| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
4. போதலியஸுத்தவண்ணனா
4. Potaliyasuttavaṇṇanā
31. ஏவங் மே ஸுதந்தி போதலியஸுத்தங். தத்த² அங்கு³த்தராபேஸூதி அங்கா³யேவ ஸோ ஜனபதோ³, மஹியா பனஸ்ஸ உத்தரேன யா ஆபோ, தாஸங் அவிதூ³ரத்தா உத்தராபோதிபி வுச்சதி. கதரமஹியா உத்தரேன யா ஆபோதி, மஹாமஹியா. தத்தா²யங் ஆவிபா⁴வகதா² – அயங் கிர ஜம்பு³தீ³போ த³ஸஸஹஸ்ஸயோஜனபரிமாணோ. தத்த² ச சதுஸஹஸ்ஸயோஜனப்பமாணோ பதே³ஸோ உத³கேன அஜ்ஜொ²த்த²டோ ஸமுத்³தோ³தி ஸங்க²ங் க³தோ . திஸஹஸ்ஸயோஜனப்பமாணே மனுஸ்ஸா வஸந்தி. திஸஹஸ்ஸயோஜனப்பமாணே ஹிமவா பதிட்டி²தோ உப்³பே³தே⁴ன பஞ்சயோஜனஸதிகோ சதுராஸீதிகூடஸஹஸ்ஸபடிமண்டி³தோ ஸமந்ததோ ஸந்த³மானபஞ்சஸதனதீ³விசித்தோ, யத்த² ஆயாமவித்தா²ரேன சேவ க³ம்பீ⁴ரதாய ச பண்ணாஸபண்ணாஸயோஜனா தி³யட்³ட⁴யோஜனஸதபரிமண்ட³லா அனோதத்தத³ஹோ கண்ணமுண்ட³த³ஹோ ரத²காரத³ஹோ ச²த்³த³ந்தத³ஹோ குணாலத³ஹோ மந்தா³கினீத³ஹோ ஸீஹபபாதத³ஹோதி ஸத்த மஹாஸரா பதிட்டி²தா. தேஸு அனோதத்தத³ஹோ ஸுத³ஸ்ஸனகூடங் சித்ரகூடங் காளகூடங் க³ந்த⁴மாத³னகூடங் கேலாஸகூடந்தி இமேஹி பஞ்சஹி பப்³ப³தேஹி பரிக்கி²த்தோ.
31.Evaṃme sutanti potaliyasuttaṃ. Tattha aṅguttarāpesūti aṅgāyeva so janapado, mahiyā panassa uttarena yā āpo, tāsaṃ avidūrattā uttarāpotipi vuccati. Kataramahiyā uttarena yā āpoti, mahāmahiyā. Tatthāyaṃ āvibhāvakathā – ayaṃ kira jambudīpo dasasahassayojanaparimāṇo. Tattha ca catusahassayojanappamāṇo padeso udakena ajjhotthaṭo samuddoti saṅkhaṃ gato . Tisahassayojanappamāṇe manussā vasanti. Tisahassayojanappamāṇe himavā patiṭṭhito ubbedhena pañcayojanasatiko caturāsītikūṭasahassapaṭimaṇḍito samantato sandamānapañcasatanadīvicitto, yattha āyāmavitthārena ceva gambhīratāya ca paṇṇāsapaṇṇāsayojanā diyaḍḍhayojanasataparimaṇḍalā anotattadaho kaṇṇamuṇḍadaho rathakāradaho chaddantadaho kuṇāladaho mandākinīdaho sīhapapātadahoti satta mahāsarā patiṭṭhitā. Tesu anotattadaho sudassanakūṭaṃ citrakūṭaṃ kāḷakūṭaṃ gandhamādanakūṭaṃ kelāsakūṭanti imehi pañcahi pabbatehi parikkhitto.
தத்த² ஸுத³ஸ்ஸனகூடங் ஸோவண்ணமயங் த்³வியோஜனஸதுப்³பே³த⁴ங் அந்தோவங்கங் காகமுக²ஸண்டா²னங் தமேவ ஸரங் படிச்சா²தெ³த்வா டி²தங். சித்ரகூடங் ஸப்³ப³ரதனமயங். காளகூடங் அஞ்ஜனமயங். க³ந்த⁴மாத³னகூடங் ஸானுமயங் அப்³ப⁴ந்தரே முக்³க³வண்ணங், மூலக³ந்தோ⁴ ஸாரக³ந்தோ⁴ பெ²க்³கு³க³ந்தோ⁴ தசக³ந்தோ⁴ பபடிகக³ந்தோ⁴ ரஸக³ந்தோ⁴ பத்தக³ந்தோ⁴ புப்ப²க³ந்தோ⁴ ப²லக³ந்தோ⁴ க³ந்த⁴க³ந்தோ⁴தி இமேஹி த³ஸஹி க³ந்தே⁴ஹி உஸ்ஸன்னங் நானப்பகாரஓஸத⁴ஸஞ்ச²ன்னங், காளபக்க²உபோஸத²தி³வஸே ஆதி³த்தமிவ அங்கா³ரங் ஜலந்தங் திட்ட²தி. கேலாஸகூடங் ரஜதமயங். ஸப்³பா³னி ஸுத³ஸ்ஸனேன ஸமானுப்³பே³த⁴ஸண்டா²னானி, தமேவ ஸரங் படிச்சா²தெ³த்வா டி²தானி. தானி ஸப்³பா³னி தே³வானுபா⁴வேன நாகா³னுபா⁴வேன ச வஸ்ஸந்தி, நதி³யோ ச தேஸு ஸந்த³ந்தி. தங் ஸப்³ப³ம்பி உத³கங் அனோதத்தமேவ பவிஸதி. சந்தி³மஸூரியா த³க்கி²ணேன வா உத்தரேன வா க³ச்ச²ந்தா பப்³ப³தந்தரேன தத்த² ஓபா⁴ஸங் கரொந்தி, உஜுங் க³ச்ச²ந்தா ந கரொந்தி, தேனேவஸ்ஸ அனோதத்தந்தி ஸங்கா² உத³பாதி³.
Tattha sudassanakūṭaṃ sovaṇṇamayaṃ dviyojanasatubbedhaṃ antovaṅkaṃ kākamukhasaṇṭhānaṃ tameva saraṃ paṭicchādetvā ṭhitaṃ. Citrakūṭaṃ sabbaratanamayaṃ. Kāḷakūṭaṃ añjanamayaṃ. Gandhamādanakūṭaṃ sānumayaṃ abbhantare muggavaṇṇaṃ, mūlagandho sāragandho pheggugandho tacagandho papaṭikagandho rasagandho pattagandho pupphagandho phalagandho gandhagandhoti imehi dasahi gandhehi ussannaṃ nānappakāraosadhasañchannaṃ, kāḷapakkhauposathadivase ādittamiva aṅgāraṃ jalantaṃ tiṭṭhati. Kelāsakūṭaṃ rajatamayaṃ. Sabbāni sudassanena samānubbedhasaṇṭhānāni, tameva saraṃ paṭicchādetvā ṭhitāni. Tāni sabbāni devānubhāvena nāgānubhāvena ca vassanti, nadiyo ca tesu sandanti. Taṃ sabbampi udakaṃ anotattameva pavisati. Candimasūriyā dakkhiṇena vā uttarena vā gacchantā pabbatantarena tattha obhāsaṃ karonti, ujuṃ gacchantā na karonti, tenevassa anotattanti saṅkhā udapādi.
தத்த² மனோஹரஸிலாதலானி நிம்மச்ச²கச்ச²பானி ப²லிகஸதி³ஸனிம்மலுத³கானி ந்ஹானதித்தா²னி ஸுபடியத்தானி ஹொந்தி, யேஸு பு³த்³த⁴பச்சேகபு³த்³த⁴கீ²ணாஸவா ச இத்³தி⁴மந்தோ ச இஸயோ ந்ஹாயந்தி, தே³வயக்கா²த³யோ உய்யானகீளகங் கீளந்தி.
Tattha manoharasilātalāni nimmacchakacchapāni phalikasadisanimmaludakāni nhānatitthāni supaṭiyattāni honti, yesu buddhapaccekabuddhakhīṇāsavā ca iddhimanto ca isayo nhāyanti, devayakkhādayo uyyānakīḷakaṃ kīḷanti.
தஸ்ஸ சதூஸு பஸ்ஸேஸு ஸீஹமுக²ங் ஹத்தி²முக²ங் அஸ்ஸமுக²ங் உஸப⁴முக²ந்தி சத்தாரி முகா²னி ஹொந்தி, யேஹி சதஸ்ஸோ நதி³யோ ஸந்த³ந்தி. ஸீஹமுகே²ன நிக்க²ந்தனதீ³தீரே ஸீஹா ப³ஹுதரா ஹொந்தி. ஹத்தி²முகா²தீ³ஹி ஹத்தி²அஸ்ஸஉஸபா⁴. புரத்தி²மதி³ஸதோ நிக்க²ந்தனதீ³ அனோதத்தங் திக்க²த்துங் பத³க்கி²ணங் கத்வா இதரா திஸ்ஸோ நதி³யோ அனுபக³ம்ம பாசீனஹிமவந்தேனேவ அமனுஸ்ஸபத²ங் க³ந்த்வா மஹாஸமுத்³த³ங் பவிஸதி. பச்சி²மதி³ஸதோ ச உத்தரதி³ஸதோ ச நிக்க²ந்தனதி³யோபி ததே²வ பத³க்கி²ணங் கத்வா பச்சி²மஹிமவந்தேனேவ உத்தரஹிமவந்தேனேவ ச அமனுஸ்ஸபத²ங் க³ந்த்வா மஹாஸமுத்³த³ங் பவிஸந்தி. த³க்கி²ணதி³ஸதோ நிக்க²ந்தனதீ³ பன தங் திக்க²த்துங் பத³க்கி²ணங் கத்வா த³க்கி²ணேன உஜுகங் பாஸாணபிட்டே²னேவ ஸட்டி²யோஜனானி க³ந்த்வா பப்³ப³தங் பஹரித்வா வுட்டா²ய பரிக்கே²பேன திகா³வுதப்பமாணா உத³கதா⁴ரா ச ஹுத்வா ஆகாஸேன ஸட்டி²யோஜனானி க³ந்த்வா தியக்³க³ளே நாம பாஸாணே பதிதா, பாஸாணோ உத³கதா⁴ராவேகே³ன பி⁴ன்னோ. தத்த² பஞ்ஞாஸயோஜனப்பமாணா தியக்³க³ளா நாம பொக்க²ரணீ ஜாதா, பொக்க²ரணியா கூலங் பி⁴ந்தி³த்வா பாஸாணங் பவிஸித்வா ஸட்டி²யோஜனானி க³தா. ததோ க⁴னபத²விங் பி⁴ந்தி³த்வா உமங்கே³ன ஸட்டி²யோஜனானி க³ந்த்வா விஞ்ஜு²ங் நாம திரச்சா²னபப்³ப³தங் பஹரித்வா ஹத்த²தலே பஞ்சங்கு³லிஸதி³ஸா பஞ்சதா⁴ரா ஹுத்வா பவத்தந்தி. ஸா திக்க²த்துங் அனோதத்தங் பத³க்கி²ணங் கத்வா க³தட்டா²னே ஆவட்டக³ங்கா³தி வுச்சதி. உஜுகங் பாஸாணபிட்டே²ன ஸட்டி²யோஜனானி க³தட்டா²னே கண்ஹக³ங்கா³தி, ஆகாஸேன ஸட்டி²யோஜனானி க³தட்டா²னே ஆகாஸக³ங்கா³தி, தியக்³க³ளபாஸாணே பஞ்ஞாஸயோஜனோகாஸே டி²தா தியக்³க³ளபொக்க²ரணீதி, கூலங் பி⁴ந்தி³த்வா பாஸாணங் பவிஸித்வா ஸட்டி²யோஜனானி க³தட்டா²னே ப³ஹலக³ங்கா³தி, உமங்கே³ன ஸட்டி²யோஜனானி க³தட்டா²னே உமங்க³க³ங்கா³தி வுச்சதி. விஞ்ஜு²ங் நாம திரச்சா²னபப்³ப³தங் பஹரித்வா பஞ்சதா⁴ரா ஹுத்வா பவத்தட்டா²னே பன க³ங்கா³ யமுனா அசிரவதீ ஸரபூ⁴ மஹீதி பஞ்சதா⁴ ஸங்க²ங் க³தா. ஏவமேதா பஞ்ச மஹானதி³யோ ஹிமவந்ததோ பப⁴வந்தி. தாஸு யா அயங் பஞ்சமீ மஹீ நாம, ஸா இத⁴ மஹாமஹீதி அதி⁴ப்பேதா. தஸ்ஸா உத்தரேன யா ஆபோ, தாஸங் அவிதூ³ரத்தா ஸோ ஜனபதோ³ அங்கு³த்தராபோதி வேதி³தப்³போ³. தஸ்மிங் அங்கு³த்தராபேஸு ஜனபதே³.
Tassa catūsu passesu sīhamukhaṃ hatthimukhaṃ assamukhaṃ usabhamukhanti cattāri mukhāni honti, yehi catasso nadiyo sandanti. Sīhamukhena nikkhantanadītīre sīhā bahutarā honti. Hatthimukhādīhi hatthiassausabhā. Puratthimadisato nikkhantanadī anotattaṃ tikkhattuṃ padakkhiṇaṃ katvā itarā tisso nadiyo anupagamma pācīnahimavanteneva amanussapathaṃ gantvā mahāsamuddaṃ pavisati. Pacchimadisato ca uttaradisato ca nikkhantanadiyopi tatheva padakkhiṇaṃ katvā pacchimahimavanteneva uttarahimavanteneva ca amanussapathaṃ gantvā mahāsamuddaṃ pavisanti. Dakkhiṇadisato nikkhantanadī pana taṃ tikkhattuṃ padakkhiṇaṃ katvā dakkhiṇena ujukaṃ pāsāṇapiṭṭheneva saṭṭhiyojanāni gantvā pabbataṃ paharitvā vuṭṭhāya parikkhepena tigāvutappamāṇā udakadhārā ca hutvā ākāsena saṭṭhiyojanāni gantvā tiyaggaḷe nāma pāsāṇe patitā, pāsāṇo udakadhārāvegena bhinno. Tattha paññāsayojanappamāṇā tiyaggaḷā nāma pokkharaṇī jātā, pokkharaṇiyā kūlaṃ bhinditvā pāsāṇaṃ pavisitvā saṭṭhiyojanāni gatā. Tato ghanapathaviṃ bhinditvā umaṅgena saṭṭhiyojanāni gantvā viñjhuṃ nāma tiracchānapabbataṃ paharitvā hatthatale pañcaṅgulisadisā pañcadhārā hutvā pavattanti. Sā tikkhattuṃ anotattaṃ padakkhiṇaṃ katvā gataṭṭhāne āvaṭṭagaṅgāti vuccati. Ujukaṃ pāsāṇapiṭṭhena saṭṭhiyojanāni gataṭṭhāne kaṇhagaṅgāti, ākāsena saṭṭhiyojanāni gataṭṭhāne ākāsagaṅgāti, tiyaggaḷapāsāṇe paññāsayojanokāse ṭhitā tiyaggaḷapokkharaṇīti, kūlaṃ bhinditvā pāsāṇaṃ pavisitvā saṭṭhiyojanāni gataṭṭhāne bahalagaṅgāti, umaṅgena saṭṭhiyojanāni gataṭṭhāne umaṅgagaṅgāti vuccati. Viñjhuṃ nāma tiracchānapabbataṃ paharitvā pañcadhārā hutvā pavattaṭṭhāne pana gaṅgā yamunā aciravatī sarabhū mahīti pañcadhā saṅkhaṃ gatā. Evametā pañca mahānadiyo himavantato pabhavanti. Tāsu yā ayaṃ pañcamī mahī nāma, sā idha mahāmahīti adhippetā. Tassā uttarena yā āpo, tāsaṃ avidūrattā so janapado aṅguttarāpoti veditabbo. Tasmiṃ aṅguttarāpesu janapade.
ஆபணங் நாமாதி தஸ்மிங் கிர நிக³மே வீஸதி ஆபணமுக²ஸஹஸ்ஸானி விப⁴த்தானி அஹேஸுங். இதி ஸோ ஆபணானங் உஸ்ஸன்னத்தா ஆபணந்த்வேவ ஸங்க²ங் க³தோ. தஸ்ஸ ச நிக³மஸ்ஸ அவிதூ³ரே நதீ³தீரே க⁴னச்சா²யோ ரமணீயோ பூ⁴மிபா⁴கோ³ மஹாவனஸண்டோ³, தஸ்மிங் ப⁴க³வா விஹரதி. தேனேவெத்த² வஸனட்டா²னங் ந நியாமிதந்தி வேதி³தப்³ப³ங். யேனஞ்ஞதரோ வனஸண்டோ³ தேனுபஸங்கமீதி பி⁴க்கு²ஸங்க⁴ங் வஸனட்டா²னங் பேஸெத்வா ஏககோவ உபஸங்கமி போதலியங் க³ஹபதிங் ஸந்தா⁴ய. போதலியோபி கோ² க³ஹபதீதி போதலியோதி ஏவங்னாமகோ க³ஹபதி. ஸம்பன்னநிவாஸனபாவுரணோதி பரிபுண்ணனிவாஸனபாவுரணோ , ஏகங் தீ³க⁴த³ஸங் ஸாடகங் நிவத்தோ² ஏகங் பாருதோதி அத்தோ². ச²த்துபாஹனாஹீதி ச²த்தங் க³ஹெத்வா உபாஹனா ஆருய்ஹாதி அத்தோ². ஆஸனானீதி பல்லங்கபீட²பலாலபீட²காதீ³னி. அந்தமஸோ ஸாகா²ப⁴ங்க³ம்பி ஹி ஆஸனந்தேவ வுச்சதி. க³ஹபதிவாதே³னாதி க³ஹபதீதி இமினா வசனேன. ஸமுதா³சரதீதி வோஹரதி.
Āpaṇaṃnāmāti tasmiṃ kira nigame vīsati āpaṇamukhasahassāni vibhattāni ahesuṃ. Iti so āpaṇānaṃ ussannattā āpaṇantveva saṅkhaṃ gato. Tassa ca nigamassa avidūre nadītīre ghanacchāyo ramaṇīyo bhūmibhāgo mahāvanasaṇḍo, tasmiṃ bhagavā viharati. Tenevettha vasanaṭṭhānaṃ na niyāmitanti veditabbaṃ. Yenaññataro vanasaṇḍo tenupasaṅkamīti bhikkhusaṅghaṃ vasanaṭṭhānaṃ pesetvā ekakova upasaṅkami potaliyaṃ gahapatiṃ sandhāya. Potaliyopi kho gahapatīti potaliyoti evaṃnāmako gahapati. Sampannanivāsanapāvuraṇoti paripuṇṇanivāsanapāvuraṇo , ekaṃ dīghadasaṃ sāṭakaṃ nivattho ekaṃ pārutoti attho. Chattupāhanāhīti chattaṃ gahetvā upāhanā āruyhāti attho. Āsanānīti pallaṅkapīṭhapalālapīṭhakādīni. Antamaso sākhābhaṅgampi hi āsananteva vuccati. Gahapativādenāti gahapatīti iminā vacanena. Samudācaratīti voharati.
ப⁴க³வந்தங் ஏதத³வோசாதி ததியங் க³ஹபதீதி வசனங் அதி⁴வாஸேதுங் அஸக்கொந்தோ ப⁴க³வந்தமேதங் ‘‘தயித³ங், போ⁴, கோ³தமா’’திஆதி³வசனங் அவோச. தத்த² நச்ச²ன்னந்தி ந அனுச்ச²விகங். நப்பதிரூபந்தி ந ஸாருப்பங். ஆகாராதிஆதீ³னி ஸப்³பா³னேவ காரணவேவசனானி. தீ³க⁴த³ஸவத்த²தா⁴ரண-கேஸமஸ்ஸுனக²ட²பனாதீ³னி ஹி ஸப்³பா³னேவ கி³ஹிப்³யஞ்ஜனானி தஸ்ஸ கி³ஹிபா⁴வங் பாகடங் கரொந்தீதி ஆகாரா, கி³ஹிஸண்டா²னேன ஸண்டி²தத்தா லிங்கா³, கி³ஹிபா⁴வஸ்ஸ ஸஞ்ஜானநனிமித்ததாய நிமித்தாதி வுத்தா. யதா² தங் க³ஹபதிஸ்ஸாதி யதா² க³ஹபதிஸ்ஸ ஆகாரலிங்க³னிமித்தா ப⁴வெய்யுங், ததே²வ துய்ஹங். தேன தாஹங் ஏவங் ஸமுதா³சராமீதி த³ஸ்ஸேதி. அத² ஸோ யேன காரணேன க³ஹபதிவாத³ங் நாதி⁴வாஸேதி, தங் பகாஸெந்தோ ‘‘ததா² ஹி பன மே’’திஆதி³மாஹ.
Bhagavantaṃ etadavocāti tatiyaṃ gahapatīti vacanaṃ adhivāsetuṃ asakkonto bhagavantametaṃ ‘‘tayidaṃ, bho, gotamā’’tiādivacanaṃ avoca. Tattha nacchannanti na anucchavikaṃ. Nappatirūpanti na sāruppaṃ. Ākārātiādīni sabbāneva kāraṇavevacanāni. Dīghadasavatthadhāraṇa-kesamassunakhaṭhapanādīni hi sabbāneva gihibyañjanāni tassa gihibhāvaṃ pākaṭaṃ karontīti ākārā, gihisaṇṭhānena saṇṭhitattā liṅgā, gihibhāvassa sañjānananimittatāya nimittāti vuttā. Yathā taṃ gahapatissāti yathā gahapatissa ākāraliṅganimittā bhaveyyuṃ, tatheva tuyhaṃ. Tena tāhaṃ evaṃ samudācarāmīti dasseti. Atha so yena kāraṇena gahapativādaṃ nādhivāseti, taṃ pakāsento ‘‘tathā hi pana me’’tiādimāha.
நிய்யாதந்தி நிய்யாதிதங். அனோவாதீ³ அனுபவாதீ³தி ‘‘தாதா, கஸத², வபத², வணிப்பத²ங் பயோஜேதா²’’திஆதி³னா ஹி நயேன ஓவத³ந்தோ ஓவாதீ³ நாம ஹோதி. ‘‘தும்ஹே ந கஸத², ந வபத², ந வணிப்பத²ங் பயோஜேத², கத²ங் ஜீவிஸ்ஸத², புத்ததா³ரங் வா ப⁴ரிஸ்ஸதா²’’திஆதி³னா நயேன பன உபவத³ந்தோ உபவாதீ³ நாம ஹோதி. அஹங் பன உப⁴யம்பி தங் ந கரோமி. தேனாஹங் தத்த² அனோவாதீ³ அனுபவாதீ³தி த³ஸ்ஸேதி. கா⁴ஸச்சா²த³னபரமோ விஹராமீதி கா⁴ஸமத்தஞ்சேவ அச்சா²த³னமத்தஞ்ச பரமங் கத்வா விஹராமி, ததோ பரங் நத்தி², ந ச பத்தே²மீதி தீ³பேதி.
Niyyātanti niyyātitaṃ. Anovādī anupavādīti ‘‘tātā, kasatha, vapatha, vaṇippathaṃ payojethā’’tiādinā hi nayena ovadanto ovādī nāma hoti. ‘‘Tumhe na kasatha, na vapatha, na vaṇippathaṃ payojetha, kathaṃ jīvissatha, puttadāraṃ vā bharissathā’’tiādinā nayena pana upavadanto upavādī nāma hoti. Ahaṃ pana ubhayampi taṃ na karomi. Tenāhaṃ tattha anovādī anupavādīti dasseti. Ghāsacchādanaparamoviharāmīti ghāsamattañceva acchādanamattañca paramaṃ katvā viharāmi, tato paraṃ natthi, na ca patthemīti dīpeti.
32. கி³த்³தி⁴லோபோ⁴ பஹாதப்³போ³தி கே³த⁴பூ⁴தோ லோபோ⁴ பஹாதப்³போ³. அனிந்தா³ரோஸந்தி அனிந்தா³பூ⁴தங் அக⁴ட்டனங். நிந்தா³ரோஸோதி நிந்தா³க⁴ட்டனா. வோஹாரஸமுச்சே²தா³யாதி எத்த² வோஹாரோதி ப்³யவஹாரவோஹாரோபி பண்ணத்திபி வசனம்பி சேதனாபி. தத்த² –
32.Giddhilobhopahātabboti gedhabhūto lobho pahātabbo. Anindārosanti anindābhūtaṃ aghaṭṭanaṃ. Nindārosoti nindāghaṭṭanā. Vohārasamucchedāyāti ettha vohāroti byavahāravohāropi paṇṇattipi vacanampi cetanāpi. Tattha –
‘‘யோ ஹி கோசி மனுஸ்ஸேஸு, வோஹாரங் உபஜீவதி;
‘‘Yo hi koci manussesu, vohāraṃ upajīvati;
ஏவங் வாஸெட்ட² ஜானாஹி, வாணிஜோ ஸோ ந ப்³ராஹ்மணோ’’தி. (ம॰ நி॰ 2.457) –
Evaṃ vāseṭṭha jānāhi, vāṇijo so na brāhmaṇo’’ti. (ma. ni. 2.457) –
அயங் ப்³யவஹாரவோஹாரோ நாம. ‘‘ஸங்கா² ஸமஞ்ஞா பஞ்ஞத்தி வோஹாரோ’’தி (த⁴॰ ஸ॰ 1313-1315) அயங் பண்ணத்திவோஹாரோ நாம. ‘‘ததா² ததா² வோஹரதி அபராமஸ’’ந்தி (ம॰ நி॰ 3.332) அயங் வசனவோஹாரோ நாம. ‘‘அட்ட² அரியவோஹாரா அட்ட² அனரியவோஹரா’’தி (அ॰ நி॰ 8.67) அயங் சேதனாவோஹாரோ நாம, அயமிதா⁴தி⁴ப்பேதோ. யஸ்மா வா பப்³ப³ஜிதகாலதோ பட்டா²ய கி³ஹீதி சேதனா நத்தி², ஸமணோதி சேதனா ஹோதி. கி³ஹீதி வசனங் நத்தி², ஸமணோதி வசனங் ஹோதி. கி³ஹீதி பண்ணத்தி நத்தி², ஸமணோதி பண்ணத்தி ஹோதி. கி³ஹீதி ப்³யவஹாரோ நத்தி², ஸமணோதி வா பப்³ப³ஜிதோதி வா ப்³யவஹாரோ ஹோதி. தஸ்மா ஸப்³பே³பேதே லப்³ப⁴ந்தி.
Ayaṃ byavahāravohāro nāma. ‘‘Saṅkhā samaññā paññatti vohāro’’ti (dha. sa. 1313-1315) ayaṃ paṇṇattivohāro nāma. ‘‘Tathā tathā voharati aparāmasa’’nti (ma. ni. 3.332) ayaṃ vacanavohāro nāma. ‘‘Aṭṭha ariyavohārā aṭṭha anariyavoharā’’ti (a. ni. 8.67) ayaṃ cetanāvohāro nāma, ayamidhādhippeto. Yasmā vā pabbajitakālato paṭṭhāya gihīti cetanā natthi, samaṇoti cetanā hoti. Gihīti vacanaṃ natthi, samaṇoti vacanaṃ hoti. Gihīti paṇṇatti natthi, samaṇoti paṇṇatti hoti. Gihīti byavahāro natthi, samaṇoti vā pabbajitoti vā byavahāro hoti. Tasmā sabbepete labbhanti.
33. யேஸங் கோ² அஹங் ஸங்யோஜனானங் ஹேது பாணாதிபாதீதி எத்த² பாணாதிபாதோவ ஸங்யோஜனங். பாணாதிபாதஸ்ஸேவ ஹி ஹேது பாணாதிபாதபச்சயா பாணாதிபாதீ நாம ஹோதி. பாணாதிபாதானங் பன ப³ஹுதாய ‘‘யேஸங் கோ² அஹ’’ந்தி வுத்தங். தேஸாஹங் ஸங்யோஜனானந்தி தேஸங் அஹங் பாணாதிபாதப³ந்த⁴னானங். பஹானாய ஸமுச்சே²தா³ய படிபன்னோதி இமினா அபாணாதிபாதஸங்கா²தேன காயிகஸீலஸங்வரேன பஹானத்தா²ய ஸமுச்சே²த³னத்தா²ய படிபன்னோ. அத்தாபி மங் உபவதெ³ய்யாதி குந்த²கிபில்லிகம்பி நாம ஜீவிதா அவோரோபனகஸாஸனே பப்³ப³ஜித்வா பாணாதிபாதமத்ததோபி ஓரமிதுங் ந ஸக்கோமி, கிங் மய்ஹங் பப்³ப³ஜ்ஜாயாதி ஏவங் அத்தாபி மங் உபவதெ³ய்ய. அனுவிச்சாபி மங் விஞ்ஞூ க³ரஹெய்யுந்தி ஏவரூபே நாம ஸாஸனே பப்³ப³ஜித்வா பாணாதிபாதமத்ததோபி ஓரமிதுங் ந ஸக்கோதி, கிங் ஏதஸ்ஸ பப்³ப³ஜ்ஜாயாதி ஏவங் அனுவிச்ச துலயித்வா பரியோகா³ஹெத்வா அஞ்ஞேபி விஞ்ஞூ பண்டி³தா க³ரஹெய்யுங். ஏததே³வ கோ² பன ஸங்யோஜனமேதங் நீவரணந்தி த³ஸஸு ஸங்யோஜனேஸு பஞ்சஸு ச நீவரணேஸு அபரியாபன்னம்பி ‘‘அட்ட² நீவரணா’’தி தே³ஸனாவஸேனேதங் வுத்தங். வட்டப³ந்த⁴னட்டே²ன ஹி ஹிதபடிச்சா²த³னட்டே²ன ச ஸங்யோஜனந்திபி நீவரணந்திபி வுத்தங். ஆஸவாதி பாணாதிபாதகாரணா ஏகோ அவிஜ்ஜாஸவோ உப்பஜ்ஜதி. விகா⁴தபரிளாஹாதி விகா⁴தா ச பரிளாஹா ச. தத்த² விகா⁴தக்³க³ஹணேன கிலேஸது³க்க²ஞ்ச விபாகது³க்க²ஞ்ச க³ஹிதங், பரிளாஹக்³க³ஹணேனபி கிலேஸபரிளாஹோ ச விபாகபரிளாஹோ ச க³ஹிதோ. இமினா உபாயேன ஸப்³ப³த்த² அத்தோ² வேதி³தப்³போ³.
33.Yesaṃ kho ahaṃ saṃyojanānaṃ hetu pāṇātipātīti ettha pāṇātipātova saṃyojanaṃ. Pāṇātipātasseva hi hetu pāṇātipātapaccayā pāṇātipātī nāma hoti. Pāṇātipātānaṃ pana bahutāya ‘‘yesaṃ kho aha’’nti vuttaṃ. Tesāhaṃsaṃyojanānanti tesaṃ ahaṃ pāṇātipātabandhanānaṃ. Pahānāya samucchedāya paṭipannoti iminā apāṇātipātasaṅkhātena kāyikasīlasaṃvarena pahānatthāya samucchedanatthāya paṭipanno. Attāpi maṃ upavadeyyāti kunthakipillikampi nāma jīvitā avoropanakasāsane pabbajitvā pāṇātipātamattatopi oramituṃ na sakkomi, kiṃ mayhaṃ pabbajjāyāti evaṃ attāpi maṃ upavadeyya. Anuviccāpi maṃ viññū garaheyyunti evarūpe nāma sāsane pabbajitvā pāṇātipātamattatopi oramituṃ na sakkoti, kiṃ etassa pabbajjāyāti evaṃ anuvicca tulayitvā pariyogāhetvā aññepi viññū paṇḍitā garaheyyuṃ. Etadeva kho pana saṃyojanametaṃ nīvaraṇanti dasasu saṃyojanesu pañcasu ca nīvaraṇesu apariyāpannampi ‘‘aṭṭha nīvaraṇā’’ti desanāvasenetaṃ vuttaṃ. Vaṭṭabandhanaṭṭhena hi hitapaṭicchādanaṭṭhena ca saṃyojanantipi nīvaraṇantipi vuttaṃ. Āsavāti pāṇātipātakāraṇā eko avijjāsavo uppajjati. Vighātapariḷāhāti vighātā ca pariḷāhā ca. Tattha vighātaggahaṇena kilesadukkhañca vipākadukkhañca gahitaṃ, pariḷāhaggahaṇenapi kilesapariḷāho ca vipākapariḷāho ca gahito. Iminā upāyena sabbattha attho veditabbo.
34-40. அயங் பன விஸேஸோ – தேஸாஹங் ஸங்யோஜனானங் பஹானாயாதி இமஸ்மிங் பதே³ இமினா தி³ன்னாதா³னஸங்கா²தேன காயிகஸீலஸங்வரேன, ஸச்சவாசாஸங்கா²தேன வாசஸிகஸீலஸங்வரேன, அபிஸுணாவாசாஸங்கா²தேன வாசஸிகஸீலஸங்வரேன, அகி³த்³தி⁴லோப⁴ஸங்கா²தேன மானஸிகஸீலஸங்வரேன, அனிந்தா³ரோஸஸங்கா²தேன காயிகவாசஸிகஸீலஸங்வரேன , அகோது⁴பாயாஸஸங்கா²தேன மானஸிகஸீலஸங்வரேன, அனதிமானஸங்கா²தேன மானஸிகஸீலஸங்வரேன பஹானத்தா²ய ஸமுச்சே²த³னத்தா²ய படிபன்னோதி ஏவங் ஸப்³ப³வாரேஸு யோஜனா காதப்³பா³.
34-40. Ayaṃ pana viseso – tesāhaṃ saṃyojanānaṃ pahānāyāti imasmiṃ pade iminā dinnādānasaṅkhātena kāyikasīlasaṃvarena, saccavācāsaṅkhātena vācasikasīlasaṃvarena, apisuṇāvācāsaṅkhātena vācasikasīlasaṃvarena, agiddhilobhasaṅkhātena mānasikasīlasaṃvarena, anindārosasaṅkhātena kāyikavācasikasīlasaṃvarena , akodhupāyāsasaṅkhātena mānasikasīlasaṃvarena, anatimānasaṅkhātena mānasikasīlasaṃvarena pahānatthāya samucchedanatthāya paṭipannoti evaṃ sabbavāresu yojanā kātabbā.
அத்தாபி மங் உபவதெ³ய்ய அனுவிச்சாபி மங் விஞ்ஞூ க³ரஹெய்யுந்தி இமேஸு பன பதே³ஸு திணஸலாகம்பி நாம உபாதா³ய அதி³ன்னங் அக்³க³ஹணஸாஸனே பப்³ப³ஜித்வா அதி³ன்னாதா³னமத்ததோபி விரமிதுங் ந ஸக்கோமி, கிங் மய்ஹங் பப்³ப³ஜ்ஜாயாதி ஏவங் அத்தாபி மங் உபவதெ³ய்ய. ஏவரூபே நாம ஸாஸனே பப்³ப³ஜித்வா அதி³ன்னாதா³னமத்ததோபி ஓரமிதுங் ந ஸக்கோதி, கிங் இமஸ்ஸ பப்³ப³ஜ்ஜாயாதி ஏவங் அனுவிச்சாபி மங் விஞ்ஞூ க³ரஹெய்யுங்? ஹஸாபெக்க²தாயபி நாம த³வகம்யதாய வா முஸாவாத³ங் அகரணஸாஸனே பப்³ப³ஜித்வா. ஸப்³பா³காரேன பிஸுணங் அகரணஸாஸனே நாம பப்³ப³ஜித்வா. அப்பமத்தகம்பி கி³த்³தி⁴லோப⁴ங் அகரணஸாஸனே நாம பப்³ப³ஜித்வாபி. ககசேன அங்கே³ஸு ஓக்கந்தியமானேஸுபி நாம பரேஸங் நிந்தா³ரோஸங் அகரணஸாஸனே பப்³ப³ஜித்வா. சி²ன்னகா²ணுகண்டகாதீ³ஸுபி நாம கோது⁴பாயாஸங் அகரணஸாஸனே பப்³ப³ஜித்வா. அதி⁴மானமத்தம்பி நாம மானங் அகரணஸாஸனே பப்³ப³ஜித்வா அதிமானமத்தம்பி பஜஹிதுங் ந ஸக்கோமி, கிங் மய்ஹங் பப்³ப³ஜ்ஜாயாதி ஏவங் அத்தாபி மங் உபவதெ³ய்ய. ஏவரூபே நாம ஸாஸனே பப்³ப³ஜித்வா அதிமானமத்தம்பி பஜஹிதுங் ந ஸக்கோதி, கிங் இமஸ்ஸ பப்³ப³ஜ்ஜாயாதி ஏவங் அனுவிச்சாபி மங் விஞ்ஞூ க³ரஹெய்யுந்தி ஏவங் ஸப்³ப³வாரேஸு யோஜனா காதப்³பா³.
Attāpi maṃ upavadeyya anuviccāpi maṃ viññū garaheyyunti imesu pana padesu tiṇasalākampi nāma upādāya adinnaṃ aggahaṇasāsane pabbajitvā adinnādānamattatopi viramituṃ na sakkomi, kiṃ mayhaṃ pabbajjāyāti evaṃ attāpi maṃ upavadeyya. Evarūpe nāma sāsane pabbajitvā adinnādānamattatopi oramituṃ na sakkoti, kiṃ imassa pabbajjāyāti evaṃ anuviccāpi maṃ viññū garaheyyuṃ? Hasāpekkhatāyapi nāma davakamyatāya vā musāvādaṃ akaraṇasāsane pabbajitvā. Sabbākārena pisuṇaṃ akaraṇasāsane nāma pabbajitvā. Appamattakampi giddhilobhaṃ akaraṇasāsane nāma pabbajitvāpi. Kakacena aṅgesu okkantiyamānesupi nāma paresaṃ nindārosaṃ akaraṇasāsane pabbajitvā. Chinnakhāṇukaṇṭakādīsupi nāma kodhupāyāsaṃ akaraṇasāsane pabbajitvā. Adhimānamattampi nāma mānaṃ akaraṇasāsane pabbajitvā atimānamattampi pajahituṃ na sakkomi, kiṃ mayhaṃ pabbajjāyāti evaṃ attāpi maṃ upavadeyya. Evarūpe nāma sāsane pabbajitvā atimānamattampi pajahituṃ na sakkoti, kiṃ imassa pabbajjāyāti evaṃ anuviccāpi maṃ viññū garaheyyunti evaṃ sabbavāresu yojanā kātabbā.
ஆஸவாதி இமஸ்மிங் பன பதே³ அதி³ன்னாதா³னகாரணா காமாஸவோ தி³ட்டா²ஸவோ அவிஜ்ஜாஸவோதி தயோ ஆஸவா உப்பஜ்ஜந்தி, ததா² முஸாவாத³காரணா பிஸுணாவாசாகாரணா ச, கி³த்³தி⁴லோப⁴காரணா தி³ட்டா²ஸவோ அவிஜ்ஜாஸவோ ச, நிந்தா³ரோஸகாரணா அவிஜ்ஜாஸவோவ, ததா² கோது⁴பாயாஸகாரணா, அதிமானகாரணா ப⁴வாஸவோ அவிஜ்ஜாஸவோ சாதி த்³வேவ ஆஸவா உப்பஜ்ஜந்தீதி ஏவங் ஆஸவுப்பத்தி வேதி³தப்³பா³.
Āsavāti imasmiṃ pana pade adinnādānakāraṇā kāmāsavo diṭṭhāsavo avijjāsavoti tayo āsavā uppajjanti, tathā musāvādakāraṇā pisuṇāvācākāraṇā ca, giddhilobhakāraṇā diṭṭhāsavo avijjāsavo ca, nindārosakāraṇā avijjāsavova, tathā kodhupāyāsakāraṇā, atimānakāraṇā bhavāsavo avijjāsavo cāti dveva āsavā uppajjantīti evaṃ āsavuppatti veditabbā.
இமேஸு பன அட்ட²ஸுபி வாரேஸு அஸம்மோஹத்த²ங் புன அயங் ஸங்கே²பவினிச்ச²யோ – புரிமேஸு தாவ சதூஸு விரமிதுங் ந ஸக்கோமீதி வத்தப்³ப³ங், பச்சி²மேஸு பஜஹிதுங் ந ஸக்கோமீதி. பாணாதிபாதனிந்தா³ரோஸகோது⁴பாயாஸேஸு ச ஏகோ அவிஜ்ஜாஸவோவ ஹோதி, அதி³ன்னாதா³னமுஸாவாத³பிஸுணாவாசாஸு காமாஸவோ தி³ட்டா²ஸவோ அவிஜ்ஜாஸவோ, கி³த்³தி⁴லோபே⁴ தி³ட்டா²ஸவோ அவிஜ்ஜாஸவோ, அதிமானே ப⁴வாஸவோ அவிஜ்ஜாஸவோ, அபாணாதிபாதங் தி³ன்னாதா³னங் காயிகங் ஸீலங், அமுஸா அபிஸுணங் வாசஸிகஸீலங், ட²பெத்வா அனிந்தா³ரோஸங் ஸேஸானி தீணி மானஸிகஸீலானி. யஸ்மா பன காயேனபி க⁴ட்டேதி ரோஸேதி வாசாயபி, தஸ்மா அனிந்தா³ரோஸோ த்³வே டா²னானி யாதி, காயிகஸீலம்பி ஹோதி வாசஸிகஸீலம்பி. எத்தாவதா கிங் கதி²தங்? பாதிமொக்க²ஸங்வரஸீலங். பாதிமொக்க²ஸங்வரஸீலே டி²தஸ்ஸ ச பி⁴க்கு²னோ படிஸங்கா²பஹானவஸேன கி³ஹிவோஹாரஸமுச்சே²தோ³ கதி²தோதி வேதி³தப்³போ³.
Imesu pana aṭṭhasupi vāresu asammohatthaṃ puna ayaṃ saṅkhepavinicchayo – purimesu tāva catūsu viramituṃ na sakkomīti vattabbaṃ, pacchimesu pajahituṃ na sakkomīti. Pāṇātipātanindārosakodhupāyāsesu ca eko avijjāsavova hoti, adinnādānamusāvādapisuṇāvācāsu kāmāsavo diṭṭhāsavo avijjāsavo, giddhilobhe diṭṭhāsavo avijjāsavo, atimāne bhavāsavo avijjāsavo, apāṇātipātaṃ dinnādānaṃ kāyikaṃ sīlaṃ, amusā apisuṇaṃ vācasikasīlaṃ, ṭhapetvā anindārosaṃ sesāni tīṇi mānasikasīlāni. Yasmā pana kāyenapi ghaṭṭeti roseti vācāyapi, tasmā anindāroso dve ṭhānāni yāti, kāyikasīlampi hoti vācasikasīlampi. Ettāvatā kiṃ kathitaṃ? Pātimokkhasaṃvarasīlaṃ. Pātimokkhasaṃvarasīle ṭhitassa ca bhikkhuno paṭisaṅkhāpahānavasena gihivohārasamucchedo kathitoti veditabbo.
காமாதீ³னவகதா²வண்ணனா
Kāmādīnavakathāvaṇṇanā
42. வித்தா²ரதே³ஸனாயங் தமேனங் த³க்கோ²தி பத³ஸ்ஸ உபஸும்பெ⁴ய்யாதி இமினா ஸத்³தி⁴ங் ஸம்ப³ந்தோ⁴ வேதி³தப்³போ³. இத³ங் வுத்தங் ஹோதி, தமேனங் குக்குரங் உபஸும்பெ⁴ய்ய, தஸ்ஸ ஸமீபே கி²பெய்யாதி அத்தோ². அட்டி²கங்கலந்தி உரட்டி²ங் வா பிட்டி²கண்டகங் வா ஸீஸட்டி²ங் வா. தஞ்ஹி நிம்மங்ஸத்தா கங்கலந்தி வுச்சதி. ஸுனிக்கந்தங் நிக்கந்தந்தி யதா² ஸுனிக்கந்தங் ஹோதி, ஏவங் நிக்கந்தங் நில்லிகி²தங், யதெ³த்த² அல்லீனமங்ஸங் அத்தி², தங் ஸப்³ப³ங் நில்லிகி²த்வா அட்டி²மத்தமேவ கதந்தி அத்தோ². தேனேவாஹ ‘‘நிம்மங்ஸ’’ந்தி. லோஹிதங் பன மக்கி²த்வா திட்ட²தி, தேன வுத்தங் ‘‘லோஹிதமக்கி²த’’ந்தி.
42. Vitthāradesanāyaṃ tamenaṃ dakkhoti padassa upasumbheyyāti iminā saddhiṃ sambandho veditabbo. Idaṃ vuttaṃ hoti, tamenaṃ kukkuraṃ upasumbheyya, tassa samīpe khipeyyāti attho. Aṭṭhikaṅkalanti uraṭṭhiṃ vā piṭṭhikaṇṭakaṃ vā sīsaṭṭhiṃ vā. Tañhi nimmaṃsattā kaṅkalanti vuccati. Sunikkantaṃnikkantanti yathā sunikkantaṃ hoti, evaṃ nikkantaṃ nillikhitaṃ, yadettha allīnamaṃsaṃ atthi, taṃ sabbaṃ nillikhitvā aṭṭhimattameva katanti attho. Tenevāha ‘‘nimmaṃsa’’nti. Lohitaṃ pana makkhitvā tiṭṭhati, tena vuttaṃ ‘‘lohitamakkhita’’nti.
ப³ஹுது³க்கா² ப³ஹுபாயாஸாதி தி³ட்ட²த⁴ம்மிகஸம்பராயிகேஹி து³க்கே²ஹி ப³ஹுது³க்கா², உபாயாஸஸங்கிலேஸேஹி ப³ஹுபாயாஸா. யாயங் உபெக்கா² நானத்தா நானத்தஸிதாதி யா அயங் பஞ்சகாமகு³ணாரம்மணவஸேன நானாஸபா⁴வா, தானேவ ச ஆரம்மணானி நிஸ்ஸிதத்தா ‘‘நானத்தஸிதா’’தி வுச்சதி பஞ்சகாமகு³ணூபெக்கா², தங் அபி⁴னிவஜ்ஜெத்வா. ஏகத்தா ஏகத்தஸிதாதி சதுத்த²ஜ்ஜா²னுபெக்கா², ஸா ஹி தி³வஸம்பி ஏகஸ்மிங் ஆரம்மணே உப்பஜ்ஜனதோ ஏகஸபா⁴வா, ததே³வ ஏகங் ஆரம்மணங் நிஸ்ஸிதத்தா ஏகத்தஸிதா நாம. யத்த² ஸப்³ப³ஸோ லோகாமிஸூபாதா³னா அபரிஸேஸா நிருஜ்ஜ²ந்தீதி யத்த² சதுத்த²ஜ்ஜா²னுபெக்கா²யங் யங் உபெக்க²ங் ஆக³ம்ம யங் படிச்ச ஸப்³பே³ன ஸப்³ப³ங் அபரிஸேஸா லோகாமிஸஸங்கா²தா பஞ்சகாமகு³ணாமிஸா நிருஜ்ஜ²ந்தி. பஞ்சகாமகு³ணாமிஸாதி ச காமகு³ணாரம்மணச²ந்த³ராகா³, க³ஹணட்டே²ன தேயேவ ச உபாதா³னாதிபி வுத்தா. தமேவூபெக்க²ங் பா⁴வேதீதி தங் லோகாமிஸூபாதா³னானங் படிபக்க²பூ⁴தங் சதுத்த²ஜ்ஜா²னுபெக்க²மேவ வட்³டே⁴தி.
Bahudukkhā bahupāyāsāti diṭṭhadhammikasamparāyikehi dukkhehi bahudukkhā, upāyāsasaṃkilesehi bahupāyāsā. Yāyaṃ upekkhā nānattā nānattasitāti yā ayaṃ pañcakāmaguṇārammaṇavasena nānāsabhāvā, tāneva ca ārammaṇāni nissitattā ‘‘nānattasitā’’ti vuccati pañcakāmaguṇūpekkhā, taṃ abhinivajjetvā. Ekattā ekattasitāti catutthajjhānupekkhā, sā hi divasampi ekasmiṃ ārammaṇe uppajjanato ekasabhāvā, tadeva ekaṃ ārammaṇaṃ nissitattā ekattasitā nāma. Yattha sabbaso lokāmisūpādānā aparisesā nirujjhantīti yattha catutthajjhānupekkhāyaṃ yaṃ upekkhaṃ āgamma yaṃ paṭicca sabbena sabbaṃ aparisesā lokāmisasaṅkhātā pañcakāmaguṇāmisā nirujjhanti. Pañcakāmaguṇāmisāti ca kāmaguṇārammaṇachandarāgā, gahaṇaṭṭhena teyeva ca upādānātipi vuttā. Tamevūpekkhaṃ bhāvetīti taṃ lokāmisūpādānānaṃ paṭipakkhabhūtaṃ catutthajjhānupekkhameva vaḍḍheti.
43. உட்³டீ³யெய்யாதி உப்பதித்வா க³ச்செ²ய்ய. அனுபதித்வாதி அனுப³ந்தி⁴த்வா. விதச்செ²ய்யுந்தி முக²துண்ட³கேன ட³ங்ஸந்தா தச்செ²ய்யுங். விஸ்ஸஜ்ஜெய்யுந்தி மங்ஸபேஸிங் நகே²ஹி கட்³டி⁴த்வா பாதெய்யுங்.
43.Uḍḍīyeyyāti uppatitvā gaccheyya. Anupatitvāti anubandhitvā. Vitaccheyyunti mukhatuṇḍakena ḍaṃsantā taccheyyuṃ. Vissajjeyyunti maṃsapesiṃ nakhehi kaḍḍhitvā pāteyyuṃ.
47. யானங் வா போரிஸெய்யந்தி புரிஸானுச்ச²விகங் யானங். பவரமணிகுண்ட³லந்தி நானப்பகாரங் உத்தமமணிஞ்ச குண்ட³லஞ்ச. ஸானி ஹரந்தீதி அத்தனோ ப⁴ண்ட³கானி க³ண்ஹந்தி.
47.Yānaṃ vā poriseyyanti purisānucchavikaṃ yānaṃ. Pavaramaṇikuṇḍalanti nānappakāraṃ uttamamaṇiñca kuṇḍalañca. Sāni harantīti attano bhaṇḍakāni gaṇhanti.
48. ஸம்பன்னப²லந்தி மது⁴ரப²லங். உபபன்னப²லந்தி ப²லூபபன்னங் ப³ஹுப²லங்.
48.Sampannaphalanti madhuraphalaṃ. Upapannaphalanti phalūpapannaṃ bahuphalaṃ.
49. அனுத்தரந்தி உத்தமங் பப⁴ஸ்ஸரங் நிருபக்கிலேஸங்.
49.Anuttaranti uttamaṃ pabhassaraṃ nirupakkilesaṃ.
50. ஆரகா அஹங், ப⁴ந்தேதி பத²விதோ நப⁴ங் விய ஸமுத்³த³ஸ்ஸ ஓரிமதீரதோ பரதீரங் விய ச ஸுவிதூ³ரவிதூ³ரே அஹங். அனாஜானீயேதி கி³ஹிவோஹாரஸமுச்சே²த³னஸ்ஸ காரணங் அஜானநகே. ஆஜானீயபோ⁴ஜனந்தி காரணங் ஜானந்தேஹி பு⁴ஞ்ஜிதப்³ப³ங் போ⁴ஜனங். அனாஜானீயபோ⁴ஜனந்தி காரணங் அஜானந்தேஹி பு⁴ஞ்ஜிதப்³ப³ங் போ⁴ஜனங். ஸேஸங் ஸப்³ப³த்த² உத்தானமேவாதி.
50.Ārakā ahaṃ, bhanteti pathavito nabhaṃ viya samuddassa orimatīrato paratīraṃ viya ca suvidūravidūre ahaṃ. Anājānīyeti gihivohārasamucchedanassa kāraṇaṃ ajānanake. Ājānīyabhojananti kāraṇaṃ jānantehi bhuñjitabbaṃ bhojanaṃ. Anājānīyabhojananti kāraṇaṃ ajānantehi bhuñjitabbaṃ bhojanaṃ. Sesaṃ sabbattha uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
போதலியஸுத்தவண்ணனா நிட்டி²தா.
Potaliyasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 4. போதலியஸுத்தங் • 4. Potaliyasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 4. போதலியஸுத்தவண்ணனா • 4. Potaliyasuttavaṇṇanā
