| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
2. ப²க்³கு³னஸுத்தங்
2. Phaggunasuttaṃ
56. தேன கோ² பன ஸமயேன ஆயஸ்மா ப²க்³கு³னோ 1 ஆபா³தி⁴கோ ஹோதி து³க்கி²தோ பா³ள்ஹகி³லானோ. அத² கோ² ஆயஸ்மா ஆனந்தோ³ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா ஆனந்தோ³ ப⁴க³வந்தங் ஏதத³வோச – ‘‘ஆயஸ்மா, ப⁴ந்தே, ப²க்³கு³னோ ஆபா³தி⁴கோ து³க்கி²தோ பா³ள்ஹகி³லானோ. ஸாது⁴, ப⁴ந்தே , ப⁴க³வா யேனாயஸ்மா ப²க்³கு³னோ தேனுபஸங்கமது அனுகம்பங் உபாதா³யா’’தி. அதி⁴வாஸேஸி ப⁴க³வா துண்ஹீபா⁴வேன. அத² கோ² ப⁴க³வா ஸாயன்ஹஸமயங் படிஸல்லானா வுட்டி²தோ யேனாயஸ்மா ப²க்³கு³னோ தேனுபஸங்கமி. அத்³த³ஸா கோ² ஆயஸ்மா ப²க்³கு³னோ ப⁴க³வந்தங் தூ³ரதோவ ஆக³ச்ச²ந்தங். தி³ஸ்வான மஞ்சகே ஸமதோ⁴ஸி 2. அத² கோ² ப⁴க³வா ஆயஸ்மந்தங் ப²க்³கு³னங் ஏதத³வோச – ‘‘அலங், ப²க்³கு³ன, மா த்வங் மஞ்சகே ஸமதோ⁴ஸி. ஸந்திமானி ஆஸனானி பரேஹி பஞ்ஞத்தானி, தத்தா²ஹங் நிஸீதி³ஸ்ஸாமீ’’தி. நிஸீதி³ ப⁴க³வா பஞ்ஞத்தே ஆஸனே. நிஸஜ்ஜ கோ² ப⁴க³வா ஆயஸ்மந்தங் ப²க்³கு³னங் ஏதத³வோச –
56. Tena kho pana samayena āyasmā phagguno 3 ābādhiko hoti dukkhito bāḷhagilāno. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca – ‘‘āyasmā, bhante, phagguno ābādhiko dukkhito bāḷhagilāno. Sādhu, bhante , bhagavā yenāyasmā phagguno tenupasaṅkamatu anukampaṃ upādāyā’’ti. Adhivāsesi bhagavā tuṇhībhāvena. Atha kho bhagavā sāyanhasamayaṃ paṭisallānā vuṭṭhito yenāyasmā phagguno tenupasaṅkami. Addasā kho āyasmā phagguno bhagavantaṃ dūratova āgacchantaṃ. Disvāna mañcake samadhosi 4. Atha kho bhagavā āyasmantaṃ phaggunaṃ etadavoca – ‘‘alaṃ, phagguna, mā tvaṃ mañcake samadhosi. Santimāni āsanāni parehi paññattāni, tatthāhaṃ nisīdissāmī’’ti. Nisīdi bhagavā paññatte āsane. Nisajja kho bhagavā āyasmantaṃ phaggunaṃ etadavoca –
‘‘கச்சி தே, ப²க்³கு³ன, க²மனீயங் கச்சி யாபனீயங்? கச்சி தே து³க்கா² வேத³னா படிக்கமந்தி, நோ அபி⁴க்கமந்தி; படிக்கமோஸானங் பஞ்ஞாயதி, நோ அபி⁴க்கமோ’’தி? ‘‘ந மே , ப⁴ந்தே , க²மனீயங் ந யாபனீயங். பா³ள்ஹா மே து³க்கா² வேத³னா அபி⁴க்கமந்தி, நோ படிக்கமந்தி; அபி⁴க்கமோஸானங் பஞ்ஞாயதி, நோ படிக்கமோ.
‘‘Kacci te, phagguna, khamanīyaṃ kacci yāpanīyaṃ? Kacci te dukkhā vedanā paṭikkamanti, no abhikkamanti; paṭikkamosānaṃ paññāyati, no abhikkamo’’ti? ‘‘Na me , bhante , khamanīyaṃ na yāpanīyaṃ. Bāḷhā me dukkhā vedanā abhikkamanti, no paṭikkamanti; abhikkamosānaṃ paññāyati, no paṭikkamo.
‘‘ஸெய்யதா²பி, ப⁴ந்தே, ப³லவா புரிஸோ த³ள்ஹேன வரத்தக்க²ண்டே³ன ஸீஸவேட²னங் த³தெ³ய்ய; ஏவமேவங் கோ² மே, ப⁴ந்தே, அதி⁴மத்தா ஸீஸே ஸீஸவேத³னா. ந மே, ப⁴ந்தே, க²மனீயங் ந யாபனீயங். பா³ள்ஹா மே து³க்கா² வேத³னா அபி⁴க்கமந்தி, நோ படிக்கமந்தி; அபி⁴க்கமோஸானங் பஞ்ஞாயதி, நோ படிக்கமோ.
‘‘Seyyathāpi, bhante, balavā puriso daḷhena varattakkhaṇḍena sīsaveṭhanaṃ dadeyya; evamevaṃ kho me, bhante, adhimattā sīse sīsavedanā. Na me, bhante, khamanīyaṃ na yāpanīyaṃ. Bāḷhā me dukkhā vedanā abhikkamanti, no paṭikkamanti; abhikkamosānaṃ paññāyati, no paṭikkamo.
‘‘ஸெய்யதா²பி, ப⁴ந்தே, த³க்கோ² கோ³கா⁴தகோ வா கோ³கா⁴தகந்தேவாஸீ வா திண்ஹேன கோ³விகந்தனேன குச்சி²ங் பரிகந்தெய்ய; ஏவமேவங் கோ² மே, ப⁴ந்தே, அதி⁴மத்தா வாதா குச்சி²ங் பரிகந்தந்தி. ந மே, ப⁴ந்தே, க²மனீயங் ந யாபனீயங். பா³ள்ஹா மே து³க்கா² வேத³னா அபி⁴க்கமந்தி, நோ படிக்கமந்தி; அபி⁴க்கமோஸானங் பஞ்ஞாயதி, நோ படிக்கமோ.
‘‘Seyyathāpi, bhante, dakkho goghātako vā goghātakantevāsī vā tiṇhena govikantanena kucchiṃ parikanteyya; evamevaṃ kho me, bhante, adhimattā vātā kucchiṃ parikantanti. Na me, bhante, khamanīyaṃ na yāpanīyaṃ. Bāḷhā me dukkhā vedanā abhikkamanti, no paṭikkamanti; abhikkamosānaṃ paññāyati, no paṭikkamo.
‘‘ஸெய்யதா²பி, ப⁴ந்தே, த்³வே ப³லவந்தோ புரிஸா து³ப்³ப³லதரங் புரிஸங் நானாபா³ஹாஸு க³ஹெத்வா அங்கா³ரகாஸுயா ஸந்தாபெய்யுங் ஸம்பரிதாபெய்யுங்; ஏவமேவங் கோ² மே, ப⁴ந்தே, அதி⁴மத்தோ காயஸ்மிங் டா³ஹோ. ந மே, ப⁴ந்தே, க²மனீயங் ந யாபனீயங். பா³ள்ஹா மே து³க்கா² வேத³னா அபி⁴க்கமந்தி, நோ படிக்கமந்தி; அபி⁴க்கமோஸானங் பஞ்ஞாயதி, நோ படிக்கமோ’’தி. அத² கோ² ப⁴க³வா ஆயஸ்மந்தங் ப²க்³கு³னங் த⁴ம்மியா கதா²ய ஸந்த³ஸ்ஸெத்வா ஸமாத³பெத்வா ஸமுத்தேஜெத்வா ஸம்பஹங்ஸெத்வா உட்டா²யாஸனா பக்காமி.
‘‘Seyyathāpi, bhante, dve balavanto purisā dubbalataraṃ purisaṃ nānābāhāsu gahetvā aṅgārakāsuyā santāpeyyuṃ samparitāpeyyuṃ; evamevaṃ kho me, bhante, adhimatto kāyasmiṃ ḍāho. Na me, bhante, khamanīyaṃ na yāpanīyaṃ. Bāḷhā me dukkhā vedanā abhikkamanti, no paṭikkamanti; abhikkamosānaṃ paññāyati, no paṭikkamo’’ti. Atha kho bhagavā āyasmantaṃ phaggunaṃ dhammiyā kathāya sandassetvā samādapetvā samuttejetvā sampahaṃsetvā uṭṭhāyāsanā pakkāmi.
அத² கோ² ஆயஸ்மா ப²க்³கு³னோ அசிரபக்கந்தஸ்ஸ ப⁴க³வதோ காலமகாஸி. தம்ஹி சஸ்ஸ ஸமயே மரணகாலே இந்த்³ரியானி விப்பஸீதி³ங்ஸு. அத² கோ² ஆயஸ்மா ஆனந்தோ³ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா ஆனந்தோ³ ப⁴க³வந்தங் ஏதத³வோச – ‘‘ஆயஸ்மா, ப⁴ந்தே, ப²க்³கு³னோ அசிரபக்கந்தஸ்ஸ ப⁴க³வதோ காலமகாஸி. தம்ஹி சஸ்ஸ ஸமயே மரணகாலே இந்த்³ரியானி விப்பஸீதி³ங்ஸூ’’தி.
Atha kho āyasmā phagguno acirapakkantassa bhagavato kālamakāsi. Tamhi cassa samaye maraṇakāle indriyāni vippasīdiṃsu. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca – ‘‘āyasmā, bhante, phagguno acirapakkantassa bhagavato kālamakāsi. Tamhi cassa samaye maraṇakāle indriyāni vippasīdiṃsū’’ti.
‘‘கிங் ஹானந்த³, ப²க்³கு³னஸ்ஸ 11 பி⁴க்கு²னோ இந்த்³ரியானி ந விப்பஸீதி³ஸ்ஸந்தி! ப²க்³கு³னஸ்ஸ, ஆனந்த³, பி⁴க்கு²னோ பஞ்சஹி ஓரம்பா⁴கி³யேஹி ஸங்யோஜனேஹி சித்தங் அவிமுத்தங் அஹோஸி. தஸ்ஸ தங் த⁴ம்மதே³ஸனங் ஸுத்வா பஞ்சஹி ஓரம்பா⁴கி³யேஹி ஸங்யோஜனேஹி சித்தங் விமுத்தங்.
‘‘Kiṃ hānanda, phaggunassa 12 bhikkhuno indriyāni na vippasīdissanti! Phaggunassa, ānanda, bhikkhuno pañcahi orambhāgiyehi saṃyojanehi cittaṃ avimuttaṃ ahosi. Tassa taṃ dhammadesanaṃ sutvā pañcahi orambhāgiyehi saṃyojanehi cittaṃ vimuttaṃ.
‘‘ச²யிமே, ஆனந்த³, ஆனிஸங்ஸா காலேன த⁴ம்மஸ்ஸவனே 13 காலேன அத்து²பபரிக்கா²ய. கதமே ச²? இதா⁴னந்த³, பி⁴க்கு²னோ பஞ்சஹி ஓரம்பா⁴கி³யேஹி ஸங்யோஜனேஹி சித்தங் அவிமுத்தங் ஹோதி. ஸோ தம்ஹி ஸமயே மரணகாலே லப⁴தி ததா²க³தங் த³ஸ்ஸனாய. தஸ்ஸ ததா²க³தோ த⁴ம்மங் தே³ஸேதி ஆதி³கல்யாணங் மஜ்ஜே²கல்யாணங் பரியோஸானகல்யாணங் ஸாத்த²ங் ஸப்³யஞ்ஜனங், கேவலபரிபுண்ணங் பரிஸுத்³த⁴ங் ப்³ரஹ்மசரியங் பகாஸேதி. தஸ்ஸ தங் த⁴ம்மதே³ஸனங் ஸுத்வா பஞ்சஹி ஓரம்பா⁴கி³யேஹி ஸங்யோஜனேஹி சித்தங் விமுச்சதி. அயங், ஆனந்த³, பட²மோ ஆனிஸங்ஸோ காலேன த⁴ம்மஸ்ஸவனே.
‘‘Chayime, ānanda, ānisaṃsā kālena dhammassavane 14 kālena atthupaparikkhāya. Katame cha? Idhānanda, bhikkhuno pañcahi orambhāgiyehi saṃyojanehi cittaṃ avimuttaṃ hoti. So tamhi samaye maraṇakāle labhati tathāgataṃ dassanāya. Tassa tathāgato dhammaṃ deseti ādikalyāṇaṃ majjhekalyāṇaṃ pariyosānakalyāṇaṃ sātthaṃ sabyañjanaṃ, kevalaparipuṇṇaṃ parisuddhaṃ brahmacariyaṃ pakāseti. Tassa taṃ dhammadesanaṃ sutvā pañcahi orambhāgiyehi saṃyojanehi cittaṃ vimuccati. Ayaṃ, ānanda, paṭhamo ānisaṃso kālena dhammassavane.
‘‘புன சபரங், ஆனந்த³, பி⁴க்கு²னோ பஞ்சஹி ஓரம்பா⁴கி³யேஹி ஸங்யோஜனேஹி சித்தங் அவிமுத்தங் ஹோதி. ஸோ தம்ஹி ஸமயே மரணகாலே ந ஹேவ கோ² 15 லப⁴தி ததா²க³தங் த³ஸ்ஸனாய, அபி ச கோ² ததா²க³தஸாவகங் லப⁴தி த³ஸ்ஸனாய. தஸ்ஸ ததா²க³தஸாவகோ த⁴ம்மங் தே³ஸேதி ஆதி³கல்யாணங் மஜ்ஜே²கல்யாணங் பரியோஸானகல்யாணங் ஸாத்த²ங் ஸப்³யஞ்ஜனங், கேவலபரிபுண்ணங் பரிஸுத்³த⁴ங் ப்³ரஹ்மசரியங் பகாஸேதி. தஸ்ஸ தங் த⁴ம்மதே³ஸனங் ஸுத்வா பஞ்சஹி ஓரம்பா⁴கி³யேஹி ஸங்யோஜனேஹி சித்தங் விமுச்சதி. அயங், ஆனந்த³, து³தியோ ஆனிஸங்ஸோ காலேன த⁴ம்மஸ்ஸவனே.
‘‘Puna caparaṃ, ānanda, bhikkhuno pañcahi orambhāgiyehi saṃyojanehi cittaṃ avimuttaṃ hoti. So tamhi samaye maraṇakāle na heva kho 16 labhati tathāgataṃ dassanāya, api ca kho tathāgatasāvakaṃ labhati dassanāya. Tassa tathāgatasāvako dhammaṃ deseti ādikalyāṇaṃ majjhekalyāṇaṃ pariyosānakalyāṇaṃ sātthaṃ sabyañjanaṃ, kevalaparipuṇṇaṃ parisuddhaṃ brahmacariyaṃ pakāseti. Tassa taṃ dhammadesanaṃ sutvā pañcahi orambhāgiyehi saṃyojanehi cittaṃ vimuccati. Ayaṃ, ānanda, dutiyo ānisaṃso kālena dhammassavane.
‘‘புன சபரங், ஆனந்த³, பி⁴க்கு²னோ பஞ்சஹி ஓரம்பா⁴கி³யேஹி ஸங்யோஜனேஹி சித்தங் அவிமுத்தங் ஹோதி. ஸோ தம்ஹி ஸமயே மரணகாலே ந ஹேவ கோ² லப⁴தி ததா²க³தங் த³ஸ்ஸனாய, நபி ததா²க³தஸாவகங் லப⁴தி த³ஸ்ஸனாய; அபி ச கோ² யதா²ஸுதங் யதா²பரியத்தங் த⁴ம்மங் சேதஸா அனுவிதக்கேதி அனுவிசாரேதி மனஸானுபெக்க²தி. தஸ்ஸ யதா²ஸுதங் யதா²பரியத்தங் த⁴ம்மங் சேதஸா அனுவிதக்கயதோ அனுவிசாரயதோ மனஸானுபெக்க²தோ பஞ்சஹி ஓரம்பா⁴கி³யேஹி ஸங்யோஜனேஹி சித்தங் விமுச்சதி. அயங், ஆனந்த³, ததியோ ஆனிஸங்ஸோ காலேன அத்து²பபரிக்கா²ய.
‘‘Puna caparaṃ, ānanda, bhikkhuno pañcahi orambhāgiyehi saṃyojanehi cittaṃ avimuttaṃ hoti. So tamhi samaye maraṇakāle na heva kho labhati tathāgataṃ dassanāya, napi tathāgatasāvakaṃ labhati dassanāya; api ca kho yathāsutaṃ yathāpariyattaṃ dhammaṃ cetasā anuvitakketi anuvicāreti manasānupekkhati. Tassa yathāsutaṃ yathāpariyattaṃ dhammaṃ cetasā anuvitakkayato anuvicārayato manasānupekkhato pañcahi orambhāgiyehi saṃyojanehi cittaṃ vimuccati. Ayaṃ, ānanda, tatiyo ānisaṃso kālena atthupaparikkhāya.
‘‘இதா⁴னந்த³ , பி⁴க்கு²னோ பஞ்சஹி ஓரம்பா⁴கி³யேஹி ஸங்யோஜனேஹி சித்தங் விமுத்தங் ஹோதி, அனுத்தரே ச கோ² உபதி⁴ஸங்க²யே சித்தங் அவிமுத்தங் ஹோதி. ஸோ தம்ஹி ஸமயே மரணகாலே லப⁴தி ததா²க³தங் த³ஸ்ஸனாய. தஸ்ஸ ததா²க³தோ த⁴ம்மங் தே³ஸேதி ஆதி³கல்யாணங் மஜ்ஜே²கல்யாணங்…பே॰… ப்³ரஹ்மசரியங் பகாஸேதி. தஸ்ஸ தங் த⁴ம்மதே³ஸனங் ஸுத்வா அனுத்தரே உபதி⁴ஸங்க²யே சித்தங் விமுச்சதி. அயங், ஆனந்த³, சதுத்தோ² ஆனிஸங்ஸோ காலேன த⁴ம்மஸ்ஸவனே.
‘‘Idhānanda , bhikkhuno pañcahi orambhāgiyehi saṃyojanehi cittaṃ vimuttaṃ hoti, anuttare ca kho upadhisaṅkhaye cittaṃ avimuttaṃ hoti. So tamhi samaye maraṇakāle labhati tathāgataṃ dassanāya. Tassa tathāgato dhammaṃ deseti ādikalyāṇaṃ majjhekalyāṇaṃ…pe… brahmacariyaṃ pakāseti. Tassa taṃ dhammadesanaṃ sutvā anuttare upadhisaṅkhaye cittaṃ vimuccati. Ayaṃ, ānanda, catuttho ānisaṃso kālena dhammassavane.
‘‘புன சபரங், ஆனந்த³, பி⁴க்கு²னோ பஞ்சஹி ஓரம்பா⁴கி³யேஹி ஸங்யோஜனேஹி சித்தங் விமுத்தங் ஹோதி, அனுத்தரே ச கோ² உபதி⁴ஸங்க²யே சித்தங் அவிமுத்தங் ஹோதி. ஸோ தம்ஹி ஸமயே மரணகாலே ந ஹேவ கோ² லப⁴தி ததா²க³தங் த³ஸ்ஸனாய, அபி ச கோ² ததா²க³தஸாவகங் லப⁴தி த³ஸ்ஸனாய. தஸ்ஸ ததா²க³தஸாவகோ த⁴ம்மங் தே³ஸேதி ஆதி³கல்யாணங்…பே॰… பரிஸுத்³த⁴ங் ப்³ரஹ்மசரியங் பகாஸேதி. தஸ்ஸ தங் த⁴ம்மதே³ஸனங் ஸுத்வா அனுத்தரே உபதி⁴ஸங்க²யே சித்தங் விமுச்சதி. அயங், ஆனந்த³, பஞ்சமோ ஆனிஸங்ஸோ காலேன த⁴ம்மஸ்ஸவனே.
‘‘Puna caparaṃ, ānanda, bhikkhuno pañcahi orambhāgiyehi saṃyojanehi cittaṃ vimuttaṃ hoti, anuttare ca kho upadhisaṅkhaye cittaṃ avimuttaṃ hoti. So tamhi samaye maraṇakāle na heva kho labhati tathāgataṃ dassanāya, api ca kho tathāgatasāvakaṃ labhati dassanāya. Tassa tathāgatasāvako dhammaṃ deseti ādikalyāṇaṃ…pe… parisuddhaṃ brahmacariyaṃ pakāseti. Tassa taṃ dhammadesanaṃ sutvā anuttare upadhisaṅkhaye cittaṃ vimuccati. Ayaṃ, ānanda, pañcamo ānisaṃso kālena dhammassavane.
‘‘புன சபரங், ஆனந்த³, பி⁴க்கு²னோ பஞ்சஹி ஓரம்பா⁴கி³யேஹி ஸங்யோஜனேஹி சித்தங் விமுத்தங் ஹோதி, அனுத்தரே ச கோ² உபதி⁴ஸங்க²யே சித்தங் அவிமுத்தங் ஹோதி. ஸோ தம்ஹி ஸமயே மரணகாலே ந ஹேவ கோ² லப⁴தி ததா²க³தங் த³ஸ்ஸனாய, நபி ததா²க³தஸாவகங் லப⁴தி த³ஸ்ஸனாய; அபி ச கோ² யதா²ஸுதங் யதா²பரியத்தங் த⁴ம்மங் சேதஸா அனுவிதக்கேதி அனுவிசாரேதி மனஸானுபெக்க²தி. தஸ்ஸ யதா²ஸுதங் யதா²பரியத்தங் த⁴ம்மங் சேதஸா அனுவிதக்கயதோ அனுவிசாரயதோ மனஸானுபெக்க²தோ அனுத்தரே உபதி⁴ஸங்க²யே சித்தங் விமுச்சதி. அயங், ஆனந்த³, ச²ட்டோ² ஆனிஸங்ஸோ காலேன அத்து²பபரிக்கா²ய. இமே கோ², ஆனந்த³, ச² ஆனிஸங்ஸா காலேன த⁴ம்மஸ்ஸவனே காலேன அத்து²பபரிக்கா²யா’’தி. து³தியங்.
‘‘Puna caparaṃ, ānanda, bhikkhuno pañcahi orambhāgiyehi saṃyojanehi cittaṃ vimuttaṃ hoti, anuttare ca kho upadhisaṅkhaye cittaṃ avimuttaṃ hoti. So tamhi samaye maraṇakāle na heva kho labhati tathāgataṃ dassanāya, napi tathāgatasāvakaṃ labhati dassanāya; api ca kho yathāsutaṃ yathāpariyattaṃ dhammaṃ cetasā anuvitakketi anuvicāreti manasānupekkhati. Tassa yathāsutaṃ yathāpariyattaṃ dhammaṃ cetasā anuvitakkayato anuvicārayato manasānupekkhato anuttare upadhisaṅkhaye cittaṃ vimuccati. Ayaṃ, ānanda, chaṭṭho ānisaṃso kālena atthupaparikkhāya. Ime kho, ānanda, cha ānisaṃsā kālena dhammassavane kālena atthupaparikkhāyā’’ti. Dutiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 2. ப²க்³கு³னஸுத்தவண்ணனா • 2. Phaggunasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 2. ப²க்³கு³னஸுத்தவண்ணனா • 2. Phaggunasuttavaṇṇanā
