| Library / Tipiṭaka / திபிடக • Tipiṭaka / உதா³ன-அட்ட²கதா² • Udāna-aṭṭhakathā |
6. பிண்டோ³லஸுத்தவண்ணனா
6. Piṇḍolasuttavaṇṇanā
36. ச²ட்டே² பிண்டோ³லபா⁴ரத்³வாஜோதி பிண்ட³ங் உலமானோ பரியேஸமானோ பப்³ப³ஜிதோதி பிண்டோ³லோ. ஸோ கிர பரிஜிண்ணபோ⁴கோ³ ப்³ராஹ்மணோ ஹுத்வா மஹந்தங் பி⁴க்கு²ஸங்க⁴ஸ்ஸ லாப⁴ஸக்காரங் தி³ஸ்வா பிண்ட³த்தா²ய நிக்க²மித்வா பப்³ப³ஜிதோ. ஸோ மஹந்தங் கபல்லங் ‘‘பத்த’’ந்தி க³ஹெத்வா சரதி, கபல்லபூரங் யாகு³ங் பிவதி, ப⁴த்தங் பு⁴ஞ்ஜதி, பூவக²ஜ்ஜகஞ்ச கா²த³தி. அத²ஸ்ஸ மஹக்³க⁴ஸபா⁴வங் ஸத்து² ஆரோசேஸுங். ஸத்தா² தஸ்ஸ பத்தத்த²விகங் நானுஜானி, ஹெட்டா²மஞ்சே பத்தங் நிக்குஜ்ஜித்வா ட²பேதி, ஸோ ட²பெந்தோபி க⁴ங்ஸெந்தோவ பணாமெத்வா ட²பேதி, க³ண்ஹந்தோபி க⁴ங்ஸெந்தோவ ஆகட்³டி⁴த்வா க³ண்ஹாதி. தங் க³ச்ச²ந்தே க³ச்ச²ந்தே காலே க⁴ங்ஸனேன பரிக்கீ²ணங், நாளிகோத³னமத்தஸ்ஸேவ க³ண்ஹனகங் ஜாதங். ததோ ஸத்து² ஆரோசேஸுங், அத²ஸ்ஸ ஸத்தா² பத்தத்த²விகங் அனுஜானி. தே²ரோ அபரேன ஸமயேன இந்த்³ரியபா⁴வனங் பா⁴வெந்தோ அக்³க³ப²லே அரஹத்தே பதிட்டா²ஸி. இதி ஸோ புப்³பே³ ஸவிஸேஸங் பிண்ட³த்தா²ய உலதீதி பிண்டோ³லோ, கொ³த்தேன பன பா⁴ரத்³வாஜோதி உப⁴யங் ஏகதோ கத்வா ‘‘பிண்டோ³லபா⁴ரத்³வாஜோ’’தி வுச்சதி.
36. Chaṭṭhe piṇḍolabhāradvājoti piṇḍaṃ ulamāno pariyesamāno pabbajitoti piṇḍolo. So kira parijiṇṇabhogo brāhmaṇo hutvā mahantaṃ bhikkhusaṅghassa lābhasakkāraṃ disvā piṇḍatthāya nikkhamitvā pabbajito. So mahantaṃ kapallaṃ ‘‘patta’’nti gahetvā carati, kapallapūraṃ yāguṃ pivati, bhattaṃ bhuñjati, pūvakhajjakañca khādati. Athassa mahagghasabhāvaṃ satthu ārocesuṃ. Satthā tassa pattatthavikaṃ nānujāni, heṭṭhāmañce pattaṃ nikkujjitvā ṭhapeti, so ṭhapentopi ghaṃsentova paṇāmetvā ṭhapeti, gaṇhantopi ghaṃsentova ākaḍḍhitvā gaṇhāti. Taṃ gacchante gacchante kāle ghaṃsanena parikkhīṇaṃ, nāḷikodanamattasseva gaṇhanakaṃ jātaṃ. Tato satthu ārocesuṃ, athassa satthā pattatthavikaṃ anujāni. Thero aparena samayena indriyabhāvanaṃ bhāvento aggaphale arahatte patiṭṭhāsi. Iti so pubbe savisesaṃ piṇḍatthāya ulatīti piṇḍolo, gottena pana bhāradvājoti ubhayaṃ ekato katvā ‘‘piṇḍolabhāradvājo’’ti vuccati.
ஆரஞ்ஞகோதி கா³மந்தஸேனாஸனபடிக்கி²பனேன அரஞ்ஞே நிவாஸோ அஸ்ஸாதி ஆரஞ்ஞகோ, ஆரஞ்ஞகது⁴தங்க³ங் ஸமாதா³ய வத்தந்தஸ்ஸேதங் நாமங். ததா² பி⁴க்கா²ஸங்கா²தானங் ஆமிஸபிண்டா³னங் பாதோ பிண்ட³பாதோ, பரேஹி தி³ன்னானங் பிண்டா³னங் பத்தே நிபதனந்தி அத்தோ². பிண்ட³பாதங் உஞ்ச²தி தங் தங் குலங் உபஸங்கமந்தோ க³வேஸதீதி பிண்ட³பாதிகோ, பிண்டா³ய வா பதிதுங் சரிதுங் வதமேதஸ்ஸாதி பிண்ட³பாதீ, பிண்ட³பாதீயேவ பிண்ட³பாதிகோ. ஸங்காரகூடாதீ³ஸு பங்ஸூனங் உபரி டி²தத்தா அப்³பு⁴க்³க³தட்டே²ன பங்ஸுகூலங் வியாதி பங்ஸுகூலங், பங்ஸு விய வா குச்சி²தபா⁴வங் உலதி க³ச்ச²தீதி பங்ஸுகூலங், பங்ஸுகூலஸ்ஸ தா⁴ரணங் பங்ஸுகூலங், தங் ஸீலங் ஏதஸ்ஸாதி பங்ஸுகூலிகோ. ஸங்கா⁴டிஉத்தராஸங்க³அந்தரவாஸகஸங்கா²தானி தீணி சீவரானி திசீவரங், திசீவரஸ்ஸ தா⁴ரணங் திசீவரங், தங் ஸீலங் ஏதஸ்ஸாதி தேசீவரிகோ. அப்பிச்சோ²திஆதீ³னங் பதா³னங் அத்தோ² ஹெட்டா² வுத்தோயேவ.
Āraññakoti gāmantasenāsanapaṭikkhipanena araññe nivāso assāti āraññako, āraññakadhutaṅgaṃ samādāya vattantassetaṃ nāmaṃ. Tathā bhikkhāsaṅkhātānaṃ āmisapiṇḍānaṃ pāto piṇḍapāto, parehi dinnānaṃ piṇḍānaṃ patte nipatananti attho. Piṇḍapātaṃ uñchati taṃ taṃ kulaṃ upasaṅkamanto gavesatīti piṇḍapātiko, piṇḍāya vā patituṃ carituṃ vatametassāti piṇḍapātī, piṇḍapātīyeva piṇḍapātiko. Saṅkārakūṭādīsu paṃsūnaṃ upari ṭhitattā abbhuggataṭṭhena paṃsukūlaṃ viyāti paṃsukūlaṃ, paṃsu viya vā kucchitabhāvaṃ ulati gacchatīti paṃsukūlaṃ, paṃsukūlassa dhāraṇaṃ paṃsukūlaṃ, taṃ sīlaṃ etassāti paṃsukūliko. Saṅghāṭiuttarāsaṅgaantaravāsakasaṅkhātāni tīṇi cīvarāni ticīvaraṃ, ticīvarassa dhāraṇaṃ ticīvaraṃ, taṃ sīlaṃ etassāti tecīvariko. Appicchotiādīnaṃ padānaṃ attho heṭṭhā vuttoyeva.
து⁴தவாதோ³தி து⁴தோ வுச்சதி து⁴தகிலேஸோ புக்³க³லோ, கிலேஸது⁴னநகத⁴ம்மோ வா. தத்த² அத்தி² து⁴தோ, ந து⁴தவாதோ³, அத்தி² ந து⁴தோ, து⁴தவாதோ³, அத்தி² நேவ து⁴தோ, ந து⁴தவாதோ³, அத்தி² து⁴தோ சேவ, து⁴தவாதோ³ சாதி இத³ங் சதுக்கங் வேதி³தப்³ப³ங். தேஸு யோ ஸயங் து⁴தத⁴ம்மே ஸமாதா³ய வத்ததி, ந பரங் தத³த்தா²ய ஸமாத³பேதி, அயங் பட²மோ. யோ பன ஸயங் ந து⁴தத⁴ம்மே ஸமாதா³ய வத்ததி, பரங் ஸமாத³பேதி, அயங் து³தியோ. யோ உப⁴யரஹிதோ, அயங் ததியோ. யோ பன உப⁴யஸம்பன்னோ, அயங் சதுத்தோ². ஏவரூபோ ச ஆயஸ்மா பிண்டோ³லபா⁴ரத்³வாஜோதி. தேன வுத்தங் ‘‘து⁴தவாதோ³’’தி. ஏகதே³ஸஸரூபேகஸேஸவஸேன ஹி அயங் நித்³தே³ஸோ யதா² தங் ‘‘நாமரூப’’ந்தி.
Dhutavādoti dhuto vuccati dhutakileso puggalo, kilesadhunanakadhammo vā. Tattha atthi dhuto, na dhutavādo, atthi na dhuto, dhutavādo, atthi neva dhuto, na dhutavādo, atthi dhuto ceva, dhutavādo cāti idaṃ catukkaṃ veditabbaṃ. Tesu yo sayaṃ dhutadhamme samādāya vattati, na paraṃ tadatthāya samādapeti, ayaṃ paṭhamo. Yo pana sayaṃ na dhutadhamme samādāya vattati, paraṃ samādapeti, ayaṃ dutiyo. Yo ubhayarahito, ayaṃ tatiyo. Yo pana ubhayasampanno, ayaṃ catuttho. Evarūpo ca āyasmā piṇḍolabhāradvājoti. Tena vuttaṃ ‘‘dhutavādo’’ti. Ekadesasarūpekasesavasena hi ayaṃ niddeso yathā taṃ ‘‘nāmarūpa’’nti.
அதி⁴சித்தமனுயுத்தோதி எத்த² அட்ட²ஸமாபத்திஸம்பயோக³தோ அரஹத்தப²லஸமாபத்திஸம்பயோக³தோ வா சித்தஸ்ஸ அதி⁴சித்தபா⁴வோ வேதி³தப்³போ³, இத⁴ பன ‘‘அரஹத்தப²லசித்த’’ந்தி வத³ந்தி. தங்தங்ஸமாபத்தீஸு ஸமாதி⁴ ஏவ அதி⁴சித்தங், இத⁴ பன அரஹத்தப²லஸமாதி⁴ வேதி³தப்³போ³. கேசி பன ‘‘அதி⁴சித்தமனுயுத்தேன, பி⁴க்க²வே, பி⁴க்கு²னா காலேன காலங் தீணி நிமித்தானி மனஸி காதப்³பா³னீதி ஏதஸ்மிங் அதி⁴சித்தஸுத்தே (அ॰ நி॰ 3.103) விய ஸமத²விபஸ்ஸனாசித்தங் அதி⁴சித்தந்தி இதா⁴தி⁴ப்பேத’’ந்தி வத³ந்தி, தங் ந ஸுந்த³ரங். புரிமோயேவத்தோ² க³ஹேதப்³போ³.
Adhicittamanuyuttoti ettha aṭṭhasamāpattisampayogato arahattaphalasamāpattisampayogato vā cittassa adhicittabhāvo veditabbo, idha pana ‘‘arahattaphalacitta’’nti vadanti. Taṃtaṃsamāpattīsu samādhi eva adhicittaṃ, idha pana arahattaphalasamādhi veditabbo. Keci pana ‘‘adhicittamanuyuttena, bhikkhave, bhikkhunā kālena kālaṃ tīṇi nimittāni manasi kātabbānīti etasmiṃ adhicittasutte (a. ni. 3.103) viya samathavipassanācittaṃ adhicittanti idhādhippeta’’nti vadanti, taṃ na sundaraṃ. Purimoyevattho gahetabbo.
ஏதமத்த²ங் விதி³த்வாதி ஏதங் ஆயஸ்மதோ பிண்டோ³லபா⁴ரத்³வாஜஸ்ஸ அதி⁴ட்டா²னபரிக்கா²ரஸம்பதா³ஸம்பன்னங் அதி⁴சித்தானுயோக³ஸங்கா²தங் அத்த²ங் ஸப்³பா³காரதோ விதி³த்வா. ஏவங் ‘‘அதி⁴சித்தானுயோகோ³ மம ஸாஸனானுட்டா²ன’’ந்தி தீ³பெந்தோ இமங் உதா³னங் உதா³னேஸி.
Etamatthaṃviditvāti etaṃ āyasmato piṇḍolabhāradvājassa adhiṭṭhānaparikkhārasampadāsampannaṃ adhicittānuyogasaṅkhātaṃ atthaṃ sabbākārato viditvā. Evaṃ ‘‘adhicittānuyogo mama sāsanānuṭṭhāna’’nti dīpento imaṃ udānaṃ udānesi.
தத்த² அனூபவாதோ³தி வாசாய கஸ்ஸசிபி அனுபவத³னங். அனூபகா⁴தோதி காயேன கஸ்ஸசி உபகா⁴தாகரணங். பாதிமொக்கே²தி எத்த² பாதிமொக்க²பத³ஸ்ஸ அத்தோ² ஹெட்டா² நானப்பகாரேஹி வுத்தோ, தஸ்மிங் பாதிமொக்கே². ஸத்தன்னங் ஆபத்திக்க²ந்தா⁴னங் அவீதிக்கமலக்க²ணோ ஸங்வரோ. மத்தஞ்ஞுதாதி படிக்³க³ஹணபரிபோ⁴க³வஸேன பமாணஞ்ஞுதா. பந்தஞ்ச ஸயனாஸனந்தி விவித்தங் ஸங்க⁴ட்டனவிரஹிதங் ஸேனாஸனங். அதி⁴சித்தே ச ஆயோகோ³தி அட்ட²ன்னங் ஸமாபத்தீனங் அதி⁴க³மாய பா⁴வனானுயோகோ³.
Tattha anūpavādoti vācāya kassacipi anupavadanaṃ. Anūpaghātoti kāyena kassaci upaghātākaraṇaṃ. Pātimokkheti ettha pātimokkhapadassa attho heṭṭhā nānappakārehi vutto, tasmiṃ pātimokkhe. Sattannaṃ āpattikkhandhānaṃ avītikkamalakkhaṇo saṃvaro. Mattaññutāti paṭiggahaṇaparibhogavasena pamāṇaññutā. Pantañca sayanāsananti vivittaṃ saṅghaṭṭanavirahitaṃ senāsanaṃ. Adhicitte ca āyogoti aṭṭhannaṃ samāpattīnaṃ adhigamāya bhāvanānuyogo.
அபரோ நயோ – அனூபவாதோ³தி கஸ்ஸசிபி உபருஜ்ஜ²னவசனஸ்ஸ அவத³னங். தேன ஸப்³ப³ம்பி வாசஸிகங் ஸீலங் ஸங்க³ண்ஹாதி. அனூபகா⁴தோதி காயேன கஸ்ஸசி உபகா⁴தஸ்ஸ பரவிஹேட²னஸ்ஸ அகரணங். தேன ஸப்³ப³ம்பி காயிகங் ஸீலங் ஸங்க³ண்ஹாதி. யாதி³ஸங் பனித³ங் உப⁴யங் பு³த்³தா⁴னங் ஸாஸனந்தோக³த⁴ங் ஹோதி, தங் த³ஸ்ஸேதுங் – ‘‘பாதிமொக்கே² ச ஸங்வரோ’’தி வுத்தங். சஸத்³தோ³ நிபாதமத்தங். பாதிமொக்கே² ச ஸங்வரோதி பாதிமொக்க²ஸங்வரபூ⁴தோ அனூபவாதோ³ அனூபகா⁴தோ சாதி அத்தோ².
Aparo nayo – anūpavādoti kassacipi uparujjhanavacanassa avadanaṃ. Tena sabbampi vācasikaṃ sīlaṃ saṅgaṇhāti. Anūpaghātoti kāyena kassaci upaghātassa paraviheṭhanassa akaraṇaṃ. Tena sabbampi kāyikaṃ sīlaṃ saṅgaṇhāti. Yādisaṃ panidaṃ ubhayaṃ buddhānaṃ sāsanantogadhaṃ hoti, taṃ dassetuṃ – ‘‘pātimokkhe ca saṃvaro’’ti vuttaṃ. Casaddo nipātamattaṃ. Pātimokkhe ca saṃvaroti pātimokkhasaṃvarabhūto anūpavādo anūpaghāto cāti attho.
அத² வா பாதிமொக்கே²தி அதி⁴கரணே பு⁴ம்மங். பாதிமொக்கே² நிஸ்ஸயபூ⁴தே ஸங்வரோ. கோ பன ஸோதி? அனூபவாதோ³ அனூபகா⁴தோ. உபஸம்பத³வேலாயஞ்ஹி அவிஸேஸேன பாதிமொக்க²ஸீலங் ஸமாதி³ன்னங் நாம ஹோதி, தஸ்மிங் பாதிமொக்கே² டி²தஸ்ஸ ததோ பரங் உபவாதூ³பகா⁴தானங் அகரணவஸேன ஸங்வரோ, ஸோ அனூபவாதோ³ அனூபகா⁴தோ சாதி வுத்தோ.
Atha vā pātimokkheti adhikaraṇe bhummaṃ. Pātimokkhe nissayabhūte saṃvaro. Ko pana soti? Anūpavādo anūpaghāto. Upasampadavelāyañhi avisesena pātimokkhasīlaṃ samādinnaṃ nāma hoti, tasmiṃ pātimokkhe ṭhitassa tato paraṃ upavādūpaghātānaṃ akaraṇavasena saṃvaro, so anūpavādo anūpaghāto cāti vutto.
அத² வா பாதிமொக்கே²தி நிப்பா²தே³தப்³பே³ பு⁴ம்மங் யதா² ‘‘சேதஸோ அவூபஸமோ அயோனிஸோமனஸிகாரபத³ட்டா²ன’’ந்தி (ஸங்॰ நி॰ 5.232). தேன பாதிமொக்கே²ன ஸாதே⁴தப்³போ³ அனூபவாதோ³ அனூபகா⁴தோ, பாதிமொக்க²ஸங்வரஸங்க³ஹிதோ அனூபவாதோ³ அனூபகா⁴தோஇச்சேவ அத்தோ². ஸங்வரோதி இமினா பன ஸதிஸங்வரோ , ஞாணஸங்வரோ, க²ந்திஸங்வரோ, வீரியஸங்வரோதி இமேஸங் சதுன்னங் ஸங்வரானங் க³ஹணங், பாதிமொக்க²ஸாத⁴னங் இத³ங் ஸங்வரசதுக்கங்.
Atha vā pātimokkheti nipphādetabbe bhummaṃ yathā ‘‘cetaso avūpasamo ayonisomanasikārapadaṭṭhāna’’nti (saṃ. ni. 5.232). Tena pātimokkhena sādhetabbo anūpavādo anūpaghāto, pātimokkhasaṃvarasaṅgahito anūpavādo anūpaghātoicceva attho. Saṃvaroti iminā pana satisaṃvaro , ñāṇasaṃvaro, khantisaṃvaro, vīriyasaṃvaroti imesaṃ catunnaṃ saṃvarānaṃ gahaṇaṃ, pātimokkhasādhanaṃ idaṃ saṃvaracatukkaṃ.
மத்தஞ்ஞுதா ச ப⁴த்தஸ்மிந்தி பரியேஸனபடிக்³க³ஹணபரிபோ⁴க³விஸ்ஸஜ்ஜனானங் வஸேன போ⁴ஜனே பமாணஞ்ஞுதா. பந்தஞ்ச ஸயனாஸனந்தி பா⁴வனானுகூலங் அரஞ்ஞருக்க²மூலாதி³விவித்தஸேனாஸனங். அதி⁴சித்தே ச ஆயோகோ³தி ஸப்³ப³சித்தானங் அதி⁴கத்தா உத்தமத்தா அதி⁴சித்தஸங்கா²தே அரஹத்தப²லசித்தே ஸாதே⁴தப்³பே³ தஸ்ஸ நிப்பா²த³னத்த²ங் ஸமத²விபஸ்ஸனாபா⁴வனாவஸேன ஆயோகோ³. ஏதங் பு³த்³தா⁴ன ஸாஸனந்தி ஏதங் பரஸ்ஸ அனூபவத³னங், அனூபகா⁴தனங், பாதிமொக்க²ஸங்வரோ , பரியேஸனபடிக்³க³ஹணாதீ³ஸு மத்தஞ்ஞுதா, விவித்தவாஸோ, யதா²வுத்தஅதி⁴சித்தானுயோகோ³ ச பு³த்³தா⁴னங் ஸாஸனங் ஓவாதோ³ அனுஸிட்டீ²தி அத்தோ². ஏவங் இமாய கா³தா²ய திஸ்ஸோ ஸிக்கா² கதி²தாதி வேதி³தப்³பா³.
Mattaññutā ca bhattasminti pariyesanapaṭiggahaṇaparibhogavissajjanānaṃ vasena bhojane pamāṇaññutā. Pantañca sayanāsananti bhāvanānukūlaṃ araññarukkhamūlādivivittasenāsanaṃ. Adhicitte ca āyogoti sabbacittānaṃ adhikattā uttamattā adhicittasaṅkhāte arahattaphalacitte sādhetabbe tassa nipphādanatthaṃ samathavipassanābhāvanāvasena āyogo. Etaṃ buddhāna sāsananti etaṃ parassa anūpavadanaṃ, anūpaghātanaṃ, pātimokkhasaṃvaro , pariyesanapaṭiggahaṇādīsu mattaññutā, vivittavāso, yathāvuttaadhicittānuyogo ca buddhānaṃ sāsanaṃ ovādo anusiṭṭhīti attho. Evaṃ imāya gāthāya tisso sikkhā kathitāti veditabbā.
ச²ட்ட²ஸுத்தவண்ணனா நிட்டி²தா.
Chaṭṭhasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / உதா³னபாளி • Udānapāḷi / 6. பிண்டோ³லஸுத்தங் • 6. Piṇḍolasuttaṃ
