| Library / Tipiṭaka / તિપિટક • Tipiṭaka / સંયુત્તનિકાય (ટીકા) • Saṃyuttanikāya (ṭīkā) |
૮. પિણ્ડસુત્તવણ્ણના
8. Piṇḍasuttavaṇṇanā
૧૫૪. તત્થ તત્થાતિ તસ્મિં તસ્મિં ઞાતિમિત્તકુલે. પાહુનકાનીતિ પહિતબ્બપણ્ણાકારાનિ. આગન્તુકપણ્ણાકારાનીતિ આગન્તુકાનં ઉપગતાનં દાતબ્બપણ્ણાકારાનિ. સયંચરદિવસેતિ કુમારકાનઞ્ચ કુમારિકાનઞ્ચ સયં અત્તના ચરિતબ્બછણદિવસે. ઇદાનિ તમત્થં વિત્થારતો દસ્સેન્તો ‘‘સમવયજાતિગોત્તા’’તિઆદિમાહ. સમવયસમજાતિકસમગોત્તાતિ પચ્ચેકં સમ-સદ્દો યોજેતબ્બો. ગોત્તસમતા ચ આવાહવિવાહયોગ્યતાવસેન દટ્ઠબ્બા, ન એકગોત્તતાવસેન. તતો તતો ગામતો. અઞ્ઞસ્મિં દાતબ્બે અસતિ. છણવસેન પહિણિતું સમ્પાદિતં પૂવં છણપૂવં. તાસં સમ્પત્તિયાતિ તાસં દાનં ધમ્મસ્સવનઞ્ચાતિ તસ્સા દુવિધાયપિ સમ્પત્તિયા.
154.Tattha tatthāti tasmiṃ tasmiṃ ñātimittakule. Pāhunakānīti pahitabbapaṇṇākārāni. Āgantukapaṇṇākārānīti āgantukānaṃ upagatānaṃ dātabbapaṇṇākārāni. Sayaṃcaradivaseti kumārakānañca kumārikānañca sayaṃ attanā caritabbachaṇadivase. Idāni tamatthaṃ vitthārato dassento ‘‘samavayajātigottā’’tiādimāha. Samavayasamajātikasamagottāti paccekaṃ sama-saddo yojetabbo. Gottasamatā ca āvāhavivāhayogyatāvasena daṭṭhabbā, na ekagottatāvasena. Tato tato gāmato. Aññasmiṃ dātabbe asati. Chaṇavasena pahiṇituṃ sampāditaṃ pūvaṃ chaṇapūvaṃ. Tāsaṃ sampattiyāti tāsaṃ dānaṃ dhammassavanañcāti tassā duvidhāyapi sampattiyā.
ઞાણં નામ આવજ્જનપુબ્બકં, તસ્મા અજાનનસ્સ ‘‘અનાવજ્જનતાયા’’તિ કારણં વત્વા સેસકારણં વદન્તો ‘‘બુદ્ધાન’’ન્તિઆદિમાહ. ઉપચારભેદન્તિ બુદ્ધં દિસ્વા મનુસ્સેહિ કાતબ્બઉપચારસ્સ ભિન્દનં. ભિન્દિતુન્તિ વિધમિતું.
Ñāṇaṃ nāma āvajjanapubbakaṃ, tasmā ajānanassa ‘‘anāvajjanatāyā’’ti kāraṇaṃ vatvā sesakāraṇaṃ vadanto ‘‘buddhāna’’ntiādimāha. Upacārabhedanti buddhaṃ disvā manussehi kātabbaupacārassa bhindanaṃ. Bhinditunti vidhamituṃ.
ભગવા પનાતિ પનસદ્દો વિસેસત્થજોતકો. તેન ન કેવલં ભગવા ઉપ્પણ્ડનં પરિહરન્તો તં ગામં ન પુન પાવિસિ, અથ ખો મારં અનુકમ્પન્તોતિ ઇદં વિસેસં જોતેતિ.
Bhagavā panāti panasaddo visesatthajotako. Tena na kevalaṃ bhagavā uppaṇḍanaṃ pariharanto taṃ gāmaṃ na puna pāvisi, atha kho māraṃ anukampantoti idaṃ visesaṃ joteti.
જનેસીતિ અપુઞ્ઞં જનેસિ, જનેન્તો ચ યથા તતો આયતિં થિરતરં મહન્તં દુક્ખં નિપ્ફજ્જિસ્સતિ, એવં નિપ્ફાદેસિ. આસજ્જનન્તિ એત્થ નન્તિ નિપાતમત્તં. કિઞ્ચતિ મદ્દતિ અભિભવતીતિ કિઞ્ચનન્તિ આહ ‘‘મદ્દિતું સમત્થ’’ન્તિ.
Janesīti apuññaṃ janesi, janento ca yathā tato āyatiṃ thirataraṃ mahantaṃ dukkhaṃ nipphajjissati, evaṃ nipphādesi. Āsajjananti ettha nanti nipātamattaṃ. Kiñcati maddati abhibhavatīti kiñcananti āha ‘‘maddituṃ samattha’’nti.
પિણ્ડસુત્તવણ્ણના નિટ્ઠિતા.
Piṇḍasuttavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૮. પિણ્ડસુત્તં • 8. Piṇḍasuttaṃ
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૮. પિણ્ડસુત્તવણ્ણના • 8. Piṇḍasuttavaṇṇanā
