| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
4. பட²மஸிக்கா²பத³ஸுத்தங்
4. Paṭhamasikkhāpadasuttaṃ
235. ‘‘சத்தாரிமானி, பி⁴க்க²வே, கம்மானி மயா ஸயங் அபி⁴ஞ்ஞா ஸச்சி²கத்வா பவேதி³தானி. கதமானி சத்தாரி? அத்தி² , பி⁴க்க²வே, கம்மங் கண்ஹங் கண்ஹவிபாகங்; அத்தி², பி⁴க்க²வே, கம்மங் ஸுக்கங் ஸுக்கவிபாகங்; அத்தி², பி⁴க்க²வே, கம்மங் கண்ஹஸுக்கங் கண்ஹஸுக்கவிபாகங் ; அத்தி², பி⁴க்க²வே, கம்மங் அகண்ஹஅஸுக்கங் அகண்ஹஅஸுக்கவிபாகங் கம்மக்க²யாய ஸங்வத்ததி. கதமஞ்ச, பி⁴க்க²வே, கம்மங் கண்ஹங் கண்ஹவிபாகங்? இத⁴, பி⁴க்க²வே, ஏகச்சோ பாணாதிபாதீ ஹோதி, அதி³ன்னாதா³யீ ஹோதி, காமேஸுமிச்சா²சாரீ ஹோதி, முஸாவாதீ³ ஹோதி, ஸுராமேரயமஜ்ஜபமாத³ட்டா²யீ ஹோதி. இத³ங் வுச்சதி, பி⁴க்க²வே, கம்மங் கண்ஹங் கண்ஹவிபாகங்.
235. ‘‘Cattārimāni, bhikkhave, kammāni mayā sayaṃ abhiññā sacchikatvā paveditāni. Katamāni cattāri? Atthi , bhikkhave, kammaṃ kaṇhaṃ kaṇhavipākaṃ; atthi, bhikkhave, kammaṃ sukkaṃ sukkavipākaṃ; atthi, bhikkhave, kammaṃ kaṇhasukkaṃ kaṇhasukkavipākaṃ ; atthi, bhikkhave, kammaṃ akaṇhaasukkaṃ akaṇhaasukkavipākaṃ kammakkhayāya saṃvattati. Katamañca, bhikkhave, kammaṃ kaṇhaṃ kaṇhavipākaṃ? Idha, bhikkhave, ekacco pāṇātipātī hoti, adinnādāyī hoti, kāmesumicchācārī hoti, musāvādī hoti, surāmerayamajjapamādaṭṭhāyī hoti. Idaṃ vuccati, bhikkhave, kammaṃ kaṇhaṃ kaṇhavipākaṃ.
‘‘கதமஞ்ச, பி⁴க்க²வே, கம்மங் ஸுக்கங் ஸுக்கவிபாகங்? இத⁴, பி⁴க்க²வே, ஏகச்சோ பாணாதிபாதா படிவிரதோ ஹோதி, அதி³ன்னாதா³னா படிவிரதோ ஹோதி, காமேஸுமிச்சா²சாரா படிவிரதோ ஹோதி, முஸாவாதா³ படிவிரதோ ஹோதி, ஸுராமேரயமஜ்ஜபமாத³ட்டா²னா படிவிரதோ ஹோதி. இத³ங் வுச்சதி, பி⁴க்க²வே, கம்மங் ஸுக்கங் ஸுக்கவிபாகங்.
‘‘Katamañca, bhikkhave, kammaṃ sukkaṃ sukkavipākaṃ? Idha, bhikkhave, ekacco pāṇātipātā paṭivirato hoti, adinnādānā paṭivirato hoti, kāmesumicchācārā paṭivirato hoti, musāvādā paṭivirato hoti, surāmerayamajjapamādaṭṭhānā paṭivirato hoti. Idaṃ vuccati, bhikkhave, kammaṃ sukkaṃ sukkavipākaṃ.
‘‘கதமஞ்ச, பி⁴க்க²வே, கம்மங் கண்ஹஸுக்கங் கண்ஹஸுக்கவிபாகங்? இத⁴, பி⁴க்க²வே, ஏகச்சோ ஸப்³யாப³ஜ்ஜ²ம்பி அப்³யாப³ஜ்ஜ²ம்பி காயஸங்கா²ரங் அபி⁴ஸங்க²ரோதி…பே॰… இத³ங் வுச்சதி, பி⁴க்க²வே, கம்மங் கண்ஹஸுக்கங் கண்ஹஸுக்கவிபாகங்.
‘‘Katamañca, bhikkhave, kammaṃ kaṇhasukkaṃ kaṇhasukkavipākaṃ? Idha, bhikkhave, ekacco sabyābajjhampi abyābajjhampi kāyasaṅkhāraṃ abhisaṅkharoti…pe… idaṃ vuccati, bhikkhave, kammaṃ kaṇhasukkaṃ kaṇhasukkavipākaṃ.
‘‘கதமஞ்ச, பி⁴க்க²வே, கம்மங் அகண்ஹஅஸுக்கங் அகண்ஹஅஸுக்கவிபாகங் கம்மக்க²யாய ஸங்வத்ததி? தத்ர, பி⁴க்க²வே, யமித³ங் கம்மங் கண்ஹங் கண்ஹவிபாகங்…பே॰… இத³ங் வுச்சதி, பி⁴க்க²வே, கம்மங் அகண்ஹஅஸுக்கங் அகண்ஹஅஸுக்கவிபாகங் கம்மக்க²யாய ஸங்வத்ததி. இமானி கோ², பி⁴க்க²வே, சத்தாரி கம்மானி மயா ஸயங் அபி⁴ஞ்ஞா ஸச்சி²கத்வா பவேதி³தானீ’’தி. சதுத்த²ங்.
‘‘Katamañca, bhikkhave, kammaṃ akaṇhaasukkaṃ akaṇhaasukkavipākaṃ kammakkhayāya saṃvattati? Tatra, bhikkhave, yamidaṃ kammaṃ kaṇhaṃ kaṇhavipākaṃ…pe… idaṃ vuccati, bhikkhave, kammaṃ akaṇhaasukkaṃ akaṇhaasukkavipākaṃ kammakkhayāya saṃvattati. Imāni kho, bhikkhave, cattāri kammāni mayā sayaṃ abhiññā sacchikatvā paveditānī’’ti. Catutthaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 4-9. ஸிக்கா²பத³ஸுத்தாதி³வண்ணனா • 4-9. Sikkhāpadasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 3-9. ஸோணகாயனஸுத்தாதி³வண்ணனா • 3-9. Soṇakāyanasuttādivaṇṇanā
