| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
7. பவாரணாஸுத்தவண்ணனா
7. Pavāraṇāsuttavaṇṇanā
215. தஸ்மிங் அஹூதி தஸ்மிங் அஹனீதி ஆஹ ‘‘தஸ்மிங் தி³வஸே’’தி. அனஸனேனாதி ஸப்³ப³ஸோ ஆஹாரஸ்ஸ அபு⁴ஞ்ஜனேன. ஸாஸனிகஸீலேன பா³ஹிரகஅனஸனேன வா உபேதா ஹுத்வாதி யோஜனா. வா-ஸத்³தே³ன கீ²ரபானமது⁴ஸாயனாதீ³னிபி ஸங்க³ண்ஹாதி. பகாரேஹி தி³ட்டா²தீ³ஹி வாரேதி காயகம்மாதி³கே ஸராபேதி கா³ரய்ஹே கரோதி ஏதாயாதி பவாரணா, படிபத்திவிஸோத⁴னாய அத்தனோ அத்தனோ வஜ்ஜஸோத⁴னாய ஓகாஸதா³னங். யஸ்மா யேபு⁴ய்யேன வஸ்ஸங்வுட்டே²ஹி காதப்³பா³ ஏஸா விஸுத்³தி⁴தே³ஸனா, தஸ்மா வுத்தங் ‘‘வஸ்ஸங்வுட்ட²பவாரணாய. விஸுத்³தி⁴பவாரணாதிபி ஏதிஸ்ஸாவ நாம’’ந்தி. ததா³ தஸ்ஸ பி⁴க்கு²ஸங்க⁴ஸ்ஸ துண்ஹீபா⁴வஸ்ஸ அனவஸேஸதாயபி வண்ணங் த³ஸ்ஸேதுங் பாளியங் ‘‘துண்ஹீபூ⁴த’’ந்தி வுத்தந்தி ஆஹ ‘‘யதோ யதோ…பே॰… நத்தீ²’’தி. ஹத்த²ஸ்ஸ குக்குச்சதா அஸங்யமோ அஸம்பஜஞ்ஞகிரியா ஹத்த²குக்குச்சங். ததா² பாத³குக்குச்சங் வேதி³தப்³ப³ங், வா-ஸத்³தோ³ அவுத்தவிகப்பத்தோ², தேன தத³ஞ்ஞேஸமபா⁴வோ விபா⁴விதோதி த³ட்ட²ப்³ப³ங்.
215.Tasmiṃ ahūti tasmiṃ ahanīti āha ‘‘tasmiṃ divase’’ti. Anasanenāti sabbaso āhārassa abhuñjanena. Sāsanikasīlena bāhirakaanasanena vā upetā hutvāti yojanā. Vā-saddena khīrapānamadhusāyanādīnipi saṅgaṇhāti. Pakārehi diṭṭhādīhi vāreti kāyakammādike sarāpeti gārayhe karoti etāyāti pavāraṇā, paṭipattivisodhanāya attano attano vajjasodhanāya okāsadānaṃ. Yasmā yebhuyyena vassaṃvuṭṭhehi kātabbā esā visuddhidesanā, tasmā vuttaṃ ‘‘vassaṃvuṭṭhapavāraṇāya. Visuddhipavāraṇātipi etissāva nāma’’nti. Tadā tassa bhikkhusaṅghassa tuṇhībhāvassa anavasesatāyapi vaṇṇaṃ dassetuṃ pāḷiyaṃ ‘‘tuṇhībhūta’’nti vuttanti āha ‘‘yato yato…pe…natthī’’ti. Hatthassa kukkuccatā asaṃyamo asampajaññakiriyā hatthakukkuccaṃ. Tathā pādakukkuccaṃ veditabbaṃ, vā-saddo avuttavikappattho, tena tadaññesamabhāvo vibhāvitoti daṭṭhabbaṃ.
பஞ்சபஸாதே³ஹீதி பஞ்சவண்ணேஹி பஸாதே³ஹி. வொஸ்ஸக்³க³த்தோ² யதா²ருசி கிரியாய வொஸ்ஸஜ்ஜனங். புச்ச²னத்தே²தி படிக்கே²பமுகே²னேவ புச்ச²னத்தே² நகாரோ, மே கிஞ்சி கிரியங் வா வாசஸிகங் வா ந க³ரஹத², கிங் நு க³ரஹத² காயவாசாஹீதி அத்தோ². கேசி ‘‘த்³வாரானேவா’’தி த்³வாரஸீஸேன த்³வாரப்பவத்தசரியங் வத³ந்தி. விஸுத்³தி⁴பவாரணாய அதி⁴ப்பேதத்தா யேன பவாரிதங், தேனேவ விஸுத்³தீ⁴தி ஞாயதி, யேன ந பவாரிதங். கிங் நு தங் அவிஸுத்³த⁴ந்தி ஸியா கஸ்ஸசி புது²ஜ்ஜனஸ்ஸ ஆஸங்கா? தன்னிவாரணத்த²மாஹ ‘‘நோ அபரிஸுத்³த⁴த்தா’’தி. மனொத்³வாரங் பரிஸுத்³த⁴ங் அஸுசிகாரகஉபக்கிலேஸானங் தூ³ரீகதத்தா. இதா³னி ஏதரஹி பு³த்³த⁴காலே. எத்தா²தி மனொத்³வாரபரிஸுத்³தி⁴யங்.
Pañcapasādehīti pañcavaṇṇehi pasādehi. Vossaggattho yathāruci kiriyāya vossajjanaṃ. Pucchanattheti paṭikkhepamukheneva pucchanatthe nakāro, me kiñci kiriyaṃ vā vācasikaṃ vā na garahatha, kiṃ nu garahatha kāyavācāhīti attho. Keci ‘‘dvārānevā’’ti dvārasīsena dvārappavattacariyaṃ vadanti. Visuddhipavāraṇāya adhippetattā yena pavāritaṃ, teneva visuddhīti ñāyati, yena na pavāritaṃ. Kiṃ nu taṃ avisuddhanti siyā kassaci puthujjanassa āsaṅkā? Tannivāraṇatthamāha ‘‘no aparisuddhattā’’ti. Manodvāraṃparisuddhaṃ asucikārakaupakkilesānaṃ dūrīkatattā. Idāni etarahi buddhakāle. Etthāti manodvāraparisuddhiyaṃ.
காயவசீஸமாசாரபரிஸுத்³தி⁴யா பவேதி³தாய மனோஸமாசாரபரிஸுத்³தி⁴ அத்த²தோ பவேதி³தாவ ஹோதீதி ‘‘காயிகங் வா வாசஸிகங் வா’’இச்சேவாஹ. ததா² ஹி வுத்தங் ‘‘காயிகங் வா வாசஸிகங் வாதி இத³ங் சதுன்னங் அரக்கி²யதங் ஸந்தா⁴ய தே²ரோ ஆஹா’’தி. ‘‘பி⁴க்க²வே, பவாரேமி வோ’’தி பி⁴க்கு²ஸங்க⁴விஸயத்தா பவாரணாய தத்த² பி⁴க்கு²ஸங்கே⁴ன வத்தப்³ப³ங் படிவசனங் தெ³ந்தோ த⁴ம்மஸேனாபதி ‘‘பி⁴க்கு²ஸங்க⁴ஸ்ஸ பா⁴ரங் வஹந்தோ’’தி வுத்தோ. தேனாஹ ‘‘ந கோ² மயங், ப⁴ந்தே’’திஆதி³. அரக்கி²யானீதி பரானுவாத³தோ ந பா⁴யிதப்³பா³னி ஸுபரிஸுத்³த⁴பா⁴வதோ.
Kāyavacīsamācāraparisuddhiyā paveditāya manosamācāraparisuddhi atthato paveditāva hotīti ‘‘kāyikaṃ vā vācasikaṃ vā’’iccevāha. Tathā hi vuttaṃ ‘‘kāyikaṃ vā vācasikaṃ vāti idaṃ catunnaṃ arakkhiyataṃ sandhāya thero āhā’’ti. ‘‘Bhikkhave, pavāremi vo’’ti bhikkhusaṅghavisayattā pavāraṇāya tattha bhikkhusaṅghena vattabbaṃ paṭivacanaṃ dento dhammasenāpati ‘‘bhikkhusaṅghassa bhāraṃ vahanto’’ti vutto. Tenāha ‘‘na kho mayaṃ, bhante’’tiādi. Arakkhiyānīti parānuvādato na bhāyitabbāni suparisuddhabhāvato.
‘‘அனுப்பன்னஸ்ஸா’’தி இத³ங் அதி⁴ப்பாயிகவசனந்தி தத³தி⁴ப்பாயங் விவரந்தோ ‘‘கஸ்ஸபஸம்மாஸம்பு³த்³த⁴தோ பட்டா²யா’’திஆதி³மாஹ. கஸ்ஸபஸம்மாஸம்பு³த்³த⁴தோதி விப⁴த்தே நிஸ்ஸக்கங், தஸ்மா கஸ்ஸபஸம்மாஸம்பு³த்³த⁴தோ ஓரந்தி அத்தோ²தி. அஞ்ஞேனாதி இதோ ப⁴க³வதோ அஞ்ஞேன. அனுப்பாதி³தபுப்³ப³ஸ்ஸாதி பரஸந்தானே ந உப்பாதி³தபுப்³ப³ஸ்ஸ. ஸஸந்தானே பன பச்சேகபு³த்³தா⁴னங் வஸேன ந உப்பாதி³தோதி ந ஸக்கா வத்துங். ஸமனுஆக³தாதி ஸம்மா அனு உபக³தா. ப⁴க³வதோ ஸீலாத³யோ கு³ணாதி பு³த்³த⁴பூ⁴தஸ்ஸ கு³ணா அதி⁴ப்பேதாதி ஆஹ ‘‘அரஹத்தமக்³க³மேவ நிஸ்ஸாய ஆக³தா’’தி. ஸப்³ப³கு³ணாதி த³ஸப³லஞாணாத³யோ ஸப்³பே³ பு³த்³த⁴கு³ணா. ப⁴ந்தேதி எத்த² இதிஸத்³தோ³ ஆதி³அத்தோ². தேன ‘‘இமேஸங் பன…பே॰… வாசஸிகங் வா’’தி யாவாயங் பாளிபதே³ஸோ, தங் ஸப்³ப³ங் க³ண்ஹாதி. தேனாஹ ‘‘இத³ங் தே²ரோ…பே॰… பவாரெந்தோ ஆஹா’’தி.
‘‘Anuppannassā’’ti idaṃ adhippāyikavacananti tadadhippāyaṃ vivaranto ‘‘kassapasammāsambuddhato paṭṭhāyā’’tiādimāha. Kassapasammāsambuddhatoti vibhatte nissakkaṃ, tasmā kassapasammāsambuddhato oranti atthoti. Aññenāti ito bhagavato aññena. Anuppāditapubbassāti parasantāne na uppāditapubbassa. Sasantāne pana paccekabuddhānaṃ vasena na uppāditoti na sakkā vattuṃ. Samanuāgatāti sammā anu upagatā. Bhagavato sīlādayo guṇāti buddhabhūtassa guṇā adhippetāti āha ‘‘arahattamaggameva nissāya āgatā’’ti. Sabbaguṇāti dasabalañāṇādayo sabbe buddhaguṇā. Bhanteti ettha itisaddo ādiattho. Tena ‘‘imesaṃ pana…pe… vācasikaṃ vā’’ti yāvāyaṃ pāḷipadeso, taṃ sabbaṃ gaṇhāti. Tenāha ‘‘idaṃ thero…pe… pavārento āhā’’ti.
யங் அத்தனோ புஞ்ஞானுபா⁴வஸித்³த⁴ங் சக்கரதனங் நிப்பரியாயதோ தேன பவத்திதங் நாம, ந இதரந்தி பட²மனயோ வுத்தோ. யஸ்மா பவத்திதஸ்ஸேவ அனுபவத்தனங், பட²மனயோ ச தங்ஸதி³ஸே தப்³போ³ஹாரவஸேன வுத்தோதி தங் அனாதி³யித்வா து³தியனயோ வுத்தோ. த³ஸவித⁴ந்தி அந்தோஜனஸ்மிங், ப³லகாயே ரக்கா²வரணகு³த்தியா ஸங்விதா⁴னங், க²த்தியேஸு அனுயுத்தேஸு, ப்³ராஹ்மணக³ஹபதிகேஸு, நேக³மஜானபதே³ஸு, ஸமணப்³ராஹ்மணேஸு, மிக³பக்கீ²ஸு அத⁴ம்மசாரபடிக்கே²போ, அத⁴னானங் த⁴னானுப்பதா³னங், ஸமணப்³ராஹ்மணே உபஸங்கமித்வா பஞ்ஹபுச்ச²னந்தி ஏவங் த³ஸவித⁴ங். தத்த² க³ஹபதிகே பக்கி²ஜாதே ச விஸுங் கத்வா க³ஹணவஸேன த்³வாத³ஸவித⁴ங். சக்கவத்திவத்தந்தி சக்கவத்திபா⁴வாவஹங் வத்தங். யஸ்மா யாதா²வதோ பவத்திதங், தத³னுரூபகங் பன ஞாயேன யுத்தகேன பவத்திதங் நாம ஹோதீதி ஆஹ ‘‘ஸம்மா நயேன ஹேதுனா காரணேனா’’தி. உப⁴தோபா⁴க³விமுத்தாதி உப⁴யபா⁴கே³ஹி உப⁴யபா⁴க³தோ விமுத்தாதி அயமெத்த² அத்தோ²தி த³ஸ்ஸேதி ‘‘த்³வீஹி பா⁴கே³ஹி விமுத்தா, அரூபா…பே॰… நாமகாயதோ’’தி இமினா. தேவிஜ்ஜாதி³பா⁴வந்தி தேவிஜ்ஜச²ளபி⁴ஞ்ஞசதுப்படிஸம்பி⁴த³பா⁴வங். பஞ்ஞாவிமுத்தா ஹி தங் திவித⁴ங் அப்பத்தா கேவலங் பஞ்ஞாய ஏவ விமுத்தா.
Yaṃ attano puññānubhāvasiddhaṃ cakkaratanaṃ nippariyāyato tena pavattitaṃ nāma, na itaranti paṭhamanayo vutto. Yasmā pavattitasseva anupavattanaṃ, paṭhamanayo ca taṃsadise tabbohāravasena vuttoti taṃ anādiyitvā dutiyanayo vutto. Dasavidhanti antojanasmiṃ, balakāye rakkhāvaraṇaguttiyā saṃvidhānaṃ, khattiyesu anuyuttesu, brāhmaṇagahapatikesu, negamajānapadesu, samaṇabrāhmaṇesu, migapakkhīsu adhammacārapaṭikkhepo, adhanānaṃ dhanānuppadānaṃ, samaṇabrāhmaṇe upasaṅkamitvā pañhapucchananti evaṃ dasavidhaṃ. Tattha gahapatike pakkhijāte ca visuṃ katvā gahaṇavasena dvādasavidhaṃ. Cakkavattivattanti cakkavattibhāvāvahaṃ vattaṃ. Yasmā yāthāvato pavattitaṃ, tadanurūpakaṃ pana ñāyena yuttakena pavattitaṃ nāma hotīti āha ‘‘sammā nayena hetunā kāraṇenā’’ti. Ubhatobhāgavimuttāti ubhayabhāgehi ubhayabhāgato vimuttāti ayamettha atthoti dasseti ‘‘dvīhi bhāgehi vimuttā, arūpā…pe… nāmakāyato’’ti iminā. Tevijjādibhāvanti tevijjachaḷabhiññacatuppaṭisambhidabhāvaṃ. Paññāvimuttā hi taṃ tividhaṃ appattā kevalaṃ paññāya eva vimuttā.
விஸுத்³த⁴த்தா²யாதி விஸுத்³தி⁴பவாரணத்தா²ய. ஸங்யோஜனட்டே²ன ஸங்யோஜனஸங்கா²தே சேவ ப³ந்த⁴னட்டே²ன ப³ந்த⁴னஸங்கா²தே ச. விஜிதஸங்கா³மந்தி யதா² ராகா³த³யோ புன ந ஸீஸங் உக்கி²பந்தி, ஏவங் அரியமக்³க³ஸேனாய வஸேன விஜிதஸங்கா³மங். தேனாஹ ‘‘விஜிதராக³தோ³ஸமோஹஸங்கா³ம’’ந்தி. மாரப³லஸ்ஸாதி மாரஸேனாய, மாரஸ்ஸ வா ஸாமத்தி²யஸ்ஸ. வேனெய்யஸத்த²ந்தி வினேதப்³ப³ஜனஸமூஹங். ஸகடாதி³ஸத்த²ஸபா⁴க³தோ வினெய்யோவ ஸத்தோ²தி தங் வேனெய்யஸத்த²ங். ஸீலஸாராதி³அபா⁴வதோ அந்தோதுச்சோ².
Visuddhatthāyāti visuddhipavāraṇatthāya. Saṃyojanaṭṭhena saṃyojanasaṅkhāte ceva bandhanaṭṭhena bandhanasaṅkhāte ca. Vijitasaṅgāmanti yathā rāgādayo puna na sīsaṃ ukkhipanti, evaṃ ariyamaggasenāya vasena vijitasaṅgāmaṃ. Tenāha ‘‘vijitarāgadosamohasaṅgāma’’nti. Mārabalassāti mārasenāya, mārassa vā sāmatthiyassa. Veneyyasatthanti vinetabbajanasamūhaṃ. Sakaṭādisatthasabhāgato vineyyova satthoti taṃ veneyyasatthaṃ. Sīlasārādiabhāvato antotuccho.
பவாரணாஸுத்தவண்ணனா நிட்டி²தா.
Pavāraṇāsuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 7. பவாரணாஸுத்தங் • 7. Pavāraṇāsuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 7. பவாரணாஸுத்தவண்ணனா • 7. Pavāraṇāsuttavaṇṇanā
