| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
6. பத்தஸுத்தவண்ணனா
6. Pattasuttavaṇṇanā
152. பஞ்சன்னங் உபாதா³னக்க²ந்தா⁴னங் லக்க²ணாதீ³னி சேவ ஸமுத³யஞ்ச அஸ்ஸாதா³தீ³னவனிஸ்ஸரணானி ச க³ஹெத்வா ஸம்மா தேஸங் லக்க²ணாதீ³னங் க³ஹணங் ஹோதீதி ஆஹ ‘‘பஞ்ச உபாதா³னக்க²ந்தே⁴ ஆதி³யித்வா’’தி. ருப்பனவேதி³யனஸஞ்ஜானநஅபி⁴ஸங்க²ரணவிஜானநானி க²ந்தா⁴னங் ஸபா⁴வலக்க²ணானி. ஆதி³-ஸத்³தே³ன ரஸபச்சுபட்டா²னபத³ட்டா²னானி சேவ ஸமுத³யாதீ³னி ச ஸங்க³ண்ஹாதி. த³ஸ்ஸேதீதி பச்சக்க²தோ த³ஸ்ஸேதி, ஹத்தா²மலகங் விய பாகடே விபூ⁴தே கத்வா விபா⁴வேதி. க³ண்ஹாபேதீதி தே த⁴ம்மே மனஸா அனுபெக்கி²தே தி³ட்டி²யா ஸுப்படிவித்³தே⁴ கரொந்தோ உக்³க³ண்ஹாபேதி. ஸமாதா³னம்ஹீதி தத்த² அத்த²ஸ்ஸ ஸம்மதே³வ ஆதி³யனே க²ந்தா⁴னஞ்ச ஸம்மஸனவஸேன அஞ்ஞத⁴ம்மவஸேன ஸமாதி³யனே. படிவித்³த⁴கு³ணேனாதி தாய தே³ஸனாய, தங் நிஸ்ஸாய பச்சத்தபுரிஸகாரேன ச தேஸங் படிவித்³த⁴கு³ணேன . ஜோதாபேதீதி தேஸங் சித்தஸந்தானங் அஸ்ஸத்³தி⁴யாதி³கிலேஸமலவித⁴மனேன பப⁴ஸ்ஸரங் கரோதி. அட்டி²ங் கத்வாதி தாய தே³ஸனாய பாபேதப்³ப³ங் அத்த²ங் பயோஜனங் த³ள்ஹங் கத்வா. தேனாஹ ‘‘அயங் நோ’’திஆதி³. கம்மகாரகசித்தங் நாம ஓதரணசித்தங். ‘‘யோனிஸோமனஸிகாரபுப்³ப³கங் விபஸ்ஸனாசித்த’’ந்தி கேசி. ஓஹிதஸோதாதி அனஞ்ஞவிஹிததாய த⁴ம்மஸ்ஸவனாய அப்பிதஸோதா, ததோ ஏவ தத³த்த²ங் ட²பிதஸோதா.
152. Pañcannaṃ upādānakkhandhānaṃ lakkhaṇādīni ceva samudayañca assādādīnavanissaraṇāni ca gahetvā sammā tesaṃ lakkhaṇādīnaṃ gahaṇaṃ hotīti āha ‘‘pañca upādānakkhandhe ādiyitvā’’ti. Ruppanavediyanasañjānanaabhisaṅkharaṇavijānanāni khandhānaṃ sabhāvalakkhaṇāni. Ādi-saddena rasapaccupaṭṭhānapadaṭṭhānāni ceva samudayādīni ca saṅgaṇhāti. Dassetīti paccakkhato dasseti, hatthāmalakaṃ viya pākaṭe vibhūte katvā vibhāveti. Gaṇhāpetīti te dhamme manasā anupekkhite diṭṭhiyā suppaṭividdhe karonto uggaṇhāpeti. Samādānamhīti tattha atthassa sammadeva ādiyane khandhānañca sammasanavasena aññadhammavasena samādiyane. Paṭividdhaguṇenāti tāya desanāya, taṃ nissāya paccattapurisakārena ca tesaṃ paṭividdhaguṇena . Jotāpetīti tesaṃ cittasantānaṃ assaddhiyādikilesamalavidhamanena pabhassaraṃ karoti. Aṭṭhiṃ katvāti tāya desanāya pāpetabbaṃ atthaṃ payojanaṃ daḷhaṃ katvā. Tenāha ‘‘ayaṃ no’’tiādi. Kammakārakacittaṃ nāma otaraṇacittaṃ. ‘‘Yonisomanasikārapubbakaṃ vipassanācitta’’nti keci. Ohitasotāti anaññavihitatāya dhammassavanāya appitasotā, tato eva tadatthaṃ ṭhapitasotā.
ஏதே ரூபாத³யோ க²ந்தே⁴ யஞ்ச ஸங்க²தங் ஸமித்³த⁴பச்சயேஹி கதங், தஞ்ச ‘‘ஏஸோ அஹங் ந ஹோமி, ஏதங் மய்ஹங் ந ஹோதீ’’தி பஸ்ஸந்தோதி யோஜனா. கே²மோ அத்தாதி கே²மத்தா, தங் கே²மத்தங். தேனாஹ ‘‘கே²மிபூ⁴தங் அத்தபா⁴வ’’ந்தி. பரியேஸமானா மாரஸேனா.
Ete rūpādayo khandhe yañca saṅkhataṃ samiddhapaccayehi kataṃ, tañca ‘‘eso ahaṃ na homi, etaṃ mayhaṃ na hotī’’ti passantoti yojanā. Khemo attāti khemattā, taṃ khemattaṃ. Tenāha ‘‘khemibhūtaṃ attabhāva’’nti. Pariyesamānā mārasenā.
பத்தஸுத்தவண்ணனா நிட்டி²தா.
Pattasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 6. பத்தஸுத்தங் • 6. Pattasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 6. பத்தஸுத்தவண்ணனா • 6. Pattasuttavaṇṇanā
