| Library / Tipiṭaka / તિપિટક • Tipiṭaka / કથાવત્થુપાળિ • Kathāvatthupāḷi |
૫. પઞ્ચમવગ્ગો
5. Pañcamavaggo
(૫૧) ૯. પટુપ્પન્નકથા
(51) 9. Paṭuppannakathā
૪૪૧. પટુપ્પન્ને 1 ઞાણં અત્થીતિ? આમન્તા. તેન ઞાણેન તં ઞાણં જાનાતીતિ? ન હેવં વત્તબ્બે…પે॰… તેન ઞાણેન તં ઞાણં જાનાતીતિ? આમન્તા. તેન ઞાણેન તં ઞાણં ‘‘ઞાણ’’ન્તિ જાનાતીતિ? ન હેવં વત્તબ્બે…પે॰… તેન ઞાણેન તં ઞાણં ‘‘ઞાણ’’ન્તિ જાનાતીતિ? આમન્તા. તં ઞાણં તસ્સ ઞાણસ્સ આરમ્મણન્તિ? ન હેવં વત્તબ્બે…પે॰….
441. Paṭuppanne 2 ñāṇaṃ atthīti? Āmantā. Tena ñāṇena taṃ ñāṇaṃ jānātīti? Na hevaṃ vattabbe…pe… tena ñāṇena taṃ ñāṇaṃ jānātīti? Āmantā. Tena ñāṇena taṃ ñāṇaṃ ‘‘ñāṇa’’nti jānātīti? Na hevaṃ vattabbe…pe… tena ñāṇena taṃ ñāṇaṃ ‘‘ñāṇa’’nti jānātīti? Āmantā. Taṃ ñāṇaṃ tassa ñāṇassa ārammaṇanti? Na hevaṃ vattabbe…pe….
તં ઞાણં તસ્સ ઞાણસ્સ આરમ્મણન્તિ? આમન્તા. તેન ફસ્સેન તં ફસ્સં ફુસતિ, તાય વેદનાય તં વેદનં વેદેતિ, તાય સઞ્ઞાય તં સઞ્ઞં સઞ્જાનાતિ, તાય ચેતનાય તં ચેતનં ચેતેતિ, તેન ચિત્તેન તં ચિત્તં ચિન્તેતિ, તેન વિતક્કેન તં વિતક્કં વિતક્કેતિ, તેન વિચારેન તં વિચારં વિચારેતિ, તાય પીતિયા તં પીતિં પિયાયતિ, તાય સતિયા તં સતિં સરતિ, તાય પઞ્ઞાય તં પઞ્ઞં પજાનાતિ, તેન ખગ્ગેન તં ખગ્ગં છિન્દતિ, તેન ફરસુના તં ફરસું તચ્છતિ, તાય કુધારિયા તં કુધારિં તચ્છતિ, તાય વાસિયા તં વાસિં તચ્છતિ, તાય સૂચિયા તં સૂચિં સિબ્બેતિ, તેન અઙ્ગુલગ્ગેન તં અઙ્ગુલગ્ગં પરામસતિ, તેન નાસિકગ્ગેન તં નાસિકગ્ગં પરામસતિ, તેન મત્થકેન તં મત્થકં પરામસતિ, તેન ગૂથેન તં ગૂથં ધોવતિ, તેન મુત્તેન તં મુત્તં ધોવતિ, તેન ખેળેન તં ખેળં ધોવતિ, તેન પુબ્બેન તં પુબ્બં ધોવતિ, તેન લોહિતેન તં લોહિતં ધોવતીતિ? ન હેવં વત્તબ્બે …પે॰….
Taṃ ñāṇaṃ tassa ñāṇassa ārammaṇanti? Āmantā. Tena phassena taṃ phassaṃ phusati, tāya vedanāya taṃ vedanaṃ vedeti, tāya saññāya taṃ saññaṃ sañjānāti, tāya cetanāya taṃ cetanaṃ ceteti, tena cittena taṃ cittaṃ cinteti, tena vitakkena taṃ vitakkaṃ vitakketi, tena vicārena taṃ vicāraṃ vicāreti, tāya pītiyā taṃ pītiṃ piyāyati, tāya satiyā taṃ satiṃ sarati, tāya paññāya taṃ paññaṃ pajānāti, tena khaggena taṃ khaggaṃ chindati, tena pharasunā taṃ pharasuṃ tacchati, tāya kudhāriyā taṃ kudhāriṃ tacchati, tāya vāsiyā taṃ vāsiṃ tacchati, tāya sūciyā taṃ sūciṃ sibbeti, tena aṅgulaggena taṃ aṅgulaggaṃ parāmasati, tena nāsikaggena taṃ nāsikaggaṃ parāmasati, tena matthakena taṃ matthakaṃ parāmasati, tena gūthena taṃ gūthaṃ dhovati, tena muttena taṃ muttaṃ dhovati, tena kheḷena taṃ kheḷaṃ dhovati, tena pubbena taṃ pubbaṃ dhovati, tena lohitena taṃ lohitaṃ dhovatīti? Na hevaṃ vattabbe …pe….
૪૪૨. ન વત્તબ્બં – ‘‘પટુપ્પન્ને ઞાણં અત્થી’’તિ? આમન્તા. નનુ સબ્બસઙ્ખારે અનિચ્ચતો દિટ્ઠે તમ્પિ ઞાણં અનિચ્ચતો દિટ્ઠં હોતીતિ? આમન્તા. હઞ્ચિ સબ્બસઙ્ખારે અનિચ્ચતો દિટ્ઠે તમ્પિ ઞાણં અનિચ્ચતો દિટ્ઠં હોતિ, તેન વત રે વત્તબ્બે – ‘‘પટુપ્પન્ને ઞાણં અત્થી’’તિ.
442. Na vattabbaṃ – ‘‘paṭuppanne ñāṇaṃ atthī’’ti? Āmantā. Nanu sabbasaṅkhāre aniccato diṭṭhe tampi ñāṇaṃ aniccato diṭṭhaṃ hotīti? Āmantā. Hañci sabbasaṅkhāre aniccato diṭṭhe tampi ñāṇaṃ aniccato diṭṭhaṃ hoti, tena vata re vattabbe – ‘‘paṭuppanne ñāṇaṃ atthī’’ti.
Footnotes:
Related texts:
અટ્ઠકથા • Aṭṭhakathā / અભિધમ્મપિટક (અટ્ઠકથા) • Abhidhammapiṭaka (aṭṭhakathā) / પઞ્ચપકરણ-અટ્ઠકથા • Pañcapakaraṇa-aṭṭhakathā / ૯. પટુપ્પન્નઞાણકથાવણ્ણના • 9. Paṭuppannañāṇakathāvaṇṇanā
ટીકા • Tīkā / અભિધમ્મપિટક (ટીકા) • Abhidhammapiṭaka (ṭīkā) / પઞ્ચપકરણ-મૂલટીકા • Pañcapakaraṇa-mūlaṭīkā / ૯. પટુપ્પન્નઞાણકથાવણ્ણના • 9. Paṭuppannañāṇakathāvaṇṇanā
ટીકા • Tīkā / અભિધમ્મપિટક (ટીકા) • Abhidhammapiṭaka (ṭīkā) / પઞ્ચપકરણ-અનુટીકા • Pañcapakaraṇa-anuṭīkā / ૯. પટુપ્પન્નઞાણકથાવણ્ણના • 9. Paṭuppannañāṇakathāvaṇṇanā
