| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
9. பிண்ட³பாதபாரிஸுத்³தி⁴ஸுத்தவண்ணனா
9. Piṇḍapātapārisuddhisuttavaṇṇanā
438. ஏவங் மே ஸுதந்தி பிண்ட³பாதபாரிஸுத்³தி⁴ஸுத்தங். தத்த² படிஸல்லானாதி ப²லஸமாபத்திதோ.
438.Evaṃme sutanti piṇḍapātapārisuddhisuttaṃ. Tattha paṭisallānāti phalasamāpattito.
விப்பஸன்னானீதி ஓகாஸவஸேனேதங் வுத்தங். ப²லஸமாபத்திதோ ஹி வுட்டி²தஸ்ஸ பஞ்சஹி பஸாதே³ஹி பதிட்டி²தோகாஸோ விப்பஸன்னோ ஹோதி, ச²விவண்ணோ பரிஸுத்³தோ⁴. தஸ்மா ஏவமாஹ. ஸுஞ்ஞதவிஹாரேனாதி ஸுஞ்ஞதப²லஸமாபத்திவிஹாரேன. மஹாபுரிஸவிஹாரோதி பு³த்³த⁴பச்சேகபு³த்³த⁴ததா²க³தமஹாஸாவகானங் மஹாபுரிஸானங் விஹாரோ. யேன சாஹங் மக்³கே³னாதிஆதீ³ஸு விஹாரதோ பட்டா²ய யாவ கா³மஸ்ஸ இந்த³கீ²லா ஏஸ பவிட்ட²மக்³கோ³ நாம, அந்தோகா³மங் பவிஸித்வா கே³ஹபடிபாடியா சரித்வா யாவ நக³ரத்³வாரேன நிக்க²மனா ஏஸ சரிதப்³ப³பதே³ஸோ நாம, ப³ஹி இந்த³கீ²லதோ பட்டா²ய யாவ விஹாரா ஏஸ படிக்கந்தமக்³கோ³ நாம. படிக⁴ங் வாபி சேதஸோதி சித்தே படிஹஞ்ஞனகிலேஸஜாதங் கிஞ்சி அத்தி² நத்தீ²தி. அஹோரத்தானுஸிக்கி²னாதி தி³வஸஞ்ச ரத்திஞ்ச அனுஸிக்க²ந்தேன.
Vippasannānīti okāsavasenetaṃ vuttaṃ. Phalasamāpattito hi vuṭṭhitassa pañcahi pasādehi patiṭṭhitokāso vippasanno hoti, chavivaṇṇo parisuddho. Tasmā evamāha. Suññatavihārenāti suññataphalasamāpattivihārena. Mahāpurisavihāroti buddhapaccekabuddhatathāgatamahāsāvakānaṃ mahāpurisānaṃ vihāro. Yena cāhaṃ maggenātiādīsu vihārato paṭṭhāya yāva gāmassa indakhīlā esa paviṭṭhamaggo nāma, antogāmaṃ pavisitvā gehapaṭipāṭiyā caritvā yāva nagaradvārena nikkhamanā esa caritabbapadeso nāma, bahi indakhīlato paṭṭhāya yāva vihārā esa paṭikkantamaggo nāma. Paṭighaṃ vāpi cetasoti citte paṭihaññanakilesajātaṃ kiñci atthi natthīti. Ahorattānusikkhināti divasañca rattiñca anusikkhantena.
440. பஹீனா நு கோ² மே பஞ்ச காமகு³ணாதிஆதீ³ஸு ஏகபி⁴க்கு²ஸ்ஸ பச்சவெக்க²ணா நானா, நானாபி⁴க்கூ²னங் பச்சவெக்க²ணா நானாதி. கத²ங்? ஏகோ ஹி பி⁴க்கு² பச்சா²ப⁴த்தங் பிண்ட³பாதபடிக்கந்தோ பத்தசீவரங் படிஸாமெத்வா விவித்தோகாஸே நிஸின்னோ பச்சவெக்க²தி ‘‘பஹீனா நு கோ² மே பஞ்சகாமகு³ணா’’தி. ஸோ ‘‘அப்பஹீனா’’தி ஞத்வா வீரியங் பக்³க³ய்ஹ அனாகா³மிமக்³கே³ன பஞ்சகாமகு³ணிகராக³ங் ஸமுக்³கா⁴டெத்வா மக்³கா³னந்தரங் ப²லங் ப²லானந்தரங் மக்³க³ங் ததோ வுட்டா²ய பச்சவெக்க²ந்தோ ‘‘பஹீனா’’தி பஜானாதி. நீவரணாதீ³ஸுபி ஏஸேவ நயோ. ஏதேஸங் பன அரஹத்தமக்³கே³ன பஹானாதீ³னி ஹொந்தி, ஏவங் ஏகபி⁴க்கு²ஸ்ஸ நானாபச்சவெக்க²ணா ஹோதி. ஏதாஸு பன பச்சவெக்க²ணாஸு அஞ்ஞோ பி⁴க்கு² ஏகங் பச்சவெக்க²ணங் பச்சவெக்க²தி, அஞ்ஞோ ஏகந்தி ஏவங் நானாபி⁴க்கூ²னங் நானாபச்சவெக்க²ணா ஹோதி. ஸேஸங் ஸப்³ப³த்த² உத்தானமேவாதி.
440.Pahīnā nu kho me pañca kāmaguṇātiādīsu ekabhikkhussa paccavekkhaṇā nānā, nānābhikkhūnaṃ paccavekkhaṇā nānāti. Kathaṃ? Eko hi bhikkhu pacchābhattaṃ piṇḍapātapaṭikkanto pattacīvaraṃ paṭisāmetvā vivittokāse nisinno paccavekkhati ‘‘pahīnā nu kho me pañcakāmaguṇā’’ti. So ‘‘appahīnā’’ti ñatvā vīriyaṃ paggayha anāgāmimaggena pañcakāmaguṇikarāgaṃ samugghāṭetvā maggānantaraṃ phalaṃ phalānantaraṃ maggaṃ tato vuṭṭhāya paccavekkhanto ‘‘pahīnā’’ti pajānāti. Nīvaraṇādīsupi eseva nayo. Etesaṃ pana arahattamaggena pahānādīni honti, evaṃ ekabhikkhussa nānāpaccavekkhaṇā hoti. Etāsu pana paccavekkhaṇāsu añño bhikkhu ekaṃ paccavekkhaṇaṃ paccavekkhati, añño ekanti evaṃ nānābhikkhūnaṃ nānāpaccavekkhaṇā hoti. Sesaṃ sabbattha uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
பிண்ட³பாதபாரிஸுத்³தி⁴ஸுத்தவண்ணனா நிட்டி²தா.
Piṇḍapātapārisuddhisuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 9. பிண்ட³பாதபாரிஸுத்³தி⁴ஸுத்தங் • 9. Piṇḍapātapārisuddhisuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 9. பிண்ட³பாதபாரிஸுத்³தி⁴ஸுத்தவண்ணனா • 9. Piṇḍapātapārisuddhisuttavaṇṇanā
