| Library / Tipiṭaka / તિપિટક • Tipiṭaka / સંયુત્તનિકાય (ટીકા) • Saṃyuttanikāya (ṭīkā) |
૩. પેસલસુત્તવણ્ણના
3. Pesalasuttavaṇṇanā
૨૧૧. એતેસન્તિ એતેસં મહલ્લકાનં. ન પાળિ આગચ્છતિ અપ્પગુણભાવતો. ન ચ પાળિ ઉપટ્ઠાતિ, એકાય પાળિયા સતિ પાળિગતિયા તથા તથા ઉપટ્ઠાનમ્પિ નેસં નત્થીતિ વદતિ. ન અટ્ઠકથાતિ એત્થાપિ એસેવ નયો. સિથિલધનિતાદિતંતંબ્યઞ્જનબુદ્ધિં અહાપેત્વા ઉચ્ચારણં પદબ્યઞ્જનમધુરતા. અતિક્કમિત્વા મઞ્ઞતિ અઞ્ઞે ભિક્ખૂ. હીળનવસેન અભિભવિત્વા પટિભાનસુતેન અત્તાનં પસંસતિ સમ્ભાવેતિ. માનસ્સ પવત્તિતાય સહજાતનિસ્સયાદિપચ્ચયધમ્મા તંસહભુધમ્મા. માનવસેન વિપ્પટિસારી અહુવા. મા અહોસીતિ યોજના. વણ્ણભણનન્તિ પરેહિ કિરિયમાનં ગુણાભિત્થવં. અખિલોતિ પઞ્ચચેતોખિલરહિતો. નિસ્સેસં નવવિધન્તિ નવવિધમ્પિ માનં કસ્સચિ એકદેસસ્સપિ અસેસતો. વિજ્જાયાતિ અગ્ગમગ્ગવિજ્જાય. અચ્ચન્તમેવ સમિતતાય વૂપસમિતતાય સમિતાવી.
211.Etesanti etesaṃ mahallakānaṃ. Na pāḷi āgacchati appaguṇabhāvato. Na ca pāḷi upaṭṭhāti, ekāya pāḷiyā sati pāḷigatiyā tathā tathā upaṭṭhānampi nesaṃ natthīti vadati. Na aṭṭhakathāti etthāpi eseva nayo. Sithiladhanitāditaṃtaṃbyañjanabuddhiṃ ahāpetvā uccāraṇaṃ padabyañjanamadhuratā. Atikkamitvā maññati aññe bhikkhū. Hīḷanavasena abhibhavitvā paṭibhānasutena attānaṃ pasaṃsati sambhāveti. Mānassa pavattitāya sahajātanissayādipaccayadhammā taṃsahabhudhammā. Mānavasena vippaṭisārī ahuvā. Mā ahosīti yojanā. Vaṇṇabhaṇananti parehi kiriyamānaṃ guṇābhitthavaṃ. Akhiloti pañcacetokhilarahito. Nissesaṃ navavidhanti navavidhampi mānaṃ kassaci ekadesassapi asesato. Vijjāyāti aggamaggavijjāya. Accantameva samitatāya vūpasamitatāya samitāvī.
પેસલસુત્તવણ્ણના નિટ્ઠિતા.
Pesalasuttavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૩. પેસલસુત્તં • 3. Pesalasuttaṃ
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૩. પેસલસુત્તવણ્ણના • 3. Pesalasuttavaṇṇanā
