| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
3. படிபதா³ஸுத்தவண்ணனா
3. Paṭipadāsuttavaṇṇanā
3. மிச்சா² படிபஜ்ஜதி ஏதாயாதி மிச்சா²படிபதா³, வட்டகா³மிமக்³கோ³ து³க்கா²வஹத்தா. தங் மிச்சா²படிபத³ங். தேனாஹ ‘‘அனிய்யானிகபடிபதா³’’தி. ஸோ புஞ்ஞாபி⁴ஸங்கா²ரோ கத²ங் மிச்சா²படிபதா³ ஹோதீதி? ஸம்பத்திப⁴வே ஸுகா²வஹோவ ஹோதீதி அதி⁴ப்பாயோ. வட்டஸீஸத்தாதி வட்டபக்கி²யானங் உத்தமங்க³பா⁴வதோ. அந்தமஸோதி உக்கங்ஸபரியந்தங் ஸந்தா⁴ய வத³தி அவகங்ஸபரியந்ததோ. ‘‘இத³ங் மே புஞ்ஞங் நிப்³பா³னாதி⁴க³மாய பச்சயோ ஹோதூ’’தி ஏவங் நிப்³பா³னங் பத்தெ²த்வா பவத்திதங். பண்ணமுட்டி²தா³னமத்தந்தி ஸாகபண்ணமுட்டி²தா³னமத்தங். அப்பத்வாதி அந்தோக³த⁴ஹேது ஏஸ நித்³தே³ஸோ, அபாபெத்வாதி அத்தோ². யத³க்³கே³ன வா படிபஜ்ஜனதோ அரஹத்தங் பத்தோதி வுச்சதி, தத³க்³கே³ன ததா³வஹா படிபதா³பி பத்தாதி வுச்சதீதி ‘‘அப்பத்வா’’தி வுத்தங். அனுலோமவஸேனாதி அனுலோமபடிச்சஸமுப்பாத³வஸேன. படிலோமவஸேனாதி எத்தா²பி ஏஸேவ நயோ. படிபதா³ புச்சி²தாதி ஏதேன படிபதா³ தே³ஸேதுங் ஆரத்³தா⁴தி அயம்பி அத்தோ² ஸங்க³ஹிதோ யதா²ரத்³த⁴ஸ்ஸ அத்த²ஸ்ஸ கதே²துகம்யதாபுச்சா²ய இதா⁴க³தத்தா. அனுலோமபடிச்சஸமுப்பாத³தே³ஸனாயம்பெத்த² ப்³யதிரேகமுகே²ன அவிஜ்ஜாதி³னிரோதா⁴ பன விஜ்ஜாய ஸதி ஹோதி ஸங்கா²ரானங் அஸம்ப⁴வோதி வுத்தங் ‘‘நிப்³பா³னங் பா⁴ஜித’’ந்தி. ஸரூபேன பன தாய வட்டமேவ பகாஸிதங். வக்க²தி ஹி பரியோஸானே ‘‘வட்டவிவட்டமேவ கதி²த’’ந்தி. நிய்யாதனேதி நிக³மனே. ப²லேனாதி பத்தப்³ப³ப²லேன படிபதா³ய ஸம்பாபகஹேதுனோ த³ஸ்ஸிதத்தா. யதா² ஹி திவிதோ⁴ ஹேது ஞாபகோ, நிப்³ப³த்தகோ, ஸம்பாபகோதி, ஏவங் திவித⁴ங் ப²லங் ஞாபேதப்³ப³ங், நிப்³ப³த்தேதப்³ப³ங், ஸம்பாபேதப்³ப³ந்தி. தஸ்மா பத்தப்³ப³ப²லேன நிப்³பா³னேன தங்ஸம்பாபகஹேதுபூ⁴தாய படிபதா³ய த³ஸ்ஸிதத்தாதி அத்தோ². தேனாஹ ‘‘ப²லேன ஹெத்தா²’’திஆதி³. அயங் வுச்சதீதி ஏவங் நிப்³பா³னப²லா அயங் ‘‘ஸம்மாபடிபதா³’’தி வுச்சதி. அஸேஸவிராகா³ அஸேஸனிரோதா⁴தி ஸமுச்சே²த³ப்பஹானவஸேன அவிஜ்ஜாய அஸேஸவிரஜ்ஜனதோ அஸேஸனிருஜ்ஜ²னதோ ச. பத³த்³வயேனபி அனுப்பாத³னிரோத⁴மேவ வத³தி. தஞ்ஹி நிப்³பா³னங். து³தியவிகப்பே அயங் எத்த² அதி⁴ப்பாயோ – யேன மக்³கே³ன கரணபூ⁴தேன அஸேஸனிரோதோ⁴ ஹோதி, அவிஜ்ஜாய அஸேஸனிரோதோ⁴ யங் ஆக³ம்ம ஹோதி, தங் மக்³க³ங் த³ஸ்ஸேதுந்தி. ஏவஞ்ஹி ஸதீதி ஏவங் பத³பா⁴ஜனஸ்ஸ நிப்³பா³னஸ்ஸ பத³த்தே² ஸதி. ஸானுபா⁴வா படிபதா³ விப⁴த்தா ஹோதீதி அவிஜ்ஜாய அஸேஸனிரோத⁴ஹேதுபடிபதா³ தத்த² ஸாதிஸயஸாமத்தி²யஸமாயோக³தோ ஸானுபா⁴வா விப⁴த்தா ஹோதி. மிச்சா²படிபதா³க³ஹணேனெத்த² வட்டஸ்ஸபி விப⁴த்தத்தா வுத்தங் ‘‘வட்டவிவட்டமேவ கதி²த’’ந்தி.
3. Micchā paṭipajjati etāyāti micchāpaṭipadā, vaṭṭagāmimaggo dukkhāvahattā. Taṃ micchāpaṭipadaṃ. Tenāha ‘‘aniyyānikapaṭipadā’’ti. So puññābhisaṅkhāro kathaṃ micchāpaṭipadā hotīti? Sampattibhave sukhāvahova hotīti adhippāyo. Vaṭṭasīsattāti vaṭṭapakkhiyānaṃ uttamaṅgabhāvato. Antamasoti ukkaṃsapariyantaṃ sandhāya vadati avakaṃsapariyantato. ‘‘Idaṃ me puññaṃ nibbānādhigamāya paccayo hotū’’ti evaṃ nibbānaṃ patthetvā pavattitaṃ. Paṇṇamuṭṭhidānamattanti sākapaṇṇamuṭṭhidānamattaṃ. Appatvāti antogadhahetu esa niddeso, apāpetvāti attho. Yadaggena vā paṭipajjanato arahattaṃ pattoti vuccati, tadaggena tadāvahā paṭipadāpi pattāti vuccatīti ‘‘appatvā’’ti vuttaṃ. Anulomavasenāti anulomapaṭiccasamuppādavasena. Paṭilomavasenāti etthāpi eseva nayo. Paṭipadā pucchitāti etena paṭipadā desetuṃ āraddhāti ayampi attho saṅgahito yathāraddhassa atthassa kathetukamyatāpucchāya idhāgatattā. Anulomapaṭiccasamuppādadesanāyampettha byatirekamukhena avijjādinirodhā pana vijjāya sati hoti saṅkhārānaṃ asambhavoti vuttaṃ ‘‘nibbānaṃ bhājita’’nti. Sarūpena pana tāya vaṭṭameva pakāsitaṃ. Vakkhati hi pariyosāne ‘‘vaṭṭavivaṭṭameva kathita’’nti. Niyyātaneti nigamane. Phalenāti pattabbaphalena paṭipadāya sampāpakahetuno dassitattā. Yathā hi tividho hetu ñāpako, nibbattako, sampāpakoti, evaṃ tividhaṃ phalaṃ ñāpetabbaṃ, nibbattetabbaṃ, sampāpetabbanti. Tasmā pattabbaphalena nibbānena taṃsampāpakahetubhūtāya paṭipadāya dassitattāti attho. Tenāha ‘‘phalena hetthā’’tiādi. Ayaṃ vuccatīti evaṃ nibbānaphalā ayaṃ ‘‘sammāpaṭipadā’’ti vuccati. Asesavirāgā asesanirodhāti samucchedappahānavasena avijjāya asesavirajjanato asesanirujjhanato ca. Padadvayenapi anuppādanirodhameva vadati. Tañhi nibbānaṃ. Dutiyavikappe ayaṃ ettha adhippāyo – yena maggena karaṇabhūtena asesanirodho hoti, avijjāya asesanirodho yaṃ āgamma hoti, taṃ maggaṃ dassetunti. Evañhi satīti evaṃ padabhājanassa nibbānassa padatthe sati. Sānubhāvā paṭipadā vibhattā hotīti avijjāya asesanirodhahetupaṭipadā tattha sātisayasāmatthiyasamāyogato sānubhāvā vibhattā hoti. Micchāpaṭipadāgahaṇenettha vaṭṭassapi vibhattattā vuttaṃ ‘‘vaṭṭavivaṭṭameva kathita’’nti.
படிபதா³ஸுத்தவண்ணனா நிட்டி²தா.
Paṭipadāsuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. படிபதா³ஸுத்தங் • 3. Paṭipadāsuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3. படிபதா³ஸுத்தவண்ணனா • 3. Paṭipadāsuttavaṇṇanā
