| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
6. பியங்கரஸுத்தவண்ணனா
6. Piyaṅkarasuttavaṇṇanā
240. பச்சந்தேதி பரியந்தே. பாடியேக்கந்தி ஸங்கீ³திகாலே விஸுங். யமகவக்³கா³தி³கா ப்³ராஹ்மணவக்³க³பரியோஸானா ச²ப்³பீ³ஸதி வக்³கா³ ஏதிஸ்ஸாதி ச²ப்³பீ³ஸதிவக்³கா³, தந்தீதி பாளி. உச்சாரபஸ்ஸாவாதி³ ஏவரூபங் து³ப்³போ⁴ஜனங், ‘‘அஸுசிஜேகு³ச்ச²பா⁴வேன து³ட்டு² போ⁴ஜன’’ந்தி கத்வா, து³ப்³போ⁴ஜனக்³க³ஹணேன வா வந்தக³ப்³ப⁴மலாதீ³னி அதிதி³ஸதி. ச²விஆதீ³னி செ²த்வாதி ச²விஆதீ³னி அதிவிஜ்ஜ² அதிவிய பவிஸித்வா. அட்டி²மிஞ்ஜங் ஆஹச்ச அட்டா²ஸி பீதிஸமுட்டா²னஉளாரோளாரரூபப்பவத்தியா. தேனாஹ ‘‘ஹத³யங்க³மனீயோ ஹுத்வா’’தி.
240.Paccanteti pariyante. Pāṭiyekkanti saṅgītikāle visuṃ. Yamakavaggādikā brāhmaṇavaggapariyosānā chabbīsati vaggā etissāti chabbīsativaggā, tantīti pāḷi. Uccārapassāvādi evarūpaṃ dubbhojanaṃ, ‘‘asucijegucchabhāvena duṭṭhu bhojana’’nti katvā, dubbhojanaggahaṇena vā vantagabbhamalādīni atidisati. Chaviādīni chetvāti chaviādīni ativijjha ativiya pavisitvā. Aṭṭhimiñjaṃ āhacca aṭṭhāsi pītisamuṭṭhānauḷāroḷārarūpappavattiyā. Tenāha ‘‘hadayaṅgamanīyo hutvā’’ti.
த⁴ம்மதாய ஸமாதி³ண்ணந்தி கஸ்ஸசி ஸந்திகே அக்³க³ஹெத்வா ஸயமேவ தஸ்மிங் க²ணே ஸங்யதா ஹோமாதி யதா²ஸங்யதா. ததியபதே³னாதி ‘‘ஸிக்கே²ம ஸுஸீல்ய’’ந்தி இமினா பதே³ன. ஸேஸாதி வுத்தாவஸேஸா. திஸ்ஸோ அதி³ன்னாதா³னமிச்சா²சாரஸுராபானவிரதியோ. க³ஹிதா கோ³ப³லீப³த்³த³ஞாயேன. சா²தகங் து³ப்³பி⁴க்க²ஞ்ச எத்தா²தி சா²தகது³ப்³பி⁴க்கா², ஜிக⁴ச்சா²து³ப்³பி⁴க்கா²ப³ஹுலாயாதி அத்தோ². பிஸாசயக்க²யோனியாதி பெத்திவிஸயஸதி³ஸயக்க²யோனியா அபி நாம முச்சேமாதி யோஜனா.
Dhammatāyasamādiṇṇanti kassaci santike aggahetvā sayameva tasmiṃ khaṇe saṃyatā homāti yathāsaṃyatā. Tatiyapadenāti ‘‘sikkhema susīlya’’nti iminā padena. Sesāti vuttāvasesā. Tisso adinnādānamicchācārasurāpānaviratiyo. Gahitā gobalībaddañāyena. Chātakaṃ dubbhikkhañca etthāti chātakadubbhikkhā, jighacchādubbhikkhābahulāyāti attho. Pisācayakkhayoniyāti pettivisayasadisayakkhayoniyā api nāma muccemāti yojanā.
பியங்கரஸுத்தவண்ணனா நிட்டி²தா.
Piyaṅkarasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 6. பியங்கரஸுத்தங் • 6. Piyaṅkarasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 6. பியங்கரஸுத்தவண்ணனா • 6. Piyaṅkarasuttavaṇṇanā
