| Library / Tipiṭaka / તિપિટક • Tipiṭaka / પઞ્ચપકરણ-મૂલટીકા • Pañcapakaraṇa-mūlaṭīkā |
૭. પથવીકમ્મવિપાકોતિકથાવણ્ણના
7. Pathavīkammavipākotikathāvaṇṇanā
૪૯૨. ફસ્સો સુખવેદનીયાદિભેદો હોતીતિ ફસ્સેન સબ્બમ્પિ કમ્મવિપાકં દસ્સેત્વા પુન અત્તવજ્જેહિ સમ્પયોગદસ્સનત્થં ‘‘સો ચ સઞ્ઞાદયો ચા’’તિઆદિ વુત્તં. અત્થિ ચ નેસન્તિ સાવજ્જને ચક્ખુવિઞ્ઞાણાદિસહજાતધમ્મે સન્ધાય વુત્તં. યો તત્થ ઇટ્ઠવિપાકો, તસ્સ પત્થનાતિ ઇટ્ઠવિપાકે એવ પત્થનં કત્વા કમ્મં કરોન્તીતિ કમ્મૂપનિસ્સયભૂતમેવ પત્થનં દસ્સેતિ, પચ્ચુપ્પન્નવેદનાપચ્ચયં વા તણ્હં ઉપાદાનાદિનિબ્બત્તનવસેન દુક્ખસ્સ પભાવિતં. મૂલતણ્હાતિ પચ્ચુપ્પન્નવિપાકવટ્ટનિબ્બત્તકકમ્મસ્સ ઉપનિસ્સયભૂતં પુરિમતણ્હં, કમ્મસહાયં વા વિપાકસ્સ ઉપનિસ્સયભૂતં.
492. Phassosukhavedanīyādibhedo hotīti phassena sabbampi kammavipākaṃ dassetvā puna attavajjehi sampayogadassanatthaṃ ‘‘so ca saññādayo cā’’tiādi vuttaṃ. Atthi ca nesanti sāvajjane cakkhuviññāṇādisahajātadhamme sandhāya vuttaṃ. Yo tattha iṭṭhavipāko, tassa patthanāti iṭṭhavipāke eva patthanaṃ katvā kammaṃ karontīti kammūpanissayabhūtameva patthanaṃ dasseti, paccuppannavedanāpaccayaṃ vā taṇhaṃ upādānādinibbattanavasena dukkhassa pabhāvitaṃ. Mūlataṇhāti paccuppannavipākavaṭṭanibbattakakammassa upanissayabhūtaṃ purimataṇhaṃ, kammasahāyaṃ vā vipākassa upanissayabhūtaṃ.
૪૯૩. સકસમયવસેન ચ ચોદનાય પયુજ્જમાનતં દસ્સેતું ‘‘તેસઞ્ચ લદ્ધિયા’’તિઆદિમાહ.
493. Sakasamayavasena ca codanāya payujjamānataṃ dassetuṃ ‘‘tesañca laddhiyā’’tiādimāha.
૪૯૪. પટિલાભવસેનાતિ કમ્મે સતિ પથવિયાદીનં પટિલાભો હોતીતિ કમ્મં તંસંવત્તનિકં નામ હોતીતિ દસ્સેતિ.
494. Paṭilābhavasenāti kamme sati pathaviyādīnaṃ paṭilābho hotīti kammaṃ taṃsaṃvattanikaṃ nāma hotīti dasseti.
પથવીકમ્મવિપાકોતિકથાવણ્ણના નિટ્ઠિતા.
Pathavīkammavipākotikathāvaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / અભિધમ્મપિટક • Abhidhammapiṭaka / કથાવત્થુપાળિ • Kathāvatthupāḷi / (૬૯) ૭. પથવી કમ્મવિપાકોતિકથા • (69) 7. Pathavī kammavipākotikathā
અટ્ઠકથા • Aṭṭhakathā / અભિધમ્મપિટક (અટ્ઠકથા) • Abhidhammapiṭaka (aṭṭhakathā) / પઞ્ચપકરણ-અટ્ઠકથા • Pañcapakaraṇa-aṭṭhakathā / ૭. પથવીકમ્મવિપાકોતિકથાવણ્ણના • 7. Pathavīkammavipākotikathāvaṇṇanā
ટીકા • Tīkā / અભિધમ્મપિટક (ટીકા) • Abhidhammapiṭaka (ṭīkā) / પઞ્ચપકરણ-અનુટીકા • Pañcapakaraṇa-anuṭīkā / ૭. પથવીકમ્મવિપાકોતિકથાવણ્ણના • 7. Pathavīkammavipākotikathāvaṇṇanā
