக்க²ந்தா⁴’’தி வவத்த²பேதி. ததோ ‘‘இமே பஞ்சக்க²ந்தா⁴ து³க்க²’’ந்தி வவத்த²பேதி. தே பன ஸங்கே²பதோ நாமஞ்ச ரூபஞ்சாதி த்³வே பா⁴கா³ ஹொந்தி. இத³ஞ்ச நாமரூபங் ஸஹேது ஸப்பச்சயங் உப்பஜ்ஜதி, தஸ்ஸ அயங் அவிஜ்ஜாப⁴வதண்ஹாதி³கோ ஹேது, அயங் ஆஹாராதி³கோ பச்சயோதி ஹேதுப்பச்சயே வவத்த²பேதி. ஸோ தேஸங் பச்சயானஞ்ச பச்சயுப்பன்னானஞ்ச யாதா²வஸரஸலக்க²ணங் வவத்த²பெத்வா ‘‘இமே த⁴ம்மா அஹுத்வா ப⁴வந்தி, ஹுத்வா நிருஜ்ஜ²ந்தி, தஸ்மா அனிச்சா’’தி அனிச்சலக்க²ணங் ஆரோபேதி, ‘‘உத³யப்³ப³யபடிபீளிதத்தா து³க்கா²’’தி து³க்க²லக்க²ணங் ஆரோபேதி, ‘‘அவஸவத்தனதோ அனத்தா’’தி அனத்தலக்க²ணங் ஆரோபேதி.
Tatrāyaṃ upāyo – abhiniveso nāma khandhe hoti, na vivaṭṭe, tasmā ayamattho – ‘‘imasmiṃ kāye pathavīdhātu, āpodhātū’’tiādinā (dī. ni. 2.378) nayena cattāri mahābhūtāni tadanusārena upādārūpāni ca pariggahetvā ‘‘ayaṃ rūpakkhandho’’ti vavatthapeti. Taṃ vavatthāpayato uppanne tadārammaṇe cittacetasikadhamme ‘‘ime cattāro arūpakkhandhā’’ti vavatthapeti. Tato ‘‘ime pañcakkhandhā dukkha’’nti vavatthapeti. Te pana saṅkhepato nāmañca rūpañcāti dve bhāgā honti. Idañca nāmarūpaṃ sahetu sappaccayaṃ uppajjati, tassa ayaṃ avijjābhavataṇhādiko hetu, ayaṃ āhārādiko paccayoti hetuppaccaye vavatthapeti. So tesaṃ paccayānañca paccayuppannānañca yāthāvasarasalakkhaṇaṃ vavatthapetvā ‘‘ime dhammā ahutvā bhavanti, hutvā nirujjhanti, tasmā aniccā’’ti aniccalakkhaṇaṃ āropeti, ‘‘udayabbayapaṭipīḷitattā dukkhā’’ti dukkhalakkhaṇaṃ āropeti, ‘‘avasavattanato anattā’’ti anattalakkhaṇaṃ āropeti.
ஏவங் திலக்க²ணானி ஆரோபெத்வா விபஸ்ஸந்தோ உத³யப்³ப³யஞாணுப்பத்தியா உப்பன்னே ஓபா⁴ஸாதி³கே விபஸ்ஸனுபக்கிலேஸே ‘அமக்³கோ³’தி உத³யப்³ப³யஞாணமேவ ‘‘அரியமக்³க³ஸ்ஸ உபாயபூ⁴தோ புப்³ப³பா⁴க³மக்³கோ³’’தி மக்³கா³மக்³க³ங் வவத்த²பெத்வா புன உத³யப்³ப³யஞாணங் படிபாடியா ப⁴ங்க³ஞாணாதீ³னி ச உப்பாதெ³ந்தோ ஸோதாபத்திமக்³கா³த³யோ பாபுணாதி. தஸ்மிங் க²ணே சத்தாரி ஸச்சானி ஏகப்படிவேதே⁴னேவ படிவிஜ்ஜ²தி, ஏகாபி⁴ஸமயேன அபி⁴ஸமேதி. தத்த² து³க்க²ங் பரிஞ்ஞாபடிவேதே⁴ன படிவிஜ்ஜ²ந்தோ, ஸமுத³யங் பஹானப்படிவேதே⁴ன படிவிஜ்ஜ²ந்தோ ஸப்³ப³ங் அகுஸலங் பஜஹதி, நிரோத⁴ங் ஸச்சி²கிரியாபடிவேதே⁴ன படிவிஜ்ஜ²ந்தோ மக்³க³ங் பா⁴வனாபடிவேதே⁴ன படிவிஜ்ஜ²ந்தோ ஸப்³ப³ங் குஸலங் பா⁴வேதி. அரியமக்³கோ³ ஹி நிப்பரியாயதோ குச்சி²தஸலனாதி³அத்தே²ன குஸலோ, தஸ்மிஞ்ச பா⁴விதே ஸப்³பே³பி குஸலா அனவஜ்ஜபோ³தி⁴பக்கி²யத⁴ம்மா பா⁴வனாபாரிபூரிங் க³ச்ச²ந்தீதி. ஏவங் யோனிஸோ மனஸி கரொந்தோ அகுஸலங் பஜஹதி, குஸலங் பா⁴வேதி. ததா² ஹி வுத்தங் – ‘‘இத³ங் து³க்க²ந்தி யோனிஸோ மனஸி கரோதி, அயங் து³க்க²ஸமுத³யோதி யோனிஸோ மனஸி கரோதீ’’திஆதி³ (ம॰ நி॰ 1.21). அபரம்பி வுத்தங் ‘‘யோனிஸோ மனஸிகாரஸம்பன்னஸ்ஸேதங், பி⁴க்க²வே, பி⁴க்கு²னோ பாடிகங்க²ங் – அரியங் அட்ட²ங்கி³கங் மக்³க³ங் பா⁴வெஸ்ஸதி, அரியங் அட்ட²ங்கி³கங் மக்³க³ங் ப³ஹுலீகரிஸ்ஸதீ’’தி (ஸங்॰ நி॰ 5.55).
Evaṃ tilakkhaṇāni āropetvā vipassanto udayabbayañāṇuppattiyā uppanne obhāsādike vipassanupakkilese ‘amaggo’ti udayabbayañāṇameva ‘‘ariyamaggassa upāyabhūto pubbabhāgamaggo’’ti maggāmaggaṃ vavatthapetvā puna udayabbayañāṇaṃ paṭipāṭiyā bhaṅgañāṇādīni ca uppādento sotāpattimaggādayo pāpuṇāti. Tasmiṃ khaṇe cattāri saccāni ekappaṭivedheneva paṭivijjhati, ekābhisamayena abhisameti. Tattha dukkhaṃ pariññāpaṭivedhena paṭivijjhanto, samudayaṃ pahānappaṭivedhena paṭivijjhanto sabbaṃ akusalaṃ pajahati, nirodhaṃ sacchikiriyāpaṭivedhena paṭivijjhanto maggaṃ bhāvanāpaṭivedhena paṭivijjhanto sabbaṃ kusalaṃ bhāveti. Ariyamaggo hi nippariyāyato kucchitasalanādiatthena kusalo, tasmiñca bhāvite sabbepi kusalā anavajjabodhipakkhiyadhammā bhāvanāpāripūriṃ gacchantīti. Evaṃ yoniso manasi karonto akusalaṃ pajahati, kusalaṃ bhāveti. Tathā hi vuttaṃ – ‘‘idaṃ dukkhanti yoniso manasi karoti, ayaṃ dukkhasamudayoti yoniso manasi karotī’’tiādi (ma. ni. 1.21). Aparampi vuttaṃ ‘‘yoniso manasikārasampannassetaṃ, bhikkhave, bhikkhuno pāṭikaṅkhaṃ – ariyaṃ aṭṭhaṅgikaṃ maggaṃ bhāvessati, ariyaṃ aṭṭhaṅgikaṃ maggaṃ bahulīkarissatī’’ti (saṃ. ni. 5.55).
யோனிஸோ மனஸிகாரோதி கா³தா²ய அயங் ஸங்கே²பத்தோ² – ஸிக்க²தி, ஸிக்கா²பதா³னி தஸ்ஸ அத்தி², ஸிக்க²னஸீலோதி வா ஸேகோ². ஸங்ஸாரே ப⁴யங் இக்க²தீதி பி⁴க்கு². தஸ்ஸ ஸேக²ஸ்ஸ பி⁴க்கு²னோ உத்தமத்த²ஸ்ஸ அரஹத்தஸ்ஸ பத்தியா அதி⁴க³மாய யதா² யோனிஸோ மனஸிகாரோ, ஏவங் ப³ஹுகாரோ ப³ஹூபகாரோ அஞ்ஞோ கோசி த⁴ம்மோ நத்தி². கஸ்மா? யஸ்மா யோனிஸோ உபாயேன மனஸிகாரங் புரக்க²த்வா பத³ஹங் சதுப்³பி³த⁴ஸம்மப்பதா⁴னவஸேன பத³ஹந்தோ, க²யங் து³க்க²ஸ்ஸ பாபுணே ஸங்கிலேஸவட்டது³க்க²ஸ்ஸ பரிக்க²யங் பரியோஸானங் நிப்³பா³னங் பாபுணே அதி⁴க³ச்செ²ய்ய, தஸ்மா யோனிஸோ மனஸிகாரோ ப³ஹுகாரோதி.
Yonisomanasikāroti gāthāya ayaṃ saṅkhepattho – sikkhati, sikkhāpadāni tassa atthi, sikkhanasīloti vā sekho. Saṃsāre bhayaṃ ikkhatīti bhikkhu. Tassa sekhassa bhikkhuno uttamatthassa arahattassa pattiyā adhigamāya yathā yoniso manasikāro, evaṃ bahukāro bahūpakāro añño koci dhammo natthi. Kasmā? Yasmā yoniso upāyena manasikāraṃ purakkhatvā padahaṃ catubbidhasammappadhānavasena padahanto, khayaṃ dukkhassa pāpuṇe saṃkilesavaṭṭadukkhassa parikkhayaṃ pariyosānaṃ nibbānaṃ pāpuṇe adhigaccheyya, tasmā yoniso manasikāro bahukāroti.
ச²ட்ட²ஸுத்தவண்ணனா நிட்டி²தா.
Chaṭṭhasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 6. பட²மஸேக²ஸுத்தங் • 6. Paṭhamasekhasuttaṃ
