| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
8. படிஸல்லானஸுத்தவண்ணனா
8. Paṭisallānasuttavaṇṇanā
45. அட்ட²மே படிஸல்லானராமாதி தேஹி தேஹி ஸத்தஸங்கா²ரேஹி படினிவத்தித்வா ஸல்லானங் படிஸல்லானங், ஏகவிஹாரோ ஏகமந்தஸேவிதா, காயவிவேகோதி அத்தோ². தங் படிஸல்லானங் ரமந்தி ரோசந்தீதி படிஸல்லானராமா. ‘‘படிஸல்லானாராமா’’திபி பாடோ². யதா² வுத்தங் படிஸல்லானங் ஆரமிதப்³ப³தோ ஆராமோ ஏதேஸந்தி படிஸல்லானாராமா. விஹரதா²தி ஏவங்பூ⁴தா ஹுத்வா விஹரதா²தி அத்தோ². படிஸல்லானே ரதா நிரதா ஸம்முதி³தாதி படிஸல்லானரதா. எத்தாவதா ஜாக³ரியானுயோகோ³, தஸ்ஸ நிமித்தபூ⁴தா வூபகட்ட²காயதா ச த³ஸ்ஸிதா. ஜாக³ரியானுயோகோ³, ஸீலஸங்வரோ, இந்த்³ரியேஸு, கு³த்தத்³வாரதா, போ⁴ஜனே மத்தஞ்ஞுதா, ஸதிஸம்பஜஞ்ஞந்தி இமேஹி த⁴ம்மேஹி வினா ந வத்ததீதி தேபி இத⁴ அத்த²தோ வுத்தா ஏவாதி வேதி³தப்³பா³.
45. Aṭṭhame paṭisallānarāmāti tehi tehi sattasaṅkhārehi paṭinivattitvā sallānaṃ paṭisallānaṃ, ekavihāro ekamantasevitā, kāyavivekoti attho. Taṃ paṭisallānaṃ ramanti rocantīti paṭisallānarāmā. ‘‘Paṭisallānārāmā’’tipi pāṭho. Yathā vuttaṃ paṭisallānaṃ āramitabbato ārāmo etesanti paṭisallānārāmā. Viharathāti evaṃbhūtā hutvā viharathāti attho. Paṭisallāne ratā niratā sammuditāti paṭisallānaratā. Ettāvatā jāgariyānuyogo, tassa nimittabhūtā vūpakaṭṭhakāyatā ca dassitā. Jāgariyānuyogo, sīlasaṃvaro, indriyesu, guttadvāratā, bhojane mattaññutā, satisampajaññanti imehi dhammehi vinā na vattatīti tepi idha atthato vuttā evāti veditabbā.
அஜ்ஜ²த்தங் சேதோஸமத²மனுயுத்தாதி அத்தனோ சித்தஸமதே² அனுயுத்தா. அஜ்ஜ²த்தங் அத்தனோதி ச ஏதங் ஏகத்த²ங், ப்³யஞ்ஜனமேவ நானங். பு⁴ம்மத்தே² சேதங் ஸமத²ந்தி அனுஸத்³த³யோகே³ன உபயோக³வசனங். அனிராகதஜ்ஜா²னாதி ப³ஹி அனீஹதஜ்ஜா²னா அவினாஸிதஜ்ஜா²னா வா. நீஹரணங் வினாஸோ வாதி இத³ங் நிராகதங் நாம ‘‘த²ம்ப⁴ங் நிரங்கத்வா நிவாதவுத்தீ’’திஆதீ³ஸு (ஸு॰ நி॰ 328) விய. விபஸ்ஸனாய ஸமன்னாக³தாதி ஸத்தவிதா⁴ய அனுபஸ்ஸனாய யுத்தா. ஸத்தவிதா⁴ அனுபஸ்ஸனா நாம அனிச்சானுபஸ்ஸனா, து³க்கா²னுபஸ்ஸனா, அனத்தானுபஸ்ஸனா, நிப்³பி³தா³னுபஸ்ஸனா, விராகா³னுபஸ்ஸனா, நிரோதா⁴னுபஸ்ஸனா, படினிஸ்ஸக்³கா³னுபஸ்ஸனா ச, தா விஸுத்³தி⁴மக்³கே³ வித்தா²ரிதாவ.
Ajjhattaṃ cetosamathamanuyuttāti attano cittasamathe anuyuttā. Ajjhattaṃ attanoti ca etaṃ ekatthaṃ, byañjanameva nānaṃ. Bhummatthe cetaṃ samathanti anusaddayogena upayogavacanaṃ. Anirākatajjhānāti bahi anīhatajjhānā avināsitajjhānā vā. Nīharaṇaṃ vināso vāti idaṃ nirākataṃ nāma ‘‘thambhaṃ niraṃkatvā nivātavuttī’’tiādīsu (su. ni. 328) viya. Vipassanāya samannāgatāti sattavidhāya anupassanāya yuttā. Sattavidhā anupassanā nāma aniccānupassanā, dukkhānupassanā, anattānupassanā, nibbidānupassanā, virāgānupassanā, nirodhānupassanā, paṭinissaggānupassanā ca, tā visuddhimagge vitthāritāva.
ப்³ரூஹேதாரோ ஸுஞ்ஞாகா³ரானந்தி வட்³டே⁴தாரோ ஸுஞ்ஞாகா³ரானங். எத்த² ச ‘‘ஸுஞ்ஞாகா³ரான’’ந்தி யங்கிஞ்சி விவித்தங் பா⁴வனானுயோக³ஸ்ஸ அனுச்ச²விகட்டா²னங். ஸமத²விபஸ்ஸனாவஸேன கம்மட்டா²னங் க³ஹெத்வா ரத்திந்தி³வங் ஸுஞ்ஞாகா³ரங் பவிஸித்வா பா⁴வனானுயோக³வஸேன நிஸீத³மானா பி⁴க்கூ² ‘‘ப்³ரூஹேதாரோ ஸுஞ்ஞாகா³ரான’’ந்தி வேதி³தப்³பா³. ஏகபூ⁴மிகாதி³பாஸாதே³பி பன வாஸங் குருமானா ஜா²யினோ ஸுஞ்ஞாகா³ரானங் ப்³ரூஹேதாரொத்வேவ வேதி³தப்³பா³.
Brūhetāro suññāgārānanti vaḍḍhetāro suññāgārānaṃ. Ettha ca ‘‘suññāgārāna’’nti yaṃkiñci vivittaṃ bhāvanānuyogassa anucchavikaṭṭhānaṃ. Samathavipassanāvasena kammaṭṭhānaṃ gahetvā rattindivaṃ suññāgāraṃ pavisitvā bhāvanānuyogavasena nisīdamānā bhikkhū ‘‘brūhetāro suññāgārāna’’nti veditabbā. Ekabhūmikādipāsādepi pana vāsaṃ kurumānā jhāyino suññāgārānaṃ brūhetārotveva veditabbā.
எத்த² ச யா ‘‘படிஸல்லானராமா, பி⁴க்க²வே, விஹரத² படிஸல்லானரதா’’தி வூபகட்ட²காயதா விஹிதா, ஸா பரிஸுத்³த⁴ஸீலஸ்ஸ, ந அஸீலஸ்ஸ அவிஸுத்³த⁴ஸீலஸ்ஸ வா தஸ்ஸ ரூபாரம்மணாதி³தோ சித்தவினிவத்தனஸ்ஸேவ அபா⁴வதோதி அத்த²தோ ஸீலவிஸுத்³தி⁴ த³ஸ்ஸிதாதி வுத்தோவாயமத்தோ². ‘‘அஜ்ஜ²த்தங் சேதோஸமத²மனுயுத்தா அனிராகதஜ்ஜா²னா’’தி பத³த்³வயேன ஸமாதி⁴பா⁴வனா, ‘‘விபஸ்ஸனாய ஸமன்னாக³தா’’தி இமினா பஞ்ஞாபா⁴வனா விஹிதாதி லோகியா திஸ்ஸோ ஸிக்கா² த³ஸ்ஸிதா.
Ettha ca yā ‘‘paṭisallānarāmā, bhikkhave, viharatha paṭisallānaratā’’ti vūpakaṭṭhakāyatā vihitā, sā parisuddhasīlassa, na asīlassa avisuddhasīlassa vā tassa rūpārammaṇādito cittavinivattanasseva abhāvatoti atthato sīlavisuddhi dassitāti vuttovāyamattho. ‘‘Ajjhattaṃ cetosamathamanuyuttā anirākatajjhānā’’ti padadvayena samādhibhāvanā, ‘‘vipassanāya samannāgatā’’ti iminā paññābhāvanā vihitāti lokiyā tisso sikkhā dassitā.
இதா³னி தாஸு பதிட்டி²தஸ்ஸ அவஸ்ஸங்பா⁴விப²லங் த³ஸ்ஸேதுங் ‘‘படிஸல்லானராமான’’ந்திஆதி³ வுத்தங். தத்த² ப்³ரூஹேதானந்தி வட்³டே⁴தானங். த்³வின்னங் ப²லானந்தி ததியசதுத்த²ப²லானங். பாடிகங்க²ந்தி இச்சி²தப்³ப³ங் அவஸ்ஸங்பா⁴வீ. அஞ்ஞாதி அரஹத்தங். தஞ்ஹி ஹெட்டி²மமக்³க³ஞாணேஹி ஞாதமரியாத³ங் அனதிக்கமித்வா ஜானநதோ பரிபுண்ணஜானநத்தா உபரி ஜானநகிச்சாபா⁴வதோ ச ‘‘அஞ்ஞா’’தி வுச்சதி. ஸதி வா உபாதி³ஸேஸேதி ஸதி வா கிலேஸூபாதி³ஸேஸே, பஹாதுங் அஸக்குணெய்யே ஸதி. ஞாணே ஹி அபரிபக்கே யே தேன பரிபக்கேன பஹாதப்³ப³கிலேஸா, தே ந பஹீயந்தி. தங் ஸந்தா⁴யாஹ ‘‘ஸதி வா உபாதி³ஸேஸே’’தி. ஸதி ச கிலேஸே க²ந்தா⁴பி⁴ஸங்கா²ரா திட்ட²ந்தி ஏவ. இதி இமஸ்மிங் ஸுத்தே அனாகா³மிப²லங் அரஹத்தந்தி த்³வே த⁴ம்மா த³ஸ்ஸிதா. யதா² செத்த², ஏவங் இதோ பரேஸு த்³வீஸு ஸுத்தேஸு.
Idāni tāsu patiṭṭhitassa avassaṃbhāviphalaṃ dassetuṃ ‘‘paṭisallānarāmāna’’ntiādi vuttaṃ. Tattha brūhetānanti vaḍḍhetānaṃ. Dvinnaṃ phalānanti tatiyacatutthaphalānaṃ. Pāṭikaṅkhanti icchitabbaṃ avassaṃbhāvī. Aññāti arahattaṃ. Tañhi heṭṭhimamaggañāṇehi ñātamariyādaṃ anatikkamitvā jānanato paripuṇṇajānanattā upari jānanakiccābhāvato ca ‘‘aññā’’ti vuccati. Sati vā upādiseseti sati vā kilesūpādisese, pahātuṃ asakkuṇeyye sati. Ñāṇe hi aparipakke ye tena paripakkena pahātabbakilesā, te na pahīyanti. Taṃ sandhāyāha ‘‘sati vā upādisese’’ti. Sati ca kilese khandhābhisaṅkhārā tiṭṭhanti eva. Iti imasmiṃ sutte anāgāmiphalaṃ arahattanti dve dhammā dassitā. Yathā cettha, evaṃ ito paresu dvīsu suttesu.
கா³தா²ஸு யே ஸந்தசித்தாதி யே யோகா³வசரா தத³ங்க³வஸேன விக்க²ம்ப⁴னவஸேவ ச ஸமிதகிலேஸதாய ஸந்தசித்தா. நேபக்கங் வுச்சதி பஞ்ஞா, தாய ஸமன்னாக³தத்தா நிபகா. இமினா தேஸங் கம்மட்டா²னபரிஹரணஞாணங் த³ஸ்ஸேதி. ஸதிமந்தோ ச ஜா²யினோதி டா²னநிஸஜ்ஜாதீ³ஸு கம்மட்டா²னாவிஜஹனஹேதுபூ⁴தாய ஸதியா ஸதிமந்தோ, ஆரம்மணூபனிஜ்ஜா²னலக்க²ணேன ஜா²னேன ஜா²யினோ. ஸம்மா த⁴ம்மங் விபஸ்ஸந்தி, காமேஸு அனபெக்கி²னோதி புப்³பே³யேவ ‘‘அட்டி²கங்கலூபமா காமா’’திஆதி³னா (ம॰ நி॰ 1.234; பாசி॰ 417) வத்து²காமேஸு கிலேஸகாமேஸு ச ஆதீ³னவபச்சவெக்க²ணேன அனபெக்கி²னோ அனத்தி²கா தே பஹாய அதி⁴க³தங் உபசாரஸமாதி⁴ங் அப்பனாஸமாதி⁴ங் வா பாத³கங் கத்வா நாமரூபங் தஸ்ஸ பச்சயே ச பரிக்³க³ஹெத்வா கலாபஸம்மஸனாதி³க்கமேன ஸம்மா அவிபரீதங் பஞ்சக்க²ந்த⁴த⁴ம்மங் அனிச்சாதி³தோ விபஸ்ஸந்தி.
Gāthāsu ye santacittāti ye yogāvacarā tadaṅgavasena vikkhambhanavaseva ca samitakilesatāya santacittā. Nepakkaṃ vuccati paññā, tāya samannāgatattā nipakā. Iminā tesaṃ kammaṭṭhānapariharaṇañāṇaṃ dasseti. Satimantoca jhāyinoti ṭhānanisajjādīsu kammaṭṭhānāvijahanahetubhūtāya satiyā satimanto, ārammaṇūpanijjhānalakkhaṇena jhānena jhāyino. Sammā dhammaṃ vipassanti, kāmesu anapekkhinoti pubbeyeva ‘‘aṭṭhikaṅkalūpamā kāmā’’tiādinā (ma. ni. 1.234; pāci. 417) vatthukāmesu kilesakāmesu ca ādīnavapaccavekkhaṇena anapekkhino anatthikā te pahāya adhigataṃ upacārasamādhiṃ appanāsamādhiṃ vā pādakaṃ katvā nāmarūpaṃ tassa paccaye ca pariggahetvā kalāpasammasanādikkamena sammā aviparītaṃ pañcakkhandhadhammaṃ aniccādito vipassanti.
அப்பமாத³ரதாதி வுத்தப்பகாராய ஸமத²விபஸ்ஸனாபா⁴வனாய அப்பமஜ்ஜனே ரதா அபி⁴ரதா தத்த² அப்பமாதே³னேவ ரத்திந்தி³வங் வீதினாமெந்தா. ஸந்தாதி ஸமானா. ‘‘ஸத்தா’’திபி பாடோ², புக்³க³லாதி அத்தோ². பமாதே³ ப⁴யத³ஸ்ஸினோதி நிரயூபபத்திஆதி³கங் பமாதே³ ப⁴யங் பஸ்ஸந்தா. அப⁴ப்³பா³ பரிஹானாயாதி தே ஏவரூபா ஸமத²விபஸ்ஸனாத⁴ம்மேஹி மக்³க³ப²லேஹி வா பரிஹானாய அப⁴ப்³பா³. ஸமத²விபஸ்ஸனாதோ ஹி ஸம்பத்ததோ ந பரிஹாயந்தி, இதரானி ச அப்பத்தானி பாபுணந்தி. நிப்³பா³னஸ்ஸேவ ஸந்திகேதி நிப்³பா³னஸ்ஸ ச அனுபாதா³பரினிப்³பா³னஸ்ஸ ச ஸந்திகே ஏவ, ந சிரஸ்ஸேவ நங் அதி⁴க³மிஸ்ஸந்தீதி.
Appamādaratāti vuttappakārāya samathavipassanābhāvanāya appamajjane ratā abhiratā tattha appamādeneva rattindivaṃ vītināmentā. Santāti samānā. ‘‘Sattā’’tipi pāṭho, puggalāti attho. Pamāde bhayadassinoti nirayūpapattiādikaṃ pamāde bhayaṃ passantā. Abhabbā parihānāyāti te evarūpā samathavipassanādhammehi maggaphalehi vā parihānāya abhabbā. Samathavipassanāto hi sampattato na parihāyanti, itarāni ca appattāni pāpuṇanti. Nibbānasseva santiketi nibbānassa ca anupādāparinibbānassa ca santike eva, na cirasseva naṃ adhigamissantīti.
அட்ட²மஸுத்தவண்ணனா நிட்டி²தா.
Aṭṭhamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 8. படிஸல்லானஸுத்தங் • 8. Paṭisallānasuttaṃ
