| Library / Tipiṭaka / તિપિટક • Tipiṭaka / સંયુત્તનિકાય • Saṃyuttanikāya |
૮. પિણ્ડસુત્તં
8. Piṇḍasuttaṃ
૧૫૪. એકં સમયં ભગવા મગધેસુ વિહરતિ પઞ્ચસાલાયં બ્રાહ્મણગામે. તેન ખો પન સમયેન પઞ્ચસાલાયં બ્રાહ્મણગામે કુમારિકાનં પાહુનકાનિ ભવન્તિ. અથ ખો ભગવા પુબ્બણ્હસમયં નિવાસેત્વા પત્તચીવરમાદાય પઞ્ચસાલં બ્રાહ્મણગામં પિણ્ડાય પાવિસિ. તેન ખો પન સમયેન પઞ્ચસાલેય્યકા બ્રાહ્મણગહપતિકા મારેન પાપિમતા અન્વાવિટ્ઠા ભવન્તિ – મા સમણો ગોતમો પિણ્ડમલત્થાતિ.
154. Ekaṃ samayaṃ bhagavā magadhesu viharati pañcasālāyaṃ brāhmaṇagāme. Tena kho pana samayena pañcasālāyaṃ brāhmaṇagāme kumārikānaṃ pāhunakāni bhavanti. Atha kho bhagavā pubbaṇhasamayaṃ nivāsetvā pattacīvaramādāya pañcasālaṃ brāhmaṇagāmaṃ piṇḍāya pāvisi. Tena kho pana samayena pañcasāleyyakā brāhmaṇagahapatikā mārena pāpimatā anvāviṭṭhā bhavanti – mā samaṇo gotamo piṇḍamalatthāti.
અથ ખો ભગવા યથાધોતેન પત્તેન પઞ્ચસાલં બ્રાહ્મણગામં પિણ્ડાય પાવિસિ તથાધોતેન 1 પત્તેન પટિક્કમિ. અથ ખો મારો પાપિમા યેન ભગવા તેનુપસઙ્કમિ; ઉપસઙ્કમિત્વા ભગવન્તં એતદવોચ – ‘‘અપિ ત્વં, સમણ, પિણ્ડમલત્થા’’તિ? ‘‘તથા નુ ત્વં, પાપિમ, અકાસિ યથાહં પિણ્ડં ન લભેય્ય’’ન્તિ. ‘‘તેન હિ, ભન્તે, ભગવા દુતિયમ્પિ પઞ્ચસાલં બ્રાહ્મણગામં પિણ્ડાય પવિસતુ. તથાહં કરિસ્સામિ યથા ભગવા પિણ્ડં લચ્છતી’’તિ.
Atha kho bhagavā yathādhotena pattena pañcasālaṃ brāhmaṇagāmaṃ piṇḍāya pāvisi tathādhotena 2 pattena paṭikkami. Atha kho māro pāpimā yena bhagavā tenupasaṅkami; upasaṅkamitvā bhagavantaṃ etadavoca – ‘‘api tvaṃ, samaṇa, piṇḍamalatthā’’ti? ‘‘Tathā nu tvaṃ, pāpima, akāsi yathāhaṃ piṇḍaṃ na labheyya’’nti. ‘‘Tena hi, bhante, bhagavā dutiyampi pañcasālaṃ brāhmaṇagāmaṃ piṇḍāya pavisatu. Tathāhaṃ karissāmi yathā bhagavā piṇḍaṃ lacchatī’’ti.
‘‘અપુઞ્ઞં પસવિ મારો, આસજ્જ નં તથાગતં;
‘‘Apuññaṃ pasavi māro, āsajja naṃ tathāgataṃ;
કિં નુ મઞ્ઞસિ પાપિમ, ન મે પાપં વિપચ્ચતિ.
Kiṃ nu maññasi pāpima, na me pāpaṃ vipaccati.
‘‘સુસુખં વત જીવામ, યેસં નો નત્થિ કિઞ્ચનં;
‘‘Susukhaṃ vata jīvāma, yesaṃ no natthi kiñcanaṃ;
પીતિભક્ખા ભવિસ્સામ, દેવા આભસ્સરા યથા’’તિ.
Pītibhakkhā bhavissāma, devā ābhassarā yathā’’ti.
અથ ખો મારો પાપિમા ‘‘જાનાતિ મં ભગવા, જાનાતિ મં સુગતો’’તિ દુક્ખી દુમ્મનો તત્થેવન્તરધાયીતિ.
Atha kho māro pāpimā ‘‘jānāti maṃ bhagavā, jānāti maṃ sugato’’ti dukkhī dummano tatthevantaradhāyīti.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૮. પિણ્ડસુત્તવણ્ણના • 8. Piṇḍasuttavaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૮. પિણ્ડસુત્તવણ્ણના • 8. Piṇḍasuttavaṇṇanā
