| Library / Tipiṭaka / તિપિટક • Tipiṭaka / સંયુત્તનિકાય • Saṃyuttanikāya |
૧૦. ફસ્સમૂલકસુત્તં
10. Phassamūlakasuttaṃ
૨૫૮. ‘‘તિસ્સો ઇમા, ભિક્ખવે, વેદના ફસ્સજા ફસ્સમૂલકા ફસ્સનિદાના ફસ્સપચ્ચયા. કતમા તિસ્સો? સુખા વેદના, દુક્ખા વેદના, અદુક્ખમસુખા વેદના. સુખવેદનિયં, ભિક્ખવે, ફસ્સં પટિચ્ચ ઉપ્પજ્જતિ સુખા વેદના. તસ્સેવ સુખવેદનિયસ્સ ફસ્સસ્સ નિરોધા, યં તજ્જં વેદયિતં સુખવેદનિયં ફસ્સં પટિચ્ચ ઉપ્પન્ના સુખા વેદના, સા નિરુજ્ઝતિ, સા વૂપસમ્મતિ. દુક્ખવેદનિયં, ભિક્ખવે, ફસ્સં પટિચ્ચ ઉપ્પજ્જતિ દુક્ખા વેદના. તસ્સેવ દુક્ખવેદનિયસ્સ ફસ્સસ્સ નિરોધા, યં તજ્જં વેદયિતં દુક્ખવેદનિયં ફસ્સં પટિચ્ચ ઉપ્પન્ના દુક્ખા વેદના, સા નિરુજ્ઝતિ, સા વૂપસમ્મતિ. અદુક્ખમસુખવેદનિયં, ભિક્ખવે, ફસ્સં પટિચ્ચ ઉપ્પજ્જતિ અદુક્ખમસુખા વેદના. તસ્સેવ અદુક્ખમસુખવેદનિયસ્સ ફસ્સસ્સ નિરોધા, યં તજ્જં વેદયિતં અદુક્ખમસુખવેદનિયં ફસ્સં પટિચ્ચ ઉપ્પન્ના અદુક્ખમસુખા વેદના, સા નિરુજ્ઝતિ, સા વૂપસમ્મતિ. સેય્યથાપિ , ભિક્ખવે, દ્વિન્નં કટ્ઠાનં સઙ્ઘટ્ટનસમોધાના 1 ઉસ્મા જાયતિ, તેજો અભિનિબ્બત્તતિ. તેસંયેવ કટ્ઠાનં નાનાભાવા વિનિક્ખેપા, યા તજ્જા ઉસ્મા, સા નિરુજ્ઝતિ, સા વૂપસમ્મતિ. એવમેવ ખો, ભિક્ખવે, ઇમા તિસ્સો વેદના ફસ્સજા ફસ્સમૂલકા ફસ્સનિદાના ફસ્સપચ્ચયા. તજ્જં ફસ્સં પટિચ્ચ તજ્જા વેદના ઉપ્પજ્જન્તિ. તજ્જસ્સ ફસ્સસ્સ નિરોધા તજ્જા વેદના નિરુજ્ઝન્તી’’તિ. દસમં.
258. ‘‘Tisso imā, bhikkhave, vedanā phassajā phassamūlakā phassanidānā phassapaccayā. Katamā tisso? Sukhā vedanā, dukkhā vedanā, adukkhamasukhā vedanā. Sukhavedaniyaṃ, bhikkhave, phassaṃ paṭicca uppajjati sukhā vedanā. Tasseva sukhavedaniyassa phassassa nirodhā, yaṃ tajjaṃ vedayitaṃ sukhavedaniyaṃ phassaṃ paṭicca uppannā sukhā vedanā, sā nirujjhati, sā vūpasammati. Dukkhavedaniyaṃ, bhikkhave, phassaṃ paṭicca uppajjati dukkhā vedanā. Tasseva dukkhavedaniyassa phassassa nirodhā, yaṃ tajjaṃ vedayitaṃ dukkhavedaniyaṃ phassaṃ paṭicca uppannā dukkhā vedanā, sā nirujjhati, sā vūpasammati. Adukkhamasukhavedaniyaṃ, bhikkhave, phassaṃ paṭicca uppajjati adukkhamasukhā vedanā. Tasseva adukkhamasukhavedaniyassa phassassa nirodhā, yaṃ tajjaṃ vedayitaṃ adukkhamasukhavedaniyaṃ phassaṃ paṭicca uppannā adukkhamasukhā vedanā, sā nirujjhati, sā vūpasammati. Seyyathāpi , bhikkhave, dvinnaṃ kaṭṭhānaṃ saṅghaṭṭanasamodhānā 2 usmā jāyati, tejo abhinibbattati. Tesaṃyeva kaṭṭhānaṃ nānābhāvā vinikkhepā, yā tajjā usmā, sā nirujjhati, sā vūpasammati. Evameva kho, bhikkhave, imā tisso vedanā phassajā phassamūlakā phassanidānā phassapaccayā. Tajjaṃ phassaṃ paṭicca tajjā vedanā uppajjanti. Tajjassa phassassa nirodhā tajjā vedanā nirujjhantī’’ti. Dasamaṃ.
સગાથાવગ્ગો પઠમો .
Sagāthāvaggo paṭhamo .
તસ્સુદ્દાનં –
Tassuddānaṃ –
સમાધિ સુખં પહાનેન, પાતાલં દટ્ઠબ્બેન ચ;
Samādhi sukhaṃ pahānena, pātālaṃ daṭṭhabbena ca;
સલ્લેન ચેવ ગેલઞ્ઞા, અનિચ્ચ ફસ્સમૂલકાતિ.
Sallena ceva gelaññā, anicca phassamūlakāti.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૧૦. ફસ્સમૂલકસુત્તવણ્ણના • 10. Phassamūlakasuttavaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૧૦. ફસ્સમૂલકસુત્તવણ્ણના • 10. Phassamūlakasuttavaṇṇanā
