| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
7. பியஜாதிகஸுத்தவண்ணனா
7. Piyajātikasuttavaṇṇanā
353. ஏவங் மே ஸுதந்தி பியஜாதிகஸுத்தங். தத்த² நேவ கம்மந்தா படிப⁴ந்தீதி ந ஸப்³பே³ன ஸப்³ப³ங் படிப⁴ந்தி, பகதினியாமேன பன ந படிப⁴ந்தி. து³தியபதே³பி ஏஸேவ நயோ. எத்த² ச ந படிபா⁴தீதி ந ருச்சதி. ஆளாஹனந்தி ஸுஸானங். அஞ்ஞத²த்தந்தி விவண்ணதாய அஞ்ஞதா²பா⁴வோ. இந்த்³ரியானி நாம மனோவிஞ்ஞெய்யா த⁴ம்மா, பதிட்டி²தோகாஸங் பன ஸந்தா⁴ய இத³ங் வுத்தங். பியஜாதிகாதி பியதோ ஜாயந்தி. பியப்பபா⁴விகாதி பியதோ பப⁴வந்தி.
353.Evaṃme sutanti piyajātikasuttaṃ. Tattha neva kammantā paṭibhantīti na sabbena sabbaṃ paṭibhanti, pakatiniyāmena pana na paṭibhanti. Dutiyapadepi eseva nayo. Ettha ca na paṭibhātīti na ruccati. Āḷāhananti susānaṃ. Aññathattanti vivaṇṇatāya aññathābhāvo. Indriyāni nāma manoviññeyyā dhammā, patiṭṭhitokāsaṃ pana sandhāya idaṃ vuttaṃ. Piyajātikāti piyato jāyanti. Piyappabhāvikāti piyato pabhavanti.
355. ஸசே தங், மஹாராஜாதி தஸ்ஸ அத்த²ங் அஸல்லக்க²யமானாபி ஸத்த²ரி ஸத்³தா⁴ய ஏவங் வத³தி. சர பிரேதி அபேஹி அம்ஹாகங் பரே, அனஜ்ஜ²த்திகபூ⁴தேதி அத்தோ². அத² வா சர பிரேதி பரதோ க³ச்ச², மா இத⁴ திட்டா²திபி அத்தோ².
355.Sace taṃ, mahārājāti tassa atthaṃ asallakkhayamānāpi satthari saddhāya evaṃ vadati. Cara pireti apehi amhākaṃ pare, anajjhattikabhūteti attho. Atha vā cara pireti parato gaccha, mā idha tiṭṭhātipi attho.
356. த்³விதா⁴ செ²த்வாதி அஸினா த்³வே கொட்டா²ஸே கரொந்தோ சி²ந்தி³த்வா. அத்தானங் உப்பா²லேஸீதி தேனேவ அஸினா அத்தனோ உத³ரங் பா²லேஸி. யதி³ ஹி தஸ்ஸ ஸா அப்பியா ப⁴வெய்ய, இதா³னி அஞ்ஞங் மாதுகா³மங் க³ண்ஹிஸ்ஸாமீதி அத்தானங் ந கா⁴தெய்ய. யஸ்மா பனஸ்ஸ ஸா பியா அஹோஸி, தஸ்மா பரலோகேபி தாய ஸத்³தி⁴ங் ஸமங்கி³பா⁴வங் பத்த²யமானோ ஏவமகாஸி.
356.Dvidhāchetvāti asinā dve koṭṭhāse karonto chinditvā. Attānaṃupphālesīti teneva asinā attano udaraṃ phālesi. Yadi hi tassa sā appiyā bhaveyya, idāni aññaṃ mātugāmaṃ gaṇhissāmīti attānaṃ na ghāteyya. Yasmā panassa sā piyā ahosi, tasmā paralokepi tāya saddhiṃ samaṅgibhāvaṃ patthayamāno evamakāsi.
357. பியா தே வஜிரீதி ஏவங் கிரஸ்ஸா அஹோஸி – ‘‘ஸசாஹங், ‘பூ⁴தபுப்³ப³ங், மஹாராஜ, இமிஸ்ஸாயேவ ஸாவத்தி²யங் அஞ்ஞதரிஸ்ஸா இத்தி²யா’திஆதி³கத²ங் கதெ²ய்யங், ‘கோ தே ஏவங் அகாஸி, அபேஹி நத்தி² ஏத’ந்தி மங் படிஸேதெ⁴ய்ய, வத்தமானேனேவ நங் ஸஞ்ஞாபெஸ்ஸாமீ’’தி சிந்தெத்வா ஏவமாஹ. விபரிணாமஞ்ஞதா²பா⁴வாதி எத்த² மரணவஸேன விபரிணாமோ, கேனசி ஸத்³தி⁴ங் பலாயித்வா க³மனவஸேன அஞ்ஞதா²பா⁴வோ வேதி³தப்³போ³.
357.Piyā te vajirīti evaṃ kirassā ahosi – ‘‘sacāhaṃ, ‘bhūtapubbaṃ, mahārāja, imissāyeva sāvatthiyaṃ aññatarissā itthiyā’tiādikathaṃ katheyyaṃ, ‘ko te evaṃ akāsi, apehi natthi eta’nti maṃ paṭisedheyya, vattamāneneva naṃ saññāpessāmī’’ti cintetvā evamāha. Vipariṇāmaññathābhāvāti ettha maraṇavasena vipariṇāmo, kenaci saddhiṃ palāyitvā gamanavasena aññathābhāvo veditabbo.
வாஸபா⁴யாதி வாஸபா⁴ நாம ரஞ்ஞோ ஏகா தே³வீ, தங் ஸந்தா⁴யாஹ.
Vāsabhāyāti vāsabhā nāma rañño ekā devī, taṃ sandhāyāha.
பியா தே அஹந்தி கஸ்மா ஸப்³ப³பச்சா² ஆஹ? ஏவங் கிரஸ்ஸா அஹோஸி – ‘‘அயங் ராஜா மய்ஹங் குபிதோ, ஸசாஹங் ஸப்³ப³பட²மங் ‘பியா தே அஹ’ந்தி புச்செ²ய்யங், ‘ந மே த்வங் பியா, சர பிரே’தி வதெ³ய்ய, ஏவங் ஸந்தே கதா² பதிட்டா²னங் ந லபி⁴ஸ்ஸதீ’’தி கதா²ய பதிட்டா²னத்த²ங் ஸப்³ப³பச்சா² புச்சி². காஸிகோஸலேஸு ச²ட்³டி³தபா⁴வேன விபரிணாமோ, படிராஜூனங் ஹத்த²க³மனவஸேன அஞ்ஞதா²பா⁴வோ வேதி³தப்³போ³.
Piyāte ahanti kasmā sabbapacchā āha? Evaṃ kirassā ahosi – ‘‘ayaṃ rājā mayhaṃ kupito, sacāhaṃ sabbapaṭhamaṃ ‘piyā te aha’nti puccheyyaṃ, ‘na me tvaṃ piyā, cara pire’ti vadeyya, evaṃ sante kathā patiṭṭhānaṃ na labhissatī’’ti kathāya patiṭṭhānatthaṃ sabbapacchā pucchi. Kāsikosalesu chaḍḍitabhāvena vipariṇāmo, paṭirājūnaṃ hatthagamanavasena aññathābhāvo veditabbo.
ஆசமேஹீதி ஆசமனோத³கங் தே³ஹி. ஆசமித்வா ஹத்த²பாதே³ தோ⁴வித்வா முக²ங் விக்கா²லெத்வா ஸத்தா²ரங் நமஸ்ஸிதுகாமோ ஏவமாஹ. ஸேஸங் ஸப்³ப³த்த² உத்தானமேவாதி.
Ācamehīti ācamanodakaṃ dehi. Ācamitvā hatthapāde dhovitvā mukhaṃ vikkhāletvā satthāraṃ namassitukāmo evamāha. Sesaṃ sabbattha uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
பியஜாதிகஸுத்தவண்ணனா நிட்டி²தா.
Piyajātikasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 7. பியஜாதிகஸுத்தங் • 7. Piyajātikasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 7. பியஜாதிகஸுத்தவண்ணனா • 7. Piyajātikasuttavaṇṇanā
