| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
8. பிண்ட³ஸுத்தவண்ணனா
8. Piṇḍasuttavaṇṇanā
154. தத்த² தத்தா²தி தஸ்மிங் தஸ்மிங் ஞாதிமித்தகுலே. பாஹுனகானீதி பஹிதப்³ப³பண்ணாகாரானி. ஆக³ந்துகபண்ணாகாரானீதி ஆக³ந்துகானங் உபக³தானங் தா³தப்³ப³பண்ணாகாரானி. ஸயங்சரதி³வஸேதி குமாரகானஞ்ச குமாரிகானஞ்ச ஸயங் அத்தனா சரிதப்³ப³ச²ணதி³வஸே. இதா³னி தமத்த²ங் வித்தா²ரதோ த³ஸ்ஸெந்தோ ‘‘ஸமவயஜாதிகொ³த்தா’’திஆதி³மாஹ. ஸமவயஸமஜாதிகஸமகொ³த்தாதி பச்சேகங் ஸம-ஸத்³தோ³ யோஜேதப்³போ³. கொ³த்தஸமதா ச ஆவாஹவிவாஹயொக்³யதாவஸேன த³ட்ட²ப்³பா³, ந ஏககொ³த்ததாவஸேன. ததோ ததோ கா³மதோ. அஞ்ஞஸ்மிங் தா³தப்³பே³ அஸதி. ச²ணவஸேன பஹிணிதுங் ஸம்பாதி³தங் பூவங் ச²ணபூவங். தாஸங் ஸம்பத்தியாதி தாஸங் தா³னங் த⁴ம்மஸ்ஸவனஞ்சாதி தஸ்ஸா து³விதா⁴யபி ஸம்பத்தியா.
154.Tattha tatthāti tasmiṃ tasmiṃ ñātimittakule. Pāhunakānīti pahitabbapaṇṇākārāni. Āgantukapaṇṇākārānīti āgantukānaṃ upagatānaṃ dātabbapaṇṇākārāni. Sayaṃcaradivaseti kumārakānañca kumārikānañca sayaṃ attanā caritabbachaṇadivase. Idāni tamatthaṃ vitthārato dassento ‘‘samavayajātigottā’’tiādimāha. Samavayasamajātikasamagottāti paccekaṃ sama-saddo yojetabbo. Gottasamatā ca āvāhavivāhayogyatāvasena daṭṭhabbā, na ekagottatāvasena. Tato tato gāmato. Aññasmiṃ dātabbe asati. Chaṇavasena pahiṇituṃ sampāditaṃ pūvaṃ chaṇapūvaṃ. Tāsaṃ sampattiyāti tāsaṃ dānaṃ dhammassavanañcāti tassā duvidhāyapi sampattiyā.
ஞாணங் நாம ஆவஜ்ஜனபுப்³ப³கங், தஸ்மா அஜானநஸ்ஸ ‘‘அனாவஜ்ஜனதாயா’’தி காரணங் வத்வா ஸேஸகாரணங் வத³ந்தோ ‘‘பு³த்³தா⁴ன’’ந்திஆதி³மாஹ. உபசாரபே⁴த³ந்தி பு³த்³த⁴ங் தி³ஸ்வா மனுஸ்ஸேஹி காதப்³ப³உபசாரஸ்ஸ பி⁴ந்த³னங். பி⁴ந்தி³துந்தி வித⁴மிதுங்.
Ñāṇaṃ nāma āvajjanapubbakaṃ, tasmā ajānanassa ‘‘anāvajjanatāyā’’ti kāraṇaṃ vatvā sesakāraṇaṃ vadanto ‘‘buddhāna’’ntiādimāha. Upacārabhedanti buddhaṃ disvā manussehi kātabbaupacārassa bhindanaṃ. Bhinditunti vidhamituṃ.
ப⁴க³வா பனாதி பனஸத்³தோ³ விஸேஸத்த²ஜோதகோ. தேன ந கேவலங் ப⁴க³வா உப்பண்ட³னங் பரிஹரந்தோ தங் கா³மங் ந புன பாவிஸி, அத² கோ² மாரங் அனுகம்பந்தோதி இத³ங் விஸேஸங் ஜோதேதி.
Bhagavā panāti panasaddo visesatthajotako. Tena na kevalaṃ bhagavā uppaṇḍanaṃ pariharanto taṃ gāmaṃ na puna pāvisi, atha kho māraṃ anukampantoti idaṃ visesaṃ joteti.
ஜனேஸீதி அபுஞ்ஞங் ஜனேஸி, ஜனெந்தோ ச யதா² ததோ ஆயதிங் தி²ரதரங் மஹந்தங் து³க்க²ங் நிப்ப²ஜ்ஜிஸ்ஸதி, ஏவங் நிப்பா²தே³ஸி. ஆஸஜ்ஜனந்தி எத்த² நந்தி நிபாதமத்தங். கிஞ்சதி மத்³த³தி அபி⁴ப⁴வதீதி கிஞ்சனந்தி ஆஹ ‘‘மத்³தி³துங் ஸமத்த²’’ந்தி.
Janesīti apuññaṃ janesi, janento ca yathā tato āyatiṃ thirataraṃ mahantaṃ dukkhaṃ nipphajjissati, evaṃ nipphādesi. Āsajjananti ettha nanti nipātamattaṃ. Kiñcati maddati abhibhavatīti kiñcananti āha ‘‘maddituṃ samattha’’nti.
பிண்ட³ஸுத்தவண்ணனா நிட்டி²தா.
Piṇḍasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 8. பிண்ட³ஸுத்தங் • 8. Piṇḍasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 8. பிண்ட³ஸுத்தவண்ணனா • 8. Piṇḍasuttavaṇṇanā
