| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
5. பிங்கி³யானீஸுத்தங்
5. Piṅgiyānīsuttaṃ
195. ஏகங் ஸமயங் ப⁴க³வா வேஸாலியங் விஹரதி மஹாவனே கூடாகா³ரஸாலாயங். தேன கோ² பன ஸமயேன பஞ்சமத்தானி லிச்ச²விஸதானி ப⁴க³வந்தங் பயிருபாஸந்தி. அப்பேகச்சே லிச்ச²வீ நீலா ஹொந்தி நீலவண்ணா நீலவத்தா² நீலாலங்காரா, அப்பேகச்சே லிச்ச²வீ பீதா ஹொந்தி பீதவண்ணா பீதவத்தா² பீதாலங்காரா , அப்பேகச்சே லிச்ச²வீ லோஹிதகா ஹொந்தி லோஹிதகவண்ணா லோஹிதகவத்தா² லோஹிதகாலங்காரா, அப்பேகச்சே லிச்ச²வீ ஓதா³தா ஹொந்தி ஓதா³தவண்ணா ஓதா³தவத்தா² ஓதா³தாலங்காரா. த்யஸ்ஸுத³ங் ப⁴க³வா அதிரோசதி வண்ணேன சேவ யஸஸா ச.
195. Ekaṃ samayaṃ bhagavā vesāliyaṃ viharati mahāvane kūṭāgārasālāyaṃ. Tena kho pana samayena pañcamattāni licchavisatāni bhagavantaṃ payirupāsanti. Appekacce licchavī nīlā honti nīlavaṇṇā nīlavatthā nīlālaṅkārā, appekacce licchavī pītā honti pītavaṇṇā pītavatthā pītālaṅkārā , appekacce licchavī lohitakā honti lohitakavaṇṇā lohitakavatthā lohitakālaṅkārā, appekacce licchavī odātā honti odātavaṇṇā odātavatthā odātālaṅkārā. Tyassudaṃ bhagavā atirocati vaṇṇena ceva yasasā ca.
அத² கோ² பிங்கி³யானீ ப்³ராஹ்மணோ உட்டா²யாஸனா ஏகங்ஸங் உத்தராஸங்க³ங் கரித்வா யேன ப⁴க³வா தேனஞ்ஜலிங் பணாமெத்வா ப⁴க³வந்தங் ஏதத³வோச – ‘‘படிபா⁴தி மங், ப⁴க³வா, படிபா⁴தி மங், ஸுக³தா’’தி. ‘‘படிபா⁴து தங் பிங்கி³யானீ’’தி ப⁴க³வா அவோச. அத² கோ² பிங்கி³யானீ ப்³ராஹ்மணோ ப⁴க³வதோ ஸம்முகா² ஸாருப்பாய கா³தா²ய அபி⁴த்த²வி –
Atha kho piṅgiyānī brāhmaṇo uṭṭhāyāsanā ekaṃsaṃ uttarāsaṅgaṃ karitvā yena bhagavā tenañjaliṃ paṇāmetvā bhagavantaṃ etadavoca – ‘‘paṭibhāti maṃ, bhagavā, paṭibhāti maṃ, sugatā’’ti. ‘‘Paṭibhātu taṃ piṅgiyānī’’ti bhagavā avoca. Atha kho piṅgiyānī brāhmaṇo bhagavato sammukhā sāruppāya gāthāya abhitthavi –
பாதோ ஸியா பு²ல்லமவீதக³ந்த⁴ங்;
Pāto siyā phullamavītagandhaṃ;
அங்கீ³ரஸங் பஸ்ஸ விரோசமானங்,
Aṅgīrasaṃ passa virocamānaṃ,
தபந்தமாதி³ச்சமிவந்தலிக்கே²’’தி.
Tapantamādiccamivantalikkhe’’ti.
அத² கோ² தே லிச்ச²வீ பஞ்சஹி உத்தராஸங்க³ஸதேஹி பிங்கி³யானிங் ப்³ராஹ்மணங் அச்சா²தே³ஸுங். அத² கோ² பிங்கி³யானீ ப்³ராஹ்மணோ தேஹி பஞ்சஹி உத்தராஸங்க³ஸதேஹி ப⁴க³வந்தங் அச்சா²தே³ஸி .
Atha kho te licchavī pañcahi uttarāsaṅgasatehi piṅgiyāniṃ brāhmaṇaṃ acchādesuṃ. Atha kho piṅgiyānī brāhmaṇo tehi pañcahi uttarāsaṅgasatehi bhagavantaṃ acchādesi .
அத² கோ² ப⁴க³வா தே லிச்ச²வீ ஏதத³வோச – ‘‘பஞ்சன்னங், லிச்ச²வீ, ரதனானங் பாதுபா⁴வோ து³ல்லபோ⁴ லோகஸ்மிங். கதமேஸங் பஞ்சன்னங்? ததா²க³தஸ்ஸ அரஹதோ ஸம்மாஸம்பு³த்³த⁴ஸ்ஸ பாதுபா⁴வோ து³ல்லபோ⁴ லோகஸ்மிங். ததா²க³தப்பவேதி³தஸ்ஸ த⁴ம்மவினயஸ்ஸ தே³ஸேதா புக்³க³லோ து³ல்லபோ⁴ லோகஸ்மிங். ததா²க³தப்பவேதி³தஸ்ஸ த⁴ம்மவினயஸ்ஸ தே³ஸிதஸ்ஸ விஞ்ஞாதா புக்³க³லோ து³ல்லபோ⁴ லோகஸ்மிங். ததா²க³தப்பவேதி³தஸ்ஸ த⁴ம்மவினயஸ்ஸ தே³ஸிதஸ்ஸ விஞ்ஞாதா த⁴ம்மானுத⁴ம்மப்படிபன்னோ புக்³க³லோ து³ல்லபோ⁴ லோகஸ்மிங். கதஞ்ஞூ கதவேதீ³ புக்³க³லோ து³ல்லபோ⁴ லோகஸ்மிங். இமேஸங் கோ², லிச்ச²வீ, பஞ்சன்னங் ரதனானங் பாதுபா⁴வோ து³ல்லபோ⁴ லோகஸ்மி’’ந்தி 5. பஞ்சமங்.
Atha kho bhagavā te licchavī etadavoca – ‘‘pañcannaṃ, licchavī, ratanānaṃ pātubhāvo dullabho lokasmiṃ. Katamesaṃ pañcannaṃ? Tathāgatassa arahato sammāsambuddhassa pātubhāvo dullabho lokasmiṃ. Tathāgatappaveditassa dhammavinayassa desetā puggalo dullabho lokasmiṃ. Tathāgatappaveditassa dhammavinayassa desitassa viññātā puggalo dullabho lokasmiṃ. Tathāgatappaveditassa dhammavinayassa desitassa viññātā dhammānudhammappaṭipanno puggalo dullabho lokasmiṃ. Kataññū katavedī puggalo dullabho lokasmiṃ. Imesaṃ kho, licchavī, pañcannaṃ ratanānaṃ pātubhāvo dullabho lokasmi’’nti 6. Pañcamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 5. பிங்கி³யானீஸுத்தவண்ணனா • 5. Piṅgiyānīsuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 5. பிங்கி³யானீஸுத்தவண்ணனா • 5. Piṅgiyānīsuttavaṇṇanā
