| Library / Tipiṭaka / திபிடக • Tipiṭaka / உதா³ன-அட்ட²கதா² • Udāna-aṭṭhakathā |
8. பிண்ட³பாதிகஸுத்தவண்ணனா
8. Piṇḍapātikasuttavaṇṇanā
28. அட்ட²மே பச்சா²ப⁴த்தந்தி ஏகாஸனிகக²லுபச்சா²ப⁴த்திகானங் பாதோவ பு⁴த்தானங் அந்தோமஜ்ஜ²ன்ஹிகோபி பச்சா²ப⁴த்தமேவ, இத⁴ பன பகதிப⁴த்தஸ்ஸேவ பச்ச²தோ பச்சா²ப⁴த்தந்தி வேதி³தப்³ப³ங். பிண்ட³பாதபடிக்கந்தானந்தி பிண்ட³பாததோ படிக்கந்தானங், பிண்ட³பாதங் பரியேஸித்வா ப⁴த்தகிச்சஸ்ஸ நிட்டா²பனவஸேன ததோ நிவத்தானங். கரேரிமண்ட³லமாளேதி எத்த² கரேரீதி வருணருக்க²ஸ்ஸ நாமங். ஸோ கிர க³ந்த⁴குடியா மண்ட³பஸ்ஸ ஸாலாய ச அந்தரே ஹோதி, தேன க³ந்த⁴குடீபி ‘‘கரேரிகுடிகா’’தி வுச்சதி, மண்ட³போபி ஸாலாபி ‘‘கரேரிமண்ட³லமாளோ’’தி. தஸ்மா கரேரிருக்க²ஸ்ஸ அவிதூ³ரே கதே நிஸீத³னஸாலஸங்கா²தே மண்ட³லமாளே. திணபண்ணச்ச²த³னங் அனோவஸ்ஸகங் ‘‘மண்ட³லமாளோ’’தி வத³ந்தி, அதிமுத்தகாதி³லதாமண்ட³போ ‘‘மண்ட³லமாளோ’’தி அபரே.
28. Aṭṭhame pacchābhattanti ekāsanikakhalupacchābhattikānaṃ pātova bhuttānaṃ antomajjhanhikopi pacchābhattameva, idha pana pakatibhattasseva pacchato pacchābhattanti veditabbaṃ. Piṇḍapātapaṭikkantānanti piṇḍapātato paṭikkantānaṃ, piṇḍapātaṃ pariyesitvā bhattakiccassa niṭṭhāpanavasena tato nivattānaṃ. Karerimaṇḍalamāḷeti ettha karerīti varuṇarukkhassa nāmaṃ. So kira gandhakuṭiyā maṇḍapassa sālāya ca antare hoti, tena gandhakuṭīpi ‘‘karerikuṭikā’’ti vuccati, maṇḍapopi sālāpi ‘‘karerimaṇḍalamāḷo’’ti. Tasmā karerirukkhassa avidūre kate nisīdanasālasaṅkhāte maṇḍalamāḷe. Tiṇapaṇṇacchadanaṃ anovassakaṃ ‘‘maṇḍalamāḷo’’ti vadanti, atimuttakādilatāmaṇḍapo ‘‘maṇḍalamāḷo’’ti apare.
காலேன காலந்தி காலே காலே அந்தரந்தரா, தஸ்மிங் தஸ்மிங் ஸமயேதி அத்தோ². மனாபிகேதி மனவட்³ட⁴கே, பியரூபே இட்டே²தி அத்தோ². இட்டா²னிட்ட²பா⁴வோ ச புக்³க³லவஸேன ச த்³வாரவஸேன ச க³ஹேதப்³போ³. ஏகச்சஸ்ஸ ஹி இட்டா²பி⁴மதோ ஏகச்சஸ்ஸ அனிட்டோ² ஹோதி, ஏகச்சஸ்ஸ அனிட்டா²பி⁴மதோ ஏகச்சஸ்ஸ இட்டோ² . ததா² ஏகஸ்ஸ த்³வாரஸ்ஸ இட்டோ² அஞ்ஞஸ்ஸ அனிட்டோ². விபாகவஸேன பனெத்த² வினிச்ச²யோ வேதி³தப்³போ³. குஸலவிபாகோ ஹி ஏகந்தேன இட்டோ², அகுஸலவிபாகோ அனிட்டோ² ஏவாதி. சக்கு²னா ரூபே பஸ்ஸிதுந்தி கா³மங் பிண்டா³ய பவிட்டோ² உபாஸகேஹி கே³ஹங் பவேஸெத்வா பூஜாஸக்காரகரணத்த²ங் உபனீதேஸு ஆஸனவிதானாதீ³ஸு நானாவிராக³ஸமுஜ்ஜலவண்ணஸங்கா²தே ரஜனீயே அஞ்ஞே ச ஸவிஞ்ஞாணகரூபே சக்கு²த்³வாரிகவிஞ்ஞாணேஹி பஸ்ஸிதுங். ஸத்³தே³தி ததே²வ இஸ்ஸரஜனானங் கே³ஹங் பவிட்டோ² தேஸங் பயுத்தே கீ³தவாதி³தஸத்³தே³ ஸோதுங். க³ந்தே⁴தி ததா² தேஹி பூஜாஸக்காரவஸேன உபனீதே புப்ப²தூ⁴மாதி³க³ந்தே⁴ கா⁴யிதுங். ரஸேதி தேஹி தி³ன்னாஹாரபரிபோ⁴கே³ நானக்³க³ரஸே ஸாயிதுங். பொ²ட்ட²ப்³பே³தி மஹக்³க⁴பச்சத்த²ரணேஸு ஆஸனேஸு நிஸின்னகாலே ஸுக²ஸம்ப²ஸ்ஸே பொ²ட்ட²ப்³பே³ பு²ஸிதுங். ஏவஞ்ச பஞ்சத்³வாரிகஇட்டா²ரம்மணப்படிலாப⁴ங் கித்தெத்வா இதா³னி மனொத்³வாரிகஇட்டா²ரம்மணப்படிலாப⁴ங் த³ஸ்ஸேதுங் ‘‘ஸக்கதோ’’திஆதி³ வுத்தங். தங் ஹெட்டா² வுத்தத்த²மேவ.
Kālena kālanti kāle kāle antarantarā, tasmiṃ tasmiṃ samayeti attho. Manāpiketi manavaḍḍhake, piyarūpe iṭṭheti attho. Iṭṭhāniṭṭhabhāvo ca puggalavasena ca dvāravasena ca gahetabbo. Ekaccassa hi iṭṭhābhimato ekaccassa aniṭṭho hoti, ekaccassa aniṭṭhābhimato ekaccassa iṭṭho . Tathā ekassa dvārassa iṭṭho aññassa aniṭṭho. Vipākavasena panettha vinicchayo veditabbo. Kusalavipāko hi ekantena iṭṭho, akusalavipāko aniṭṭho evāti. Cakkhunā rūpe passitunti gāmaṃ piṇḍāya paviṭṭho upāsakehi gehaṃ pavesetvā pūjāsakkārakaraṇatthaṃ upanītesu āsanavitānādīsu nānāvirāgasamujjalavaṇṇasaṅkhāte rajanīye aññe ca saviññāṇakarūpe cakkhudvārikaviññāṇehi passituṃ. Saddeti tatheva issarajanānaṃ gehaṃ paviṭṭho tesaṃ payutte gītavāditasadde sotuṃ. Gandheti tathā tehi pūjāsakkāravasena upanīte pupphadhūmādigandhe ghāyituṃ. Raseti tehi dinnāhāraparibhoge nānaggarase sāyituṃ. Phoṭṭhabbeti mahagghapaccattharaṇesu āsanesu nisinnakāle sukhasamphasse phoṭṭhabbe phusituṃ. Evañca pañcadvārikaiṭṭhārammaṇappaṭilābhaṃ kittetvā idāni manodvārikaiṭṭhārammaṇappaṭilābhaṃ dassetuṃ ‘‘sakkato’’tiādi vuttaṃ. Taṃ heṭṭhā vuttatthameva.
கிங் பன அபிண்ட³பாதிகானங் அயங் நயோ ந லப்³ப⁴தீதி? லப்³ப⁴தி. தேஸம்பி ஹி நிமந்தனஸலாகப⁴த்தாதி³அத்த²ங் கா³மங் க³தகாலே உளாரவிப⁴வா உபாஸகா ததா² ஸக்காரஸம்மானங் கரொந்தியேவ, தங் பன அனியதங். பிண்ட³பாதிகானங் பன ததா³ நிச்சமேவ தத்த² பூஜாஸக்காரங் கரியமானங் தி³ஸ்வா, ஸக்காரக³ருதாய அனிஸ்ஸரணமக்³கே³ ட²த்வா, அயோனிஸோமனஸிகாரவஸேன தே பி⁴க்கூ² ஏவமாஹங்ஸு. தேனேவாஹ – ‘‘ஹந்தா³வுஸோ, மயம்பி பிண்ட³பாதிகா ஹோமா’’திஆதி³.
Kiṃ pana apiṇḍapātikānaṃ ayaṃ nayo na labbhatīti? Labbhati. Tesampi hi nimantanasalākabhattādiatthaṃ gāmaṃ gatakāle uḷāravibhavā upāsakā tathā sakkārasammānaṃ karontiyeva, taṃ pana aniyataṃ. Piṇḍapātikānaṃ pana tadā niccameva tattha pūjāsakkāraṃ kariyamānaṃ disvā, sakkāragarutāya anissaraṇamagge ṭhatvā, ayonisomanasikāravasena te bhikkhū evamāhaṃsu. Tenevāha – ‘‘handāvuso, mayampi piṇḍapātikā homā’’tiādi.
தத்த² ஹந்தா³தி வொஸ்ஸக்³க³த்தே² நிபாதோ. லச்சா²மாதி லபி⁴ஸ்ஸாம. தேனுபஸங்கமீதி தத்த² ஸுரபி⁴க³ந்த⁴குடியங் நிஸின்னோ தேஸங் தங் கதா²ஸல்லாபங் ஸுத்வா ‘‘இமே பி⁴க்கூ² மாதி³ஸஸ்ஸ நாம பு³த்³த⁴ஸ்ஸ ஸாஸனே பப்³ப³ஜித்வா மயா ஸத்³தி⁴ங் ஏகவிஹாரே வஸந்தாபி ஏவங் அயோனிஸோமனஸிகாரவஸேன கத²ங் பவத்தெந்தி, ஸல்லேகே² ந வத்தந்தி, ஹந்த³ தே ததோ நிவாரெத்வா ஸல்லேக²விஹாரே நியோஜெஸ்ஸாமீ’’தி மண்ட³லமாளங் உபஸங்கமி. ஸேஸங் ஹெட்டா² வுத்தனயமேவ.
Tattha handāti vossaggatthe nipāto. Lacchāmāti labhissāma. Tenupasaṅkamīti tattha surabhigandhakuṭiyaṃ nisinno tesaṃ taṃ kathāsallāpaṃ sutvā ‘‘ime bhikkhū mādisassa nāma buddhassa sāsane pabbajitvā mayā saddhiṃ ekavihāre vasantāpi evaṃ ayonisomanasikāravasena kathaṃ pavattenti, sallekhe na vattanti, handa te tato nivāretvā sallekhavihāre niyojessāmī’’ti maṇḍalamāḷaṃ upasaṅkami. Sesaṃ heṭṭhā vuttanayameva.
ஏதமத்த²ங் விதி³த்வாதி ‘‘அப்பிச்ச²தாஸந்துட்டி²தாஸல்லேகா²னங் வஸேன கிலேஸே து⁴னிதுங் தண்ஹங் விஸோஸேதுங் படிபன்னோதி பிண்ட³பாதிகஸ்ஸ ஸதோ தே³வா பிஹயந்தி, தஸ்ஸ படிபத்தியா ஆத³ரஜாதா பியாயந்தி, ந இதோ அஞ்ஞதா²’’தி இமமத்த²ங் விதி³த்வா தத³த்த²தீ³பனங் இமங் உதா³னங் உதா³னேஸி.
Etamatthaṃ viditvāti ‘‘appicchatāsantuṭṭhitāsallekhānaṃ vasena kilese dhunituṃ taṇhaṃ visosetuṃ paṭipannoti piṇḍapātikassa sato devā pihayanti, tassa paṭipattiyā ādarajātā piyāyanti, na ito aññathā’’ti imamatthaṃ viditvā tadatthadīpanaṃ imaṃ udānaṃ udānesi.
தத்த² நோ சே ஸத்³த³ஸிலோகனிஸ்ஸிதோதி ‘‘அஹோ அய்யோ அப்பிச்சோ² ஸந்துட்டோ² பரமஸல்லேக²வுத்தீ’’திஆதி³னா பரேஹி கித்திதப்³ப³ஸத்³த³ஸங்கா²தங் ஸிலோகங். தண்ஹாய நிஸ்ஸிதோ ந ஹோதி சேதி அத்தோ². ஸத்³தோ³ வா ஸம்முகா² வண்ணப⁴ணனது²திகோ⁴ஸோ, ஸிலோகோ பரம்முக²பூ⁴தா பஸங்ஸா பத்த²டயஸதா வா. ஸேஸங் அனந்தரஸுத்தே வுத்தனயமேவ.
Tattha no ce saddasilokanissitoti ‘‘aho ayyo appiccho santuṭṭho paramasallekhavuttī’’tiādinā parehi kittitabbasaddasaṅkhātaṃ silokaṃ. Taṇhāya nissito na hoti ceti attho. Saddo vā sammukhā vaṇṇabhaṇanathutighoso, siloko parammukhabhūtā pasaṃsā patthaṭayasatā vā. Sesaṃ anantarasutte vuttanayameva.
அட்ட²மஸுத்தவண்ணனா நிட்டி²தா.
Aṭṭhamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / உதா³னபாளி • Udānapāḷi / 8. பிண்ட³பாதிகஸுத்தங் • 8. Piṇḍapātikasuttaṃ
