| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
6. பீதிஸுத்தங்
6. Pītisuttaṃ
176. அத² கோ² அனாத²பிண்டி³கோ க³ஹபதி பஞ்சமத்தேஹி உபாஸகஸதேஹி பரிவுதோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னங் கோ² அனாத²பிண்டி³கங் க³ஹபதிங் ப⁴க³வா ஏதத³வோச –
176. Atha kho anāthapiṇḍiko gahapati pañcamattehi upāsakasatehi parivuto yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho anāthapiṇḍikaṃ gahapatiṃ bhagavā etadavoca –
‘‘தும்ஹே கோ², க³ஹபதி, பி⁴க்கு²ஸங்க⁴ங் பச்சுபட்டி²தா சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரேன . ந கோ², க³ஹபதி, தாவதகேனேவ துட்டி² கரணீயா – ‘மயங் பி⁴க்கு²ஸங்க⁴ங் பச்சுபட்டி²தா சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரேனா’தி . தஸ்மாதிஹ, க³ஹபதி, ஏவங் ஸிக்கி²தப்³ப³ங் – ‘கிந்தி மயங் காலேன காலங் பவிவேகங் பீதிங் உபஸம்பஜ்ஜ விஹரெய்யாமா’தி! ஏவஞ்ஹி வோ, க³ஹபதி, ஸிக்கி²தப்³ப³’’ந்தி.
‘‘Tumhe kho, gahapati, bhikkhusaṅghaṃ paccupaṭṭhitā cīvarapiṇḍapātasenāsanagilānappaccayabhesajjaparikkhārena . Na kho, gahapati, tāvatakeneva tuṭṭhi karaṇīyā – ‘mayaṃ bhikkhusaṅghaṃ paccupaṭṭhitā cīvarapiṇḍapātasenāsanagilānappaccayabhesajjaparikkhārenā’ti . Tasmātiha, gahapati, evaṃ sikkhitabbaṃ – ‘kinti mayaṃ kālena kālaṃ pavivekaṃ pītiṃ upasampajja vihareyyāmā’ti! Evañhi vo, gahapati, sikkhitabba’’nti.
ஏவங் வுத்தே ஆயஸ்மா ஸாரிபுத்தோ ப⁴க³வந்தங் ஏதத³வோச – ‘‘அச்ச²ரியங், ப⁴ந்தே, அப்³பு⁴தங், ப⁴ந்தே! யாவ ஸுபா⁴ஸிதங் சித³ங், ப⁴ந்தே, ப⁴க³வதா – ‘தும்ஹே கோ², க³ஹபதி, பி⁴க்கு²ஸங்க⁴ங் பச்சுபட்டி²தா சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரேன. ந கோ², க³ஹபதி, தாவதகேனேவ துட்டி² கரணீயா – மயங் பி⁴க்கு²ஸங்க⁴ங் பச்சுபட்டி²தா சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரேனாதி. தஸ்மாதிஹ, க³ஹபதி, ஏவங் ஸிக்கி²தப்³ப³ங் – கிந்தி மயங் காலேன காலங் பவிவேகங் பீதிங் உபஸம்பஜ்ஜ விஹரெய்யாமாதி! ஏவஞ்ஹி வோ, க³ஹபதி, ஸிக்கி²தப்³ப³’ந்தி. யஸ்மிங், ப⁴ந்தே, ஸமயே அரியஸாவகோ பவிவேகங் பீதிங் உபஸம்பஜ்ஜ விஹரதி, பஞ்சஸ்ஸ டா²னானி தஸ்மிங் ஸமயே ந ஹொந்தி. யம்பிஸ்ஸ காமூபஸங்ஹிதங் து³க்க²ங் தோ³மனஸ்ஸங், தம்பிஸ்ஸ தஸ்மிங் ஸமயே ந ஹோதி. யம்பிஸ்ஸ காமூபஸங்ஹிதங் ஸுக²ங் ஸோமனஸ்ஸங், தம்பிஸ்ஸ தஸ்மிங் ஸமயே ந ஹோதி. யம்பிஸ்ஸ அகுஸலூபஸங்ஹிதங் து³க்க²ங் தோ³மனஸ்ஸங், தம்பிஸ்ஸ தஸ்மிங் ஸமயே ந ஹோதி. யம்பிஸ்ஸ அகுஸலூபஸங்ஹிதங் ஸுக²ங் ஸோமனஸ்ஸங், தம்பிஸ்ஸ தஸ்மிங் ஸமயே ந ஹோதி. யம்பிஸ்ஸ குஸலூபஸங்ஹிதங் து³க்க²ங் தோ³மனஸ்ஸங், தம்பிஸ்ஸ தஸ்மிங் ஸமயே ந ஹோதி. யஸ்மிங், ப⁴ந்தே, ஸமயே அரியஸாவகோ பவிவேகங் பீதிங் உபஸம்பஜ்ஜ விஹரதி, இமானிஸ்ஸ பஞ்ச 1 டா²னானி தஸ்மிங் ஸமயே ந ஹொந்தீ’’தி.
Evaṃ vutte āyasmā sāriputto bhagavantaṃ etadavoca – ‘‘acchariyaṃ, bhante, abbhutaṃ, bhante! Yāva subhāsitaṃ cidaṃ, bhante, bhagavatā – ‘tumhe kho, gahapati, bhikkhusaṅghaṃ paccupaṭṭhitā cīvarapiṇḍapātasenāsanagilānappaccayabhesajjaparikkhārena. Na kho, gahapati, tāvatakeneva tuṭṭhi karaṇīyā – mayaṃ bhikkhusaṅghaṃ paccupaṭṭhitā cīvarapiṇḍapātasenāsanagilānappaccayabhesajjaparikkhārenāti. Tasmātiha, gahapati, evaṃ sikkhitabbaṃ – kinti mayaṃ kālena kālaṃ pavivekaṃ pītiṃ upasampajja vihareyyāmāti! Evañhi vo, gahapati, sikkhitabba’nti. Yasmiṃ, bhante, samaye ariyasāvako pavivekaṃ pītiṃ upasampajja viharati, pañcassa ṭhānāni tasmiṃ samaye na honti. Yampissa kāmūpasaṃhitaṃ dukkhaṃ domanassaṃ, tampissa tasmiṃ samaye na hoti. Yampissa kāmūpasaṃhitaṃ sukhaṃ somanassaṃ, tampissa tasmiṃ samaye na hoti. Yampissa akusalūpasaṃhitaṃ dukkhaṃ domanassaṃ, tampissa tasmiṃ samaye na hoti. Yampissa akusalūpasaṃhitaṃ sukhaṃ somanassaṃ, tampissa tasmiṃ samaye na hoti. Yampissa kusalūpasaṃhitaṃ dukkhaṃ domanassaṃ, tampissa tasmiṃ samaye na hoti. Yasmiṃ, bhante, samaye ariyasāvako pavivekaṃ pītiṃ upasampajja viharati, imānissa pañca 2 ṭhānāni tasmiṃ samaye na hontī’’ti.
‘‘ஸாது⁴ ஸாது⁴, ஸாரிபுத்த! யஸ்மிங், ஸாரிபுத்த, ஸமயே அரியஸாவகோ பவிவேகங் பீதிங் உபஸம்பஜ்ஜ விஹரதி, பஞ்சஸ்ஸ டா²னானி தஸ்மிங் ஸமயே ந ஹொந்தி. யம்பிஸ்ஸ காமூபஸங்ஹிதங் து³க்க²ங் தோ³மனஸ்ஸங், தம்பிஸ்ஸ தஸ்மிங் ஸமயே ந ஹோதி. யம்பிஸ்ஸ காமூபஸங்ஹிதங் ஸுக²ங் ஸோமனஸ்ஸங், தம்பிஸ்ஸ தஸ்மிங் ஸமயே ந ஹோதி. யம்பிஸ்ஸ அகுஸலூபஸங்ஹிதங் து³க்க²ங் தோ³மனஸ்ஸங், தம்பிஸ்ஸ தஸ்மிங் ஸமயே ந ஹோதி. யம்பிஸ்ஸ அகுஸலூபஸங்ஹிதங் ஸுக²ங் ஸோமனஸ்ஸங், தம்பிஸ்ஸ தஸ்மிங் ஸமயே ந ஹோதி. யம்பிஸ்ஸ குஸலூபஸங்ஹிதங் து³க்க²ங் தோ³மனஸ்ஸங், தம்பிஸ்ஸ தஸ்மிங் ஸமயே ந ஹோதி. யஸ்மிங், ஸாரிபுத்த, ஸமயே அரியஸாவகோ பவிவேகங் பீதிங் உபஸம்பஜ்ஜ விஹரதி, இமானிஸ்ஸ 3 பஞ்ச டா²னானி தஸ்மிங் ஸமயே ந ஹொந்தீ’’தி. ச²ட்ட²ங்.
‘‘Sādhu sādhu, sāriputta! Yasmiṃ, sāriputta, samaye ariyasāvako pavivekaṃ pītiṃ upasampajja viharati, pañcassa ṭhānāni tasmiṃ samaye na honti. Yampissa kāmūpasaṃhitaṃ dukkhaṃ domanassaṃ, tampissa tasmiṃ samaye na hoti. Yampissa kāmūpasaṃhitaṃ sukhaṃ somanassaṃ, tampissa tasmiṃ samaye na hoti. Yampissa akusalūpasaṃhitaṃ dukkhaṃ domanassaṃ, tampissa tasmiṃ samaye na hoti. Yampissa akusalūpasaṃhitaṃ sukhaṃ somanassaṃ, tampissa tasmiṃ samaye na hoti. Yampissa kusalūpasaṃhitaṃ dukkhaṃ domanassaṃ, tampissa tasmiṃ samaye na hoti. Yasmiṃ, sāriputta, samaye ariyasāvako pavivekaṃ pītiṃ upasampajja viharati, imānissa 4 pañca ṭhānāni tasmiṃ samaye na hontī’’ti. Chaṭṭhaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 6. பீதிஸுத்தவண்ணனா • 6. Pītisuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-6. ஸாரஜ்ஜஸுத்தாதி³வண்ணனா • 1-6. Sārajjasuttādivaṇṇanā
