| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
5-7. பட²மவித்தா²ரஸுத்தாதி³வண்ணனா
5-7. Paṭhamavitthārasuttādivaṇṇanā
485-487. விபஸ்ஸனாவஸேன நிஸ்ஸக்கங் வேதி³தப்³ப³ங், ந மக்³க³ப²லவஸேன, இமஸ்மிங் ஸுத்தே ஸப்³ப³ஸோவ விபஸ்ஸனிந்த்³ரியானங் ஏவ அதி⁴ப்பேதத்தா. இதா³னி தமத்த²ங் பாகடங் காதுங் ‘‘பரிபுண்ணானி ஹீ’’திஆதி³ வுத்தங். அவிஹாதீ³ஸு பஞ்சஸு ஸுத்³தா⁴வாஸேஸு தத்த² தத்த² ஆயுவேமஜ்ஜ²ங் அனதிக்கமித்வா அந்தரா கிலேஸபரினிப்³பா³னேன பரினிப்³பா³யனதோ அந்தராபரினிப்³பா³யீ, அஸங்கா²ரேன அப்பயோகே³ன ஸரஸதோவ பரினிப்³பா³யனதோ அஸங்கா²ரபரினிப்³பா³யீ, தப்³பி³பரியாயதோ ஸஸங்கா²ரபரினிப்³பா³யீ, உத்³த⁴ங் வாஹிபா⁴வேன உத்³த⁴மஸ்ஸ தண்ஹாஸோதங் வட்டஸோதங் வாதி உத்³த⁴ங்ஸோதோ, உத்³த⁴ங் வா க³ந்த்வா படிலபி⁴தப்³ப³தோ உத்³த⁴மஸ்ஸ மக்³க³ஸோதந்தி உத்³த⁴ங்ஸோதோ, அகனிட்ட²ப⁴வங் க³ச்ச²தீதி அகனிட்ட²கா³மீதி ஏவமெத்த² ஸத்³த³த்தோ² த³ட்ட²ப்³போ³.
485-487.Vipassanāvasena nissakkaṃ veditabbaṃ, na maggaphalavasena, imasmiṃ sutte sabbasova vipassanindriyānaṃ eva adhippetattā. Idāni tamatthaṃ pākaṭaṃ kātuṃ ‘‘paripuṇṇāni hī’’tiādi vuttaṃ. Avihādīsu pañcasu suddhāvāsesu tattha tattha āyuvemajjhaṃ anatikkamitvā antarā kilesaparinibbānena parinibbāyanato antarāparinibbāyī, asaṅkhārena appayogena sarasatova parinibbāyanato asaṅkhāraparinibbāyī, tabbipariyāyato sasaṅkhāraparinibbāyī, uddhaṃ vāhibhāvena uddhamassa taṇhāsotaṃ vaṭṭasotaṃ vāti uddhaṃsoto, uddhaṃ vā gantvā paṭilabhitabbato uddhamassa maggasotanti uddhaṃsoto, akaniṭṭhabhavaṃ gacchatīti akaniṭṭhagāmīti evamettha saddattho daṭṭhabbo.
இமஸ்மிங் பன டா²னேதி ‘‘விபஸ்ஸனாவஸேன நிஸ்ஸக்க’’ந்தி வுத்தட்டா²னே. அரஹத்தமக்³கே³யேவ ட²த்வாதி இமஸ்மிங்யேவ ப⁴வே அரஹத்தமக்³கே³யேவ, ந விபஸ்ஸனாய ச ட²த்வா. பஞ்ச நிஸ்ஸக்கானி நீஹரிதப்³பா³னீதி ‘‘ததோ முது³தரேஹி அந்தராபரினிப்³பா³யீ ஹோதீ’’திஆதீ³னி பஞ்ச நிஸ்ஸக்கானி நித்³தா⁴ரெத்வா கதே²தப்³பா³னி. இதா³னி தமத்த²ங் விவரந்தோ ‘‘அரஹத்தமக்³க³ஸ்ஸ ஹீ’’திஆதி³மாஹ. தத்த² அவிஹாதீ³ஸு உப்பஜ்ஜித்வா உப்பன்னஸமனந்தராய பரினிப்³பா³யனதோ பட²மஅந்தராபரினிப்³பா³யீ. தத்த² ஆயுப்பமாணவேமஜ்ஜ²ங் அப்பத்வாவ பரினிப்³பா³யனதோ து³தியஅந்தராபரினிப்³பா³யீ, ஆயுவேமஜ்ஜ²ங் பத்வா பரினிப்³பா³யனதோ ததோ பரங் ததியஅந்தராபரினிப்³பா³யீ வேதி³தப்³போ³. ‘‘பஞ்ச நிஸ்ஸக்கானீ’’தி கஸ்மா வுத்தங்? நனு அஸங்கா²ரஸஸங்கா²ரபரினிப்³பா³யீதி வத்தப்³ப³ந்தி? ந வத்தப்³ப³ந்தி த³ஸ்ஸெந்தோ ஆஹ ‘‘அஸங்கா²ரபரினிப்³பா³யிஸ்ஸ ஸஸங்கா²ரபரினிப்³பா³யினோபி ஏதேவ பஞ்ச ஜனா’’தி.
Imasmiṃ pana ṭhāneti ‘‘vipassanāvasena nissakka’’nti vuttaṭṭhāne. Arahattamaggeyeva ṭhatvāti imasmiṃyeva bhave arahattamaggeyeva, na vipassanāya ca ṭhatvā. Pañca nissakkāni nīharitabbānīti ‘‘tato mudutarehi antarāparinibbāyī hotī’’tiādīni pañca nissakkāni niddhāretvā kathetabbāni. Idāni tamatthaṃ vivaranto ‘‘arahattamaggassa hī’’tiādimāha. Tattha avihādīsu uppajjitvā uppannasamanantarāya parinibbāyanato paṭhamaantarāparinibbāyī. Tattha āyuppamāṇavemajjhaṃ appatvāva parinibbāyanato dutiyaantarāparinibbāyī, āyuvemajjhaṃ patvā parinibbāyanato tato paraṃ tatiyaantarāparinibbāyī veditabbo. ‘‘Pañca nissakkānī’’ti kasmā vuttaṃ? Nanu asaṅkhārasasaṅkhāraparinibbāyīti vattabbanti? Na vattabbanti dassento āha ‘‘asaṅkhāraparinibbāyissa sasaṅkhāraparinibbāyinopi eteva pañca janā’’ti.
தீணி நிஸ்ஸக்கானீதி ‘‘ததோ முது³தரேஹி ஸோதாபன்னோ ஹோதீ’’திஆதீ³னி தீணி நிஸ்ஸக்கபதா³னி. இத⁴ ஸகதா³கா³மீ ந க³ஹிதோ, ஸோ அனாகா³மிமக்³கே³ ட²த்வா நீஹரிதப்³போ³, அனாகா³மிமக்³க³ஸ்ஸ விபஸ்ஸனிந்த்³ரியேஹி முது³தரேஹி ஸகதா³கா³மீ ஹோதி. ஸகதா³…பே॰… முது³தரானீதி இத³ங் ஸகதா³கா³மிமக்³க³ஸ்ஸ விபஸ்ஸனிந்த்³ரியேஹி ஏகபீ³ஜிஸங்கா²தஸோதாபன்னவிபஸ்ஸனிந்த்³ரியானி முது³தரானி ஹொந்தீதி தீணி கத்வா வுத்தங். த⁴ம்மானுஸாரீதிஆதி³த்³வயங் கோலங்கோலாதி³த்³வயேன க³ஹிதங் ஹோதீதி. ஸகதா³கா³மிமக்³க³ஸ்ஸ ஹீதிஆதி³ வுத்தஸ்ஸேவ அத்த²ஸ்ஸ விவரணங். ஸேஸங் ஹெட்டா² வுத்தனயமேவ. ச²ட்ட²ஸத்தமானி வுத்தனயானேவாதி ச²ட்ட²ஸத்தமானி ஸுத்தானி து³தியததியேஸு வுத்தனயானேவ. தத்த² பன மிஸ்ஸகானி இந்த்³ரியானி கதி²தானி, இத⁴ புப்³ப³பா⁴க³விபஸ்ஸனிந்த்³ரியானி கதி²தானீதி அயமேவ விஸேஸோ.
Tīṇi nissakkānīti ‘‘tato mudutarehi sotāpanno hotī’’tiādīni tīṇi nissakkapadāni. Idha sakadāgāmī na gahito, so anāgāmimagge ṭhatvā nīharitabbo, anāgāmimaggassa vipassanindriyehi mudutarehi sakadāgāmī hoti. Sakadā…pe… mudutarānīti idaṃ sakadāgāmimaggassa vipassanindriyehi ekabījisaṅkhātasotāpannavipassanindriyāni mudutarāni hontīti tīṇi katvā vuttaṃ. Dhammānusārītiādidvayaṃ kolaṃkolādidvayena gahitaṃ hotīti. Sakadāgāmimaggassa hītiādi vuttasseva atthassa vivaraṇaṃ. Sesaṃ heṭṭhā vuttanayameva. Chaṭṭhasattamāni vuttanayānevāti chaṭṭhasattamāni suttāni dutiyatatiyesu vuttanayāneva. Tattha pana missakāni indriyāni kathitāni, idha pubbabhāgavipassanindriyāni kathitānīti ayameva viseso.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya
5. பட²மவித்தா²ரஸுத்தங் • 5. Paṭhamavitthārasuttaṃ
6. து³தியவித்தா²ரஸுத்தங் • 6. Dutiyavitthārasuttaṃ
7. ததியவித்தா²ரஸுத்தங் • 7. Tatiyavitthārasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 5-7. பட²மவித்தா²ரஸுத்தாதி³வண்ணனா • 5-7. Paṭhamavitthārasuttādivaṇṇanā
