| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
2. பவிவேகஸுத்தங்
2. Pavivekasuttaṃ
94. ‘‘தீணிமானி , பி⁴க்க²வே, அஞ்ஞதித்தி²யா பரிப்³பா³ஜகா பவிவேகானி பஞ்ஞாபெந்தி. கதமானி தீணி? சீவரபவிவேகங், பிண்ட³பாதபவிவேகங், ஸேனாஸனபவிவேகங்.
94. ‘‘Tīṇimāni , bhikkhave, aññatitthiyā paribbājakā pavivekāni paññāpenti. Katamāni tīṇi? Cīvarapavivekaṃ, piṇḍapātapavivekaṃ, senāsanapavivekaṃ.
‘‘தத்ரித³ங், பி⁴க்க²வே, அஞ்ஞதித்தி²யா பரிப்³பா³ஜகா சீவரபவிவேகஸ்மிங் பஞ்ஞாபெந்தி, ஸாணானிபி தா⁴ரெந்தி, மஸாணானிபி தா⁴ரெந்தி, ச²வது³ஸ்ஸானிபி தா⁴ரெந்தி, பங்ஸுகூலானிபி தா⁴ரெந்தி, திரீடானிபி தா⁴ரெந்தி, அஜினம்பி தா⁴ரெந்தி, அஜினக்கி²பம்பி தா⁴ரெந்தி, குஸசீரம்பி தா⁴ரெந்தி, வாகசீரம்பி தா⁴ரெந்தி, ப²லகசீரம்பி தா⁴ரெந்தி, கேஸகம்ப³லம்பி தா⁴ரெந்தி, வாலகம்ப³லம்பி தா⁴ரெந்தி , உலூகபக்கி²கம்பி தா⁴ரெந்தி. இத³ங் கோ², பி⁴க்க²வே, அஞ்ஞதித்தி²யா பரிப்³பா³ஜகா சீவரபவிவேகஸ்மிங் பஞ்ஞாபெந்தி.
‘‘Tatridaṃ, bhikkhave, aññatitthiyā paribbājakā cīvarapavivekasmiṃ paññāpenti, sāṇānipi dhārenti, masāṇānipi dhārenti, chavadussānipi dhārenti, paṃsukūlānipi dhārenti, tirīṭānipi dhārenti, ajinampi dhārenti, ajinakkhipampi dhārenti, kusacīrampi dhārenti, vākacīrampi dhārenti, phalakacīrampi dhārenti, kesakambalampi dhārenti, vālakambalampi dhārenti , ulūkapakkhikampi dhārenti. Idaṃ kho, bhikkhave, aññatitthiyā paribbājakā cīvarapavivekasmiṃ paññāpenti.
‘‘தத்ரித³ங், பி⁴க்க²வே, அஞ்ஞதித்தி²யா பரிப்³பா³ஜகா பிண்ட³பாதபவிவேகஸ்மிங் பஞ்ஞாபெந்தி. ஸாகப⁴க்கா²பி ஹொந்தி, ஸாமாகப⁴க்கா²பி ஹொந்தி, நீவாரப⁴க்கா²பி ஹொந்தி, த³த்³து³லப⁴க்கா²பி ஹொந்தி, ஹடப⁴க்கா²பி ஹொந்தி, கணப⁴க்கா²பி ஹொந்தி, ஆசாமப⁴க்கா²பி ஹொந்தி, பிஞ்ஞாகப⁴க்கா²பி ஹொந்தி, திணப⁴க்கா²பி ஹொந்தி, கோ³மயப⁴க்கா²பி ஹொந்தி, வனமூலப²லாஹாரா யாபெந்தி பவத்தப²லபோ⁴ஜீ. இத³ங் கோ², பி⁴க்க²வே, அஞ்ஞதித்தி²யா பரிப்³பா³ஜகா பிண்ட³பாதபவிவேகஸ்மிங் பஞ்ஞாபெந்தி.
‘‘Tatridaṃ, bhikkhave, aññatitthiyā paribbājakā piṇḍapātapavivekasmiṃ paññāpenti. Sākabhakkhāpi honti, sāmākabhakkhāpi honti, nīvārabhakkhāpi honti, daddulabhakkhāpi honti, haṭabhakkhāpi honti, kaṇabhakkhāpi honti, ācāmabhakkhāpi honti, piññākabhakkhāpi honti, tiṇabhakkhāpi honti, gomayabhakkhāpi honti, vanamūlaphalāhārā yāpenti pavattaphalabhojī. Idaṃ kho, bhikkhave, aññatitthiyā paribbājakā piṇḍapātapavivekasmiṃ paññāpenti.
‘‘தத்ரித³ங், பி⁴க்க²வே, அஞ்ஞதித்தி²யா பரிப்³பா³ஜகா ஸேனாஸனபவிவேகஸ்மிங் பஞ்ஞாபெந்தி அரஞ்ஞங் ருக்க²மூலங் ஸுஸானங் 1 வனபத்த²ங் அப்³போ⁴காஸங் பலாலபுஞ்ஜங் பு⁴ஸாகா³ரங் 2. இத³ங் கோ², பி⁴க்க²வே, அஞ்ஞதித்தி²யா பரிப்³பா³ஜகா ஸேனாஸனபவிவேகஸ்மிங் பஞ்ஞாபெந்தி. இமானி கோ², பி⁴க்க²வே, தீணி அஞ்ஞதித்தி²யா பரிப்³பா³ஜகா பவிவேகானி பஞ்ஞாபெந்தி.
‘‘Tatridaṃ, bhikkhave, aññatitthiyā paribbājakā senāsanapavivekasmiṃ paññāpenti araññaṃ rukkhamūlaṃ susānaṃ 3 vanapatthaṃ abbhokāsaṃ palālapuñjaṃ bhusāgāraṃ 4. Idaṃ kho, bhikkhave, aññatitthiyā paribbājakā senāsanapavivekasmiṃ paññāpenti. Imāni kho, bhikkhave, tīṇi aññatitthiyā paribbājakā pavivekāni paññāpenti.
‘‘தீணி கோ² பனிமானி, பி⁴க்க²வே, இமஸ்மிங் த⁴ம்மவினயே பி⁴க்கு²னோ பவிவேகானி. கதமானி தீணி? இத⁴, பி⁴க்க²வே, பி⁴க்கு² ஸீலவா ச ஹோதி, து³ஸ்ஸீல்யஞ்சஸ்ஸ பஹீனங் ஹோதி, தேன ச விவித்தோ ஹோதி; ஸம்மாதி³ட்டி²கோ ச ஹோதி, மிச்சா²தி³ட்டி² சஸ்ஸ பஹீனா ஹோதி, தாய ச விவித்தோ ஹோதி; கீ²ணாஸவோ ச ஹோதி, ஆஸவா சஸ்ஸ பஹீனா ஹொந்தி, தேஹி ச விவித்தோ ஹோதி . யதோ கோ², பி⁴க்க²வே, பி⁴க்கு² ஸீலவா ஹோதி, து³ஸ்ஸீல்யஞ்சஸ்ஸ பஹீனங் ஹோதி, தேன ச விவித்தோ ஹோதி; ஸம்மாதி³ட்டி²கோ ச ஹோதி, மிச்சா²தி³ட்டி² சஸ்ஸ பஹீனா ஹோதி, தாய ச விவித்தோ ஹோதி; கீ²ணாஸவோ ச ஹோதி, ஆஸவா சஸ்ஸ பஹீனா ஹொந்தி, தேஹி ச விவித்தோ ஹோதி. அயங் வுச்சதி, பி⁴க்க²வே, ‘பி⁴க்கு² அக்³க³ப்பத்தோ ஸாரப்பத்தோ ஸுத்³தோ⁴ ஸாரே பதிட்டி²தோ’’’.
‘‘Tīṇi kho panimāni, bhikkhave, imasmiṃ dhammavinaye bhikkhuno pavivekāni. Katamāni tīṇi? Idha, bhikkhave, bhikkhu sīlavā ca hoti, dussīlyañcassa pahīnaṃ hoti, tena ca vivitto hoti; sammādiṭṭhiko ca hoti, micchādiṭṭhi cassa pahīnā hoti, tāya ca vivitto hoti; khīṇāsavo ca hoti, āsavā cassa pahīnā honti, tehi ca vivitto hoti . Yato kho, bhikkhave, bhikkhu sīlavā hoti, dussīlyañcassa pahīnaṃ hoti, tena ca vivitto hoti; sammādiṭṭhiko ca hoti, micchādiṭṭhi cassa pahīnā hoti, tāya ca vivitto hoti; khīṇāsavo ca hoti, āsavā cassa pahīnā honti, tehi ca vivitto hoti. Ayaṃ vuccati, bhikkhave, ‘bhikkhu aggappatto sārappatto suddho sāre patiṭṭhito’’’.
‘‘ஸெய்யதா²பி, பி⁴க்க²வே, கஸ்ஸகஸ்ஸ க³ஹபதிஸ்ஸ ஸம்பன்னங் ஸாலிக்கெ²த்தங். தமேனங் கஸ்ஸகோ க³ஹபதி ஸீக⁴ங் ஸீக⁴ங் 5 லவாபெய்ய. ஸீக⁴ங் ஸீக⁴ங் லவாபெத்வா ஸீக⁴ங் ஸீக⁴ங் ஸங்க⁴ராபெய்ய. ஸீக⁴ங் ஸீக⁴ங் ஸங்க⁴ராபெத்வா ஸீக⁴ங் ஸீக⁴ங் உப்³ப³ஹாபெய்ய 6. ஸீக⁴ங் ஸீக⁴ங் உப்³ப³ஹாபெத்வா ஸீக⁴ங் ஸீக⁴ங் புஞ்ஜங் காராபெய்ய. ஸீக⁴ங் ஸீக⁴ங் புஞ்ஜங் காராபெத்வா ஸீக⁴ங் ஸீக⁴ங் மத்³தா³பெய்ய. ஸீக⁴ங் ஸீக⁴ங் மத்³தா³பெத்வா ஸீக⁴ங் ஸீக⁴ங் பலாலானி உத்³த⁴ராபெய்ய. ஸீக⁴ங் ஸீக⁴ங் பலாலானி உத்³த⁴ராபெத்வா ஸீக⁴ங் ஸீக⁴ங் பு⁴ஸிகங் உத்³த⁴ராபெய்ய. ஸீக⁴ங் ஸீக⁴ங் பு⁴ஸிகங் உத்³த⁴ராபெத்வா ஸீக⁴ங் ஸீக⁴ங் ஓபுனாபெய்ய. ஸீக⁴ங் ஸீக⁴ங் ஓபுனாபெத்வா ஸீக⁴ங் ஸீக⁴ங் அதிஹராபெய்ய. ஸீக⁴ங் ஸீக⁴ங் அதிஹராபெத்வா ஸீக⁴ங் ஸீக⁴ங் கொட்டாபெய்ய. ஸீக⁴ங் ஸீக⁴ங் கொட்டாபெத்வா ஸீக⁴ங் ஸீக⁴ங் து²ஸானி உத்³த⁴ராபெய்ய. ஏவமஸ்ஸு 7 தானி, பி⁴க்க²வே, கஸ்ஸகஸ்ஸ க³ஹபதிஸ்ஸ த⁴ஞ்ஞானி அக்³க³ப்பத்தானி ஸாரப்பத்தானி ஸுத்³தா⁴னி ஸாரே பதிட்டி²தானி.
‘‘Seyyathāpi, bhikkhave, kassakassa gahapatissa sampannaṃ sālikkhettaṃ. Tamenaṃ kassako gahapati sīghaṃ sīghaṃ 8 lavāpeyya. Sīghaṃ sīghaṃ lavāpetvā sīghaṃ sīghaṃ saṅgharāpeyya. Sīghaṃ sīghaṃ saṅgharāpetvā sīghaṃ sīghaṃ ubbahāpeyya 9. Sīghaṃ sīghaṃ ubbahāpetvā sīghaṃ sīghaṃ puñjaṃ kārāpeyya. Sīghaṃ sīghaṃ puñjaṃ kārāpetvā sīghaṃ sīghaṃ maddāpeyya. Sīghaṃ sīghaṃ maddāpetvā sīghaṃ sīghaṃ palālāni uddharāpeyya. Sīghaṃ sīghaṃ palālāni uddharāpetvā sīghaṃ sīghaṃ bhusikaṃ uddharāpeyya. Sīghaṃ sīghaṃ bhusikaṃ uddharāpetvā sīghaṃ sīghaṃ opunāpeyya. Sīghaṃ sīghaṃ opunāpetvā sīghaṃ sīghaṃ atiharāpeyya. Sīghaṃ sīghaṃ atiharāpetvā sīghaṃ sīghaṃ koṭṭāpeyya. Sīghaṃ sīghaṃ koṭṭāpetvā sīghaṃ sīghaṃ thusāni uddharāpeyya. Evamassu 10 tāni, bhikkhave, kassakassa gahapatissa dhaññāni aggappattāni sārappattāni suddhāni sāre patiṭṭhitāni.
‘‘ஏவமேவங் கோ², பி⁴க்க²வே, யதோ பி⁴க்கு² ஸீலவா ச ஹோதி, து³ஸ்ஸீல்யஞ்சஸ்ஸ பஹீனங் ஹோதி, தேன ச விவித்தோ ஹோதி; ஸம்மாதி³ட்டி²கோ ச ஹோதி, மிச்சா²தி³ட்டி² சஸ்ஸ பஹீனா ஹோதி, தாய ச விவித்தோ ஹோதி; கீ²ணாஸவோ ச ஹோதி, ஆஸவா சஸ்ஸ பஹீனா ஹொந்தி, தேஹி ச விவித்தோ ஹோதி. அயங் வுச்சதி, பி⁴க்க²வே, ‘பி⁴க்கு² அக்³க³ப்பத்தோ ஸாரப்பத்தோ ஸுத்³தோ⁴ ஸாரே பதிட்டி²தோ’’’தி. து³தியங்.
‘‘Evamevaṃ kho, bhikkhave, yato bhikkhu sīlavā ca hoti, dussīlyañcassa pahīnaṃ hoti, tena ca vivitto hoti; sammādiṭṭhiko ca hoti, micchādiṭṭhi cassa pahīnā hoti, tāya ca vivitto hoti; khīṇāsavo ca hoti, āsavā cassa pahīnā honti, tehi ca vivitto hoti. Ayaṃ vuccati, bhikkhave, ‘bhikkhu aggappatto sārappatto suddho sāre patiṭṭhito’’’ti. Dutiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 2. பவிவேகஸுத்தவண்ணனா • 2. Pavivekasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 2. பவிவேகஸுத்தவண்ணனா • 2. Pavivekasuttavaṇṇanā
