| Library / Tipiṭaka / તિપિટક • Tipiṭaka / સંયુત્તનિકાય (ટીકા) • Saṃyuttanikāya (ṭīkā) |
૬. પત્તસુત્તવણ્ણના
6. Pattasuttavaṇṇanā
૧૫૨. પઞ્ચન્નં ઉપાદાનક્ખન્ધાનં લક્ખણાદીનિ ચેવ સમુદયઞ્ચ અસ્સાદાદીનવનિસ્સરણાનિ ચ ગહેત્વા સમ્મા તેસં લક્ખણાદીનં ગહણં હોતીતિ આહ ‘‘પઞ્ચ ઉપાદાનક્ખન્ધે આદિયિત્વા’’તિ. રુપ્પનવેદિયનસઞ્જાનનઅભિસઙ્ખરણવિજાનનાનિ ખન્ધાનં સભાવલક્ખણાનિ. આદિ-સદ્દેન રસપચ્ચુપટ્ઠાનપદટ્ઠાનાનિ ચેવ સમુદયાદીનિ ચ સઙ્ગણ્હાતિ. દસ્સેતીતિ પચ્ચક્ખતો દસ્સેતિ, હત્થામલકં વિય પાકટે વિભૂતે કત્વા વિભાવેતિ. ગણ્હાપેતીતિ તે ધમ્મે મનસા અનુપેક્ખિતે દિટ્ઠિયા સુપ્પટિવિદ્ધે કરોન્તો ઉગ્ગણ્હાપેતિ. સમાદાનમ્હીતિ તત્થ અત્થસ્સ સમ્મદેવ આદિયને ખન્ધાનઞ્ચ સમ્મસનવસેન અઞ્ઞધમ્મવસેન સમાદિયને. પટિવિદ્ધગુણેનાતિ તાય દેસનાય, તં નિસ્સાય પચ્ચત્તપુરિસકારેન ચ તેસં પટિવિદ્ધગુણેન . જોતાપેતીતિ તેસં ચિત્તસન્તાનં અસ્સદ્ધિયાદિકિલેસમલવિધમનેન પભસ્સરં કરોતિ. અટ્ઠિં કત્વાતિ તાય દેસનાય પાપેતબ્બં અત્થં પયોજનં દળ્હં કત્વા. તેનાહ ‘‘અયં નો’’તિઆદિ. કમ્મકારકચિત્તં નામ ઓતરણચિત્તં. ‘‘યોનિસોમનસિકારપુબ્બકં વિપસ્સનાચિત્ત’’ન્તિ કેચિ. ઓહિતસોતાતિ અનઞ્ઞવિહિતતાય ધમ્મસ્સવનાય અપ્પિતસોતા, તતો એવ તદત્થં ઠપિતસોતા.
152. Pañcannaṃ upādānakkhandhānaṃ lakkhaṇādīni ceva samudayañca assādādīnavanissaraṇāni ca gahetvā sammā tesaṃ lakkhaṇādīnaṃ gahaṇaṃ hotīti āha ‘‘pañca upādānakkhandhe ādiyitvā’’ti. Ruppanavediyanasañjānanaabhisaṅkharaṇavijānanāni khandhānaṃ sabhāvalakkhaṇāni. Ādi-saddena rasapaccupaṭṭhānapadaṭṭhānāni ceva samudayādīni ca saṅgaṇhāti. Dassetīti paccakkhato dasseti, hatthāmalakaṃ viya pākaṭe vibhūte katvā vibhāveti. Gaṇhāpetīti te dhamme manasā anupekkhite diṭṭhiyā suppaṭividdhe karonto uggaṇhāpeti. Samādānamhīti tattha atthassa sammadeva ādiyane khandhānañca sammasanavasena aññadhammavasena samādiyane. Paṭividdhaguṇenāti tāya desanāya, taṃ nissāya paccattapurisakārena ca tesaṃ paṭividdhaguṇena . Jotāpetīti tesaṃ cittasantānaṃ assaddhiyādikilesamalavidhamanena pabhassaraṃ karoti. Aṭṭhiṃ katvāti tāya desanāya pāpetabbaṃ atthaṃ payojanaṃ daḷhaṃ katvā. Tenāha ‘‘ayaṃ no’’tiādi. Kammakārakacittaṃ nāma otaraṇacittaṃ. ‘‘Yonisomanasikārapubbakaṃ vipassanācitta’’nti keci. Ohitasotāti anaññavihitatāya dhammassavanāya appitasotā, tato eva tadatthaṃ ṭhapitasotā.
એતે રૂપાદયો ખન્ધે યઞ્ચ સઙ્ખતં સમિદ્ધપચ્ચયેહિ કતં, તઞ્ચ ‘‘એસો અહં ન હોમિ, એતં મય્હં ન હોતી’’તિ પસ્સન્તોતિ યોજના. ખેમો અત્તાતિ ખેમત્તા, તં ખેમત્તં. તેનાહ ‘‘ખેમિભૂતં અત્તભાવ’’ન્તિ. પરિયેસમાના મારસેના.
Ete rūpādayo khandhe yañca saṅkhataṃ samiddhapaccayehi kataṃ, tañca ‘‘eso ahaṃ na homi, etaṃ mayhaṃ na hotī’’ti passantoti yojanā. Khemo attāti khemattā, taṃ khemattaṃ. Tenāha ‘‘khemibhūtaṃ attabhāva’’nti. Pariyesamānā mārasenā.
પત્તસુત્તવણ્ણના નિટ્ઠિતા.
Pattasuttavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૬. પત્તસુત્તં • 6. Pattasuttaṃ
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૬. પત્તસુત્તવણ્ણના • 6. Pattasuttavaṇṇanā
